Mekene 30

Tro Sa Elë Hune Tune Kaa La Xou

HAPEUE la mekuna i eö, tha ka jole kö la troa nyi hlue Iehova?— Hnene lo Atre Hamë Ini Ka Sisitria hna qaja, ka hape, tro lai a jol. Ame ngöne lo jidri qëmekene troa humuthi Iesu, hnei nyidrëti hna thuemacanyi ange aposetolo, ka hape: “Maine methinë nyipunie hnene la fene hnengödrai, ate hë nyipunie laka hna pane methinë ni.”—Ioane 15:18.

Hnei Peteru hna qaja koi Iesu, ka hape, tha tro jë pi kö angeice a nue triji nyidrë, nge Iesu a ahnithe ju koi angeic, ka hape, ame ju fe kö ngöne la jidri cili, tro angeice a akönia kelikelë nyidrë. Haawe, tha tria ju kö la ewekë cili. (Mataio 26:31-35, 69-75) Pine nemene matre ujë jë Peteru tune lai?— Pine laka hna traqa koi angeice la xou, tune mina fe lo itre xa aposetolo.

Nge atre fe hi eö la kepine matre xou jë angatr?— Hnene la hnei angatre hna sixane la ketre ewekë ka sisitria. Nemen? Ka nyipi ewekë catre tro sa atre la ewekë cili, maine easa ajane troa nyi hlue Iehova, matre tha tro kö a axouenyi së hnene la hna qaja me kuca hnene la itre atr. Ngo pane ce wange jë pe së la ewekë ka traqa ngöne lo jidri tixenuë i Iesu me itre aposetolo i nyidrë.

Hnei angatre hna pane ce atrune la Paseka. Kolo pui ne xeni hna troa aca kuca ngöne la macatre, matre tro la nöje i Akötresie a mekune lo ijine kola thepe angatre qa ngöne la ithahluë e Aigupito. Thupene lai, Iesu a amamane ju koi angatre la aqane troa atrune la pui ne xeni ka hnyipixe. Tro pë hë sa ce ithanatane la aqane tro la pui ne xeni cili, a xatua së troa meku Iesu. Ame ngöne la pun, Iesu a ithuecatre kowe la itre aposetolo, nge nyidrëti a ce tro me angatre kowe la hnepe hlapa. Gethesemane la ëjen, kolo götrane lai hnei angatre hna majemine tro kow.

 Hnei Iesu hna tro troa thith ngöne la ketre götrane ga co. Nyidrëti a upi Peteru ju fe me Iakobo me Ioane troa hane thith. Ngo itre ka imekölenyi angatr. Akönia tro Iesu troa thith, nge ame la nyidrëti a bëek, nyidrëti a öhnyi Peteru memine la itre xan a kolo pala hi a imeköleny! (Mataio 26:36-47) Atre fe hi eö la kepine matre nyipi ewekë tro angatre a hlë hmek me thith?— Tro sa pane ce ithanatane lai.

Ame lo heji lapa ne Iesu me itre aposetolo i nyidrë a atrune la Paseka, tre, ce angatre petre kö me Iudra Isakariota. Atre hë eö lo pengö i Iudra; ka atrekënö. Nge angeice hë enehila, a troa iwanaxoeë. Atre hnyawa hi angeice ka hape ame Iesu me itre aposetolo ka majemine angatre tro kowe la ketre götrane ne la hnepe hlapa e Gethesemane. Angeice a wejemekene ju la trongene la itre sooc matre troa xölehuji Iesu. Ame la angatre a traqa, öni Iesu e hnyingë angatre ka hape: “Dei la hnei nyipunie hna thel ?”

Önine ju la itre soc: “Iesu.” Tha xou Iesu kö troa sa koi angatr, ka hape: “Ini hi la.” Kola haine hnei angatre me sesëkötre la aqane catre i Iesu, angatre hi lai a cile hnö, me kei ju hnadro eë. Thupene lai, Iesu a qaja koi angatre ka hape: “Maine nyipunie a thele ni, nue angate la, mate tropi.”—Ioane 18:1-9.

Ame la kola öhne hnene la itre aposetolo la itre soc a xolouthi Iesu me othi nyidrë, angatre hi lai a ixouenyi ju me isa ikötreny. Ngo Peteru ju pe hi me Ioane la ka pi atre la ewekë ka troa traqa, matre nyidroti a ixötrethenge qa ga nany. Tro sai Iesu pi hi koi Kaiafa, lo Atre Huuje Ka Sisitria. Atre Ioane hi hnei Kaiafa, celë hi matre nue angeice pi me Peteru hnene la ka thupë qëhnelö, troa hane lö hnine la hna kotr.

Itretre huje hë a icasikeu hnine la hnalapa i Kaiafa, matre troa kootrë Iesu. Pi tro angatr a humuthi nyidrë, celë hi matre hëne jë angatre la itre xa atr, troa eköthe la itre trenga thoi hui nyidrë. Öhne hi Peteru la kola jenge me xe nyidrë hnene la itre atr.

Öhnyi Peteru jë hi hnene la hlu, ene lo föe ka ce alö angeice me Ioane. Öni nyiidro koi angeice ka hape: “Eö hi lo ate ce me Iesu !” Ngo kelikelëne  kö Peteru, me qaja ka hape, thatre Iesu kö hnei angeic. Thupene lai, kola wangatrehmekunyi Peteru jë pena hnene la ketre jajiny, ka qaja kowe la itre ka icileny, ka hape: “Nyëne hi lai lo ate ce me Iesu.” Ame hnei angeice hna kelikelë hmaca. Thupene jë hi lai, nge qaja hmaca ju koi Peteru hnene la ka ala nyim, ka hape: “Nyipici eö hi la sine i nyuden.” Peteru hë e celë a nyi hnaakönine ikelikelë, öni angeice ka hape: “Tha te kö ni lai ate.” Angeic a catre fë ju la mekune celë, me sisiny. Ame e cili, xei jë hi Iesu a goeë angeic.—Mataio 26:57-75; Luka 22:54-62; Ioane 18:15-27.

