Mekene 26

Kepine Matre Tha Ka Hmaloi Kö Troa Kuca La Loi

KOLA amadrinë drei lo Saulo ekö a kuca la itre ewekë ka ngazo?— Satana Diabolo. Ame fe la itre xa ka madrin, tre, kolo fe lo itre hene ne hmi angetre Iudra. Ngo ame ju hi la Saulo a xötrethenge la Atre Hamë Ini Ka Sisitria me saze ëj, a Paulo hë, tre, kolo fe hë a hane methinë nyidrë hnene la itre hene ne hmi cili. Hapeu, trotrohnine hë eö lai kepine matre jole kowe la atre drei Iesu troa kuca la ewekë ka loi?—

Ame ngöne la ketre drai, hnei Anania ketre atre huje ka sisitria, hna iupe troa xe Paulo, me thele jëne troa akalabusi nyidrë. Ame la Paulo a nyiqaane troa xötrethenge Iesu, hna anyimua akötrë nyidrë. Ame la ketre ijin, hna lepi nyidrë me tranyi nyidrë hnei etë.—Itre Huliwa 23:1, 2; 2 Korinito 11:24, 25.

Ala nyimu la angetre ihul troa kuca la itre ewekë hna methinëne hnei Akötresie. Nge tune kaa fe eö, pi tro kö eö a kuca la loi? Tro kö eö a kuca la loi, ngacama xele ju hë ma wai eö hnei itre xan? Hapeu, ka hmaloi kö lai?—

 Maine jë tro eö a sesëkötr, la kola xele ma wai eö e kuca la loi. Maine ju troa qaja aloinyi eö. Ka meköti hi la mekuna i eö, ke ame Iesu ekö, tru hnei atr ka hnimi nyidrë, ke, nyidrëti a kuca la loi. Ame ngöne la ketre ijin, traqa itronyi pi hi la itre atr ngöne la hnalapa, hna lapane hnei Iesu. Angatre a traqa troa wai nyidrë ke atre hë angatre ka hape, atreine hi nyidrëti aloine la itre trene mec.—Mareko 1:33.

Ngo hetrenyi fe kö la itre xa atr ka xele ma drenge la hna qaja hnei Iesu, ngacama itre ini ka meköti pala hi la hnei nyidrëti hna qaja. Ngo kolo hi lo kepine lai matre methinë nyidrëti jë, ke hnei nyidrëti pala hi hna qaja la nyipici. Celë hi ewekë lai ka traqa ekö e Nazareta, lo traone hna hetru nyidrëti ngön. Hnei Iesu hna lö hnine la sunago, ene lo hnë hmi angetre Iudra koi Akötresie.

 E cili hi lo hnei nyidrëti hna pane cile fë la ketre cainöje ka lolo hna nyi trepene hnei Tusi Hmitrötr. Ame petre kö ngöne la qan, tre, kola madrine hnene la itre atr. Hmalahnine hi angatre troa drenge la itre trenge ewekë ka lolo hna qaja hnei Iesu. Ngo ame pë hë e thupen, jole hë koi angatre troa kapa hnyawa itre ej, ke kolo hi lo nekönatr trahmanyi ekö ka tru nyipi angatr.

Ngo ame hë e thupen, Iesu pë hë a saze tane porotrike pi. Nyidrëti a ithanatane ju me angatre lo ijine Akötresie a hane kapa fe la itre xa atr, ngacama tha itretre Iudra kö. Drenge hë hnene la itre atrene la sunago, ene pe angatre a elëhni. Atre fe hi eö la kepin?— Angatr a mekune ka hape, angatre hmekuje hi la hna kapa hnei Akötresie, ke sisitria angatre hune la itre xan. Haawe, angatre ha methinë Iesu pine la hnei nyidrëti hna qaja. Atre fe hi eö la ewekë hnei angatre hna thele troa kuca?—

Kola qaja hnei Tusi Hmitrötr, ka hape: ‘Hnei angatre hna xolouthi Iesu me huli nyidrë e tröne la traon. Angatre pë hë a elë sai nyidrëti jë hune la wetr, me thele troa ukapië nyidrë. Ngo Iesu pë hë a kötre angatre pi.’—Luka 4:16-30.

Maine hane ju fe kuca koi eö tune lai, hapeu tro kö eö a bëeke hmaca troa qeje Akötresieti kowe la itre atr cili?— Tro jë kö eö a xou?— Ame Iesu, hnei nyidrëti hna bëeke hmaca Nazareta eë, thupene la ca macatre. Kola qaja hnei Tusi Hmitrötr, ka hape: “Hnei nyidëti hna ini angate hnine la sunago i angat.” Tha hnei Iesu kö hna xouene la itre atr ka methinë Akötresie, celë hi matre tha mano kö nyidrëti qaja la nyipici.—Mataio 13:54.

Ame ngöne la ketre Sabath, hnei Iesu hna öhne la ketre atr fitre im, ka sine atr pë hë. Atreine hi Iesu troa aloine la mec i angeic jëne la mene i Akötresie. Ngo hetrenyi e cili la itre atr ka thele iwesitrë me Iesu. Atre fe hi eö la hnei Iesu hna kuca?— Hnei nyidrëti hna pane hnyinge koi angatr, ka hape: ‘E kei pi la ketre nekö i mamoe i nyipunie e hnine la hnaope ngöne la drai Sabath, tro kö nyipunieti a thele troa ee nyëne hmaca qa hnine lai hnaop?’

