Mekene 12

Iesu a Ini Së Troa Thith

HAPEU eö kö a hane ithanata koi Iehova Akötresie?— Aja i Nyidrë tro eö a ithanata koi Nyidrë. Ame la eö a ithanata koi Akötresie, tre, eö hi lai a thith. Hnei Iesu hna majemine troa ithanata kowe la Tretretro i nyidrë ekoho hnengödrai. Hnei nyidrëti hna thele troa lapa cas, e itre xa ijin, göi troa ithanata koi Akötresie. Öni Tusi Hmitrötr, ka hape: “Nyidëti a elëne la wete ga pa ate troa thith ; nge ömömë hë, nyidëti hmekuje kö e cili.”—Mataio 14:23.

E kaa la hnë tro eö a lapa casi göi troa thithi koi Iehova?— Maine jë ngöne la hnahage i eö, e jidr qëmekene tro eö a meköl. Hnei Iesu hna qaja ka hape: “E tro eö a thith, löju kowe la hnahage i ’ö, nge ase hë thinge la qëhnelö, thithiju kowe la Tetetro i ’ö.” (Mataio 6:6) Ka thithi lapa fe kö eö koi Iehova qëmekene tro eö a meköl e jidr?— Celë hi la aqane ujë ka loi lai.

Hnei Iesu mina fe hna thithi qëmekene la ka ala nyim. Ame lo kola meci hnei Lazaro sine i nyidrë, hnei Iesu hna thithi qëmekene  la nöjei atr ezine la hua i Lazaro. (Ioane 11:41, 42) Ketre, hnei Iesu hna thithi ngöne la nyidrëti a icasikeu memine la itretre drei nyidrë. Hane kö eö drenge la kola thithi ngöne la itre icasikeu?— Itre ka tru la ka thith. Drenge hnyawa ju la hna qaja, ke, thatraqai eö fe la angeic a thithi koi Akötresie. Ame hë la kola umuthe la thith, hawe, ijije fe tro eö a hane qaja ka hape, “Amen.” Atre hi eö la kepine lai?— Eö hi lai a amamane ka hape eö a kapa me madrine la thith, ke, maine eö ju hi lai ka thith, tro hi a ceitune la thithi epon.

Hnei Iesu mina fe hna thithi qëmekene troa xen, göi troa olene koi Iehova la xötrönë. Hapeu, hnei eö fe kö a hane thithi qëmekene troa xen?— Loi e tro pala hi a tro pane la ole së koi Iehova, nge thupene lai easë pë hë a xeni jë. Ame la eö a ce xeni memine la itre xan, hetre ka tro kö lai a thith. Ngo tune kaa ju hë e eö casi hi? Nge maine eö a ce xeni memine la itre xan nge tha olene kö angatre la xeni koi Iehova, nemene la nyine tro eö a kuca?— Eö pë hë a ketre thithi ju.

Hapeu, e thithi jë eö, tro pala hi eö a ithanata catr? Nge e traqa ju eö thithi hni ië, tro kö Iehova a drenge la thithi eö?— Drei la ewekë ka traqa koi Nehemia. Nehemia la ketre atr ka nyi hlue i Iehova nge ka huliwa ngöne la hna nyi joxu ne Peresi hnei Aretaseta. Ame ngöne la ketre ijin, kola kucakuca hnei Nehemia, ngöne la angeic a drenge ka hape, kei hë la traetë ne la traon e Ierusalema, lo nöje i angeic.

 Ame la kola hnyingëne la kepine lai hnene la joxu, ene pe canga thithi hni ië ju hi Nehemia. Thupene lai, hnei angeice hna qaja kowe la joxu la kepin la angeic a nango kucakuca; nge angeic a sipone jë koi nyidrë troa tro Ierusalema, matre troa xupe hmaca la traetë. Nemene ju hë la ewekë ka traqa?—

Hnei Akötresieti hna kapa la thithi Nehemia. Hnene la joxu hna aejëne la mekune i angeic. Hnei nyidrëti fe hna hamëne koi angeic la itre sinöe ka nyimutre, matre troa xupe hmaca la ihag. Kolo hi lai a anyipicine laka, Akötresieti a kapa la itre thithi së, ngacama itre thithi lai hna qaja thaupun.—Nehemia 1:2, 3; 2:4-8.

Tro pena sa ce ithanatane la ketre mekun. Tro kö eö a qe ipië ngöne la eö a thith? Maine troa sa watingöne ca pena? Tune kaa la mekuna i eö?— Ame lo itre ijine Iesu a thith, hetre ijine nyidrëti a sa watingöne ca, nge e itre xa ijin, nyidrëti a cil.  Nge ame lo ijine nyidrëti a thithi thatraqai Lazaro, hnei nyidrëti hna gala draië.

