Mekene 42

Kepine Matre Nyipi Ewekë Tro Sa Huliwa

NEMENE la aja i eö, huliwa maine elo?— Ke nemene la engazone la troa elo? Hna qaja lo hnei Tusi Hmitrötre ka hape, ame ekö e Ierusalema, ka “tiqa la ite gojenyi ne la lapa hnei ite nekö trahmanyi me jajiny, kola elo e kuhu ite gojeny.”—Zakaria 8:5.

Hetre aja ne la Atre Hamë Ini Ka Sisitria troa goeëne la itre nekönatr a elo. Qëmekene tro nyidrëti a uti kowe la fen, hnei nyidrëti hna qaja ka hape: “Ce ini hi me [Akötresie] nge ate xup,  . . . kola madi xajawa i anganyidë o ijin’ asë.” Kola amamane hnyawa e celë laka, ka ce huliwa Iesu me Iehova ekö e hnengödrai. Nge nyidrëti a nyixane ju me hape: “Hanyinge la ite nekö i at.” Tune lo hne së hna ce wange hë, tru la hnene la Atre Hamë Ini Ka Sisitria hna hnehengazone la nöjei pengöne atr, a itre nekönatre fe.—Ite Edomë 8:30, 31.

 Ame ngöne lo Iesu ekö a nekönatr, hnei nyidrëti fe kö hna hane elo?— Ma tro jë hi a eje lai. Nge pine laka ka atreine catre nyidrëti lo huliwa e hnengödrai, lo kola ixatua troa “xup” la nöjei pengöne ewekë, hapeue lo nyidrëti e celë fen, hnei nyidrëti kö hna hane huliwa?— Eje hi lai, pine laka hna hë Iesu lo, ka hape, “neköne lo ate tratrau.” Nge hna qeje nyidrëti mina fe, ka hape, “ate tratrau.” Nemene la hna amamane hnene la ewekë celë?— Kolo hi lai a amamane ka hape, ame la kola hia Iesu hnei Iosefa, tre, kolo fe hi lai a ini nyidrë la huliwa cili, nge hane fe hi lai kepine matre hë Iesu jë, ka hape, atre tratrau.—Mataio 13:55; Mareko 6:3.

Atre tratrau ka tune kaa lae Iesu?— Pine laka ka maca hnyawa Iesu huliwa ekö e koho hnengödrai troa xupe la nöjei ewekë asë, hapeu, tro kö a jole koi nyidrëti troa tratrau sinö, ngöne lo nyidrëti  e celë fen, tune kaa la mekuna i eö?— Ame ngöne la hneijine i nyidrë, ketre huliwa ka jole la troa tratrau sinö. Qëmekene troa kuci sine laulau maine itre icea me itre xa ewekë ju kö, troa pane thupe sinöe, nge e ase hë, troa sa acone itre ej, nge ajöne jë hë qa hnitr koi hnalapa.

Ame la eö a hane mekun, tre, ka tru kö koi Iesu la huliwa i nyidrë?—Aja i eö fe kö troa hane cai sine laulau, me icea me itre xa ewekë kö hna ajane hnei itre atr?— Kola qaja hnei Tusi Hmitrötre ka hape, loi e tro la atr “a madine la ite huliwa i angeic.” Eje hi, sisitria la madrine së qa ngöne la itre huliwa hne së hna kuca, hune la madrine qa ngöne la hne së hna kuci elo.—Ate Cainöj 3:22.

Ka lolo la thangane la huliwa kowe la mekuna së me ngönetrei së. Nyimutre la itre nekönatr ka nyipi ewekëne la wai televizio, maine itre nyine elone ngöne video. Ngo ame la pun, tru hlepuhlepu la ngönetrei angatr, me canga tithe hi hnei mec, nge tha nyipi madrine kö angatr. Ketre, pëkö hnei angatre hna hane kuca, matre troa madrine la itre xan. Matre, nemene la nyine tro sa kuca, e pi tro sa hetre madrin?—

Hne së lo hna inine ngöne la Mekene 17, la pengöne la madrin. Ej a xulu qa ngöne la hne së hna ham, me kuca la itre ewekë nyine xatuane la itre xan. (Ite Huliwa 20:35) Ketre, kola qaja hnei Tusi Hmitrötr, ka hape, Iehova la “Akötesie tene manathith.” (1 Timoteo 1:11) Ame fe ngöne lo tus i Ite Edomë, kola qaja ka hape, Iesu a “madi xajawa i anganyidë o ijin’ asë.” Pine nemene matre ka madrine pala hi Iesu?— Hnei nyidrëti hna hamëne la kepine ngöne lo nyidrëti a qaja ka hape: “Hnei Kakati hna huliwa uti hë enehila, nge ini fe a huliwa.”—Ioane 5:17.

Ame ngöne lo Iesu e celë fen, tha hnei nyidrëti hmekuje kö hna tratrau sinöe uti hë la pune la mele i nyidrë. Hnei Iehova hna ahnithe koi nyidrë la ketre huliwa ka ketre pengöne kö nyine troa kuca e celë fen. Atre fe hi eö ka hape, nemene huliwa lai?— Hnei Iesu hna qaja ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena ; ke hna upi ni thatraqane lai.” (Luka 4:43) Thupene la hnei Iesu hna cainöje kowe la itre xa atr ka kepe nyidrë me lapaun, angatr a ce thawa hmaca ju pena me itre xan, tune la hna kuca hnene cahu föe ne Samaria.—Ioane 4:7-15, 27-30.

