Mekene 38

Kepine Matre Loi e Tro Sa Hnimi Iesu

MAINE eö ju a të ngöne la he ka troa lö, hapeu aja i eö kö tro la ketre atr a thepe eö qa lai?— Nemene la hnei eö hna dreng e kuhu hni eö, e nue mele pi la ketre atr troa thepe eö?— Ka ceitune hi lai memine lo hna kuca hnei Iesu Keriso. Tune lo hne së hna inine ngöne la Mekene 37, hnei nyidrëti hna nue la mele i nyidrë nyine itö mele së.

Tha hnei Iesu kö hna thepe së ngöne la easa nunucil. Ngo hapeu, mekune hi eö lo hnei Iesu hna thepe së qa ngön?— Hna thepe së hnei nyidrë qa ngöne la ngazo me mec, lo hne së hna kapa qaathei Adamu. Ngacama ala nyimu la angetre kuca la itre ewekë ka ngazo, ngo Iesu mina fe a meci thatraqai angatr. Hapeu, tro fe kö eö a hane nue la mele i eö thatraqane la itre atr ka ngazo?—

Kola qaja hnei Tusi Hmitrötr, ka hape: “Hace kowe la ate troa meci hnane la ate thina ka meköt, ngo loi maine edrae hetete cate troa meci nyine hnane la ate ka loi.” Ngo Tusi Hmitrötr a qaja hnyawa ka hape, hnei Iesu hna meci “thatraqane la ite ka ngazo,” ene fe lo itre atr ka tha hane nyihlue i Akötresie! Ketre, ej a sisedrëne hmaca ju ka hape: “Ngöne laka hna elelengë Keriso nyine hna i eëshë, nge ite ka ngazo pete kö shë [nge easë pala kö a kuca la itre ewekë ka ngazo].”—Roma 5:6-8.

Mekune hi eö lo ketre aposetolo ka kuca ekö lo itre ewekë ka ngazo?— Sipu önine jë kö la aposetolo cili: “Hnei Keriso Iesu hna hlepëtipi e celë fene troa amelene la nöjei ate ka ngazo ; nge sisitia kö ni hui angat.” Paulo hi lai aposetolo hna qaja e celë. Hnei nyidrëti hna wangatrehmekune laka, ka “hmo” nyidrëti ekö, nge hnei nyidrëti hna “lapa fë la hni ka ngazo.”—1 Timoteo 1:15; Tito 3:3.

Hnei Akötresieti hna upe la Hupuna i Nyidrë, troa meci thatraqane la  itre atr ka tune lai. Pane xome jë la tusi Ioane mekene 3 xötre 16. Kola qaja ka hape: “Hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.”

Hnei Iesu mina fe hna amamane laka, ceitune hi la ihnimi nyidrë memine la Tretretro i nyidrë kowe la nöjei atr asë. Hne së lo hna ce wange ngöne lo Mekene 30, la itre xa akötre hna melëne hnei Iesu ngöne lo jidri ne kola xolouthi nyidrë. Hna xomi nyidrë matre troa kootrë nyidrë qëmeke i Kaiafa lo Atre Huuje Ka Sisitria. Hnene la itre atr hna eköthe la itre trenga thoi hui Iesu, me je i nyidrë. Nge ame mina fe ngöne la jidri cili, akönia kelikelë nyidrë hnei Peteru. Tro pena së enehila a ce wange la itre ewekë ka traqa e thupen.

Hmakanyi hë, nge tha ase ju kö Iesu meköl. Hna eköthe hmaca la ketre ikootrë, ke tha ka meköti kö lo hnapan. Haawe, hna canga tro la itretre huuje troa wange la hnakootre i angetre Iudra. Traqa ju hi angatr a jele ngazo Iesu, ke öni angatr, hnei nyidrëti hna qaja angazo Akötresie.

Thupene lai, angatre pë hë a othi nyidrëti jë, me xomi nyidrëti koi Pilato, gavena ne Roma. Öni angatre koi Pilato ka hape: ‘Iesu la ketre ithupëjia memine la gavena. Loi e troa humuthi nyidrë.’ Ngo atre hnyawa hi Pilato laka, kola thoi hnene la itretre huuj. Matre, öni nyidrëti jë koi angatr, ka hape: ‘Pëkö ngazo hna öhne thene la atr celë. Tro hmaca ha ni a nue nyidrë.’ Ngo sue jë hi hnene la itretre huuje me itre xane ju kö, me hape: ‘Ohea! Humuthi nyidrëti pi!’

Hnei Pilato hna thele jëne troa nue Iesu. Ngo hnene la itretre huuje hna hule la ka ala nyim, troa suen ka hape: ‘Maine tro nyipëti a nue la atr celë, ithupëjia ha nyipë memine la gavena! Humuthi nyidrëti pi!’ Mejene ka ngazo la hna suen hnene la ka ala nyim. Matre, atre fe hi eö la hna kuca hnei Pilato?—

Hnei nyidrëti hna drengethenge angatr. Ame hnei nyidrëti hna thaucë Iesu. Thupene lai, Pilato a hamë Iesu jë kowe la itre sooc, matre troa humuthi nyidrë. Pine laka angatre a thele troa hnyima sai Iesu, angatre hi lai a xome jë la itre otretre ka ithinyi troa nyi koronan, me petrë Iesu, me thili  koi nyidrë. Ketre, angatre a upi nyidrëti jë troa ajöne la sinöe ka hace, uti hë la götrane e tröne la traon, hna hëne ka hape, Zi Ne La Inehenatr. Ame e cili, angatre a jei faone ju la lue wanakoime me lue ca i Iesu hune la sinö. Thupene lai, angatre a acile jë lai sinö, matre troa thipi hnei Iesu. Tru la madra i nyidrë ka neni, nge tru fe la akötre i nyidrë.

