Mekene 45

Nemene La Baselaia i Akötresie? Easë Kö a Lapa Treqen?

ATRE fe hi eö lo thithi hnei Iesu hna inine kowe la itretre drei nyidrë?— Maine thatre kö eö, tro nyiso a ce xome ngöne la Tusi Hmitrötr la tusi Mataio 6:9-13. Kolo hna hape, Thithi Ne La Joxu, nge eje e celë la trenge ewekë hna hape: “Jiniati e hlepëtipi la baselaia i enëtilai.” Atre fe hi eö, ka hape nemene la Baselaia i Akötresie?—

Ame ngöne la itre xa nöj, kola elemekene la musi hnene la joxu; ame pena itre xa nöj, ke perezida. Maine kola cilëne la musi hnei joxu, kola hëne la hna nyijoxu cili, ka hape, baselaia. Haawe, nemene la aqane tro sa hëne la atre cilëne la mus i Akötresie?— Joxu. Hane hi lai kepine matre easa hëne la mus i Akötresie, ka hape “Baselaia.”

Atre fe hi eö ka hape, drei la hnei Akötresieti hna iëne nyine Joxu ne la Baselaia i Nyidrë?— Iesu Keriso, lo Hupuna i Nyidrë. Qa ngöne nemene matre ka sisitria catre kö Iesu hune la nöjei joxu hna acile hnei atr?— Pine laka tru la ihnim i Iesu koi Iehova, Tretretro i nyidrë. Nge ka kuca pala hi nyidrë la itre ewekë ka meköt.

 Hnaho Iesu pë hë e Bethelema, nge ase hë ahnithe amë ekö hnene la Tusi Hmitrötr, nge ase fe hë ië nyidrë hnei Akötresie troa Joxu. Hna qaja ha lai ngöne la tusi Isaia 9:6, 7, ka hape: “Hna hnahone thatraqai shë la nekönat, hna hamë shë la nekö trahmany, nge troa eje hune la lue hnaiape i nyidë la mus ; nge troa ati atesiwa i nyidë . . . Tixe ne tingeting. Tha tro kö a nyi pune troa kekë la musi me tingetinge i nyidë.”— Bible de Darby.

Atre fe hi eö la kepine matre hëne jë e celë la Atre cilë mekene la Baselaia i Akötresie, ka hape, “Tixe”?— Pine laka ame la tixe, tre, kola qaja la nekö i joxu. Nge ame Iesu, ke, nyidrëti la Neköne la Joxu Ka Sisitria, ene Iehova. Nge hna acili nyidrë hnei Iehova troa Joxu ne la Baselaia, nge tro nyidrëti a musi kowe la fene hnengödrai uti hë la pune la itre macatre ka ca thauzan. (Hna Amamane 20:6) Ase jë hi Iesu bapataiso, nge nyidrëti a qane ju “troa cainöj, ka hape, Ietraju nyipunie, ke eashenyi hë la baselaia ne hnengödrai.”—Mataio 4:17.

Ame la mekuna i eö, hnauëne laka qaja jë Iesu kowe la itre atr, ka hape, easenyi hë la Baselaia?— Pine laka ce angatre hi ngöne la ijine cili memine la Joxu ka troa musi elanyi e hnengödrai. Hane hi lai kepine matre qaja jë nyidrëti koi angatr, ka hape: “Eje nyipi nyipunie la baselaia i Akötesie.” (Luka 17:21) Maine ce eö ju fe me angatre ngöne la ijine cili, ke aja i eö kö troa easenyine la Joxu hnei Iehova hna acil, me ketri nyidrë?—

Ngo nemene lo huliwa ka sisitria hna ahnithe koi Iesu troa kuca e celë fen?— Öni Iesu e sa ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena ; ke hna upi ni thatraqane lai.” (Luka 4:43) Pine laka thatreine kö tro Iesu a kuca casine la huliwa ne cainöje cili, haawe, nemene la nyine tro nyidrëti a kuca?—

Hnei Iesu hna xome la itre xa atr nyine nyi sine huliwa i nyidrë, me amamai angatre la aqane cainöj. Hnei nyidrëti hna nyiqane iëne la 12 lao aposetolo. (Mataio 10:5, 7) Ngo tha angatre hmekuje kö la hnei nyidrëti hna inin. Tusi Hmitrötr a qaja ka hape, hnei Iesu mina fe hna inine la itre xa atr matre troa hane cainöj. Ame ngöne la ketre ijin, hnei nyidrëti hna icasikeu memine la ala 70 lao itretre dreng,  me thewe angatre troa tro isa ala lue troa cainöj. Nge nemene la nyine tro angatr a qaja kowe la itre atr?— Öni Iesu ka hape: “[Tro jë] qaja koi angat, ka hape, Eashenyi hë koi nyipunie la baselaia i Akötesie.” (Luka 10:9) Haawe, jëne la aqane huliwa cili, ijije kowe la nöjei atr asë troa atrepengöne la Baselaia i Akötresie.

