Mekene 40

Tro Sa Amadrinë Akötresie Tune Kaa?

TUNE kaa la aqane tro sa amadrinë Akötresie? Hapeu, hetre ewekë fe kö nyine tro eö a hamë Nyidrë?— Kola qaja hnei Iehova ka hape: “Ite ewekënge la nöjei öni ne hnite asëjëihë.” Nge Nyidrëti mina fe a qaja ka hape: “Ewekënge la sileva, nge ewekënge la gol.” (Salamo 24:1; 50:10; Hagai 2:8) Ngo ame pe, hetrenyi la ketre ewekë nyine tro sa hamëne koi Akötresie. Nemene jë koi eö la ewekë cili?—

Hnei Iehova hna nue së troa isa iën, ene la troa nyi hlue i Nyidrë maine tha tro pena kö a nyi hlue i Nyidrë. Tha hnei Nyidrëti kö hna iele së troa kuca la aja i Nyidrë. Loi e tro pe sa atre la kepine matre nue së pi hnei Iehova tro sa ketre xomi mekun.

Atre fe hi eö la robot. Ame laka kuca jë la robot, ke tro hi eje a trongëne la mekuna ne lai atre xup. Thatreine kö tro eje a ketre kuca la sipu mekuna ne ej. Maine ju tro hi Iehova ekö a hane xupi së ceitune me itre robots, matre tro hi sa kuca la aja i Nyidrë. Ngo tha hnei Iehova kö hna ujë tun. Atre fe hi eö la kepine matre tha hnei Nyidrëti kö hna xupi së tune lai?— Ame la itre xa robots, tre nyine nyimon. Huje ju hi së la buto, nge eje fe hë lai a trongëne la itre ewekë hna amekötin kowe ej hnene la atre xupe ej. Ma öhne fe hë eö la itre robots cili?— Hnene la itre xa atr hna elone la itre ewekë cili, ngo canga nuetrije hmaca ju angatr, ke tha nyipi ewekëne hë. Ame Akötresie, tha ajane kö Nyidrë tro sa drengethenge Nyidrë ceitu me  itre robots. Ke ame la aja i Nyidrë, tro sa nyi hlue i Nyidrë cememine la ihnim me hni ka ajan.

Ame koi eö, nemene la mekune ka eje e kuhu hni ne la Tretretro së, e öhne jë Nyidrë laka easa drengethenge Nyidrëti cememine la hni ka ajan?— Pane qaja jë eö koi ni la mekuna ne la keme me thine i eö, e kuca ju eö la ewekë ka loi maine ka ngazo— Tusi Hmitrötre a qaja ka hape, ame la nekönatr ka inamacan, tre, nyën “a amadinëne la keme [i nyën]” ngo ame la nekönatre ka hmo, tre, nyën a “akötëne la thine i nyën.” (Ite Edomë 10:1) Haawe, maine tro eö a drengethenge kaka me nenë, tro eö lai a amadrinë nyidro. Ngo nemene ju hë la hnei nyidro hna mekun, e tha drengethenge nyidroti ju hnei eö?—

Tro pena së enehila a ce wange la pengöne la Tretretro së e koho hnengödrai, ene Iehova. Hnei Nyidrëti hna amamane koi së la aqane tro sa amadrinë Nyidrë. Xome jë ngöne la Tusi Hmitrötre i eö la tusi Ite Edomë 27:11. Akötresie a qaja koi së e celë, ka hape: “Neköng, inamacanepi, mate madinejë la hning ; mate hete nyine sa koi angeic’ ate qaja angazo ni.” Atre fe hi eö la aliene la kola hape, troa qaja angazon, maine nyisine pena la ketre atr?— Kolo lai a hape, easa hnyima sai angeic, me qaja ka hape, thatreine fe kö angeice troa kuca la itre ewekë hnei angeice hna qaja. Hnei Satana hna nyisi Iehova tune kaa?— Tro sa pane ce ithanatane la ewekë cili.

