Mekene 37

Meku Iehova Jë Memine La Hupuna i Nyidrë

MAINE jë hnene la ketre sinee i eö hna hamë eö la ketre ahnahna ka lolo. Nemene ju hë la nyine tro eö a kuca?— Hapeu, ase jë hi eö olen, nge thupene lai tha meku angeice hë hnei eö? Maine pena thatreine kö eö thëthëhmi angeice memine la hnei angeice hna kuca?—

Hetre ahnahna ka sisitria catr hnei Iehova hna hamëne koi së. Hnei Nyidrëti hna upe la Hupuna i Nyidrë matre troa meci pi së e celë fen. Atre fe hi eö la kepine matre nyipi ewekë tro Iesu a meci pi së?— Nyipi ewekë catre tro sa trotrohnine hnyawa la mekune celë.

Tune lo hne së hna inine ngöne la Mekene 23, hnei Adamu hna ena lo wathebo ka pexeje i Akötresie. ge pine laka angeice la pane keme së asë, haawe, easë asë hi a xeni pune la ngazo i angeic. Haawe, ame koi eö, nemene hë la ka nyipi ewekë koi së?— Ene la tro sa hetrenyi la ketre keme ka hnyipixe, atr ka hetrenyi la mele ka pexej, nge atre troa mele e celë fen. Nge drei koi eö lai keme ka hnyipixe?— Iesu.

Hnei Iehova hna upi Iesu troa nyihna i Adamu e celë fen, matre nyine keme së. Kola qaja hnei Tusi Hmitrötr, ka hape: “Hna xupi Adamu ate hnapane nyine u ka mel ; ngo Adamu hnapine la u ne iamele.” Drei lai Adamu hnapan?— Eje hi, kolo pane atr hnei Akötresieti hna xupe qa ngöne la hnadro. Nge drei la Adamu hnapin?— Iesu hi. Hna amamane hnyawa lai hnene laTusi Hmitrötre, kola hape: “Qa la fene la ate hnapan [Adamu], ate hnadro ; nge celati hnengödrai la ate hnaaluen [Iesu].”—1 Korinito 15:45, 47; Genese 2:7.

Hnei Akötresieti hna xome la mele i Iesu lo nyidrëti petre kö e koho hnengödrai, me amë hnine la trengene hnaho i Maria, celë hi matre, tha hna ketri nyidrëti fe kö hnene la ngazo i Adamu. Haawe, atr ka pexeje kö Iesu. (Luka 1:30-35) Ame ngöne lo ijine kola hnaho Iesu, önine jë hi la angela  kowe la itretre thupë mamoe, ka hape: “Hna hnahone thatraqai nyipunie ngöne la drai celë . . . la Ate iamele.” (Luka 2:11) Medrenge petre kö Iesu ngöne la ijine cili. Ngo nemene la nyine tro nyidrëti a kuca, matre troa Atre amele së?— Loi e tro nyidrëti a pane tru trootro, matre traqa pi kowe la thupëtresiji tui Adamu. Nge amë hë e cili, ijijë hë tro nyidrë a nyi ‘Adamu hnaaluen.’

Tha Iesu hmekuje kö a troa Atre iamele, ngo tune lo hna qaja hnei Tusi Hmitrötr, tro fe nyidrëti a nyi “Keme [së] ka epine palua.” (Isaia 9:6, 7) Atre ka pexeje Iesu, celë hi matre ijiji nyidrë troa nyihna i Adamu lo atre eni wathebo. Haawe, ijiji së hë troa ië Iesu nyine ‘Adamu hnaaluen’ matre nyine keme së. Ngo the thëthëhmine pi kö së laka, Iesu hi lo Hupuna i Iehova Akötresie.

E tro sa thele troa atrepengöi Iesu, easë hi lai a kepe nyidrë ceitu me Atre iamele. Mekune pala kö eö lo ewekë nyine troa thepe së qa ngön?— Nyipi ewekë troa thepe së qa ngöne la ngazo me mec, lo hne së hna xeni pune qaathei Adamu. Celë hi matre, nue pi Iesu la mele i nyidrë ka pexej, matre troa amele së. Kolo mele lai hnei nyidrëti hna huujën, hna hëne ka hape, thupene mel. Iehova a hamëne la thupene mele cili, nyine köletrije asë la itre ngazo së.—Mataio 20:28; Roma 5:8; 6:23.

