Mekene 44

Loi e Tro La Itre Sinee Së a Hnimi Akötresie

AME la sinee, tre, kola qaja la atr hne së hna pi ithanata memin me ce tro memin. Celë hi matre nyipi ewekë catre tro sa iëne hnyawa la itre sinee së. Ame koi eö, ke drei la sinee së ka sisitria?— Iehova Akötresieti hi.

Ngo hapeu, ijije kö tro sa nyi sinee i Akötresie?— Eje hi, hnei Tusi Hmitrötre hna qeje Aberahama lo ketre atr ka mele ekö, ka hape, “enehmu i Iehova.” (Iakobo 2:23) Atre fe hi eö la kepine matre hë Aberahama jë, ka hape enehmu i Akötresie?— Öni Tusi Hmitrötr, hnei Aberahama hna drengethenge Akötresie. Ngacama hna traqa la itre xa ijine ka jol, ngo hnei nyidrëti hna catre trongëne pala hi la hnei Iehova hna qaja. Qa ngöne lai, maine easa ajane troa nyi enehmu i Akötresie, nyipi ewekë tro sa kuca la itre ewekë ka amadrinë Nyidrë, tune la aqane ujë i Aberahama memine lo Atre Hamë Ini Ka Sisitria.—Genese 22:1-14; Ioane 8:28, 29; Heberu 11:8, 17-19.

 Hnei Iesu hna qaja kowe la itre aposetolo i nyidrë, ka hape: “Maine tro nyipunie a kuca la nöjei ewekë hnenge hna ahnithe koi nyipunie, ite sinenge nyipunie.” (Ioane 15:14) Qaathei Iehova la itre hna amekötine celë hna qaja hnei Iesu, haawe, maine easa ajane troa nyi sinee i Iesu, loi e tro sa trongëne la hna qaja hnei Iehova. Celë hi matre, ame la nöjei sinee i Iesu asë, tre, ene lo itre atr ka hnimi Akötresie.

Ame la itre enehmu ne la Atre Hamë Ini Ka Sisitria, tre, kolo fe hi lo itre aposetolo i nyidrë (hna amamai angatre fe ngöne la götrane 75 ne la itusi celë). Itre sine tronge i nyidrëti angatr, me itre ka xatua nyidrë troa cainöje trootro. Ce Iesu pala hi me angatr. Angatr a ce xeni me ce qeje Akötresie, me ce kuca la itre huliwa ka isa pengön. Ngo hetre itre xa sinee i Iesu fe. Kolo itre hnei nyidrëti hna lapa then, me ce madrine memin.

Hetrenyi la ketre hnepe lapa hnei Iesu hna majemi catre kow. Itre ka lapa angatr e Bethania, nöje ezine la traone e Ierusalema. Hapeu, mekune hi eö lo lai hnepe lapa cili?— Kola qeje Maria me Maretha me Lazaro, xa i nyidro. Hnei Iesu hna hë Lazaro, ka hape, sinee i nyidrë. (Ioane 11:1, 5, 11) Ka tru catre la ihnim i Iesu kowe la köni trejine cili, nge ka epe catre  nyidrë koi angatr, pine laka itre ka hnimi Iehova catre angatr, me ka nyi hlue i Nyidrë.

Tha ka xele kö Iesu ma wange la itre atr ka tha hane kö nyi hlue i Akötresie, ke hnei nyidrëti hna hane tro fe kowe la itre hnalapa i angatr, me ce xeni me angatr. Celë hi matre qaja jë hnene la ka ala nyim ka hape, Iesu la “sine [ne] la nöjei telona me ite ka ngazo.” (Mataio 11:19) Ngo tha Iesu kö a tro koi angatr matre troa jele loine la mele i angatr. Ngo nyidrëti pe a trongene qeje Iehova koi angatr. Aja i nyidrë tro angatr a nuetrije la aqane ujë ka ngazo i angatr, me hane nyi hlue i Akötresie.

Hna traqa la ewekë ka tune lai e Ieriko, traone hna xötrëne hnei Iesu ngöne la nyidrëti a tro Ierusalema. Hna traqa la ka alanyim troa wai nyidrë, nge ame la ëjen la ketre e angatr, tre, Zakaio. Pine laka tiqa hnei atr la ijine cili, nge ka hopatre Zakaio, ene pe jole koi angeice troa öhnyi Iesu. Ame hnei angeice hna nyinyape ju, me elë hune la isinöe matre ijiji angeice troa öhne la kola tro hnei Iesu.

Traqa ha Iesu fene la isinöe, nge nyidrëti a gala jë draië me qaja koi Zakaio, ka hape: ‘Uti pi, lolo jë; ke eni a tro troa lapa hnine la uma i ’ö ngöne la drai celë.’ Ame pe Zakaio, tre, ketre atre trenamo angeic, nge nyimutre la itre ewekë ka ngazo hnei angeice hna kuca. Ngo hnauëne kö laka ajane jë Iesu troa tro kowe la hnalapa ne la atr cili?—

 Tha hnei Iesu kö hna wangaloine la aqane mele i angeic. Ngo nyidrëti a pi tro kowe la hnalapa i Zakaio, ke aja i nyidrë troa qeje Akötresie koi angeic. Öhne hi Iesu la aqane thele catrëne angeice troa öhnyi nyidrë. Celë hi matre, ame koi Iesu, ma tro jë hi Zakaio a drei nyidrë. Ijine ka ijije hi lai troa qeje pengöne koi angeice la mele ka ihmeku memine la aja i Akötresie.

