Mekene 13

Itretre Pane Drei Iesu

DREI la hlue i Akötresie ka sisitria catr?— Iesu Keriso hi. Ame koi eö, ijije kö tro sa nyitipu nyidrë?— Eje hi, kola qaja hnei Tusi Hmitrötr ka hape, hnei nyidrëti hna amamai tulu koi së. Ketre, nyidrëti fe a hë së troa hane itretre drei nyidrë.

Atre fe hi eö la aliene la troa ketre atre drei Iesu?— Ka nyimu aliene la hnëqa cili. Ame la hnapan, nyipi ewekë tro sa xomi ini qaathei nyidrë. Ngo tha eje hmekuje kö lai. Nyipi ewekë mina fe tro sa mejiune kowe la itre trenge ewekë i nyidrë. Maine tro sa ujë tune lai, haawe, easë hi lai a drengethenge nyidrë.

Nyimutre la itre atr ka qaja ka hape, angatr a mejiune koi Iesu. Tune kaa fe la mekuna i eö, itre ka xötrethenge Iesu hnyawa asë kö angatr?— Ohea, tha angatre asë kö. Ngacama itre ka tro angatre koi uma hmitrötr, ngo ala nyimu la angetre sixane la itre ini hnei Iesu hna hamën. Nyipici, ame hi la itretre drei Iesu, tre, kolo itre atr ka xötrethenge hnyawa la tulu i nyidrë.

Tro sa pane ce wange la itre xa atr ka xötrethenge Iesu ngöne lo nyidrëti pala kö e celë fen. Filipo hi la ketre ka pane xötrethenge Iesu. Kola tro hnei Filipo troa wai Nathaniela (lo hna hëne fe ka hape, Batolomaio), laka hane cahu kola lapa fene la ketre isinöe. Ame la Nathaniela a tro koi Iesu, tre, öni Iesu jë hi, ka hape: ‘Hana wange la nyipi atre ne Isaraela ka huliwa nyipici.’ Kola sesëkötre hnei Nathaniela, ame hnei angeice hna qaja, ka hape: ‘Hna atre ni tune kaa hnei cilie?’

 Öni Iesu, ka hape: “Öhnyi eö hë ni fene la hmejieng, nge tha hna hë eö pete kö hnei Filipo.” Kola sesëkötre hnei Nathaniela laka, atre hnyawa hi Iesu la götrane hnei angeice hna cile ngön, ene pe öni angeic, ka hape: “Cilieti la Hupuna i Akötesie ; cilieti la Joxu ne Isaraela.”—Ioane 1:49.

Xötrethenge Iesu jë pë hë hnei Filipo me Nathaniela, nge hetre ka pane ce tro hë me nyidrë. Kola qeje Anederea me Peteru trejine me angeic, nge ketre tui Ioane memine la trejine me angeic, ene Iakobo. (Ioane 1:35-51) Ngo tha qea ju kö e thupen, bëeke hmaca jë hi angatre kowe lo huliwa i angatre ekö, ene la troa nyi ie. Ame ju hi la ketre drai, Iesu a nango tro ezine la Hnagejë e Galilaia, ene pe öhnyi Peteru ju hi me Anederea hnei nyidrë, nyidroti a nue la ieötre i nyidro e kuhu hnagejë. Ame hnei Iesu hna hë nyidro, me hape: “Xöte thenge ni jë.”

 Tha hmitre ju kö thupene lai, nge ixelë ju fe hi Iesu me Iakobo me Ioane. Nyidroti a sili ieötre hune la bootr ne la keme i nyidro. Iesu a hë nyidroti jë fe troa hane xötrethenge nyidrë. Maine eö ju fe la hnei Iesu hna hën, tro ju hë eö a hane ujë tune kaa? Tro jë kö eö a hane canga xemin?— Ame la itre atr cili, tre, atre Iesu hnyawa hi hnei angatr. Ka xecie koi angatr, laka, hna upi nyidrë hnei Akötresie. Celë hi kepine matre canga nue ju hi angatre la huliwa i angatr, me xötrethenge Iesu.—Mataio 4:18-22.

Hapeue jë fe la mekuna i eö göne lo itretre drei Iesu, hnei angatre kö hna kuca pala hi la itre ewekë ka meköt?— Ohea. Maine jë mekune hi eö ekö lo angatre a ithepe ka tru, tha ewekë ka loi pi kö lai. Ngo hna ujë la pengö i angatr, ke e thupene hë, hnei angatre hna kapa la iameköti qaathei Iesu, hetre aja i angatre troa saze la aqane ujë i angatr. Ketre tu së mina fe, laka, maine eje the së la ajan troa saze, haawe, ijije fe hë tro sa hane ketre atre drei Iesu.

