MEkene 17

Jëne Troa Mele Madrin

HAPEUE la mekuna i eö, ka ajane jë kö la nöjei atr asë troa mele madrin?— Ame hi la engazon, xalaithe hi la itre atr ka melëne la nyipi madrin. Atre fe hi eö la kepin?— Pine laka ame la itre xa atr, tha hane ju fe kö angatre inine la aqane troa hetrenyi la nyipi madrin. Angatr a mekune ka hape, ka xulu la nyipi madrin, qa ngöne la itre mo ne fen. Ngo thupene hë la hnei angatre hna kapa, canga saqe hi patre la madrine i angatr.

Hane hi la aqane troa hetrenyi la mele madrin. Hnene la Atre Hamë Ini Ka Sisitria hna qaja, ka hape: “Sisitia la manathithi e troa hame hune la troa kapa.” (Ite Huliwa 20:35) Haawe, nemene jë la aqane troa mele madrin?— Ene la troa ham me kuca la itre ewekë thatraqane la itre xa atr. Ma atre fe hë eö lai?—

Pane ce ithanatane jë pe së la mekune celë. Öni Iesu lo ka hapeu, tha tro kö a hetre madrinen la atre ka kepe ahnahna?— Ohea, tha celë kö la hnei nyidrëti hna qaja. Nge ame eö ke, madrine fe kö eö e kapa jë eö la itre ahnahna qaathene la  itre xan?— Eje hi laka, tha eö hmekuje kö. E hamëne pi koi së la ketre ewekë ka lolo, tro ha atraqatre la madrine së.

Ngo hnei Iesu hna qaja ka hape, sisitria catre kö la madrine së ngöne la easa ham. Ame koi eö, drei la ka hamëne la nöjei ewekë asë ka nyimutre?— Iehova Akötresie.

Kola qaja hnei Tusi Hmitrötr ka hape, Akötresieti la ka “hamën asë la mel, me mano, me nöjei ewekë asë kowe la nöjei ewekë asë.” Nyidrëti fe a hamëne la manie qa koho hnengödrai me jö, celë hi matre cia hlöeë jë la itre feja, nge qa ngöne lai, tro sa hetrenyi la itre xeni ka lolo. (Itre Huliwa 14:17; 17:25) Celë hi matre, tha sesëkötre kö së la kola hë Iehova hnene la Tusi Hmitrötr, ka hape, “Akötesie tene manathith”! (1 Timoteo 1:11) Ame la ketre ka thue madrine koi Akötresie, tre, hnene hi laka Nyidrëti a hamëne koi itre xan la nöjei ewekë. Ketre tune mina fe, maine tro sa ham, tro fe hë së lai a hane madrin.

Ngo nemene la nyine tro sa hamëne kowe la itre xan? Tune kaa la mekuna i eö?— Hetre ahnahna nyine itöne qa ngöne la itre setroa. Maine pi tro sa xom, loi e tro sa ami mani matre hetre nyine nyi thupene ej.

Ngo ame la itre ahnahna, tre, tha ka xulu hmekuje kö qa ngöne la itre setroa. Hanawange la ketre ceitun, ame la ijine hedredrei, ijije hi troa hetre madrine së hnene hi la trepe timi ka lepany. Hawe, ijije hi tro eö a madrine qa ngöne la hnei eö hna hamëne la trepe timi ka lepanyi kowe la ketre atr ka pi ij.

Ame e itre xa ijin, maine jë hnei eö hna majemine sa gato memine la thine i eö, nge lolo catre koi eö. Maine ju tro hi eö a xeni casi la gato i eö. Ngo e pi tro eö a akökötrene la madrine i eö, nemene la nyine tro eö a kuca?— Haawe, ce thawa ju la a i eö memine la ketre sinee i eö. Hapeu, hnei eö fe kö hna hane kuca tune lai e itre xa ijin?—

 Atre hnyawa hi la Atre Hamë Ini Ka Sisitria memine la itre aposetolo i nyidrë, la nyine kuca matre troa mele madrin. Hapeu, atre fe hi eö la hnei angatre hna hamëne ekö kowe la itre atr?— Ewekë ka tru catr nge pë hmaca ju kö ketre ewekë ka sisitria hune lai ngöne la fene celë! Qa ngöne laka atre hë angatr la nyipici göi Akötresie, atraqatre la madrine i angatr e troa ce thawa la maca ka loi memine la itre xan, ngacama angatr a huliwa pë thupen.

Ame ngöne la ketre drai, hnei Paulo aposetolo me Luka sinee i nyidrë, hna ixelë memine la ketre föe ka ajane fe troa kepe manathith qa ngöne la hna ham. Nyidro a ixelë ju me eahlo ezin la ketre hneopegejë. Ame laka tro pi nyidro kowe la götrane cili, tre, hna qaja koi nyidro ka hape, ketre götrane lai hna hmi hnene la itre atr. Nge eje hi, ka tiqa hnei föe ka thithi e cili.

