Mekene 8

Itre Hna Xupe Ka Sisitria Kö Hu Së

HETRE itre ka tru trenge catre nge ka draië catre kö hu së. Drei la ketre e angatr?— Iehova Akötresie. Nge ame lo Hupuna i Nyidrëti ka Hamë Ini Ka Sisitria; nemene fe la pengö i nyidrë? Ka draië fe kö nyidrë?— Eje hi.

Ka mele Iesu ekö thei Akötresie e koho hnengödrai. Ua nge ketre angela nyidrë. Hapeu, hetre itre xa ua kö maine angela hnei Akötresieti hna xup?— Eje hi, itre milio la etrun. Ka draië catre fe angatr nge ka tru trenge catre kö hu së.—Salamo 104:4; Daniela 7:10.

Atre fe hi eö lo ëje ne la angela ka ithanata koi Maria?— Gaberiela la ëje i angeic. Hnei angeice hna ahnithe koi Maria ka hape, tro eahlo a hnahone la Hupuna i Akötresie. Thupene lai, hnei Akötresieti hna ami Iesu e hnine la trengene hnaho i Maria, matre troa mala nyidrë e celë fen.—Luka 1:26, 27.

Mejiune kö eö kowe la iamamanyikeu cili? Ka xecie kö e kuhu hni eö laka, hnei Iesu hna ce mele me Akötresie e koho hnengödrai?— Celë hi la hnei Iesu hna qaja. Ngo hnei nyidrë hna atre tune kaa la itre ewekë cili? Ame ngöne lo nyidrëti a co, maine jë hnei Maria hna amexeje hmaca lo itre trenge ewekë i Gaberiela lo angela. Ketre, maine jë hnei Iosefa mina fe hna qaja koi nyidrë, ka hape, Akötresieti hi la sipu Keme i nyidrë.

Ame ngöne lo kola bapataiso Iesu, hnei Akötresieti hna qaja qa hnengödrai, ka hape: “Drei la Neköng.” (Mataio 3:17) Ketre, qëmekene tro Iesu a  mec, hnei nyidrëti hna thith, me hape: “Tetetroti fe, atrunyi ni jë ce me cilie hnene la lolo thei nyisho, nge pate pete kö la fene hnengödrai.” (Ioane 17:5) Iesu hi lai a sipone koi Akötresie troa bëeke hmaca hnengödrai eë. Ngo ijije kö tro nyidrëti a bëeke hmaca hnengödrai eë?— Ijije hi, ngo hetre ketre ewekë nyine tro Iehova Akötresieti a kuca, matre bëeke hmaca jë Iesu troa nyi angela maine ketre ua.

Ame enehila, eni a pi hnyingë eö la ketre ewekë ka sisitria: Tune kaa la itre angela, itre ka loi asë hi angatr? Tune kaa la mekuna i eö?— Kola mama ekö qa, laka ka loi asë hi la itre angela. Tha sesëkötre kö së, pine laka hna xupi angatre asë hi hnei Iehova, nge ka loi asë hi la itre hnei Nyidrëti hna kuca. Ngo ame ju hi la ketre ijin, hnene la ketre angela hna kuca la ewekë ka ngazo. Hna traqa tune kaa lai?

Tro së a sa la hnyinge cili me bëeke hmaca ngöne lo ijine Akötresieti a xupe lo lue pane atr, ene Adamu me Eva. Ala nyimu la angetre qaja ka hape, trenga thoi la edromë cili. Ngo ame kowe la Atre Hamë Ini Ka Sisitria, tre, trenge nyipici hi lai.

Ame la Akötresieti a xupi Adamu me Eva, hnei Nyidrëti hna ami nyidro ngöne la ketre hlapa ka mingöming, Edena la ëjen. Kolo paradraiso ekö. Hna aijijë nyidro troa mana me hatr, me eköthe la ketre lapa ka cahae, matre mele epine palua hnine la Paradraiso. Ngo ame pe, tha tro pi kö nyidroti a thëthëhmine la ketre ini ka tru. Hne së hë lo hna ce ithanatane la ini cili. Ngo pane ce wange hmaca jë pe së lai.