Ame ekö ngöne lo hneijine i angetre Isaraela, tro la itre joxu hna xötrei acil a tithe la asina, matre troa mama kowe la nöj. Hnei Iesu hna kuca la ewekë cili ngöne la drai ne traqa tixenuë nyidrë e Ierusalema. Kolo hi lai a amamane ka hape, nyidrëti la Joxu ne la Baselaia i Akötresie. Ngo hapeu, hna kepe nyidrëti kö hnene la itre atr, ceitu me Joxu?—

Kola amamane hnyawa hnene la iatr, laka, ame la kola lö hnei Iesu kowe la nöj, hnene la ka ala nyimu hna seluthe trongëne e kuhu gojenyi la itre ixetre i angatr. Hnei itre xane fe hna sa la itre ipicine sinöe, me kuiën hnadro eë. Mama hnyawa pi hi laka, aja i angatre tro Iesu a Joxu. Öni angatre jë hi e sue ka hape: “Manathithi la Joxu kola hlepëti ngöne la atesiwa i Iehova!” Ngo tha madrine kö lo itre hene ne hmi, ke öni angatre koi Iesu: ‘Sawa ju la itretre drei cilie.’—Luka 19:28-40.

Thupene jë hi la faifi lao drai, kola xolouthi Iesu, me xomi nyidrëti ju fe kowe la ketre uma ka tru, matre troa cile qëmeke i Ponetio Pilato. Ame e cili kola qaja hnene la itre ithupëjia me Iesu ka hape, Iesu a selë nyidrëti kö, me thele troa thapa la hna nyi joxu me icilekeu memine la mus i angetre Roma. Qa ngöne lai hnei Pilato hna upi Iesu troa qejepengöne la ewekë cili. Iesu a amamane hnyawa jë koi nyidrë, laka, tha aja i Iesu kö troa thapa la mus i angatr. Öni nyidrëti koi Pilato, ka hape: “Tha qa kö la fene la baselaiang.”—Ioane 18:36.

Ame hna lö pi hnei Pilato qa hnine la uma troa thuemacane la ka ala nyim, ka hape, pëkö ngazo i Iesu. Ngo tha ajane kö hnei angetre Iudra tro Iesu a Joxu. Ketre, tha pi tro kö angatr a nue nyidrë. (Ioane 18:37-40) Pilato a ithanata hmaca ju me Iesu; nge mama hnyawa pi hi koi nyidrëti ka hape, pëkö ewekë ka ngazo hnei Iesu hna kuca. Ase jë hi lai, ce lö pi Pilato me Iesu kowe la ka ala nyim, me qaja koi angatre ka hape: “Hana wange la Joxu i nyipunie !” Ngo öni angatr asë jë hi e sa, ka hape: “Xomejë, xomejë, [“athipi nyëne jë ngöne la sinöe,” MN].”

 Hnyingëne jë hi Pilato koi angatr, ka hape: “Tro ni a [athipe] la Joxu i nyipunie [ngöne la sinöe]?” Önine jë hi la itre tane i angetre huj: “Pëkö xa joxu hun, ngo Kaisara hi.” Öhne fe hi eö lai aqane pë hni ne la itretre huje celë ka ngazo thiinan, angatre hnyawa hi la ka ukune la nöje troa icilekeu me Iesu!—Ioane 19:1-16.

Ceitune hnyawa hi la aqane ujë ne la itre atr ekö me enehila. Tha ajane kö la ka alanyim tro Iesu a Joxu i angatr. Ngacama angatr a lapaune koi Akötresie, ngo xele kö angatre tro Akötresieti me Iesu a musi hui angatr. Pi tro catre pala kö angatr a lapa qale kowe la itre musi ne fen hnei angatre hna sipu acil.