Mekune hi eö lo hne së hna inine ngöne la Mekene 8, Satana a thele troa sisitria hui itre xan, ke aja i angeice tro la nöjei atr asë a drengethenge angeic. Ame la mekuna i angeic, tre, kolo hi a nyi hlue i Iehova hnene la itre atr göi tro hi angatre a hetrenyi la mele ka tha ase palua kö. Ase jë hi angeice ekö  uku Adamu me Eva troa eni wathebo, angeice pë hë a akötrë Iehova jë. Öni angeice koi Nyidrë, ka hape: ‘Itre atr a nyi hlue i Nyipë, ke hnei Nyipë hna hamëne koi angatr la itre ewekë. Ngo nue ni pi pe troa amamane koi Nyipë, nge tro Nyipëti a öhne laka canga tro hi a thipe triji Nyipë hnene la itre atr.’

Eje hi, tha hna cinyihane kö la itre trengewekë celë e hnine la Tusi Hmitrötr. Ngo maine tro sa atre la itre ewekë ka traqa koi Iobu, tro hi sa trotrohnine laka, ma itre trenge ithanata i Satana hi la koi Akötresie. Nge hapeue Iobu, tro kö angeice a mele nyipici koi Akötresie? Drei la mekune ka sisitria koi Satana me koi Iehova fe. Tro pe sa pane ce xome la Tusi Hmitrötre së, me ce e la tusi Iobu mekene 1 me 2, matre troa waipengöne la ewekë cili.

Ame ngöne Iobu mekene 1, easa öhne laka hnei Satana hna cile qëmeke i Iehova cememine la itre angela e koho hnengödrai. Nge Iehova a hnyinge jë koi Satana, ka hape: “Qa i hmunë ka ?” Sa jë hi Satana ka hape, qa i angeice hna nyinyapëne la fene hnengödrai. Öni Iehova jë hi, ka hape: ‘Hapeu meku Iobu hi eö? Angeice la ketre atr ka nyihlueng me ka iananyi memine la ngazo.’—Iobu 1:6-8.

 Ngo canga sa jë hi Satana. Öni angeice ka hape: ‘Iobu hi lai a nyihlue i Nyipë, ke pëkö jole ka traqa koi angeic. Pane nuetriji angeice pi, nge the amanathithi angeice kö, nge tro hë angeice lai a jele ngazo Nyipë.’ Ame hnei Iehova hna sa ka hape: ‘Ka loi hö Satana, Ini a nue eö troa kuca la aja i eö koi angeic, ngo wange pala kö ketre pi eö la mele i angeic.’—Iobu 1:9-12.

Nemene ju hë la hnei Satana hna kuca?— Ame la ewekë hnapan, hnei angeice hna upe la itre atr troa humuthe la itre hlue i Iobu, me atrekënö la itre bolok me itre asina i angeic. Thupene lai, jëne la samek, hnei Satana hna humuthe la itre mamoe me itre hlue i Iobu. Nge ase jë hi, traqa ju hi la itre atr a atrekënö la itre kamela, me hane humuthe fe lo itre hlue i Iobu. Nge ame pë hë la pun, axulune pi Satana la enyi atraqatr. Ame hna ufe pi la uma i Iobu, nge kei trane ju hi lo treene lao nekö i Iobu; meci asë hi angatr. Ngacama hna traqa la nöjei pengöne jole cili koi Iobu, ngo catre pala hi angeice troa nyihlue i Iehova.—Iobu 1:13-22.

Itronyi hmaca jë hi Iehova me Satana. Iehova a qaja hmaca ju koi angeic, ka hape, ka nyipici pala hi la aqane imelekeu i Iobu me Nyidrë. Ngo kolo hmaca kö a thele nyine troa sa hnei Satana, me hape: ‘Pane nue ni pi troa lepi angeice hnene la ketre meci ka tru, nge eje hi lai laka, tro hë angeice a jele ngazo Nyipë.’ Qa ngöne lai, Iehova a nue Satana hmaca ju troa lepi Iobu hnene la ketre meci ka tru, ngo tha hna nue angeice kö troa humuthi Iobu.