Epi the tro kö sa thëthëhmine la hnei Akötresie memine la Hupuna i Nyidrë hna kuca koi së, tune kaa fe la mekuna i eö?— Hnei Iesu hna amamane kowe la itretre drei nyidrë la nyine tro angatr a kuca, matre tha tro kö a thëthëhmine la ewekë cili. Tro sa pane ce ithanatane lai.

Pane mekune jë eö, ka hape, eö fe e Ierusalema hnine la ketre uma ngöne la hnahage  götrane koho. Jidri hë. Iesu ju pe hi memine la itre aposetolo i nyidrë a lapa kanoth la laulau. Hna amë qëmeke i angatre la ketre nekö i mamoe hna dreuth, me itre falawa me waina. Angatr a troa sine la ketre pui ne xeni ka sisitria. Atre fe hi eö la aliene lai?—

Kola amekunëne hnene la pui ne xeni cili, la hnei Iehova hna kuca ekö kowe la angetre Isaraela, ene lo nöje i Nyidrë hna thahluëne e Aigupito. Ame ngöne la ijine cili, hnei Iehova hna qaja koi angatr, ka hape: ‘Tro la itre lapa a humuthe la isa ca nekö i mamoe, me xome la madra me thathane eje ngöne la itre hune qëhnelö.’ Thupene lai, öni Nyidrëti ka hape: ‘Isa lapa hnalapane ju, nge öni hnyawa jë la nekö i mamoe.’

 Hnene la angetre Isaraela hna drengethenge Iehova. Nge ngöne la jidri cili, kola tro kanöthe la nöje Aigupito hnene la angela i Akötresie. Angeic a xötrëne la itre hnalapa, matre troa humuthe la itre pane nekö i angetre Aigupito. Öhne hë angeice la itre hune qëhnelö la madra hna thathan, angeic a tro sasaithe ju. Tha hnei angeice kö hna humuthe la itre nekönatr ngöne la itre hnalapa cili. Traqa ju hi la xou atraqatre koi Farao joxu ne Aigupito, pine la itre ewekë hna kuca hnene la angela i Iehova. Celë hi matre qaja ju Farao kowe la angetre Isaraela, ka hape: ‘Cilejë, tropi qa Aigupito!’ Nge angetre Isaraela hi lai a canga hnëkëne jë la itre kamela me itre boliko i angatr, me canga kötre pi qa lai.

Ame la aja i Iehova, tre, tha tro kö la angetre Isaraela a thëthëhmine la aqane thepe angatre hnei Nyidrë. Qa ngöne lai, öni Nyidrëti ka hape: ‘Ame ngöne la nöjei macatre, tro pala hi nyipunieti a kuca la pui ne xeni celë.’ Hnei angatre hna hëne la pui ne xeni ka sisitria cili, ka hape, Paseka. Atre fe hi eö la kepin?— Pine laka ame ngöne la jidri cili, hnene la angela i Akötresie hna “tro shashaithe” la itre uma hna thathane hnei madra.—Esodo 12:1-13, 24-27, 31.

Kolo itre ewekë lai hna lapa mekune hnei Iesu memine la itre aposetolo i nyidrë, lo angatr a xeni la pui ne xeni ne la Paseka. Qëmekene tro nyidrëti a kuca la ketre ewekë ka sisitria, hnei nyidrëti hna pane helë Iudra, lo aposetolo ka iwanaxoeë. Thupene jë hi lai, xome jë hi nyidrë la falawa, me thithi me thupathupa, me hamëne kowe la itretre drei nyidrë. Öni nyidrë: “Xomejë, xeniju.” Thupene lai, nyidrëti a qeje pengöne ju ka hape: ‘Ame la falawa celë, tre, eje a nyihatrene la ngönetreing hna troa hujëne thatraqai nyipunie.’