Atre fe hi eö la kepine matre Peteru a thoi?— Hna traqa la xou koi angeic. Ngo hnauëne laka xou i angeice jë? Nemene la ewekë hnei angeice hna sixan, matre troa hetre trenge catre i angeic? Pane mekune jë eö. Nemene la ka hamë trenge catre i Iesu?— Hnei nyidrëti lo hna thithi koi Akötresie, ame hnei Akötresieti hna hamë nyidrëti ju la trenge catr. Akönia upi Peteru lo hnei Iesu troa thith, me hlë me lapa hmek. Ngo nemene lo hna kuca hnei Peteru?—

Peteru pala hi lo a meköl. Tha thithi pe angeic me lapa hmek. Celë hi matre, sesëkötre ju hi angeice la kola traqa troa xolouthi Iesu. Hane hi lai kepin, matre ame la kola kootrë Iesu, me xe nyidrë me thele troa humuthi  nyidrë, tre, hnehengazo menu jë pe hi Peteru. Ngo qëmekene troa traqa la ewekë cili, nemene lo hnei Iesu hna qaja kowe la itre aposetolo i nyidrë, matre troa hmekë angatr?— Hnei Iesu hna thuemacanyi angatr, ka hape, pine laka hna methinë nyidrë hnene la fen, haawe, ketre tro fe a methinë angatre hnene la fen.

Pane mekune jë eö e traqa ju koi eö enehila la ketre ewekë ka tune lo ka traqa koi Peteru. Ame ngöne la hnei eö hna ini, kola ixöjetrijine hnene la itre sine ini eö, la itre ka tha hane kö sali koi darapo, maine feetë Noel pena. Sesëkötre ju hi eö la ketre e qaja ka hape: “Nyipici kö laka tha ka sali fe kö eö koi darapo?” Maine pena troa qaja hnene la itre xan, ka hape:  “Drenge hë huni ka hape, tha ka hane fe kö eö feetë Noel!” Hapeu, tro kö eö a xou troa qaja la nyipici?— Maine tro pena eö a hane ikelikelë tui Peteru?—

Nyipici ame Peteru lo, hnei angeice pë hë e thupene hna ietra pine lo hna kelikelë Iesu. Wangatrehmekune hë angeice la engazone la aqane ujë i angeic, ene pe angeice hi lai a lö pi me treije hleuhleu. Ngo e thupene hë, hnei angeice hna bëeke hmaca koi Iesu. (Luka 22:32) Haawe, pane mekune jë eö: Nemene la ka troa xatua eö enehila troa elë hune la xou, me neëne la thoi wanga tui Peteru pi?— Mekune hnyawa ju eö, laka, tha hnei Peteru kö lo hna thithi me lapa hmek. Haawe, nemene la nyine troa kuca hnene la atr ka ajane troa xötrethenge la Atre Hamë Ini Ka Sisitria?—

Nyipi ewekë tro angeice a sipo ixatua thei Iehova jëne la thith. Thupene la hnei Iesu hna thith, mekune hi eö lo hnei Iehova hna kuca koi nyidrë?— Hnei Iehova hna upe la ketre angela troa aegöcatrenyi Iesu. (Luka 22:43) Hapeu, ijije fe kö troa xatua së hnene la itre angela i Akötresie?— Kola qaja hnei Tusi Hmitrötr, ka hape: “Kola lapa la angela i Iehova xöteithi angete qoue nyidë, me amele angat.” (Salamo 34:7) Ngo maine easa ajane troa kapa la ixatua qaathei Akötresie, tha tro hmekuje kö a thith. Ame koi eö, nemene fe la ketre ewekë nyine tro sa kuca?— Hnei Iesu lo hna upe la itretre drei nyidrë troa hlë, me lapa hmek. Tro sa kuca tune ka?—

Nyipi ewekë tro sa drenge hnyawa la itre hna qaja ngöne la itre icasikeu ne la ekalesia, me e hnyawa la Tusi Hmitrötr. Ketre, nyipi ewekë mina fe tro sa thithi pala hi koi Iehova, matre troa xatua së troa nyi hlue i Nyidrë. Maine tro sa catre ujë tune lai, tro ha xatua së hnei Iehova troa elë hune la xou ka eje the së, nge tro ha hetre madrine së troa qaja kowe la nöjei atr asë, la pengö i Nyidrë me pengöne la Hupuna i Nyidrë, ene lo Atre Hamë Ini Ka Sisitria.

Hanawange la itre xötre celë ka troa xatua së, matre tha tro kö la xou a thingijë së troa kuca la ewekë ka meköt: Ite Edomë 29:25; Ieremia 26:12-15, 20-24; me Ioane 12:42, 43.

[Iatr ne la götran 159]

Pine nemene matre loi e tro Peteru ekö me Iakobo me Ioane a lapa hmek?

[Iatr ne la götran 160]

Pine nemene matre traqa pi koi Peteru la xou, nge kelikelë Iesu jë hnei angeic?

[Iatr ne la götran 160]

Tune kaa la aqane tro eö a melëne enehila lo ewekë ka traqa koi Peteru ekö?