Mekene 34

Nemene Ju Hë La Pengö Së e Meci Pi Së?

ATRE hnyawa ha eö, laka, itre ka tro asë hi sa qatre trootro, me wezipo, me mec. Ketre tune mina fe la itre nekönatr. Ngo hapeu, tro kö sa xouene la mec, maine tro pena a xouene la ketre atr ka mec?— Atre fe hi eö la pengö së e meci pi së?—

Ame enehila, pëkö ketre atr e celë fen hna amelene hmaca qa hna mec. Ngo ase hë traqa tun kowe la ketre atr ngöne lo hneijine i Iesu, ene lo Atre Hamë Ini Ka Sisitria. Tro la pengö i angeic a amamane koi së la ewekë ka traqa e meci pi së. Ketre sinee i Iesu hi la atr cili. Atre Bethania angeic, ketre traon e Ierusalema. Lazaro la ëjene la atr cili, nge Maria me Maretha la lue ëjene la lue ifaxa i angeic. Hanawange la aqane qeje pengöi Lazaro hnene la Tusi Hmitrötr.

Ame ngöne la ketre drai, tithi Lazaro jë hi hnene la ketre meci ka tru. Nanyi pena Iesu qa ngöne la traone cili, celë hi matre iupi fë maca jë hi hnei Maretha me Maria troa qaja koi nyidrë, ka hape tru hë la kucakuca i Lazaro. Nge ka xecie hnyawa e kuhu hni nyidro laka, atreine hi Iesu troa aloine la meci ne la xa i nyidro. Ngacama thaa droketre kö Iesu, ngo eje thei nyidrë la mene i Akötresieti troa aloine la nöjei pengöne mec.—Mataio 15:30, 31.

Ngazo pe, ame hë la Iesu a hnëkë troa iwai, hace catre fe hë la mec i Lazaro, nge meci ju fe kö angeic. Ngo Iesu a qaja ju kowe la itretre drei nyidrë, ka hape, Lazaro a meköl, nge nyidrëti a tro troa ahlë angeic. Tha trotrohnine hnyawa kö la itretre dreng, la aliene la ithahnata i Iesu, ene pe öni nyidrëti ju koi angatre ka hape: “Meci hë Lazaro.” Nemene la hna amamane koi së göne la mec?— Ceitune hi la atr ka mec memine la atr ka hmulizië me thatre hnyawa koilo.

 Traqa ha Iesu thei Maretha me Maria, nge ka tiqa hnyawa la hnalapa i nyidro hnene la itre atr; angatr a traqa troa akeukawanyi nyidro. Atre jë hi Maretha ka hape traqa ha Iesu, nge canga nyenyape pi nyiidro troa wai nyidrë. Traqa pë hë Maria, e thupen. Tru la utipine i Maria, ene pe kei ju hi nyiidro kowe la lue ca i Iesu, me treij. Ame lo itre xa atr ka xötrethenge Maria, tre, ketre angatre fe a hane treij.

Kola hnyingëne hnene la Atre Hamë Ini Ka Sisitria la hui Lazaro. Ene pe tro sai nyidrëti jë kowe la ngönemenyi hna meköle hnei Lazaro. Ame la Iesu a goeëne la kola itreijenyi la itre atr, ene pe treije jë fe hi nyidrë. Trotrohnine hnyawa hi nyidrë la ehacene la troa meci triji së hnene la atr hne së hna hnim.

Hna nyi ithingene la ngönemenyi hnene la etë, celë hi matre öni Iesu jë: “Xomepi la etë.” Hapeu, tro kö angatre lai a huletrije la etë?— Nango jole koi Maretha. Öni nyiidro ka hape: “Joxu, pi hë angeic, ke eke pui angeicë hë.”

Ngo hnei Iesu hna sa koi nyiidro, ka hape: “Tha hnenge hna qaja koi nyipo, ka hape, Maine tro nyipoti a lapaun, tro nyipoti a öhne la lolo i Akötesie ?” Iesu hi la a thuemacanyi Maretha ka hape, nyiidro enehila a troa sine la ketre ewekë ka troa atrunyi Akötresie. Nemene la hnei nyidrëti hna troa kuca? Thupene jë hi la hna huletrije la etë, Iesu hi lai a thithi jë koi Iehova. Nge ase hë lai, nyidrëti a hë catre jë, me hape: “Lazaro fe, löpi !” Hapeu, tro jë kö Lazaro a lö trön eë? Atreine jë kö angeic?—

Nge tune kaa eö, atreine fe kö eö ahlëne la atr ka meköl?— Eje hi, maine tro sa hëne catrë angeic, tro hë angeic a hlë. Ngo atreine kö eö troa ahlëne la atr ka meci hë?— Ohea. Sue ju hë eö, ngo thatreine jë pi kö angeice lai troa dreng. Ame enehila, pëkö ketre atr e celë fen ka atreine troa ahlëne la atr ka meci hë.

Tha ceitu kö me Iesu. Hetre mene ka sisitria hnei nyidrë hna kapa qaathei Akötresie. Celë hi matre, ame ju hi la nyidrëti a hë Lazaro, ene pe mama pi hi la ewekë nyine hain. Kola lö pi lo atr ka meci hë qane hë lo  foa lao drai. Mele hmaca ha angeice qa hna mec! Angeice hmaca ha a mano, me tro me ithanata! Nyipici, hnei Iesu hna amele Lazaro hmaca qa hna mec.—Ioane 11:1-44.