 Nge tune kaa fe së? Ame la easa atrepengöne la Baselaia i Akötresieti me itre ewekë ka lolo hnene eje hna troa kuca elany, hapeu, ka tru fe kö Akötresieti e kuhu itre hni së?— Nyipici, tru la ihnim i së koi Nyidrë, nge tune kaa fe eö?—Tro sa amamane tune kaa la ihnim i së koi Akötresie, me aja së troa lapa fene la Baselaia i Nyidrë?—

Mama pi hi la ihnim i së koi Akötresie, e tro sa xötrethenge la tulu i Iesu. Hnei Iesu hna amamane tune kaa la ihnim i nyidrë koi Iehova?— Öni nyidrëti ka hape: “Ini a kuca pala hi la nöjei ewekë nyine amadi nyidë.” (Ioane 8:29) Eje hi, hnei Iesu hna traqa e celë fen, matre troa ‘kuca la aja i Akötresie’ me “umuthe la huliwa i nyidë.” (Heberu 10:7; Ioane 4:34) Pane ce wange jë pe së la hnei Iesu hna kuca qëmekene tro nyidrëti a xejë la huliwa ne cainöj.

Hnei nyidrëti hna tro kowe lo Hneopegejë ne Ioridrano troa wai Ioane Bapataiso. Ame hnei nyidroti hna ce uti kowe la tim, nge Ioane a heti Iesu ju, me kepe nyidrëti hmaca jë draië. Atre fe hi eö la kepine matre bapataiso Iesu jë hnei Ioane?—

Hnei Iesu hna sipo Ioane troa bapataiso nyidrë. Ngo hne së hna atre tune kaa laka, aja i Akötresie la troa bapataiso Iesu?— Hna amamane hnene la ewekë ka traqa thupene la kola mejë hmaca hnei Iesu qa ngöne la tim, ene la kola ewekë hnei Akötresie qa hnengödrai, kola hape: “Nyipëti la Nekönge hniminang, ini a madri nyipë.” Thupene lai, Akötresieti  a upe ju fe la uati hmitrötre i Nyidrë, kola sesë me uti koi Iesu kösë piny. Kola mama ngöne la Iesu a xomi bapataiso laka, aja i nyidrë troa nyihlue i Akötresie ngöne la mele i nyidrë ka pexej, nge uti hë epine palua.—Mareko 1:9-11.

Ngacama nekönatre petre kö eö enehila, ngo nemene la hnei eö hna mekune troa kuca elany e tru jë eö?— Hapeu, tro fe kö eö a hane xome la bapataiso tui Iesu?— Kola qaja hnene la Tusi Hmitrötre ka hape, hnei nyidrëti hna “hamë tulu thatraqai nyipunie, mate tro nyipunie a xöte thenge la ite thupa ca i nyidë.” (1 Peteru 2:21) Haawe, nyipi ewekë tro fe eö a hane nyitipu nyidrë. E bapataiso hë eö, eö hi lai a sipu amamane la aja i eö troa musinë eö hnene la Baselaia i Akötresie. Maine nyipici laka, ka nyipi ewekë catre la bapataiso, ngo hetre ketre ewekë fe kö nyine tro eö a kuca.

Loi e tro mina fe sa drengethenge la itre ini hnei Iesu hna hamën. Hane hi la ketre ceitun, hna qaja hnei Iesu koi së ka hape, “tha itete fene kö” së. E lö hnine jë së la itre huliwa ne fen, easë kö lai a drengethenge la hnei Iesu hna qaja e celë? Tha ase fe kö Iesu ekö memine la itre aposetolo i nyidrë lö hnine la itre huliwa cili. (Ioane 17:14) Ngo nemene huliwa kö la hnei angatre hna kuca?— Angatr a catre cainöjëne la Baselaia i Akötresie kowe la itre atr. Hane hi lai huliwa ka sisitria ngöne la mele i angatr. Nge ame easë enehila, tro fe kö së a hane nyitipu angatr?— Eje hi. Tro hë sa atreine kuca la itre ewekë cili, e ka nyipici la itre thithi së, me itre sipo së koi Akötresie, matre hlepëti pi la Baselaia i Nyidrë.

Tro sa amamane tune kaa ka hape, easa mejiune kowe la Baselaia i Akötresie? Haawe, e jë la itre xötre celë: Mataio 6:24-33; 24:14; 1 Ioane 2:15-17; 5:3.

[Iatr ne la götran 232]

Nemene la huliwa hna upi Iesu troa kuca e celë fen?

[Iatr ne la götran 235]

Pine nemene matre nue triji Iesu pi hnene hmaca kö lo itre atr ka ajane ekö tro nyidrëti a Joxu i angatr?

[Iatr ne la götran 236]

Pine nemene matre bapataiso Iesu jë, nge hnei Akötresieti hna amamane tune kaa laka, Nyidrëti a kapa la bapataiso i Iesu?

[Iatr ne la götran 237]

Ekaa ngön la hne së hna troa ithanatane memine la itre xan la Baselaia i Akötresie?