Mekene 15

Ini Göi Troa Hni Ka Loi

ATRE fe hi eö la aliene la troa iwangatrehmekunyi atr?— Tha kolo hmekuje kö a qaja la ketre atr ka xele ma wang la ketre, pine laka isapengöi nyidroti kö, nge tha ceitune kö la qene hlapa i nyidro. Ngo kolo mina fe a qaja la ketre atr ka jele ngazone la ketre, ngo thatre pengö angeice pe.

Hapeue la mekuna i eö, ka loi kö la troa xele ma wange la ketre atr nge tha hne së kö hna atrepengöi angeice hnyawa, maine hnene pena laka isapengöi angeice kö me easë?— Ohea, tha aqane ujë ka loi kö la troa iwangatrehmekunyi atr. Tha tro pi kö sa xele ma wang la itre atr, ngacama isapengöi angatre kö me easë.

Atre fe hi eö la ketre atr ka tha ce hane ngönetrei kö me eö, maine ka isa qene hlapa kö me eö?— Ame la itre xa atr, hna hetre ethanyi angatre hnei kucakuca maine hna eatre pena. Hapeu, ka menyike kö la thiina i eö, nge hnei eö fe kö hna hane hnime la itre atr ka tha ceitu kö me eö?—

Maine tro sa drengethenge Iesu Keriso lo Atre Hamë Ini Ka Sisitria, hawe, tro ha menyike la thiina së kowe la nöjei atr asë. The goeëne kö la nöje me hane ngönetrei ne lai atr. Loi pe troa thiina ka menyik. Ngacama ketre mekune lai hna thipetrije hnene la ka ala nyim, ngo ketre ini lai hna hamëne hnei Iesu. Tro sa pane ce ithanatane lai.

Hnene la ketre atre Iudra ka iwangatrehmekunyi atr hna traqa me hnyinge koi Iesu ka hape, ‘Nemene la nyine tro ni a kuca matre troa hetrenyi la mele ka tha ase palua kö?’ Atre hnyawa hi Iesu la mekuna ne lai atr, nge angeice a thele tro hi Iesu a qaja koi angeice ka hape, tro hi a menyike thiina hmekuj kowe la itre atr ka ceitu la hane ikupeine me angeic, me itre atrene la nöje i angeic. Ngo tha hnei Iesu kö hna sa mekötine la hnyinge i angeic; hnei nyidrëti pe hna qaja ka hape, ‘Nemene la hna upi ’ö troa kuca hnene la Wathebo i Akötresie?’

 Öni angeic e sa ka hape: ‘Tro eö a aja Iehova Akötresi ’ö hnene la hni ’ö ka pexej, me hnime la atre lapa easenyi ’ö tui eö hi.’ Iesu a sa ju me hape: ‘Meköti la hnei ’ö hna sa. Kuca jë lai, nge tro eö a mel.’

Ngo tha ajane kö la atre Iudra troa menyike thiina kowe la itre atr ka tha ceitu kö me angeic. Celë hi matre angeice a thele kepine ju troa he la mekuna i angeic. Öni angeic e hnyinge koi Iesu ka hape: “Dei la ate eashenyi ni ?” Maine jë angeic a ajane tro Iesu a sa koi angeic ka hape: “Ame la itretre lapa easenyi ’ö, tre, kolo itre sinee i ’ö,” maine pena, “Angatre lo itre ka tui ’ö.” Celë hi matre Iesu a edromëne ju koi angeice lo pengöne lo atre Iudra me atre Samaria. Drenge hnyawa ju.

Hetrenyi la ketre atre Iudra ka uti qa Ierusalema a tro Ieriko eë. Ngo ame ju hi e cahu gojeny, hna xolouthi angeice hnene la itre atrekënö. Angatre pë hë a lepi angeice jë, me xome la manie i angeic me itre ihetre i angeic. Hnei angatre fe hna jei angeic, me nuetrije menu angeice pë hë e kuhu gojeny, ceitu me atr ka mec.

Tha qea ju kö nge fetra pi hi ngöne la gojenyi cili la atre huuj. Kolo hi a goeëne la atr hna lepe angazon. Maine eö ju, tro hë eö a kuci nemen?— Ame la atre huuj, tre, hnei angeice hna tro meköt; tha pane cile kö troa xatuane la atr cili.

 Thupene lai, kolo pena a xulu hnene la ketre atr ka hmi. Ketre atre Levi ka nyi hlue e hnine la ēnē e Ierusalema. Hapeu, tro jë kö angeice a cile troa ixatua?— Ohea. Casi hi la pengöi angeice memine lo atre huuj.

