Mekene 41

Itre Nekönatr Ka Amadrinë Akötresie

AME thene la itre nekönatre hnei eö hna atre ka mele hë ekö e celë fen, drei e angatre la ka amadrinëne la hni Iehova?— Iesu lo Hupuna i Nyidrë. Tro sa pane ce wange la aqane amadrinëne nyidrë la Tretretro i nyidrëti e hnengödrai.

Hna hetru Iesu hnene la keme me thine i nyidrë ngöne la ketre götrane ka nango nanyi pi hë qa Ierusalema, ke köni drai ne troa trongë ihnadro, nge e cili hi lo ēnē i Iehova. Hnei Iesu hna hëne la ēnē cili ka hape, “uma i Kaka.” Nge e nöjei macatre, hnei Iesu pala hi memine la hnepe lapa i nyidrë hna tro Ierusalema eë troa atrune la Paseka.

Ame ngöne la ketre ijin, Iesu petre hi a truelof lao macatre, kola bëeke hmaca hnene la hnepe lapa i nyidrë qa hna atrune la Paseka. E nyipine hë la gojeny, angatr a pane mano ju, ke jidri hë, ame hnei Iosefa me Maria hna wangatrehmekun, laka patre pë hë Iesu. Ketre patre kö nyidrë thene lo itre xa atrene la hnepe lapa, me thene lo itre sinee i nyidro. Nyidro a hnehengazo, me bëeke hmaca ju Ierusalema eë troa thele Iesu. Ame jë koi eö, ekaa nyidrë?—

Traqa ha nyidro a öhnyi Iesu hnine la ēnē. Nyidrëti a drenge lo itre atr ka hamë ini, me hnyinge me sa la itre hnyinge i angatr. Angatr a haine la aqane lolon la itre mekune hnei nyidrëti hna hamën. Hapeu, trotrohnine hi eö lai kepine matre atraqatre la madrine i Akötresie kowe la Hupuna i Nyidrë?—

Eje hi laka, tingetinge hë la hni Maria me Iosefa ke öhnyi Iesu hë hnei nyidro. Ngo tha hnehengazo menu fe kö Iesu. Atre hnyawa hi nyidrë laka, göhnë ga xetietë la ēnē. Celë hi matre hnyinge jë nyidrë koi nyidro, ka hape: “Tha ’te kö nyipo laka qânge troa lapane la uma i Kaka ?” Atraqatre la trenge aja i Iesu troa lapa hnine la ēnē, ke celë hi uma i Akötresie.

 Thupene jë hi lai, ce bëeke hmaca jë hë Maria me Iosefa me Iesu qa Ierusalema. Aja i eö kö troa atre la aqane ujë i Iesu kowe la keme me thine i nyidrë?— Kola qaja hnei Tusi Hmitrötr, ka hape, hnei nyidrëti pala hi hna “denge thenge nyido.” Nemene la aliene la trenge ewekë cili?— Kolo lai a hape, hnei nyidrëti pala hi hna trongëne la itre ewekë hnei nyidroti hna qaja. Maine göi kola iupi troa jö tim, hnei nyidrëti pala hi hna drengethenge la keme me thine i nyidrë.—Luka 2:41-52.

Hanawange la ketre ewekë nyine tro eö a mekune hnyawa: Ngacama atr ka pexeje Iesu, nge lue ka tha pexeje la keme me thine i nyidrë, ngo hnei nyidrëti pala hi hna drengethenge nyidro. Hapeu, hna amadrinë Akötresie kö hnene la aqane drengethenge i Iesu?— Eje hi, hnei Akötresieti lo hna amekötine kowe la itre nekönatr, ka hape: “Denge thenge ju la ite keme me thine i nyipunie.” (Efeso 6:1) Nge tui Iesu, loi e tro fe eö a hane amadrinë Akötresie, e tro eö a drengethenge kaka me nenë.

