Mekene 23

Kepine Matre Tithi Së Jë Hnei Mec

HAPEU, hetre atr fe kö hnei eö hna atre hna tithi hnei mec?— Maine jë ase fe hë tithi eö hnei itre sine kucakuca. Hna hane löthi eö jë hnei hnötr, maine akötre hni pena. Ngo hetre itre atre kö ka tru mecin. Thatreine hmaca kö angatre troa mejë me cile cas. Hna melëne la pengöne cili hnene la itre xa qatre me qatre föe.

Pë ju pë hë atr tha hna tithi hnei mec. Ame koi eö, ke, hnauëne matre wezipo pi la itre atr, me qatre trotro uti fe hë la mec?— Hna traqa fë koi Iesu ngöne la ketre ijin, la ketre atr ka thatreine tro; ame e cili, nyidrëti a qaja ju la kepine matre wezipo pi me meci la itre atr. Tro sa ce wange la aqane trongene la ewekë cili.

Iesu a lapa ngöne la ketre uma ngöne la traon ezine la Hneopegejë Ne Galilaia. Traqa pi hi koi nyidrë la ka ala nyim. Tru catre hnei atr ka traqa, nge tha ijiji angatre hë troa lö kowe la uma; celë hi matre lapa tröne eë ju pë hë itre xan, nge pë fe hë gojenyi kowe la qëhnelö. Kolo pala hi a itraqa itronyi la ka ala nyim; traqa pi fe hi la foa lao atr kola xututhe trongëne hune igöhnë la genyi ca.

Ame koi eö, pine nemene matre traqa fë pi angatre koi Iesu la atre cili?— Pine laka xecie hnyawa koi angatr, laka tro Iesu a xatua angeic. Mejiune hnyawa hi angatre laka, tro nyidrëti a aloine la mec i angeic. Ngo tune kaa la aqane tro angatr a traqa fë la atre cili koi Iesu, nge kola ipepetrenyi la atr e hnine la uma?—

Mama hnyawa hi cahu ngöne iatr la hnei angatre hna kuca. Hnei angatre hna pane elë fë la wezipo kowe la hune uma. Thupene lai, angatre pë hë fe gojenyi angeice pi, me nuenue angeice ngöne la igöhne i  angeice koi Iesu. Mama hnyawa pi hi e celë la etrune la lapaune i angatr!

Sesëkötre ju hi la itre atr hnine la uma, la kola autine la atr ka genyi ca. Hapeu, wesitre kö Iesu pine la aqane huliwa i angatr?— Ohea. Nyidrëti pe a haine la ejuine la lapaune i angatr. Öni nyidrëti kowe la atr ka genyi ca, ka hape: “Ase hë nue tije la ite ngazo i ’ö.”

Ame thene la ka ala nyim, hnene la itre xan hna mekune ka hape, tha ijiji Iesu kö troa qaja la trenge ewekë celë. Tha kapa kö angatre ka hape, ijiji nyidrë troa senge la itre ngazo. Haawe, nyidrëti a amamane hnyawa ju koi angatre ka hape, ijiji nyidrëti hi; celë hi matre qaja ju nyidrëti kowe la genyi ca, ka hape: “Cilejë, xomejë fe la göhne i ’ö, nge tro jë kowe la uma i ’ö.”

 Thupene jë hi la hnei Iesu hna qaja la trenge ewekë cili, loi pi hi la meci angeic, ke, egöcatre hmaca ha la lue ca i angeic. Ame hnei angeice hna cile xome trongëne la göhne i angeic. Kola sesëkötre me igoeny me hai atraqatre la nöjei atr. Angatre petre hi a xötrei öhne la iamamanyikeu ka tune lai ngöne la mele i angatr. Celë hi matre atrunyi Akötresieti jë hnei angatr, me olene koi Nyidrë la hna upe koi angatre la Atre Hamë Ini Ka Sisitria ka atreine aloine la nöjei pengöne meci asë.—Mareko 2:1-12.

Nemene la ini hne së hna kapa qa ngöne la iamamanyikeu celë?— Kola ini së ka hape, eje thei Iesu la mene göi troa nuetrije la itre ngazo ne la atr, me amelene la itre trene mec. Ngo kolo mina fe a ini së la ketre ewekë ka sisitria catr. Ame laka wezipo pi së, tre, hnene la ngazo.