Fetra jë pena hi la atre Samaria. Öhne hi eö lai angeice a fetra e caha ga sisa qali?— Öhne ju hi angeice lai atre Iudra hna lepe apujen. Mekune hi së lo pengöi angetre Iudra me angetre Samaria, ka imethinë catre angatr. (Ioane 4:9) Matre hapeu, tro jë kö la atre Samaria a tro thingitröne la atre Iudra? Maine jë tro angeic a qaja ka hape: ‘Hnauëne pena la tro ni a xatuane la atre Iudra celë? Nge maine eni ju fe lai ka eatr, tro jë fe kö angeice lai a hane xatua ni’?

Ngo ame ju hi la kola goeëne hnene la atre Samaria la atr ka meköl e cahu gojeny, traqa ju hi la utipine koi angeic. Thatreine kö tro angeice a tro  trije me nue troa meci la atre cili. Haawe, angeice a sesë uti pi troa wange lai trahmany, me nyiqaane nyihnyawa angeic. Hnene la atre Samaria hna nei wakacu me waina hune la itre eatre i angeic, matre canga meu ju itre ej. Angeice a zezene pi la ketre sine imano nyine troa othe la itre eatre ne la atre Iudra.

Hnene la atre Samaria hna xepi angeic, me ati angeice hnyawa hune la öni. Thupene lai, nyidroti jë a nango ce tro, uti hë la traqa nyidro ngöne la ketre hnë meköl. Ame e cili, hnene la atre Samaria hna xome la ketre hnahag matre troa amekölen la atre Iudra, me nyinyine la itre eatre i angeic.

Ase jë hi Iesu qaja la edromë cili, nyidrëti a hnyingëne ju kowe la thupëtresij ka hape: ‘Drei e angatre ala köni la atre lapa easenyine lai atr ka eatr?’ Ame koi eö, ke drei? Hapeu, kolo atre huuj, maine lo atre Levi, maine pena lo atre Samaria?—

Hnene la thupëtresij hna sa ka hape: ‘Angeice hi lo atre cile troa kuca hnyawane lo lai atr ka eatr.’ Öni Iesu ka hape: ‘Eje hi lai. Tro jë eö a kuca tune lai.’—Luka 10:25-37.

Hane petre hi la ketre edromë ka lolo catr! Eje a qeje pengöne hnyawa koi së, ka hape, drei la atre lapa easenyi së. Tha kolo hmekuje kö lo itre sinee së. Ketre, tha kolo mina fe kö lo itre atr ka tu së, maine pena lo itre ka ithanatane la qene hlapa së.  Hnei Iesu hna ini së troa thiina ka menyike kowe la nöjei atr asë, ngacama ka xulu ju hë angatr qa ngöne la ketre nöj, maine isapengöi angatr me easë, maine pena ka ithanatane angatr la ketre qene hlapa kö.

Ame Iehova Akötresie, tre, ka tui Nyidrëti fe lai. Tha ka iwangatrehmekunyi atre kö Nyidrë. Hnei Iesu hna qaja ka hape: ‘Ame la Tretretro i nyipunieti e koho hnengödrai, tre, Nyidrëti a axulune la jö i Nyidrë hune la nöjei ka ngazo me ka loi, me upe la manie kowe la nöjei ka meköti me ka tha meköti kö.’ Qa ngöne lai, catre pi së troa nyitipu Akötresie, ene la troa hni ka menyike kowe la nöjei atr asë.—Mataio 5:44-48.

Hawe, pane mekune jë ka hape, traqa ju hi eö a öhne la ketre atr a eatr, tro ju hë eö a kuci nemen?— Ngacama trehnyiwa angeic, maine tha ka ceitu kö me eö la han ne ngönetrei angeic, tro jë eö a ujë tune kaa? The thëthëhmine kö laka, angeice hi lo lai atre lapa easenyi eö, nge hnëqa i eö troa xatua angeic. Maine nekönatre ka co pala kö eö, sipo ixatua jë kowe la ketre atr ka tru. Maine pena, hë polisi jë maine ketre atr ka hamë ini. Maine tro eö a ujë tune lai, haawe, eö hi lai a xötrethenge la tulu ne lo atre Samaria.

Kola ajane hnene la Atre Hamë Ini Ka Sisitria tro sa thiina ka menyik, me catre troa xatuane la nöjei pengöne atr asë. Celë hi kepin matre hnei nyidrëti hna qaja la edromë ne lo atre Samaria ka hni ka menyik.

Ka nyipi ewekë catre la troa hni ka menyik kowe la nöjei atr asë, ngacama isapengöne ju hë la hane ne ngönetrei me nöje i angatr, tune la hna qaja ngöne Ite Edomë 19:22; Itre Huliwa 10:34, 35; me 17:26.

[Iatr ne la götran 83]

Tro sa ujë tune kaa kowe la itre atr ka isapengöne kö me easë?

[Iatr ne la götran 85]

Hnauëne laka ijiji së jë troa qaja ka hape, atre Samaria la atre lapa easenyine lo lai atr ka eatr?

[Iatr ne la götran 86]

Tro sa amamane tune kaa laka, easë la atre lapa easenyine la ketre atr?