Hetre ketre aqane tro fe sa amadrinë Akötresie, ene la tro sa qeje Nyidrë kowe la itre xa atr. Hna mekune hnene la ka ala nyim ka hape, tha hnëqa i nekönatre kö lai. Ngo ame ngöne la ketre drai, hnei Iesu hna qaja kowe la itre atr ka sawa la itre nekönatr trahmanyi troa qeje  Akötresie, me hape: ‘Ö tha hnei nyipunieti kö hna e, ka hape, “Qa ngöne la ukeineqe ne la nöjei nekönate me ite medenge hnei cilieti hna amekötine la hna qaja aloin”?’ (Mataio 21:16) Haawe, kolo hi la a amamane ka hape, hnëqa së asë hi la troa qeje Iehova, me amamane la elolo i Nyidrë. E tro sa ujë tune lai, nyipici, tro hë së lai a amadrinëne la hni Nyidrë.

Tro sa inine qa ka la itre ewekë ka qeje Akötresie?— Tro sa inine qa hnine la Tusi Hmitrötr ngöne la itre hnalapa së. Nge tro fe sa kapa la itre ini cili ngöne la hne së hna itronyi memine la itre xa hlue i Akötresie. Ngo tro sa wangatrehmekune tune kaa la itre nyipi hlue i Akötresie?—

Nemene la aqane trongene la itre icasikeu i angatr? Qa kö hnine la Tusi Hmitrötr la itre ini hnei angatre hna hamën? Angatre kö a e me qeje pengöne la aliene ej? Celë hi lo aqane tro së lai a drei Akötresie, tune kaa fe la mekuna i eö?— Ame la easa sine la itre icasikeu ne la itre Keresiano, tre tha easë kö lo lai a traqa ne drei Akötresie?— E drenge jë eö la itre atr a qaja ka hape, tha nyipi ewekë kö troa trongëne la hna qaja hnei Tusi Hmitrötr, nemene la aqane tro eö a goeëne la itre atr cili? Ijije kö tro eö a qaja, ka hape, itre hlue i Akötresieti fe angatr?—

Pane mekune jë eö la ewekë celë. Önine la Tusi Hmitrötr, tro ha acasine la itre hlue i Akötresie, nyine ketre “nöje thatraqane la atesiwa i nyidë.” (Itre Huliwa 15:14) Pine laka Iehova la ëje i Akötresie, haawe, hnyingëne jë eö kowe la itre atr, ka hape Iehova fe kö la Akötresi angatr? E öni angatre jë ka hape, tha ëjene kö la Akötresi angatre lai, kolo hi lai a amamane ka hape, tha itre hlue i Iehova fe kö angatr. Ketre mina, ame la itre hlue i Akötresie, ke itre ka cainöjëne lapane angatr la Baselaia i Nyidrë. Nge kola mama qa ngöne la aqane drengethenge angatre la itre wathebo i Iehova, laka tru la ihnim i angatre koi Nyidrë.—1 Ioane 5:3.

E öhne jë eö la itre atr e kuca la itre ewekë cili, haawe, ce hmi ju me angatr. Drenge hnyawa ju ngöne la itre hna icasikeu, nge hane jë fe qeje mekun thenge la aqane hnying. Kolo itre ewekë lai hna kuca hnei Iesu ngöne la ēnē i Akötresie. Eö hi lai a nyitipu Iesu, me hane amadrinëne la hni Akötresie.

 Hapeu, mekune pala kö eö lo itre xa nekönatre hna qaja e hnine la Tusi Hmitrötr, angetre amadrinë Akötresie?— Timoteo la ketre tulu ka loi. Tha ka lapaune kö la keme i angeice koi Iehova. Ngo lue ka nyi hlue Iehova pe la thine i angeic ene Eunike, me Lois, qaqa i angeic. Hnei Timoteo hna drengethenge nyidro, me thele troa atrepengöi Iehova.