Kola hapeue lai?— Kola hape, e cile jë së troa thith, maine e sa watingöne ca ju pena, maine itre xa aqane tro fë thithi ju kö, tha itre pengöne cili kö la ka nyipi ewekë catr. Ame e itre xa ijin, e tro sa thith, thili ju hi nge meeke ju. Nge e tro sa pi tui Iesu, nemene la engazon e tro sa sa watingöne ca. Ngo the thëthëhmine kö eö, laka, ijije hi tro sa thithi koi Akötresie ngöne la nöjei ijin, e lai me jidr, nge Nyidrëti a drei së. Ame la ka nyipi ewekë ngöne la easa thith, tre, ene la troa lapaune laka Iehova a drei së. Hapeu, eö kö a lapaune laka Iehova a drenge la itre thithi eö?—

Nemene la nyine tro sa qaja ngöne la itre thithi së?— Nemene la hnei eö hna qaja koi Iehova?— Nyimu ewekë ka loi hnei Iehova hna hamëne koi së, haawe, loi e tro fe sa hane olene koi Nyidrë; tune kaa la hnei eö hna mekun?— Maine jë tro sa olene la xen. Ngo hane kö eö mekune troa olene koi Nyidrë, la hnengödrai e kola bulu, me itre sinöe me itre iengen ka mingöming?— Iehova hi la Atre Xupe itre ej.

Ame ngöne la ketre ijin, hnene la itretre drenge hna sipo Iesu troa ini angatre thith. Haawe, celë hi hna kuca lai hnene la Atre Hamë Ini Ka Sisitria; nyidrëti a qaja koi angatr la itre ka nyipi ewekë nyine tro sa sipone ngöne la thith. Atre hi eö la itre ewekë cili?— Fe jë la Tusi Hmitrötre i eö, ngöne Mataio mekene 6. Qa ngöne la xötre 9 koi xötre 13, eje e cili lo thithi hna hëne hnene la itre atr, ka hape, “Tretretro Hun.” Tro sa ce e.

Kola amamane hnyawa hnene la itre xötre cili, laka, Iesu a pane thithi thatraqane  la atresiwa i Akötresie, göi troa ahmitrötrëne ej. Troa ahmitrötrën, kola hape, troa goeëne la ketre ewekë ceitu me ka hmitrötr, maine ka wië pena. Drei la ëje i Akötresie?— Iehova, nge loi e tro sa hetre aja kowe la ëje cili.

Ame la hnaaluen, tre, Iesu a ini së troa thithi thatraqane la Baselaia i Akötresie, matre hlepëti eje kowe la fen. Ka nyipi ewekë catre la Baselaia celë, ke, tro eje a acile la tingeting, me aparadraisone la ihnadro.

Ame la hnakönin, kola thithi hnene la Atre Hamë Ini Ka Sisitria, matre troa eje la aja i Akötresie e celë fen, tune e hnengödrai. Maine easa thithi matre troa eje la ewekë cili, haawe, nyipi ewekë fe tro sa kuca la hnei Akötresieti hna thele the së.

Thupene lai, Iesu a upi së troa thithi matre troa hetrenyi la xötrönë thatraqane la nöjei ijin. Hnei nyidrëti fe hna qaja koi së, ka hape, maine hne së hna kuca la itre ewekë ka ngazo, haawe, loi e tro sa qeje menu koi Akötresie. Nge loi e tro mina fe sa sipo Nyidrë tro nue la itre ngazo së. Ngo eje hi laka, tro hë Nyidrëti a nue la itre ngazo së, e hne së hna pane nue la ngazo ne la itre xa atr. Hapeu, tha jole kö koi eö troa nue la ngazo i ketre?—

Ame ngöne la pune la thithi cili, Iesu a upi së troa sipo Akötresie matre tro Nyidrëti a thupë së qaathene la atr ka ngazo, ene Satana Diabolo. Celë hi itre xa ewekë lai nyine tro sa thithi fë koi Akötresie.

Loi e troa xecie e kuhu hni së, laka, Iehova a drenge la itre thithi së. Ijije hi tro sa sipo ixatua qaathei Nyidrë, ngo the thëthëhmine kö së troa hane olene fe koi Nyidrë la nöjei ewekë asë. Maine easa mekune hnyawa la itre ewekë hne së hna sipone koi Nyidrë, nge maine itre ewekë lai ka lolo xajawa i Nyidrë, hawe, tro hë Akötresieti a drenge la itre thithi së cili cememine la madrin. Nge tro hë Nyidrëti lai a hamëne koi së la itre ewekë cili. Hapeu, lapaune fe kö eö kowe la ewekë cili?—

Maine kola aja itre xa ithuemacany ka lolo göne la thith, e jë la Roma 12:12; 1 Peteru 3:12; me 1 Ioane 5:14.

[Iatr ne la götran 67]

Hnei Iesu hna thithi ngöne la nyidrëti cas . . . nge qëmekene mina fe la ka ala nyim

[Iatr ne la götran 68]

Pine nemene matre loi e tro eö a drenge hnyawa la kola thithi ngöne la itre icasikeu?

[Iatr ne la götran 69]

Eue la tro eö a thithi thaup, tui Nehemia?

[Iatr ne la götran 70]

Nemene la itre xa ewekë nyine tro eö a thithi fë koi Akötresie?