Mekene 22

Pine Nemene Matre Tha Loi Kö e Tro Sa Thoi

MAINE qaja ju hnene la nekönatre jajinyi kowe la thine i angeic, ka hape: “Nenë, ame hi la kola ase ini, eni hi a canga bëeke kowe la hnalapa.” Ngo hnei angeice hna hunyinyi ne ce elo memine la itre sine ini angeic, nge e thupene hë, thoi ju pë hë angeice koi thin, ka hape: “Hna alapa ni pë hë hnene la atre hamë ini.” Hapeu, ka loi kö lai hnei angeice hna kuca?—

Maine pena nekönatr trahmanyi a kapa la ithanata i kem, ka hape, tha tro kö angeic a elo balo e hnine la uma. Ngo e thupene hë, angeice a ena hmaca ju. Hapeu, ka ngazo kö lai e qaja ju angeice koi keme ka hape, tha ase kö angeice elo hnine la uma?—

Hnene la Atre Hamë Ini Ka Sisitria hna hamë së la wathebo celë, kola hape: ‘Loi la hnaewekë i nyipunie, hna hape Eje hi, Eje hi; Pëkö, Pëkö; nge qa ngöne la ngazo la itre xa hna nyixane pë hë.’ (Mataio 5:37) Nemene la aliene la trenge ewekë celë?— Kola hape, e ase hë së qaja la ithanata, loi e tro sa eatrën.

 Hetre hna edromën e hnine la Tusi Hmitrötre nyine amamane la enyipiewekëne la troa qaja la nyipici. Kola qaja la pengöne la ketre trahmanyi me föe ka pi hane amamane ka hape, lue ka xötrethenge Iesu fe nyidro. Ngo tro pe sa ce wange la ewekë ka traqa koi nyidro.

Hna traqa la ewekë celë e Ierusalema, lue treu thupene lo hna meci hnei Iesu. Kola traqa itronyi la ka ala nyim qa ga nany, troa sine la ketre pui ne xeni ka tru ne la angetre Iudra, hna hëne ka hape, Penetekos. E cili, Peteru aposetolo a cile fë ju la ketre cainöje ka lolo ka qeje Iesu, lo hna amelene hmaca hnei Iehova. Ala nyimu catre la itre atrene la icasikeu ka thatre Iesu petre kö. Thupene jë hi la hna cainöj, pi tro hmaca kö angatre a drenge la itre xa ithuemacany. Haawe, nemene ju hë la hnei angatre hna troa kuca?

Angatre pë hë a lapa aqeanyi ju e Ierusalema. Ngo ngazo pe, pë ju hi manie i angatre nyine itö xen. Haawe, xatua angatre jë hi hnene la itretre drenge ka lapa e Ierusalema. Ala nyimu la itre atr ka salemëne la itre ewekë i angatr, me tro fë la manien kowe la itre aposetolo i Iesu, matre troa isa thawa kowe la itre atr ka aja ixatua.

Hnei Anania me Safaira föi angeic, lue atrene la ekalesia ne Ierusalema  hna hane salemëne fe la hlapa i nyidro. Pëkö atre upi nyidro. Sipu qaathei nyidroti kö la mekune cili. Ame laka kuca jë nyidroti tune lai, tha qa ngöne ihnimi kö kowe la itre ka hnyipi xötrethenge Iesu, ngo kolo pe a nyi waina i atr. Nyidroti pë hë a ce thë ju troa hamëne sinëne la mani kowe la itre aposetolo, nge thoi ju pë hë koi angatre ka hape, ka pexeje lai hna hamën. Nemene fe la mekuna i eö la eö a wange la aqane ujë ka tune lai?—

Ame hna tro pi hnei Anania troa hamëne lo lai manie kowe la itre aposetolo. Ngo tha sihngödri kö koi Akötresie laka tha ka pexeje kö la manie cili. Haawe, Nyidrëti a amamane ju koi Peteru aposetolo ka hape, tha ka nyipici kö la hna qaja hnei Anania.

Qa ngöne lai, Peteru a qaja koi angeic ka hape: ‘Anania fe, hnauë eö a nue jë i Satana troa ujë tune lai? Ewekë i eö kö lo lai hlapa i eö. Pëkö ka upi eö troa salemëne ej. Ketre, e ase hë eö salemëne la hlapa, sipu qanyi eö kö troa amekötine la nyine tro eö a kuca memine la trenge thupene ej. Ngo hnauëne laka qaja thoine jë eö ka hape, hnei eö hna hamëne asë la mani, ngo juetrëne pë hë eö la sin? Tha eö kö lai a thoi koi huni cas, ngo koi Akötresieti fe.’

Ka ngazo catre la hna kuca hnei Anania, ke hnei angeice hna sili trengathoi. Tha kuca kö angeice thenge la hnei angeice hna qaja; hnei angeice hna huliwa hnihni. Haawe, kola qaja hnei Tusi Hmitrötr la ka traqa koi angeic e thupen: ‘Ame ju hi la Anania a drenge la trengewekë i  Peteru, ene pe keiju hi angeic a mec.’ Akötresie la Atre apatrenyi angeic. Xomi angeice jë hi qa lai troa kelem.

