Mekene 39

Tha Thëthëhmine Kö Akötresie La Hupuna i Nyidrë

HNEI Iesu hna treije lo kola meci hnei Lazaro. Ame fe la mekuna i eö ke, akötre kö Iehova lo kola meci hnei Iesu?— Kola qaja hnei Tusi Hmitrötre ka hape, hetrenyi la itre xa ewekë ka “akötë” Akötresie.—Salamo 78:40, 41; Ioane 11:35.

Drei jë fe kö la etrune la akötre ka eje thei Iehova la Nyidrëti a goeëne la kola meci la Hupuna hnei Nyidrëti hna hnim. Tha eö jë kö a hane mekune tun?— Ngo ame pe, tre, ka xecie hnyawa koi Iesu laka, tha tro pi kö a thëthëhmi nyidrë hnene la Tretretro i nyidrë. Hane hi lai kepine matre, qëmekene tro nyidrëti a mec, öni nyidrëti koi Iehova, ka hape: “Kakati fe, ini a nue la [melenge] kowe la lue ime i cilie.”—Luka 23:46.

Atre hnyawa hi Iesu laka, tro hmaca kö a amele nyidrëti qa hna mec, nge tha tro kö a nue nyidrë hnine “la hedis,” ene la hua. Thupene la hna amele Iesu hmaca qa hna mec, hnei Peteru aposetolo hna amexeje la ketre hna thingehnaeane e hnine la itre Hna Cinyihan, kola hape: “Tha hna nue tiji nyidëti kö e hedis, kete tha öhne kö la hnyeqete hnene la ngönetei nyidë.” (Itre Huliwa 2:31; Salamo 16:10)  Kola amamane hnyawa e celë, ka hape, tha lapa aqeanyi ju kö la ngönetrei Iesu e hnine la hua, nge tha hnyeqetre ju kö.

Ase fe hë Iesu ekö ahnithe amë kowe la itretre drei nyidrë, ka hape, tha tro ju kö nyidrëti a qea la hna meköle ngöne la mec. Hnei nyidrëti hna qaja koi angatre ka hape, tro ha “humuthi [nyidrë], nge troa mele hmaca ngöne la drai hnaakönin.” (Luka 9:22) Maine ju tha tro kö la itretre drenge a sesëkötr pine laka, mele hmaca ha Iesu qa hna mec. Ngo nemene ju hë la aqane ujë i angatr?— Tro sa pane ce wange lai.

Easë ngöne la Drai Ka Tru, nge traqa ha kowe la hnaakönine hawa ne la hnaipajö, meci hë la Atre Hamë Ini Ka Sisitria hune la sinöe ne iaxösisi. Iosefa la ketre atre trenamo. Ketre atr ka cilëne angeice la hnakootre i angetre Iudra, nge ka mejiune fe koi Iesu, ngo pëkö ka atre la pengöne cili. Atre jë hi angeice laka, meci hë Iesu, ene pe tro ju hi angeice troa wai Pilato gavena ne Roma. Angeic a sipo nyidrëti ju troa tha la ngönetrei Iesu qa ngöne la sinöe, me xome troa kelem. Thupene lai, Iosefa a xome jë la ngönetrei Iesu, me tro fë kowe la hlapa, ke e cili la ngönemenyi ne ami wezipo.

Ase jë hi amë la ngönetrei Iesu hnine la ngönemenyi, nge kolo fe hi a xome ju la ketre ietë nyine thinge la ulan. Traqa ha së enehila ngöne la hnaakönine drai, drai Sabath. Hmahmakanyi pala kö, tha fetra petre kö la jö. Hetre itre atr hna upe troa thupëne la ngönemenyi. Hna upi angatre hnei itretre huuj. Atre fe hi eö la kepin?—

Atre hnyawa hi hnene la itretre huuje laka hnei Iesu hna perofetane la mele hmaca i nyidrë. Celë hi matre, iupi jë angatre troa thupëne la ngönemenyi, wanga tro la itretre drenge a xome la ngönetrei Iesu, me qaja e thupen, ka hape, mele hmaca ha nyidrë. Nge hanawang, traqa pi hi la sa, nge kola hudrume lai ngöne la ga mit. Kolo hi lo ketre angela i Iehova! Traqa ju hi la xou atraqatre kowe la itre soc, matre angatre a icileny, pëkö ca ka enij. Nge ame hna fe pi la ngönemenyi hnene la angela, nge hanawang, ka pë hë alien!