 Tune kaa la aqane waipengöne Iesu la huliwa cili? Ka hmalahnine kö nyidrëti troa kuca lai huliwa cili?— Öni nyidrëti ka hape: “Ange la tro ni a kuca la ajane la ate upi ni, me umuthe la huliwa i nyidë.” (Ioane 4:34) Tru kö la madrine i eö, la eö a xeni la göxen aja i eö?— Tro hi së lai a trotrohnine la trenge madrine ka eje thei Iesu, la nyidrëti a eatrëne la huliwa hnei Akötresieti hna ahnith.

Ame la Iehova a xupi së, Nyidrëti fe hi lai a aijijë së troa kepe madrine qa ngöne la itre huliwa hne së hna inine troa kuca. Ahnahna i Nyidrë kowe la atr la troa “madine la huliwa i angeic.” Qa ngöne lai, maine tro eö a inine huliwa qane la eö a nekönatr, haawe, tro hë eö lai a mele madrine uti hë epin.—Ate Cainöj 5:19.

Tha kolo kö lai a qaja ka hape, e nekönatre petre kö, tro hë angeice a kuca la huliwa ne la ka tru. Ngo kolo pe a qaja ka hape, isa hetre itre huliwa hne së hna atreine kuca. Ngöne la nöjei drai, keme me thine i eö a tro troa huliwa thupene xeni me uma. Ngo loi e tro fe eö a atre hnyawa laka, hetre qa i eö fe hnine la hnalapa, ene la troa nyidrawan.

Nemene la itre xa aqane tro eö a ixatua hnine la hnalapa, matre hetre thangane ka loi fe kowe la itre atrene la hnepe lapa?— Ene la troa ati peleitr, me wasi peleitr, me triji salite, me nyidrawane la hnahage i eö, me troa hlem me amë xawane la itre nyimo i eö. Maine itre ewekë hë lai hnei eö hna kuca, haawe, madrine ka tru lai kowe la itre atrene la hnepe lapa asë.

Tro sa pane ce wange la kepine matre hetre manathithi hne së hna kapa qa ngöne la itre ewekë celë. Hanawange la ketre ceitun, nemene la eloine e tro eö a hleme me amë hnyawane la itre nyimo i eö, e ase hë eö elo?— Ame la hnapan, tre, matre porope pala hi la hnalapa. Nge ame la ketre, tre, matre tha tro kö a hetre ka eatre menu. E tha tro kö eö a hleme hnyawane la itre nyimo, nge traqa pi hi la thine i eö qa hna komisio, tro hë eahlo a waja itre ej, ene pe ucici pi eahlo me eatr. Nge maine ngazo la aqane hnai eahlo, tro hë eahlo lai a tro pital. Ewekë ka hace catre lai, öhne hi eö?— Hane hi lai kepine matre lolo catre e tro eö a hlem, me amë hnyawa la itre nyimo i eö, e ase jë eö elo.

Ame la ketre huliwa nyine tro la itre nekönatr a kuca, tre, ene la itre huliwa hna hamëne qa ngöne uma ne ini. Ame ngöne la hna ini, kola ini së  troa e tus. Hetre itre nekönatr ka ajan, nge öni itre xan, jole pala ha koi angatr. Nyipici, maine troa nango jole la xötrei, ngo e atreine hë së e tus, tro hë sa hetre madrine qa ngön. E atreine hë eö e tus, ijiji eö hë troa troa inine la nöjei pengöne ewekë ka lolo, me nyine hain. Atreine fe hë eö troa e la tusi qaathei Akötresie, ene la Tusi Hmitrötr. Matre, tune kaa, tha ketre manathithi ka tru kö lai, la easa ini hnyawa ngöne la uma ne ini?—

Ala nyimu la angetre kötre huliwa. Maine jë hetre hnei eö fe hi hna atre. Ngo pine pe laka hnei Akötresieti hna xupi së troa huliwa, haawe, nyipi ewekë tro sa inine la aqane troa kepe madrine qa ngöne la huliwa së. Ame lo Atre Hamë Ini Ka Sisitria, ka madrine kö nyidrë troa kuca la huliwa hna ahnithe koi nyidrë?— Eje hi, ame koi nyidrë, ka ceitu me xeni hnei nyidrëti hna ajan. Nge nemene la huliwa i nyidrë?— Ene la troa qeje Iehova Akötresie kowe la nöjei atr asë, me thuemacanyi angatre la aqane troa hetrenyi la mele ka tha ase palua kö.

Hanawange la eamo nyine xatua eö troa hnine la huliwa i eö. Thele jë ka hape, ‘Pine nemene matre ka nyipi ewekë catre e troa kuca la huliwa celë?’ E atre hë eö la enyipiewekëne la huliwa nyine tro eö a kuca, haawe, hmaloi pi hi e tro eö a huliwan. Ngacama ka co ju hë maine tru pena la huliwa cili, ngo kuca hnyawane ju pe. E tro eö a huliwa tune lai, eje hi laka tro ha thue madrine i eö qa ngöne la itre huliwa hnei eö hna kuca, tune lo Atre Hamë Ini Ka Sisitria.

Ijije hi troa xatua së hnene la Tusi Hmitrötre troa maca ngöne la huliwa hne së hna kuca. E jë la Ite Edomë 10:4; 22:29; Ate Cainöj 3:12, 13; me Kolose 3:23.

[Iatr ne la götran 217]

Nemene la ewekë ka amadrinëne la Atre Hamë Ini Ka Sisitria qëmekene tro nyidrëti a traqa e celë fen?

[Iatr ne la götran 218]

Ame lo Iesu e celë fen, nemene lo lue huliwa hnei nyidrëti hna kuca?

[Iatr ne la götran 221]

Pine nemene matre nyipi ewekë tro eö a hleme hnyawa la itre nyimo i eö, e ase hë eö elo?