Thupene la köni hawa, traqa pi fe hi Safaira. Thatre kö eahlo lo ewekë ka traqa kowe la föi eahlo. Peteru a hnyinge ju fe koi eahlo, ka hape: ‘Hapeu, ka pexeje kö cahu thupene la hlapa hnei epon hna salemën?’

Sa jë hi Safaira ka hape: ‘Eje hi, ej asë hë lai.’ Ngo kolo fe a thoi hnei eahlo. Ase pë hë nyidroti lue trefën juetrëne la sine la thupene la hlapa. Qa ngöne lai, apatrenyi Safaira jë fe hi hnei Akötresie.

Nemene la ini nyine tro sa kapa qa ngöne la ewekë ka traqa koi Anania me Safaira?— Kola ini së ka hape, xele kö Akötresieti ma wange la itre atr ka thoi. Aja i Nyidrë tro pala hi sa qaja la nyipici. Ngo ame pe, tru hnei atr ka mekune ka hape, pëkö engazone la troa thoi. Mekuna i eö fe hi lai? Atre fe kö eö lo, ka hape, hna xulu la itre sine mec me itre akötre memine fe la mec qa ngöne la thoi?—

Atre hnyawa hi eö lo, ka hape, hna iaö Eva lo pane föe hnei Satana. Hnei angeice hna qaja koi eahlo, ka hape, ngacama tro eahlo a ena la hna qaja hnei Akötresie me xeni wene la sinöe hna wathebone hnei Nyidrë, ke, tha tro jë pi kö eahlo a mec. Ame hë e cili, Eva a kapa ju la trenge ewekë i Diabolo, me xeni lo lai wene sinö. Thupene lai, eahlo a hamëne ju fe koi Adamu. Ame la thangane koi nyidro, tre, nyidroti asë hë e hnine la ngazo, nge tro fe a hane xeni pune hnene la itre matra i nyidro. Ngazo asë hë angatr, nge angatr asë hë e hnine la akötr me mec. Ka xulu qa ka la itre akötre cili?— Hnei thoi.

Trotrohnine hnyawa hë së e celë la kepine matre hë Diabolo jë hnei Iesu ka hape, “ate thoi nyën, nge keme ne ej”! Angeice hi la ka sile la pane trenga thoi. Haawe, e thoi hë la ketre atr, angeice hi lai a nyitipu Diabolo. Loi e  tro eö a canga mekune la ewekë celë, e pi tro ju eö elanyi a thoi.—Ioane 8:44.

E iupekeune jë elanyi la ketre ewekë ka ngazo, tro jë kö eö a sili trenga thoi?— Tro sa ce wange la ketre ceitun, maine hetre ewekë hnei eö hna akaqan, nge hnyingë eö jë la atrekë zön. Hapeu, tro kö eö a sili trenga thoi me upe pena ha la zöne kowe la ketre trejine me eö? Maine tro pena eö a thatre thoin?—

Tro hmaca pe sa ce wange la ketre ceitun. Tru hnei qâ i eö nyine troa kuca, ngo hnei eö hi hna kuca la sin. Hapeu, tro kö eö a qaja ka hape, ase së hë eö kuca itre ej?— Meku Anania me Safaira ju hi hnei eö. Tha hnei nyidroti kö lo hna qaja asë la nyipici. Celë hi kepine matre Akötresieti a apatrenyi nyidroti ju.

Kuca ju hë së la ketre ewekë, ngo e thoi hë së maine qaja sinëne la nyipici, easë lai a ahacene me sile catrëne la itre jol. Celë hi matre Tusi Hmitrötr a ithuecatre koi së troa “isa qeje nyipici.” Nge kolo mina fe a hmekë së, me hape: “The ithoikeu kö.” Ka qaja pala hi Iehova la nyipici, nge aja i Nyidrë tro sa ujë tune lai.—Efeso 4:25; Kolose 3:9.

Loi e tro pala hi sa qaja la nyipici. Celë hi mekune ka tru hna amamane hnyawa ngöne Esodo 20:16; Ite Edomë 6:16-19; 12:19; 14:5; 16:6; me Heberu 4:13.

[Iatr ne la götran 117]

Nemene la ewekë ka ngazo hna kuca hnene la nekönatre celë?

[Iatr ne la götran 118]

Nemene la trenga thoi hna qaja hnei Anania koi Peteru?

[Iatr ne la götran 119]

Nemene la thangane ka traqa koi Anania, pine la hnei angeice hna thoi?

[Iatr ne la götran 120]

Thenge la hna qaja hnei Iesu, drei lo ka sile lo pane trenga thoi, nge nemene la itre ethanyine lai?

[Iatr ne la götran 121]

Eue la kola tupathi eö troa thoi?