 Eje hi, ngacama Sabathi ju hë, drai hna amekötine troa mano, ngo canga tro hi angatre lai a ea la nekö i mamoe. Celë hi matre, öni Iesu jë hi ka hape: ‘Pine laka sisitria kö la atr hune la mamoe, haawe, ka nyipi ewekë catre kö e troa xatua angeice ngöne la Sabath.’ Trotrohnine hnyawa hi së e celë la enyipiewekëne la tro Iesu a xatuane lai atr, me aloine la mec i angeic!

Ame hnei Iesu hna upe lai sine atr troa sathe la ime i angeic, ene pe canga loi pi hi la iwanakoime i angeic. Drei jë kö la etrune la madrine ne la atr cili. Nge tune kaa ju pë hë lo itre xan? Hapeu, madrine jë fe kö angatr?— Ohea. Kolo jë pe ka hape, elë catre jë la hni angatre koi Iesu. Angatr a tro pi me ce ithanatane la aqane troa humuthi nyidrë!—Mataio 12:9-14.

Ketre tune mina fe enehila. Ngacama kuca ju hë së la ketre ewekë, ngo tro pala hi a hetre atr ka qeje gele së. Celë hi kepine matre, nyipi ewekë troa xecie e kuhu hni së, ka hape, drei la hne së hna troa pane amadrinën. Maine Iehova Akötresie me Iesu Keriso Hupuna i Nyidrë, haawe, drengethenge nyidroti jë. Nge e ujë hë së tune lai, drei la ka troa methinë së, me nyi ejolene la mele së, me sewe së troa kuca la loi?—

Satana Diabolo hi. Nge drei mina fe la itre xan?— Ene hi lo itre atr hna amenune hnene la itre trenga thoi Diabolo. Ame ngöne la ketre drai, hnei Iesu hna qaja kowe la itre hene ne hmi, ka hape: “Keme i nyipunie la diabolo, nge pi tro nyipunie a kuca la ite aja i keme i nyipunie.”—Ioane 8:44.

Ala nyimu la itre atr hna wanga aloine hnei Diabolo. Kolo ange hna hëne hnei Iesu, ka hape, “fen.” Ame koi eö, nemene la aliene lai “fen” hna qaja hnei Iesu?— Pane goeëne ju la hna qaja ngöne Ioane mekene 15, xötre 19. Önine la itre trenge ewekë i Iesu: “Maine ite sine ne la fene nyipunie, maine tro la fen’ a hnine la ite sine ne ej ; ngo ngöne laka tha ite sine ne la fene nyipunie, ngo hnenge hna ië nyipunie qa la fen, celë hi laka methinë nyipunie hnene la fen.”

Haawe, ame la fene celë ka xele ma wange la itretre drei Iesu, tre, kolo hi lo itre atr asë ka thipetrije la itre ini hnei nyidrëti hna hamën. Pine nemene  matre kola methinë angatre hnene la fen?— Pane mekune jë eö la ewekë celë: Drei la tane la fen?— Kola qaja hnei Tusi Hmitrötr, ka hape: “Fene hnengödrai asëjëihë a meköle thene la ate ka ngazo.” Satana Diabolo hi lai atr ka ngazo.—1 Ioane 5:19.

Hapeu, trotrohnine hë eö enehila la kepine matre ka jole catre e troa kuca la loi?— Pine laka easa mele ngöne la fene i Satana. Ngo hetre ketre kepine kö. Atre fe hi eö ka hape, nemen?— Hna qaja lo ngöne Mekene 23, laka hna hnaho së asë hi hnine la ngazo. Epi troa canga patre palua la ngazo me Diabolo memine la fene i angeic, ka loi fe kö koi eö la mekune cili?—

Hna thingehnaeane lo hnei Tusi Hmitrötr, ka hape: “Kola pate la fene hnengödrai.” Kolo lai a hape, tro asë hë a patre la itre atr ka xele ma xötrethenge la Atre Hamë Ini Ka Sisitria. Tha tro fe kö angatr a hane kapa la mele ka tha ase palua kö. Ngo atre fe hi eö, ka hape, drei la itre ka tro pe kö a mele epine palua?— Önine hmaca jë kö la Tusi Hmitrötr: “Troa cile huti epine palua la ate kuca la aja i Akötesie.” (1 Ioane 2:17) Eje hi laka, tro pe hi a mele epine palua ngöne la fene i Akötresie ka hnyipixe, lo itre atr ka kuca la loi, me ange ka “kuca la aja i Akötesie.” Haawe, epi tro pala hi sa kuca la loi ngacama jole ju hë.

E jë la itre xötre celë ka amamane la kepine matre jole catre e troa kuca la loi: Mataio 7:13, 14; Luka 13:23, 24; me Itre Huliwa 14:21, 22.

[Iatr ne la götran 137]

Nemene la itre akötre hna melëne hnei Paulo ngöne la nyidrëti a nyiqaane kuca la loi?

[Iatr ne la götran 138]

Pine nemene matre kola thele troa humuthi Iesu hnene la itre atr celë?

[Iatr ne la götran 141]

Maine troa patre elanyi la fene celë, nemene hë la ewekë ka troa traqa kowe la itre atr ka catre kuca la loi?