Iesu a xome pena ju la waina. Thupene la hnei nyidrëti hna thith, nyidrëti a hamëne jë kowe la itretre dreng, me hape: “Ijijë nyipunie asë.” Thupene lai, nyidrëti a qaja hmaca jë ka hape: ‘Ame la waina celë, tre, eje a nyihatrene la madrang. Easenyi hë matre nenge pi ni la madrang, matre troa sei nyipunie qa ngöne la itre ngazo i nyipunie. Catre jë kuca la ewekë celë nyine mekune koi ni.’—Mataio 26:26-28; 1 Korinito 11:23-26.

Öhne hë eö lai?— Hnei Iesu hna upe la itretre drei nyidrë troa kuca tun, matre tha tro kö angatr a thëthëhmi nyidrë?— Tha tro hmaca kö angatre a  atrune la pui ne xeni ne la Paseka. Ngo tro pe angatr a kuca e nöjei macatre, la pui ne xeni ka sisitria celë, matre tha tro kö angatr a thëthëhmi Iesu, memine la mec i nyidrë. Ame la pui ne xeni cili, tre, hna hëne ka hape, Jidri Ne Pui Ne Xeni Ne La Joxu. Ngo ame enehila, hna majemine hëne lai, ka hape, Drai Ne Amekunën. Pine nemen?— Pine laka ej a amekunë së la hna kuca thatraqai së hnei Iesu memine la Tretretro i nyidrë, ene Iehova Akötresie.

Ame la falawa, tre, ej a amekunë së la ngönetrei Iesu. Eje thei Iesu la hni ne ajane troa huujëne la mele i nyidrë, matre troa aijijë së troa hetrenyi la mele ka tha ase palua kö. Nge tune kaa fe lo waina?— Ej a amekunë së la enyipiewekëne la madra i Iesu. Ka sisitria catre kö la madra i nyidrë hune la madra ne lo neköi mamoe hna huujëne ngöne lo ijine Paseka e Aigupito. Atre fe hi eö la esisitrian?— Tusi Hmitrötr a qaja ka hape, ijije hi troa senge la itre ngazo së hnene la madra i Iesu. Nge ame hë elanyi la kola troa köletrij asë la itre ngazo së, tre, tro ha patre la itre sine mec, nge tha tro hmaca kö a qatre trootro me mec. Loi e tro sa lapa mekune la itre ewekë cili ngöne la easa sine la Drai Ne Amekunën.

Hapeu, ame la nöjei atr asë ka sine la Drai Ne Amekunën, tre tro kö angatr asë a xeni la falawa me iji la waina?— Hnei Iesu hna qaja kowe la itre atr ka troa xeni me ij, ka hape: ‘Tro nyipunieti a sine la baselaiang, me ce lapane me eni la itre therone ka eje e koho hnengödrai.’ (Luka 22:19, 20, 30) Kola qaja hnyawa e celë, ka hape, ame la itre atr cili, tre, angatr a troa ce musi me Iesu e hnengödrai. Qa ngöne lai, tro hmekuje hi a xeni la falawa me iji la waina, hnene la itre atr ka mejiune troa ce mele me Iesu e koho hnengödrai.

Ngacama itre ka tro së a xeni me ij, maine ka tha tro pena kö, ngo nyipi ewekë tro asë hi sa sine la Drai Ne Amekunën. Atre fe hi eö la kepine lai?— Pine laka hnei Iesu hna hamëne la mele i nyidrë kowe la nöjei atr asë. Nge koi së mina fe. Haawe, ame la easa sine la Drai Ne Amekunën, tre easë hi lai a amamane laka tha thëthëhmine kö së la mekune cili. Easë pala hi a lapa mekune la ahnahna ka sisitria hna hamëne koi së hnei Akötresie.

Hanawange la itre xa xötr ka amamane la enyipiewekëne la mele hna huujëne hnei Iesu: 1 Korinito 5:7; Efeso 1:7; 1 Timoteo 2:5, 6; me 1 Peteru 1:18, 19.

[Iatr ne la götran 193]

Nemene la mekune ka aceitunë Adamu me Iesu, nge pine nemene matre mekune ka nyipi ewekë catre lai?

[Iatr ne la götran 194]

Hnene la madra ne la nekö i mamoe hna thupëne la nöje Isaraela qa ngöne nemen?

[Iatr ne la götran 194]

Nemene la manathithi hne së hna kapa qa ngöne la madra i Iesu, lo hna nyihatrene hnene la waina?