Mekene 11

Itre Angela i Akötresie a Xatua Së

ITRE xa atr a lapaune kowe la itre ewekë hnei angatre hna öhn. Ngo ka qene hmo lai. Ke, nyimutre catre hnei ewekë ka ej, ngacama tha hna öhne kö itre eje hnei lue mek. Atreine hi eö qaja la ketre?—

Pane mekune ju hi së la enyi hne së hna manon, hne së hna atre tune kaa ka hape, hetre eny?— Ufe ju la iwanakoime i eö, hetre hnei eö kö hna dreng?— Öhne kö eö lai enyi hnei eö hna manon?—

Atre hë së lo laka ame lo itre ua, tre, tha hna öhne kö hnei lue meke i atr. Atre hi së laka, hetre ka loi, nge hetre ka ngazo. Pane qaja jë la itre ua ka lolo.— Iehova Akötresie, me Iesu me itre xa angela ka lolo. Hapeu, hetre angela ka ngazo fe kö?— Kola qaja hnei Tusi Hmitrötr, ka hape, eje hi. Nemene la pengö i angatr, tune la hnei eö hna inin?—

Atre hnyawa hi së laka, tru catre kö la trenge catre ne la itre angela ka loi me ka ngazo hu së. Atre hnyawa hi la Atre Hamë Ini Ka Sisitria la pengöne la itre angela. Ke, ketre angela nyidrë qëmekene troa hnaho nyidrëti e celë fen. Hnei nyidrëti hna ce mele memine la itre angela e koho hnengödrai, nge traqa koi itre milio lao angela hnei nyidrëti hna atre. Isa hetre ëje i angatre asë kö?—

Atre hi së lo laka, hnei Akötresieti hna ati ëjene lo itre wëtresij. Haawe, tro fe hi lai a xecie koi së laka, hnei Nyidrëti fe hna ati ëjene la itre angela. Ketre, ka ithanata fe la itre angela, ke, kola qaja hnei Tusi Hmitrötr la ‘aqane ewekë ne la itre angela.’ (1 Korinito 13:1) Matre, nemene la hnei angatre hna ithanatan? Hapeu, angatre kö a hane qeje së, itre ka mele e celë fen?—

Atre mina fe së laka, aja ne la itre angela i Satana, ene lo itre dremoni, troa ajojezi së me iaö së matre tha tro kö sa drengethenge Iehova. Qa ngöne  lai, angatre pala hi a ithanatane la aqane tro angatr a kuca la ewekë cili. Angatr a ajane tro sa ujë tui angatr, matre tro Iehova a nuetriji së. Ngo tune  kaa la itre angela ka mele nyipici koi Akötresie? Hapeu, angatre fe kö a hane qeje së?— Eje hi. Angatr a ajane troa xatua së. Hanawange la hna kuca hnene la itre xa angela i Akötresie, matre troa xatuane la itre atr ka hnimi Iehova me ka nyi hlue i Nyidrë.

Daniela la ketre, ka mele ekö e Babulona. Nyimutre la itre atr e cili ka thipetriji Iehova. Hnei angatre mina fe hna acile la ketre wathebo, me hape, tha tro kö la ketre atr a thithi koi Iehova Akötresie. Ngo hnei Daniela pala hi hna thithi koi Iehova. Atre fe hi eö la hnei angatre hna kuca koi angeic?—

Hnene la itre atr ka ngazo hna kuië Daniela e hnine la ope liona. Ame e cili, Daniela casi hi memine la itre liona ka pi öni me ka mecijin. Atre fe hi eö la ewekë ka traqa e thupen?— Öni Daniela, ka hape, “Hnei Akötesingö hna upe la angela i nyidë, me ahumune la ite qe ite  liona.” Goi pë fe ca eatre i Daniela! Nyipici, ijije hi tro la itre angela a kuca la itre ewekë ka lolo, matre troa xatuane la itre hlue i Iehova.—Daniela 6:18-22.

Tro pena sa ce wange la ewekë ka traqa koi Peteru e hnine la kalabus. Mekune ju eö lo pengöi Peteru, ene lo enehmu i Iesu Keriso lo Atre Hamë Ini Ka Sisitria. Pine laka xele kö la itre atr ma kapa la hna qaja hnei Peteru göi Iesu, lo ka hape Hupuna i Akötresieti nyidrë, angatre pë hë a akalabusi angeice ju. Hna thupëne hnyawa la kalabus, matre pëkö jëne kötre i Peteru. Drei jë la ka atreine troa xatua angeic?—

Hna ceinën la lue ime i Peteru, nge angeic a meköle nyipine la lue soc. Ngo kola qaja hnei Tusi Hmitrötr, ka hape: ‘Hanawange! Kola cile la  angela i Iehova, nge kola wië la lai e hnine la kalabus. Hnene la angela hna ketri Peteru me ahlë angeic, me hape, “Canga cilejë!” ’

Ame ju hi e cili, uke pi hi lo icein qa ngöne la lue ime i Peteru! Nge önine jë hi la angela koi angeic, ka hape: ‘Xetrëne jë la ixetre i eö, nge line ju la lue butre i eö, nge xötre thenge ni jë.’ Pine laka hna xatua Peteru hnene la ketre angela, haawe, thatreine kö troa sewe nyidro hnene la itre soc. Traqa ha nyidro kowe la iqëhnelö fao, nge ame e cili, hetrenyi la ketre ewekë ka traqa. Thawa xanëne pi hi la qëhnelö koi nyidro! Ene pe thepe Peteru ju hi hnene la angela qa hnine la kalabus, matre tro hmaca kö angeic a catre cainöj.—Itre Huliwa 12:3-11.