Ngo tha canga meci kö Iesu. Matre, kola nyiqaane hnyimasai nyidrë hnene la itretre huuj. Nge, ame fe lo itre atr ka tro e cahu gojeny, angatre a qaja koi nyidrë, ka hape: “Maine Nekö i Akötesie hmunë, te, utipi qa ngöne la [“sinöe ne iaxösisi,” MN].” Atre hnyawa hi Iesu la kepine matre upi nyidrëti pi kowe la fen hnene la Tretretro i nyidrë. Xecie hnyawa koi nyidrë, laka nyipi ewekë tro nyidrëti a nue la mele i nyidrë ka pexej, matre ijiji së jë troa hane kapa  la mele ka tha ase palua kö. Traqa ha kowe la hnaakönine hawa e hnaipajö, aca sue jë hi nyidrë draië kowe la Tretretro i nyidrë, ame hnei nyidrëti hna meci ju.—Mataio 26:36–27:50; Mareko 15:1; Luka 22:39–23:46; Ioane 18:1–19:30.

Isa pengöi Iesu catr me Adamu. Pëkö ihnim i Adamu koi Akötresie, ke hnei angeice lo hna tha drei Nyidrë. Ketre, pëkö ihnim i Adamu koi së. Hnene la eni wathebo i angeic, ene pe hnaho së asë pi ngöne la ngazo. Ame pena Iesu, ka tru la ihnim i nyidrë koi Akötresie me easë fe. Hnei nyidrëti pala hi hna drengethenge Akötresie. Ketre mina, hnei nyidrëti hna nue la mele i nyidrë, matre köletrije pi la itre ngazo qaathei Adamu.

Hapeu, eö kö a madrine kowe la hnei Iesu hna kuca koi së?— Hapeu, olene kö eö koi Akötresie jëne la thith, pine la hnei Nyidrëti hna hamëne koi së la Hupuna?— Ka tru catr la hni ne ole i Paulo aposetolo kowe la hnei Iesu hna kuca koi angeic. Celë hi matre cinyihane ju angeic ka hape, hnene la Hupuna i Akötresie hna “hnimi ni, me hamë nyidëti kö thatraqai ni.” (Galatia 2:20) Hnei Iesu mina fe hna meci pi nyiso, eö me eni. Hnei nyidrëti hna hamëne la mele i nyidrë ka pexej, matre tro sa hetrenyi la mele ka tha ase palua kö! Eje hi, celë hi kepine ka tru ka upi së troa amamane la ihnim i së koi nyidrë.

Hnei Paulo hna cinyihane kowe la itre Keresiano ne Korinito, ka hape: “Kola musinë së hnene la ihnimi Keriso.” Nemene koi eö la hna upi së troa kuca hnene la ihnim i Keriso?— Tro so a ce wange la mekune hna hamëne hnei Paulo, öni angeic: “Hnei nyidëti hna meci thatraqan’ asë, mate tha tro hmaca kö a mele koi angate kö ange ka mel, ngo loi pe koi nyidë.”—2 Korinito 5:14, 15.

 Tro eö a amamane tune kaa ngöne la mele i eö, laka eö a ajane troa amadrinë Keriso?— Ame la ketre jën, tre ene la troa qeje nyidrë kowe la itre xa atr. Ngo hetre ketre aqane tro eö a amadrinë nyidrë. Pane mekune jë eö: eö hmekuje hi ngöne la hnalapa, patre kö kaka me nenë, nge pëkö ketre atr me eö. Hapeu, tro kö eö a wange ngöne televizio, maine ëternet, lo itre ewekë hna methinëne hnei Iesu?— The thëthëhmine kö eö laka, öhne asë hi Iesu la itre ewekë hnei eö hna kuca juetrën, ke ka mele nyidrë!

Hetre ketre kepine hmaca kö, matre nyipi ewekë tro sa hnimi Iesu, ene la aja së troa xötrethenge la tulu i Iehova. Öni Iesu ka hape: “[Hna] hnimi ni hnei Tetetro.” Atre fe hi eö la kepine matre Iehova a hnimi Iesu, nge pine nemene matre tro fe së a hane hnimi Iesu?— Pine laka hnei Iesu hna kapa troa mec, matre eatrëne jë la aja i Akötresie. (Ioane 10:17) Qa ngöne lai, catre pi së troa trongëne la hna qaja hnei Tusi Hmitrötr, kola hape: “Nyi tupu Akötesieti jë nyipunie, tune la ite nekö hnimina ; me tro pala hi ngöne la ihnim, tune la hnei Keriso hna hnimi shë, me hamë nyidëti kö thatraqai shë.”—Efeso 5:1, 2.

Hanawange la itre xa xötre ka troa xatua së troa akökötrene la hni ne ole së koi Iesu, me kowe la hnei nyidrëti hna kuca koi së: Ioane 3:35; 15:9, 10; me 1 Ioane 5:11, 12.

[Iatr ne la götran 199]

Nemene la itre akötre hna melëne hnei Iesu, ngöne la nyidrëti a nue la mele i nyidrëti koi së?

[Iatr ne la götran 200]

Tro sa amamane tune kaa la ihnim i së koi Iesu?

[Iatr ne la götran 201]

Drei la ka öhne asë la itre ewekë hne së hna kuca?