Ame enehila, loi e tro sa pane mekune ka hape: Nemene la pengö i Lazaro lo meci hë angeic? Hapeu, hetrenyi kö la ketre götrane la ngönetrei angeic, hna hape u ka lö triji angeic, me mele pe kö? Hapeu, qa i Lazaro kö e hnengödrai? Ame ngöne lo lai foa lao drai, hapeu, qai Lazaro kö thei Akötresie me itre angela i Nyidrë?—

Ohea. Mekune hi eö lo hna qaja hnei Iesu, öni nyidrë Lazaro a meköl. Nemene la pengö i eö ngöne la eö a meköl? Maine ka hmulizië eö, goi pë fe ca ewekë hnei eö hna dreng, tune kaa la mekuna i eö?— Nge maine troa ahlë eö, goi thatre fe eö, ka hape, ije hawa ne mekölë hë eö.

Ceitune hi lai memine la itre atr ka meci hë. Pëkö ca ewekë hnei angatre hna atre. Pëkö hna atreine dreng. Nge ketre, pëkö ketre ewekë hnei angatre hna atreine kuca. Celë hi lai pengö i Lazaro ngöne lo angeic a mec. Kola aceitunëne la atr ka meci memine la atr ka hmulizië, laka, pëkö ewekë hnei angeice hna atreine kuca. Kola qaja hnei Tusi Hmitrötr  ka hape: “Tha ’te kö la kete ewekë hnei ite ka meci hë.”—Ate Cainöj 9:5, 10.

Pane ce wange jë së la mekune celë: Maine qa i Lazaro ju hnengödrai ngöne lo foa lao drai, canga tro hi angeice lai a qeje pengöne la mele e cili kowe lo itre atr, tune kaa la mekuna i eö?— Ketre mina, maine Lazaro ju e hnengödrai, tro jë kö Iesu lai a xome abëekë angeice hmaca qa ngöne la götrane ka lolo kowe la fen?— Ohea!

Ngo ala nyimu catre pala kö la itre ka mekune ka hape, hetre u së, nge angatre fe a qaja ka hape, ka mele pe kö eje ngöne la kola meci la atr. Ame koi angatr, mele pe kö la u i Lazaro. Ngo tha celë kö la hna qaja hnei Tusi Hmitrötr. Eje pe a qaja ka hape, ame la Akötresieti a xupi Adamu lo pane atr, ene pe “u ka mele” pi angeic. Kolo lai a hape, ame Adamu, tre, u. Ketre, Tusi Hmitrötre fe a qaja ka hape, meci hë Adamu pine laka hnei angeice hna eni wathebo. Ketre “[“u,” MN] ka mec[i]” hë angeic, nge bëeke hmaca ha angeice kowe la xaxau, lo hna xomi angeice qa ngön. Nge kolo mina fe a qaja hnei Tusi Hmitrötr, ka hape, hna xeni pune la ngazo me meci hnene la itre matra i Adamu.—Genese 2:7; 3:17-19; Numera 6:6; Roma 5:12.

Kola mama hnyawa e celë, laka, ame la u, tre, thaa ketre ewekë kö hne së hna hetreny, laka, ijije tro ej a isa tro memine la ngönetrei së. Itre u asë hi së. Nge pine laka itre ka xeni pune asë hi së la ngazo i Adamu, haawe,  kola qaja hnei Tusi Hmitrötre ka hape: ‘Troa meci la [“u,” MN] ka kuca la ngazo.’—Ezekiela 18:4.

Nyimutre la itre atr ka xouene la itre ka mec. Goi xou i angatre fe ma tro ezine hna kele wezipo. Kola mekune ka hape, tro la itre u ne la itre ka meci a lö trije la itre ngönetrei, me tro troa akötrëne la itre ka mel. Ngo hapeu, atreine kö tro la atr ka meci hë a hane akötrëne la atr ka mel?— Ohea, thatreine kö.

Kola mekune hnene la itre xan, ka hape, kola bëeke hmaca la itre ka mec ceitu me itre ua, matre troa pane iöhnyi hmaca memine la itre ka mel. Celë hi matre nyimutre la itre atr ka nango ami xeni ngöne la hna kele wezipo. Ngo ame la itre atr ka ujë tune lai, tre, kolo itre ka thaa lapaune kö kowe la hnei Akötresieti hna qaja göi itre ka mec. Ke maine ka lapaune ju angatre kowe la trengewekë i Nyidrë, eje hi lai laka thaa tro hë angatr a xouene la itre ka mec. Nge maine ka hetre hni ne ole së koi Iehova pine la hnei Nyidrëti hna hamëne koi së la ahnahna ne mel, haawe, tro hë sa catre kuca la itre ewekë ka amadrinë Nyidrë.

Ngo eö fe kö a pi atre ka hape: ‘Tro kö Akötresieti elanyi a amelene hmaca la itre nekönatr qa hna mec? Hapeu, ka ihmeku kö la mekune celë memine la aja i Nyidrë?’ Tro pë hë sa ce ithanatane lai ngöne la mekene ka troa xulu.

E jë la itre xötre celë ka qeje pengöne la u, memine la pengö së ngöne la easa mec: Salamo 115:17; 146:3, 4; me Ieremia 2:34.

[Iatr ne la götran 179]

Nemene la hnei Iesu hna kuca koi Lazaro?

[Iatr ne la götran 180]

Nemene la pengö i Lazaro ngöne lo angeic a mec?

[Iatr ne la götran 181]

Pine nemene matre tha tro pi kö eö a xouene la itre ka mec?