Itre ka hetre sine mecine asë hi së, hapeu tha nyine tro kö lai a qajaqaja ka hape, itre atr ka ngazo asë hi së?— Eje hi; kola qaja hnene la Tusi Hmitrötre ka hape, hna hnaho së hnine la ngazo. Hapeu, atre fe hi eö la aliene matre qaja jë ka hape, hna hnaho së hnine la ngazo?— Kola hape, hnaho së pë hë nge itre atr ka tha pexeje hë së. Hane hi lai kepine matre easa kuca xanëne la ngazo, ngacama tha ajane kö së. Ngo hnauëne kö laka hnaho së pë hë, nge itre ka tha pexeje hë?—

Hnei Adamu lo pane atr, hna xele ma drei Akötresie. Hnei angeice hna ena la wathebo i Nyidrë, nge hane jë fe hi së xeni pune la ngazo i angeic. Hnei nemene matre traqa pi la ewekë cili? Tro ni a pane qeje pengöne koi eö.

 Maine jë hnei eö hë hna öhne la ketre atr a sa falawa ngöne la ketre öl. Maine ka hetre ga hnyiwa ne la öl, nemene ju hë la pengöne la itre falawa hna sane hnine la öle cili? Tune kaa la mekuna i eö?— Tro lai a mama la ga hnyiwa ngöne la itre falawa hna sane ngöne la öle cili; öhne hi eö?—

Tro sa aceitunë Adamu memine la öle cili, nge easë la falawa. Ame ju hi la kola eni wathebo hnei Adamu, tre, hetre engazo i angeice ju hi. Mama pi hi la ethanyi angeic. Matre, ame la angeice a hnahone la itre matra i angeic, nemene ju hë la ewekë ka mama thei nyudreni asë?— Kolo ethanyine qaathei kem, nge pë hmaca kö ka pexej e nyudren.

Ngacama traqa ju hë la ketre nekönatr, a ka pexeje la nöjei götrane la ngönetrei nyën, ngo tro pala kö a eje thei nyën la itre sine kucakuca me mec.

Hetre itre atr ka tru sine kucakucane kö hui itre xan. Hapeu, ma qa ngöne jë laka tru catre kö la ngazo i angatr hui itre xan?— Ohea, itre hna hnaho së asë hi hnine la ngazo. Nge itre ka tha pexeje asë hi së. Haawe, tro ju hë së a catre trongëne la itre wathebo i Akötresie, maine tro ju hë së a neëne troa kuca la ewekë ka ngazo, ngo tro pala hi a tithi së asë hnei mec.

Ngo hnauëne kö laka, tru catre kö la hna tithe la itre xaa atr hnei mec hune la itre xan?— Nyimu kepine lai. Maine jë ka jinë xeni la nöje i angatr, maine pena hna xeni menu, nge tha xeni pe la itre hnyipi xen. Tune lo itre ka majemine xeni gato lapa me iji boobo. Maine pena itre ka hlë jidri angatr, matre tha pexeje hë la hna meköl. Ame itre xan, hnei angatre hna sixane la aqane heetr e drai hnötr. Nge ame itre  xan, itre ka hetre sine kucakucane hë la ngönetrei angatr, matre canga lepi angatre hi hnei mec.

Hapeu, tro kö elany a patre palua la itre mec, memine la ngazo ka eje the së?— Nemene lo hna kuca hnei Iesu kowe lo ka genyi ca?— Hnei nyidrëti lo hna senge trije la ngazo i angeic, me aloine la mec i angeic. Tro la itre ewekë celë a amamane koi së, la itre ewekë hnei Iesu hna troa kuca elanyi thatraqane la itre atr ka catre pala hi kuca la itre ewekë ka meköt.

Maine easa ajane tro Iesu a aloine la itre meci së elany, nyipi ewekë tro sa catre neëne me methinëne la thiina ka ngazo. E cile hë Iesu elanyi troa Joxu ne la Baselaia i Akötresie, hawe, tro hë nyidrëti a thepe së qa ngöne la ngazo. Tha tro kö la ngazo a aca patre ju hi, ngo tro pe eje a ae trootro uti hë la pë hnyawa. Nge e patre hnyawa ha la ngazo the së, pë hmaca kö tro sa wezipo me mec. Tro la trenge egöcatre a jilapa palua kö the së. Hane petre hi lai ketre mele elanyi ka lolo me ka tingeting!

Maine easa pi trotrohnine hnyawa la thangane la ngazo kowe la itre atr, e jë la Iobu 14:4; Salamo 51:5; Roma 3:23; 5:12; me Roma 6:23.

[Iatr ne la götran 123]

Nemene la hnei Iesu hna upe troa kuca hnene la atr ka genyi ca?

[Iatr ne la götran 124]

Nemene la ini hne së hna kapa qa ngöne la iamamanyikeu celë?

[Iatr ne la götran 125]

Hnauëne laka ame asë hi së, tre, hna jilapane hnene la ngazo?

[Iatr ne la götran 126]

Tro ha tune kaa la mele së elany, e patre hnyawa ha the së la ngazo?