Hnei Paulo hna qaja kowe la itre föe cili la maca ka loi göi Iehova Akötresie me göne la Baselaia i Nyidrë. Lidia la ketre föe ka drenge hnyawa la hna qaja hnei Paulo. Ketri eahlo ju hi hnene la maca ka loi cili, ene pe amamane ju eahlo la hni ne ole i eahlo. Eahlo a sipone iele Paulo ju me Luka ka hape: “E nyipunie lai a mekune laka ini la ate lapaune koi Iehova, trojë fe kowe la umang, me lapa.” Eje hi, hnei eahlo hna sipone iele nyidro troa lö kowe la hnalapa i eahlo.—Itre Huliwa 16:13-15.

Atraqatre la madrine i Lidia troa kapa la itre hlue i Akötresie e hnine la hnalapa i eahlo. Hnimi angatre catre hnei eahlo, pine laka hnei angatre hna xatua eahlo troa atre Iehova me Iesu, memine fe la aqane tro la itre atr elany a mele palua. Tru fe la madrine i eahlo troa thuai Paulo me Luka, me nyi göhnë ne meköle i nyidro. Eje hi, hnei Lidia hna kapa la madrine qa ngöne la hni ne ham ka eje thei eahlo. Celë hi ketre mekune ka sisitria nyine tro sa hnehen. Maine jë ame ngöne la ketre drai, tro la ketre atr a upi së troa hamëne la ketre ahnahna kowe la ketre sinee së. Ngo maine pëkö hni ne aja së, haawe, thatreine jë kö tro sa madrin.

Drei la ketre ceitun, maine tro ni a upi eö troa ce thawa la itre wana boobo i eö memine la ketre nekönatr, nge ase hë eö mekune ka hape, tro hmekuje hi eö a iji itre ej. Hapeu, tro kö eö lai a madrin?— Ngo maine sipu  mekuna i eö kö troa ce thawa la itre wana boobo i eö memine la ketre sinee i eö, tha tro kö lai a sisitria catre la madrine i eö?—

Ame e itre xa ijin, pine laka atraqatre la ihnimi së kowe la ketre atr, ene pe easa ajane troa hamëne koi angeice la nöjei ewekë hne së hna hetreny. Ketre tune mina fe, maine atraqatre la ihnimi së koi Iehova, haawe, tro hë sa ajane troa hamëne la nöjei ewekë së koi Nyidrë.

Hnene la Atre Hamë Ini Ka Sisitria hna öhne la ketre sine föe ka ujë tune lai. Hnei nyidrëti hna öhnyi eahlo e hnine la ēnē e Ierusalema. Ame hi la hnei eahlo hna hetreny, tre, lue nekö i manie hi. Ngo hnei eahlo hna hamëne la lue manie cili nyine ahnahna thatraqane la ēnē. Pëkö ketre atr ka hane ujë tui eahlo. Goi pë fe ka öhne la hnei eahlo hna kuca. Eje e kuhu hni eahlo la ajane troa hamëne la lue manie cili, nge ketre, atraqatre la ihnimi eahlo koi Iehova. Sisitria la madrine i eahlo qa ngöne la ewekë hnei eahlo hna hamën.—Luka 21:1-4.

Nyimutre la itre aqane tro sa ham. Atre fe hi eö la itre xa aqane tro sa ham?— Maine easa hamëne la ketre ewekë qa kuhu hni së, haawe, tro ha atraqatre la madrine së. Celë hi kepine matre kola ini së hnene la Atre Hamë Ini Ka Sisitria, ka hape: “Hamënejë.” (Luka 6:38) Maine tro sa ujë tune lai, tro së lai a thue madrinen la itre atr. Ngo atraqatre catre pala kö la madrine së!

E jë la itre xa xötre celë ka amamane laka, sisitria la madrine së e tro sa ham: Mataio 6:1-4; Luka 14:12-14; me 2 Korinito 9:7.

[Iatr ne la götran 92]

Pine nemene matre Iehova la “Akötesie tene manathith”?

[Iatr ne la götran 93]

Nemene la ka troa thue madrine i eö catr, hune la troa xeni casi la gato i eö?

 [Iatr ne la götran 94]

Nemene la hnei Lidia hna qaja koi Paulo me Luka?

[Iatr ne la götran 94]

Pine nemene matre atraqatre la madrine i Lidia troa kepe Paulo me Luka?

[Iatr ne la götran 96]

Pine nemene matre sisitria la madrine ne la sine föe celë troa hamën asë la hnei eahlo hna hetreny?