Tune lo hna qaja e thupene hnei Peteru: “Celë hi Iesu hna amelene hmaca hnei Akötesie.” (Itre Huliwa 2:32) Hnei Iehova hna amele Iesu hmaca qa hna mec, me hamë ngönetrei nyidrë, tune lo hnei nyidrëti ekö hna hetreny,  qëmekene troa uti kowe la fen. Hna amele Iesu hmaca, nge ua hmaca ha nyidrë, tune lo itre angela. (1 Peteru 3:18) Maine Iesu a ajane troa öhnyi nyidrë hnene la itre atr, ke loi e tro nyidrëti a nyi ngönetrei ne atr. Hapeu, tro kö nyidrëti a kuca tune lai?— Pane ce wange jë së la ewekë cili.

Fetra ha la jö, nge patre hë itre soc. Maria Magadalena me itre xa föe ka xötrethenge Iesu, a tro meköti jë kowe la hua. Angatre a iqajakeun, ka hape: ‘Tro dei a uligötrane la etë thatraqai së qa ngöne la qe ne la hua?’ (Mareko 16:3) Ngo traqa ju hi angatr a öhne la hua a hna fe hë, nge pëhë alien. Patre hë la ngönetrei Iesu! Ame hna canga nyinyape pi Maria Magadalena troa thuemacane la itre xa aposetolo i Iesu.

Ame ju pë hë lo itre xa föe, hnei angatre pe hi hna lapa easenyine la hua. Kola pi atre ka hape, ‘Ekaa jë la hmekune la ngönetrei Iesu?’ Sesëkötre ju hi angatre la kola mama la lue atr hna xetrë ka wië. Kolo lue angela! Nyidroti a hnyinge ju kowe la itre föe me hape: ‘Pine nemene matre epuni a thele Iesu e celë? Mele hmaca ha nyidrë qa hna mec. Ngo canga tro jë troa thuemacane la itretre dreng.’ Ene pe, canga tro ju hi la itre föe cili troa ithuemacany! E cahu hë gojeny, ixelë ju hi angatre memine la ketre thupëtresij. Atre fe hi eö ka hape, drei lai thupëtresij?—

Iesu hi. Hnei nyidrëti hna nyi ngönetrei ne atr! Nyidrëti a qaja ju kowe la itre föe ka hape: ‘Tro jë a thuemacane la itre trejine me ini.’ Nyipici, kola madrin atraqatre hnene la itre föe cili. Öhne ju hi angatre la itretre dreng, nge öni angatre jë hi ka hape: ‘Mele kö Iesu! Ase hë huni öhnyi nyidrë!’ Nge ketre, ase fe hë Maria thuemacanyi Peteru me Ioane, ka hape, pëhë atr ngöne lo hua. Hane cahu iatr a amamai Peteru me Ioane, nyidroti fe a hane waipengöne la hua. Itre mano lino pe hi la hnei nyidroti hna öhn, kolo itre hna hetrë Iesu, ngo kola huliwa la lue mekuna i nyidro. Pi tro hi nyidroti a mejiune kowe la mele hmaca i Iesu, ngo nango jole petre kö koi nyidro troa kapa.

Sabathi pala kö, Iesu a amamanyi hmaca ju e thupene kowe la lue atre drei nyidrë ka tro Emao, ketre hnepe traon. Nyidrëti a porotrike trootro me nyidro, ngo tha wangatrehmekunyi nyidrëti kö hnei nyidro, ke, saze hë la ngönetrei nyidrë. Nyidroti pë hë a wangatrehmekunyi nyidrë e thupen, lo nyidrëti a hmine la xen. Madrine catre nyidro, celë hi matre canga bëeke  hmaca jë nyidro Ierusalema eë ngacama nanyi la gojeny. Maine jë nyidroti hi a bëeke thupene lo hnei Iesu hna mama koi Peteru, matre troa anyipicine koi angeice ka hape, mele hmaca ha nyidrë.

