AME la troa keme me thin, tre, ketre götraneqa lai ka sisitria hna tha trotrohnine hnyawa kö hnene la atr. Isa hetre hnëqa i nyidro ngöne la kola troa hnahone la nekönatr. Qa ngöne lai, tha sesëkötre kö së laka, ame la kola mala la nekönatr, tre, kola qaja hnene la itre atr ka hape, “celë hi ketre iamamanyikeu.”

Ngo eje hi laka, ame la kola mala la nekönatr, tre, kolo petre hi a nyiqane e cili la hnëqa hna troa xome hnene la keme me thin. Ame ngöne la qan, keme me thine a hamëne kowe la medrenge la nöjei ewekë thatraqane la ngönetrei nyën. Nge ame la nyëne a tru trotro, nyipi ewekë tro fe a xatua nyën matre tro nyëne a kökötre hnyawa ngöne la götrane la mekune me hni me thina me götrane ua.

Tha tro kö a patre la ihnimi ne la keme me thine kowe la nekönatr, ke ka nyipi ewekë göi troa tro loi pala hi la mele i nyën. Ngacama nyipi ewekë troa mama lai ihnimi ngöne la itre trengewekë së, ngo sisitria catre kö e troa mama jëne la itre huliwa së. Eje hi, nyipi ewekë troa amamai tulu koi nyëne hnene la keme me thin. Ketre, loi e troa xatua nyëne troa trongëne la itre trepene meköti göi thiina, ngöne lo nekönatre petre kö nyën. Maine tha canga sajuëne kö nyidro la itre aja cili, tro ha hetre ethane kowe la mele ne la nekönatr.

Eje hmekuje hi e hnine la Tusi Hmitrötre la itre trepene meköti ka sisitria kowe la mele ne la atr. Sisitria catre la itre manathithi ka tru hne së hna kapa qa ngöne la hna inine la Tusi Hmitrötr. Tro hë la nekönatre a atrehmekune laka, ame la ka ini nyën, tre, tha ene kö la itre atr, ngo Iehova pe lo Atre Xupi nyëne me Tretretro i nyëne e koho hnengödrai. Celë hi kepine matre hetre emenene la itre eamo hna hamën.

Tusi Hmitrötre a ithuecatre kowe la itre keme me thine troa hiane la itre nekö i angatre ngöne la itre trepene meköti Iehova. Ngo eje hi laka, ame la nyudreni a tru trootro, tre, jole catre troa ce ithanatane me nyudreni la itre ewekë ka sisitria  thatraqane la mel. Hna fejane la itusi celë hna hape, Drenge Ju La Atre Hamë Ini Ka Sisitria, matre troa hamë ixatua ngöne la götrane cili. Eje a aijijë nyipunie memine la itre nekö i nyipunie troa ce ithanatane la itre xa mekune ngöne la götrane la ua. Ngo ame la ka sisitria catr, tre, ene laka eje a xatua nyipunie troa ifekeune la itre mekune memine la itre nekö i nyipunie.

Maine jë tro nyipunieti a öhne ngöne la itusi celë laka, hetre ijine tro la nekönatre a sa la hnying. Celë hi matre thupene la hnying, tro sa öhne la hatrene celë (—). Kolo lai a hape, tro sa pane mano, me nue la nekönatre troa ithanata. Ajane catre la itre nekönatre troa hane sine la itre porotrik. Maine tha tro kö sa nue nyudreni troa hane ithanata, haawe, canga tro hi lai a nanazije la aja i nyudren.

Kola troa xatua nyipunie hnene la itre hnyinge cili troa atre la mekuna ne la nekönatr. Ngacama tro ju hë nyën e itre xa ijin, a hamëne la itre xa mekune ka tha eje kö, ngo tro la itre xötrehnëewekë e thupen a xatua nyën troa amekötine la aqane mekune i nyën.

Traqa koi 230 lao iatr e hnine la itusi celë. Eje ezine la itre iatre cili la itre xa hnyinge nyine xatuane la nekönatre troa trotrohnine hnyawa la hnei nyën hna goeëne me hna e hë. Qa ngöne lai, ce wange hnyawa jë me nyën la itre iatre cili. Tro hë itre eje lai a xatua nyëne troa trotrohnine hnyawa la itre ini ka sisitria.

Ame la kola inine troa e tus hnene la nekönatr, pane xatuane jë troa ce e me nyipunie la itusi celë, nge e thupen, tro nyëne a ketre e casin. Maine tro pala hi nyën a e la itusi celë, eje hi lai laka tro ha cile huti la itre ini ka sisitria ngöne la mekune me e kuhu hni nyën. Hapeu, aja i nyipunieti kö troa acatrene la ihnimikeu me imetrötrekeu thei nyipunie memine la nekö i nyipunie? Haawe, catre pi troa e lapane me nyëne la itusi celë.

Ame enehila, kola lapa xötreithe la itre nekönatr hnene la kuci ngazo, me kuci iöni, me itre xa huliwa ka ngazo ju kö. Qa ngöne lai, nyipi ewekë troa thupë nyudren; nge ame ngöne la götrane cili, kola troa xatua nyipunie hnene la itusi celë. Ngo ame la ka nyipi ewekë catr, tre, ene la troa xatua nyudren troa easenyi catre kowe la Qane la inamacan, ene Iehova Akötresie la Tretretro së e koho hnengödrai. Celë hi lai ewekë hna kuca pala hi hnei Iesu lo Atre Hamë Ini Ka Sisitria. Ame la hne huni hna ajan, tre, ene la tro la itusi celë a xatua nyipunie memine la hnepe lapa i nyipunie, troa xome la ketre aqane mele ka amadrinë Iehova, nge ka troa aijijë nyipunie troa kapa la itre manathithi ka epine palua.