Ame la kola traqa hnei Paulo troa iwai ngöne la nöje i angatr, tre ka tru hë Timoteo. Wangatrehmekune ju hi nyidrë laka, tru la aja i Timoteo troa nyi hlue i Iehova. Nyidrëti pë hë a hë angeice jë nyine sine huliwa i nyidrë, matre akökötrene catrëne la huliwa i angeice koi Akötresie. Ame ngöne la nöjei gojenyi nyidro, nyidroti pala hi a cainöjë Iesu memine la Baselaia i Akötresie.—Itre Huliwa 16:1-5; 2 Timoteo 1:5; 3:14, 15.

Hapeu, Tusi Hmitrötre hmekuje hi a qaja la itre nekö trahmanyi ka amadrinë Akötresie?— Ohea. Tro sa pane ce wange la hna kuca hnene la ketre nekö jajinyi ne Isaraela, lo ijine kola ithupëjia hnene la nöje Suria me Isaraela. Ame la ketre drai ne angatr a itö isi, kötre fë pi hi hnene la angetre Suria lai nekö jajinyi ne Isaraela. Nge ami nyëne jë hi thene la tane isi, Naamana la ëjen, matre hluen la föi nyidrë.

 Hna tithi Naamana hnei lepera. Nge pëkö droketre ka ijij troa aloine la mec i nyidrë. Ngo ame kowe lo nekö jajinyi ne Isaraela, ka xecie hnyawa e kuhu hni nyën laka, atreine hi tro la perofeta i Akötresie a aloinyi Naamana. Ngo ame la hnepe ejolen, ame Naamana me ifënekö i nyidrë, tre, tha ka nyi hlue i Iehova kö nyidro. Matre, hapeu, tro jë kö la nekö jajinyi ne Isaraela a qaja koi nyidro la itre ewekë hnei nyën hna atre? Maine eö ju fe e cili, nemene la hnei eö hna troa kuca?—

Hanawange la hna qaja hnene la nekö jajiny, öni nyën: ‘Maine tro Naamana a tro troa wange la perofeta i Iehova, tro ha amele nyidrë qa ngöne la lepera i nyidrë.’ Naamana a drei nyëne ju, me tro kowe la perofeta i Iehova. Ame hë la nyidrëti a trongëne la hna qaja hnene la perofeta, ame hna canga loi pi hi la mec i nyidrë. Hane hi lai ewekë ka aijijë Naamana troa hane nyi hluene la nyipi Akötresie.—2 Ite Joxu 5:1-15.

Aja i eö fe kö troa tune la nekö jajinyi celë, ene la troa qeje Iehova kowe la ketre atr, me ini angeice la nöjei ewekë hnei Iehova hna atreine kuca?— Drei la nyine tro eö a qeje Akötresieti kow?— Maine jë ame la xötrei, tha pi tro kö angatr a kepe ixatua. Ngo ijije hi tro eö a qeje pengöne koi angatre la nöjei ewekë ka lolo hnei Iehova hna kuca. Maine jë tro angatr a drei eö. Ngo eje hi laka, ewekë lai ka amadrinëne la hni Akötresie.

Hanawange la itre xa ithuecatre hna hamëne kowe la itre thöthi ka ajane troa amadrinë Akötresie: Salamo 122:1; 148:12, 13; Ate Cainöj 12:1; 1 Timoteo 4:12; me Heberu 10:23-25.

[Iatr ne la götran 213]

Ame ngöne lo Iesu petre kö a thöth, tune kaa la aqane amadrinë Akötresieti hnei nyidrë?

[Iatr ne la götran 215]

Tha ka nyi hlue i Iehova kö lo keme i Timoteo, ngo nemene la hnei Timoteo hna ajane troa kuca?

[Iatr ne la götran 216]

Tune kaa la aqane amadrinë Akötresie hnene lo nekö jajinyi ne Isaraela?