 Hnei Iehova hna qaja koi Adamu me Eva ka hape, ijiji nyidroti hi troa a xeni wen la nöjei sinöe asë ka eje e hnine la hlapa. Ngo casi pe hi la sinöe hna tha troa xeni wen. Ase hë Akötresieti hmekë nyidro la ewekë ka troa traqa, e tro nyidroti a xeni wen qa ngöne la sinöe cili. Öni Nyidrëti koi Adamu: “Tro eö a mec.” (Genese 2:17) Haawe, nemene hë la ini koi Adamu me Eva?—

Ame la ini cili, tre, ene la troa drengethenge. Eje hi, maine Adamu me Eva a ajane troa mel, nyipi ewekë tro nyidroti a drengethenge Iehova Akötresie! Tha ngöne hmekuje kö la nyidroti a qaja ka hape tro nyidroti a drengethenge ngo troa mama mina fe ngöne la itre hnei nyidroti hna kuca. Maine tro nyidroti a drengethenge Akötresie, nyidroti hi lai amamane la ihnimi nyidro koi Nyidrëti, me nue Nyidrëti troa Musinëne la mele i nyidro. Eje hi lai laka, tro hë nyidroti a mele epine palua e hnine la Paradraiso. Ngo e xeni ju nyidro la wene ne la isinöe hna wathebon, nemene la hnei nyidroti hna amaman?—

Tro ha mama laka, pëkö hni ne ole i nyidro kowe la itre ewekë hna hamëne hnei Akötresie. Maine eö ju fe, tro kö eö a drengethenge Iehova?— Ame ngöne lo xötrei, hnei Adamu me Eva hna drengethenge. Ngo thupene ju hi lai, hna amenu Eva hnene la ketre xupuana i Akötresie ka draië. Hnei angeice hna uku Eva troa xele ma drei Iehova. Drei lai ka iamenu?—

 Tusi Hmitrötr a qaja ka hape, hna ithanata la ketre une koi Eva. Ngo atre asë hi së laka, tha ka ithanata kö la un. Haawe, hnauëne hö laka qaja jë ka hape, hna ithanata la un?— Hnene la ketre angela hna löthe la une troa ithanata koi Eva. Matre tha une kö, ngo angela la ka ithanata. Hnei angeice hna nyiqaane akökötrene e kuhu hni angeice la itre mekune ka ngazo. Ame la aja i angeic, tre, tro Adamu me Eva a thili koi angeic. Angeice mina fe a ajane tro nyidroti a drengethenge angeic. Eje hi, ame la sipu aja ne la angela cili, tre, ene la troa thapa la göhnë i Akötresie.

Hnene la angela ka ngazo cili hna akökötrene la itre mekune ka ngazo e kuhu hni Eva. Hnei angeice hna nyi jëne la un, me qaja koi Eva, ka hape: ‘Tha Akötresieti fe kö a qaja la nyipici. Maine tro epon a xeni wen la sinöe celë, tre, tha tro pi fe kö epon a mec. Ngo tro pe epon a tui Akötresie.’ Hapeu, tro kö eö a hane drenge la hna qaja hnene lai un?—

Hnei Eva hna nyiqaane piin la ifekë ewekën. Hnei angeice hna xeni wen qa ngöne lo sinöe hna wathebon. Thupene lai, hnei angeice hna hamëne pena koi Adamu. Tha hnei Adamu kö hna jele nyipicine la un. Ngo pine laka ka tru hë Eva e kuhu hni angeic hui Iehova, haawe, hane jë fe hi angeic xeni la wene sinöe.—Genese 3:1-6; 1 Timoteo 2:14.