Hejiheji hë, ene pala hi lo drai Sabath, ala nyimu la itretre drenge ka icasikeu e hnine la ketre hnahage nge hnei angatre hna ki qëhnelö. Hanawange mama pi hi Iesu nyipi angatr! Xecie hnyawa jë hi koi angatr, laka mele hmaca ha la Atre Hamë Ini Ka Sisitria. Drei jë kö la etrune la madrine i angatr!—Mataio 28:1-15; Luka 24:1-49; Ioane 19:38–20:21.

Ame ngöne la 40 lao drai, anyimua amamanyi Iesu kowe la itretre drei nyidrë. Hnei nyidrë hna nyi ngönetrei ka isapengön. Nyine troa anyipicine koi angatre laka, mele hmaca ha nyidrë. Thupene lai, nyidrëti pë hë a nue pi la fen, me bëeke hmaca hnengödrai eë kowe la Tretretro i nyidrë.  (Itre Huliwa 1:9-11) Ame ngöne la itre drai thupen, kolo ha cainöjëne trongëne hnene la itretre drenge ka hape ase hë Akötresieti amele Iesu hmaca qa hna mec. Ngacama hna lepi itre xan hnene la itretre huuje nge hna humuthi itre xan, ngo ka catre pala hi angatre cainöj. Ka xecie hnyawa koi angatr, laka maine tro angatr a mec, ngo tha tro pi kö Akötresieti a thëthëhmi angatr, tune lo hnei Nyidrëti hna kuca koi Iesu.

Tha ceitune kö la itre atr enehila memine lo itre ka pane xötrethenge Iesu ekö. Ame ngöne la nöjei macatre hmekune lo ijine mele hmaca i Iesu, tre, angatre pala hi a meku wakuja nyine hatrene la feetë Paak. Ngo tha hnei Tusi Hmitrötre fe kö hna upi së troa atrune la Paak. Eje pe a ithuecatre koi së troa nyihlue i Akötresie.

Maine easa pi xötrethenge la tulu ne lo itretre drei Iesu, nyipi ewekë tro sa cainöjëne kowe la itre atr la ewekë ka sisitria hnei Akötresieti hna kuca. Hnei Nyidrëti lo hna amelene hmaca la Hupuna i Nyidrë qa hna mec. Tha tro kö sa xouene la itre atr ka qaja angazo së me lepi së. Nge maine tro sa meci elany, tha tro kö Iehova a thëthëhmi së; ngo tro pe Nyidrëti a amele së hmaca tune lo hnei Nyidrëti hna kuca koi Iesu.

Hapeu, madrine kö së, e atre jë së laka, tha ka thëthëhmine kö Akötresie la itre ka nyihlue i Nyidrë, nge tro Nyidrëti elanyi a amele angatre hmaca qa hna mec?— Haawe, epi tro sa thele la nöjei aqane troa amadrinë Akötresie. Atre fe hi eö ka hape, ijiji së fe hi troa amadrinë Akötresie?— Mekune hi lai nyine tro sa ce ithanatane ngöne la mekene ka troa xulu.

Maine eje fe ngöne la mekune së la mele hmaca i Iesu, haawe, tro hë lai a acatrene hnyawa la lapaune me mejiune së. E jë la Itre Huliwa 2:22-36; 4:18-20; me 1 Korinito 15:3-8, 20-23.

[Iatr ne la götran 202]

Pine nemene matre ka pëhë aliene la hua? Hnauëne jë?

[Iatr ne la götran 205]

Nemene jë la hna mekune hnei Peteru me Ioane?

[Iatr ne la götran 206]

Ame lo hmekune lo mele hmaca i Iesu, nemene la hna majemine kuca hnene la itre atr? Nge tune kaa fe la hnei eö hna mekun?