Hnei Iesu hna hëne la nöjei pengöne atr, matre troa hane xötrethenge nyidrë. Ame ngöne la ketre ijin, hnene la ketre thupëtresij ka trenamo hna tro koi Iesu, me hnyingëne koi nyidrë la aqane troa hetrenyi la mele ka tha ase palua kö. Pine laka öni angeice ka hape, ka trongëne angeice la itre wathebo i Akötresie qane lo angeic petre kö a nekönatr, öni Iesu jë hi: “Trojë fe, ma xöte thenge ni.” Atre fe hi eö la ewekë ka traqa?—

Ame la kola atre hnene la thupëtresiji cili la esisitriane la troa xötrethenge Iesu hune la troa trenamo, ene pe hace ju hi la hni angeic. Tha hnei angeice pë hë hna xötrethenge Iesu, pine laka tru hë koi angeice la aja mani, nge co pë hë Akötresie.—Luka 18:18-25.

Thupene la hna cainöj ngöne la ca macatre nge sin, Iesu a iëne ju la 12 lao atre drei nyidrë, nyine aposetolo. Ame la itre aposetolo cili, tre, kolo itre trahmanyi hnei nyidrëti hna upe troa xome la ketre huliwa ka ketre pengön. Atre fe hi eö la itre ëje i angatr?— Tro nyiso a tupathi troa inine itre ej. Pane goeëne ju lai iatr. Qeje ëjene jë la itre atr thenge cahu itre hna cinyihan, nge thupene lai, the goeëne hmaca kö la itre ëje i angatr, ngo amexeje gufane jë hi.

 Ame ngöne la ketre ijin, ngazo ju hi la thiina ne la ketre e angatr. Ene Iuda Isakariota. Hna iëne la ketre aposetolo troa nyihna i angeic. Atre fe hi eö la ëjene la atr cili?— Matathia. Hna ië Paulo mina fe me Banaba troa lue xa aposetolo, ngo tha sine fe kö nyidro lo ala 12.—Itre Huliwa 1:23-26; 14:14.

Tune lo hne së hna inine ngöne lo Mekene 1, hnei Iesu pala hi hna wangatrune la itre nekönatr. Pine nemene matre nyidrëti a ujë tune lai?— Pine laka atre hnyawa hi nyidrë, laka, ijije fe tro nyudreni a hane xötrethenge nyidrë. Eje hi laka, ame e itre xa ijin, hnene la aqane ithanata ne la itre nekönatr, ene pe kola ukune la itre xa atr ka tru troa drenge me thele troa atrepengöne la Atre Hamë Ini Ka Sisitria.

 Nyimutre mina fe la itre föe ka hane xötrethenge Iesu. Hnene la itre xan hna ce tro me nyidrë, matre troa cainöje ngöne la itre xa traon. Kola qeje Maria Magadalena, me Ioana, me Susana. Maine jë hnei angatre fe hna hane ixatua troa kuci xen, me wasine la itre iheetre i nyidrë.—Luka 8:1-3.

Hapeu, tro fe kö eö a hane ketre atre drei Iesu?— The thëthëhmine kö eö laka, ame la troa atre drei Iesu, tre, tha göi tro kö a qaja hi. Nyipi ewekë tro sa ujë ceitu me ketre atre drei Iesu ngöne la nöjei götrane la mele së, ngo tha ene hmekuje kö ngöne la itre icasikeu ne Keresiano. Ekaa mina fe la itre xa götrane hnë tro sa ujë ceitu me ketre atre drei Iesu?—

Tro sa ujë tun ngöne la hnalapa së, me uma ne ini së. The thëthëhmine kö eö, laka, pine laka lue nyipi atre drei Iesu nyiso, haawe, nyipi ewekë tro nyiso a xötrethenge hnyawa la tulu i nyidrë ngöne la nöjei drai, me ngöne la nöjei götrane asë.

E jë la hna qaja hnei Tusi Hmitrötr, göne lo itretre drei Iesu, ngöne Mataio 28:19, 20; Luka 6:13-16; Ioane 8:31, 32; me 1 Peteru 2:21.

[Iatr ne la götran 72]

Drei la atr celë, nge hna tune kaa matre ketre atre drei Iesu jë angeic?

[Iatr ne la götran 73]

Drei la itre atr celë hnei Iesu hna hëne troa xötrethenge nyidrë?

[Iatr ne la götran 75]

Peteru

Anederea

Iakobo (trejine me Ioane)

Ioane

Filipo

Nathaniela

Mataio

Toma

Iakobo (nekö i Alefaio)

Simonas

Iuda (lo hna hëne fe, ka hape, Thadaio)

Iuda Isakariota

[Iatr ne la götran 76]

Drei la itre föe ka xatua Iesu ngöne la nyidrëti a cainöje trootro?

[Iatr ne la götran 76]

Ekaa la itre xa götrane hnë tro eö a ujë ceitu me ketre atre drei Iesu?