Nemene ju hë la pune lai?— Patre pi hi la mele ka pexeje thei Adamu me Eva, nge qatre trootro pi hi nyidro me mec. Haawe, tro fe ha  tune kowe la itre nekö i nyidro, laka, tro fe nyudreni a hane qatre trootro me mec. Eje hnyawa ju hi lo hnei Akötresieti hna qaja, laka, troa mele la atr e troa drengethenge Nyidrë. (Roma 5:12) Tusi Hmitrötre a qaja koi së ka hape, Satana lo Diabolo la ëjene lo angela ka thoi koi Eva, nge ame pë hë lo itre xa angela ka ngazo, tre, hna hë angatre ka hape, itre dremoni.—Iakobo 2:19; Hna Amaman 12:9.

Ngo trotrohnine hë eö la kepine matre ngazo pi la angela i Akötresie, ngacama ka lolo hi angeice ekö?— Hnene hi la itre mekune ka ngazo hna jilapa ngöne la hni angeic. Hnei angeice hna thele troa pi Draië Hune la itre xan. Drenge hi angeice lo Akötresieti a upi Adamu me Eva troa hnaho, ene pe cia jë hi e kuhu hni angeice la ajane tro la itre atr asë e celë fen a thili koi angeic. Ame la aja i Diabolo, tre, tha tro hmaca kö la itre atr asë a drengethenge Iehova. Haawe, angeice a thele jë tro la itre mekune ka ngazo a jilapa ngöne la itre he së.—Iakobo 1:13-15.

Öni angeice ka hape, pëkö atr ka nyipi hnimi Iehova. Angeice mina fe a qaja ka hape, ame nyiso, lue ka pë ihnimin koi Akötresie, nge ka xele ma kuca la hnei Nyidrëti hna qaja. Angeice fe a qaja ka hape, easë hi a drei Akötresie ngöne la itre drai ka loi. Hapeu, nyipici angeice kö? Nge tune kaa së, nyipici kö la hnei angeice hna qaja?

Kola qaja hnene la Atre Hamë Ini Ka Sisitria ka hape, ka sili trenga thoi lae Diabolo! Hnei Iesu hna amamane la ihnimi nyidrë koi Iehova ngöne la nyidrëti a drengethenge la Tretretro i nyidrë. Tha hnei Iesu hmekuje kö hna drengethenge ngöne la itre ijine loi. Hnei nyidrëti pala hi hna drengethenge, ngacama kola ajolë nyidrë hnene la itre xan troa drei Akötresie. Pine laka hnei nyidrëti hna drengethenge uti hë la mec haawe, hnei Iehova hna amele nyidrë hmaca, me hamëne la mele ka tha ase palua kö.

Matre, nemene la hnei eö hna mekun, drei la sipu ithupëjia me easë?— Eje hi, Satana lo Diabolo. Öhnyi angeice kö hnei eö?— Ohea! Ngo atre hi së ka hape, ka mele Satana, nge ka tru trenge catrene kö hu së. Ngo ame pe, drei la ka tru trenge catrene kö hui Diabolo?— Iehova Akötresie. Haawe ka xecie hnyawa koi së, laka, tro Nyidrëti a thupë së.

E jë la itre xötre celë ka qeje pengöne la Atr nyine tro hmekuje hi sa thili kow: Deuteronomi 30:19, 20; Iosua 24:14, 15; Ite Edomë 27:11; me Mataio 4:10.

[Iatr ne la götran 47]

Nemene jë la hnei Maria me Iosefa hna qaja koi Iesu?

[Iatr ne la götran 48]

Hapeu, ijije kö troa hane mele epine palua hnei Adamu me Eva ngöne la Paradraiso?

[Iatr ne la götran 50]

Drei lo ka löthe la un troa ithanata koi Eva?

[Iatr ne la götran 50]

Nemene la ewekë ka traqa koi Adamu me Eva thupene la hnei nyidroti hna tha drei Akötresie?