 Lepi Iobu jë hi hnei Satana hnene la ketre meci ka ngazo catr, nge kola xuje la ngönetrei angeice asë hnei thewek. Pui ngazo catre la ngönetrei angeic, nge, pëkö atre pi easenyi angeic. Önine jë hi la ifënekö i angeice ka hape: “Jele ngazo Akötesieti jë nge meciju.” Traqa ju fe hi la köni sinee i Iobu troa hane iwai. Ngo pëkö ithuecatre koi angeice qaathei angatr, ngo kolo pe a nyixane la itre akötre i angeic, pine laka öni angatr, ame laka traqa pi la itre jole cili, tre, thangane hi la itre huliwa menu i angeic. Ngacama tru ju hë la itre akötre i Iobu qaathei Satana, ngo tha patre pi kö la aqane mele nyipici Iobu koi Iehova.—Iobu 2:1-13; 7:5; 19:13-20.

Ame koi eö, tune kaa la aqane goeëne Iehova la aqane mele nyipici Iobu?— Atraqatre la madrine i Nyidrë, celë hi matre ijijii Iehova jë troa qaja koi Satana, ka hape: ‘Hanawai Iobu! Angeic a nyihlueng hnene la aja ka tru e kuhu hni angeic.’ Tune kaa fe eö, tro kö eö a hane tui Iobu, matre hetre nyine tro Iehova elanyi a sa koi Satana, me anyipicine laka ka thoi angeic?— Hnei Satana lo hna qaja ka hape, atreine fe hi angeice troa thingijëne la nöjei pengöne atr e ajane angeic, matre tha tro kö angatr a nyihlue Iehova. Ketre ewekë ka tru kowe la atr e troa amamane ka hape ka thoi lae Satana. Ame koi Iesu lo Atre Hamë Ini Ka Sisitria, nyidrëti a goeëne lai ceitu me ketre manathithi ka tru.

Pëkö mene i Satana troa huli Iesu kowe la itre ewekë ka ngazo. Tha ka co kö la madrine i Iehova kowe la tulu hna hamëne hnei Iesu. Nyidrëti hi lai a aijijë Iehova troa qaja koi Satana, ka hape: ‘Hanawange la Neköng! Ka mele nyipici pala hi angeice koi ni, ke ka tru pala hi la ihnim i angeice koi ni!’ Pane mekune ju la madrine ka eje thei Iesu qa ngöne la hna amadrinëne la Tretretro i nyidrë. Hnene la madrine cili hna hamë trengecatre i nyidrë troa meci hune la sinöe ne iaxösisi.—Heberu 12:2.

Hapeu, aja i eö fe kö troa nyitipune la Atre Hamë Ini Ka Sisitria, me hane amadrinëne la hni Iehova?— Haawe, nyipi ewekëne jë la itre ewekë hnei Iehova hna thele thei eö, nge amadrinëne jë la hni Nyidrë hnene la drengethenge.

Maine easa ajane troa atre la aqane amadrinë Akötresie hnei Iesu, memine la aqane tro sa nyitipu nyidrë, e jë la Ite Edomë 23:22-25; Ioane 5:30; 6:38; 8:28; me 2 Ioane 4.

[Iatr ne la götran 207]

Pine nemene matre tha hnei Akötresieti kö hna xupi së tune la ‘robot’ celë?

[Iatr ne la götran 208]

Tune kaa la aqane tro eö a amadrinë Iehova memine fe la keme me thine i eö?

[Iatr ne la götran 209]

Thupene la hnei Adamu me Eva hna eni wathebo, tune kaa la aqane nyisi Iehova hnei Satana?

[Iatr ne la götran 210]

Nemene la itre akötre hna melëne hnei Iobu, nge pine nemene matre madrine Akötresieti la aqane xomihni ahoeanyi angeic?