Tune kaa la mekuna i eö, ijije kö troa hane xatua së hnene la itre angela?— Eje hi, ijiji angatre hi. Ngo hapeu, kolo lai a hape, tro pala hi angatr a thepe së, me thupëne matre tha tro kö sa eatr?— Ohea, tha tro kö a xatua së hnene la itre angela, e hne së hna sipu thele eatr. Ketre, ngacama ka hmeke ju hë së, ngo ijije hi ngöne la ketre ijine tro sa hane eatr. Tha hnei Akötresieti kö hna upe la itre angela troa thupe së tune lai. Ngo hetre ketre huliwa kö ka ketre pengöne hnei Nyidrëti hna upi angatr troa kuca.

Hnene la Tusi Hmitrötre hna qaja, ka hape, hnene la ketre angela hna hëne la nöjei atr asë troa thili koi Akötresie. (Hna Amaman 14:6, 7) Hnei angeice hna hë tune kaa? Hapeu, hnei angeice kö hna sue qa hnengödrai, matre drenge ju hnene la nöjei atr e cailo fen?— Ohea. Hnene lo itretre drei Iesu e cailo fen hna qeje Akötresie, nge itre angela a xatua angatr. Kola thele hnene la itre angela matre troa drenge la maca cili hnene la nöjei atr ka ajane troa atre Akötresie. Ijiji së mina fe troa hane xome la huliwa ne cainöje cili, me hane kapa la ixatua qaathene la itre angela.

Ngo tune kaa, e kola akötrë së hnene la itre atr ka thipetriji Akötresie? Nge tune kaa fe, e akalabusi së jë? Hapeu, tro kö a thepe së hnene la itre angela?— Eje hi, atreine hi angatre lai. Ngo tha tro kö sa mekune ka hape, tro pala hi angatr a thepe së.

Paulo la ketre atre drei Iesu hna akalabusine hnine la ketre he. Ngazo pe, traqa ju hi la janacas kowe la he cili. Maine ju tro hi la itre angela a thepe angeic, ngo ame pe, tha hnei angatre kö hna ujë tun, ke, hetrenyi e hnine  la he cili la itre atr ka ajane troa atrepengöi Akötresie. Önine la ketre angela, ka hape: “Paulo fe, the xou kö; tro pala hi eö a cile qëmeke i Kaisara.” Haawe, nyipi ewekë tro Paulo a cile qëmeke i Kaisara, matre troa cainöje koi nyidrë. Atre asë hi la itre angela la itre jëne tronge i Paulo, nge angatre pala hi a xatua angeic. Ketre tu së mina fe, laka, tro angatr a hane xatua së, e hne së hna catre nyi hlue i Akötresieti hnyawa.—Itre Huliwa 27:23-25.

Easenyi hë matre kuca jë la itre angela la ketre huliwa ka nyipi ewekë catr. Tha hmitre kö matre apatrene pi Akötresieti la nöjei atr ka ngazo, ene lo itre atr ka tha hane kö thili koi Nyidrë. Ame la itre atr ka mekune ka hape, tha ka mele kö la itre angela ke tha öhnyi angatre kö hne së, tre, ketre tro kö angatr elanyi lai a sipu öhne laka, ka tria catre la mekune i angatr.—2 Thesalonika 1:6-8.

Nge tune kaa fe së ngöne la ijine cili?— Maine ka ce xöle së memine la itre angela i Akötresie, haawe, tro ha xatua së hnei angatr. Ngo hapeu, easë kö a ce xöle me angatr?— Eje hi, e ka nyi hlue i Iehova së. Nge e itre atr ka nyi hlue i Iehova ha së, hawe, catre pi hë së xatuane la itre atr matre hane jë fe angatre nyi hlue i Nyidrë.

Maine kola aja ithuemacanyi göne la aqane xatuane la itre atr hnene la itre angela, haawe, e jë la Salamo 34:7; Mataio 4:11; 18:10; Luka 22:43; me Itre Huliwa 8:26-31.

[Iatr ne la götran 63]

Nemene la hnei Akötresieti hna kuca matre mele pi Daniela?

[Iatr ne la götran 64]

Hnene la ketre angela hna thepe Peteru tune kaa qa hnine la kalabus?

[Iatr ne la götran 66]

Nemene la hna qaja hnene la angela koi Paulo?