Haawe, nemene hë la ewekë ka traqa e thupen? Nemene la hna amamane hnene caha iatr?— Ase hë ketri Zakaio hnene la itre ini hna hamëne hnei Iesu. Hnei angeice hna ietrane la itre huliwa ka ngazo hnei angeice hna kuca, me sisinyi ka hape, tha tro hmaca kö angeice a huliwa iaöne la itre atr, nge tro angeice a të hmaca la itre trengene manie hnei angeice hna xom qene ënön. Thupene lai, angeice a xötrethenge Iesu jë fe. Qane ju hi la drai cili, lue treme enehmun ka lolo hë Iesu me Zakaio.—Luka 19:1-10.

Maine easa pi xötrethenge la tulu ne la Atre Hamë Ini Ka Sisitria, hapeu, tro fe kö së lai a hane tro troa wange la itre atr, ngacama tha itre sinee së kö?— Eje hi. Ngo tha kolo kö lai a hape, easa wangaloine la aqane mele i angatr, me jele loine la itre huliwa ka ngazo i angatr. Ame la kepine matre tro pi së troa wange la itre atr cili, tre göi troa qeje Akötresie koi angatr.

 Ame la itre nyipi enehmu së, tre, kolo itre atr hne së hna ce imelekeu hnyawa memin. Nge ame la enehmu nyine imelekeu hnyawa memin, tre, ene la atr hna pi wange hnei Akötresie. Ame la itre xa atr, thatre Iehova kö hnei angatr. Ngo e pi tro angatre a hane atrepengö Nyidrë, haawe, ijije hi tro sa xatua angatr. Nge e hnimi Iehova fe hë hnei angatr, tune la aqane hnimi Nyidrë hne së, haawe, ijije hë tro sa itre treme sineen ka lolo.

Atreine hi tro sa atrepengöne hnyawa la enehmu ka lolo; qa ngöne la hne së hna goeëne la aqane ujë i angeic. Hapeu, hnei angeice kö hna qenahmone la itre xa atr, matre troa hnyimasai angatr? Tha ka loi pi kö la aqane ujë cili, tune kaa fe la mekuna i eö?— Hapeu, angeice kö a thele ikucany memine la itre xan?— Eje hi laka, tha pi tro fe kö eö a hane lö hnine la aqane ujë ka ngazo cili. Maine pena angeice a qenahmo catr, ke pë pala kö atr ka öhnyi angeice e kuca la itre ewekë ka ngazo. Ngacama tha öhne kö hnei atr, ngo öhne hi Akötresie, ke pëkö ka sihngödri koi Nyidrë; eö fe hi a hane mekune tune lai?— Tro fe koi eö a nyi enehmun la itre atr ka tune lai?—

Tro sa pane ce wange ngöne la Tusi Hmitrötr la aqane huli së hnene la itre atr hne së hna nyi sineen. Xome jë la 1 Korinito mekene 15 xötre 33. Hapeu, öhne hë eö la xötre cili?— Kola qaja ka hape: “The iaö nyipunieti kö; ithanata ka ngazo la ate angazone la thina ka loi.” Kola amamane hnyawa hnene la xötre celë laka, e ce tro hë së memine la itre atr ka ngazo thiina, haawe, tro fe hë a hane ngazo la thiina së. Ngo maine tro sa ce tro memine la itre atr ka lolo thiina, tro hë lai a xatua së troa kuca la itre hna majemine ka lolo.

Epi tro pala hi Iehova a sisitria ngöne la mele së. Tha ajane kö së troa apatrene la aqane imelekeu së me Nyidrë, tune kaa fe la mekuna i eö?— Haawe, loi e tro pala hi sa iëne hmekuje hi la itre atr ka hnimi Iehova, matre nyine sinee së.

Hanawange la itre xa xötre ka amamane la enyipiewekëne la troa hetre enehmu ka lolo: Salamo 119:115; Ite Edomë 13:20; 2 Timoteo 2:22; me 1 Ioane 2:15.

[Iatr ne la götran 227]

Pine nemene matre hna hë Aberahama, ka hape, “enehmu i Iehova”?

[Iatr ne la götran 228]

Pine nemene matre pi tro catre Iesu ekö a tro troa wange la hnepe lapa celë e Ierusalema? Atre fe hi eö la itre ëje i angatr?

[Iatr ne la götran 229]

Pine nemene matre elë jë Zakaio hune la isinöe celë?

[Iatr ne la götran 230]

Pine nemene matre hnei Iesu hna tro troa lapa thei Zakaio, nge nemene la hnei angeice hna sisiny troa kuca?