Mekene 10

Tru Catre Kö La Mene i Iesu Hune La Itre Dremoni

HAPEU, mekune hi eö lo kepine matre hëne jë la ketre angela i Akötresie ka hape, Satana Diabolo?— Hnei angeice hna icilekeu me Akötresie, hnene la hna akökötrene e kuhu hni angeic la aja ka ngazo celë, ene la troa thili koi angeic hnene la itre atr. Hapeu, hna xötrethenge angeice kö hnene la itre xa angela?— Eje hi. Tusi Hmitrötr a hë angatre ka hape, itre ‘angela i Satana,’ maine itre dremoni pena.—Hna Amamane 12:9.

Hapeu ame la itre angela ka ngazo cili, maine itre dremoni, kapa fe kö angatre laka, hetre Akötresie?— Kola qaja hnei Tusi Hmitrötr ka hape, ‘Itre dremoni a kapa ka hape, hetre Akötresie.’ (Iakobo 2:19) Ngo angatr a xoue Nyidrë. Atre hnyawa hi angatr, laka, tro Akötresieti a amekötin me ahnëjinë angatre pine la itre ewekë ka ngazo hnei angatre hna kuca. Atre fe hi eö la itre ewekë ka ngazo hna kuca hnei angatr?—

Kola qaja hnei Tusi Hmitrötr ka hape, hnei angatre hna nuetrij la hnalapa i angatr e hnengödrai, me uti kowe la fen ceitu me itre atr. Hnei angatre hna ujë tune  lai, pine laka angatre a ajane troa ce meköle ne kuci ngazo memine la itre föe ka mingöming ka mele e celë fen. (Genese 6:1, 2; Iuda 6) Nemene la hnei eö hna atre göi ce meköle trefën?—

Ame la ce meköle trefën, tre, kola qaja la trahmanyi me föe ka ce meköl, nge qa ngöne lai, upune pi föe. Ngo wathebo kowe la itre angela troa hane ce meköle tune la lue trefën. Aja i Akötresie tro hmekuje hi a ce meköle trefëne la trahmanyi me föe ka faipoipo. Ke e hnahone hë la nekönatr, hetre keme me thine i nyëne ka troa thupë nyën.

Hna löthe la itre ngönetrei ne atr hnene la itre angela, ene pe atreine jë hi angatre ce meköl memine la itre föe e celë fen. Hnahone pi hi angatre la itre nekönatr, itre ka hoea hmae e tru hë, nge itre ka nyitru me pi iönihatrë. Hane hi lai kepine matre axulune pi Akötresie la iwë ka tru, nyine lepe apatrene la itre atr cili, memine fe la itre atr ka ngazo. Ngo qëmekene lai, hnei Akötresie hna pane upi Noa troa cane la ketre aka, matre troa jëne melene pe la itre xa atr ka thiina ka lolo. Hna qaja hnene la Atre Hamë Ini Ka Sisitria ka hape, tha tro pi kö sa thëthëhmine lo lai Iwë cili.—Genese 6:3, 4, 13, 14; Luka 17:26, 27.

Ame la kola traqa lo Iwë, atre fe hi eö la hna kuca hnene lo itre angela ka ngazo cili?— Hnei angatre hna unatrije la itre itraunene i angatr, lo ngönetrei ne  atr, me bëeke hmaca hnengödrai eë. Tha itre angela i Akötresieti hmaca kö angatr, ngo itre angela i Satana pëhë, kola hëne ka hape, itre dremoni. Nge tune kaa pëhë lo itre neköne ka hoea hmae?— Ase së hë apatrenyi angatr hnene lo Iwë, memine fe lo itre atr asë ka xele ma drei Akötresie.

Thupene ju hi la Iwë cili, tha hnei Akötresieti hmaca kö hna nue la itre dremoni troa xome la itre ngönetrei ne atr. Maine nyipici laka tha öhnyi angatre kö hne së, ngo angatre pala hi a ukune la itre atr troa kuca la itre ewekë ka ngazo. Nge kola catrehnine catre la ngazo ngöne la hneijine së enehila, ke, ase hë upetriji angatre qa hnengödrai kowe la fen.

Atre fe hi eö la kepine matre thatreine kö tro sa öhne la itre dremoni?— Hnene hi laka itre ua angatr. Ngo atre hnyawa hi së, laka ka mele angatr. Öni Tusi Hmitrötr ka hape, Satana a ‘amenune la nöjei atr e cailo fen,’ nge kola xatua angeic hnene la itre dremoni angeic.—Hna Amaman 12:9, 12.

Hapeu, atreine fe kö Diabolo me itre dremoni angeic troa amenu së?— Eje hi, e tha hmeke kö së. Ngo tha tro pi kö sa xou. Hna qaja hnene la Atre Hamë Ini Ka Sisitria ka hape: ‘Pëkö ewekë i Diabolo theng.’ Maine tro sa qale catre koi Iehova, tro hë Nyidrëti a thupë së me thepe së qathei Diabolo me itre dremoni angeic.—Ioane 14:30.

Nyipi ewekë catre tro sa atre la itre huliwa ka ngazo hna upi së troa kuca hnene la itre dremoni. Haawe, pane mekune jë la ewekë celë. Nemene la itre huliwa ka ngazo hna kuca hnene la itre dremoni ngöne lo angatr a uti a tro celë fen?— Qëmekene la Iwë, hnei angatre hna ce meköle memine la itre föe, ketre ewekë hna wathebone koi angatr. Ame enehila, angatr a ajane tro la itre atr a xele ma drenge la wathebo i Akötresie göi ce meköle trefën. Mekune hi eö lo itre atr ka ijije troa ce meköle trefën?— Kolo hmekuje hi lo itre atr ka faipoipo hë.

Nyimutre enehila la itre nekö trahmanyi me nekö jajiny ka ce meköle ne kuci ngazo, nge ewekë lai ka tha meköti kö. Tusi Hmitrötr a hane qaja fe la “itei” ne la trahmany, maine ga hmitrötre i angeic. (Levitiko 15:1-3) Kola qaja mina fe la ‘itrei’ föe, maine ga hmitrötre i angeic. Hnei Iehova hna xupe la itre ‘itrei’ cili, matre troa huliwane ngöne hmekuje hi e hnine  la faipoipo. Madrine catre la itre dremoni ngöne la kola kuca hnene la itre atr la itre ewekë hna wathebone hnei Iehova. Drei la ketre ceitun, kola madrine hnei angatr e kola öhne la nekö trahmany me nekö jajinyi a elone me huliwane menune la itre ga hmitrötre i nyidro. Tha celë kö la hne së hna ajane la troa amadrinëne la itre dremoni, tune kaa la hnei eö hna mekun?—

Hetrenyi mina fe la ketre ewekë hna ajane hnene la itre dremoni, ngo ka sisi pe koi Iehova. Atre fe hi eö ka hape, nemene la ewekë cili?— Kolo hi a qaja la iangazo. (Salamo 11:5) Ame la iangazo, tre, kola mama ngöne la easa thiina ka ngazo me akötrëne la itre xan. Mekune hi eö lo pengöne lo itre atr ka hoea hmae; angatre hi lo itre neköne la itre dremoni ka iakötrë catr.

Ajane mina fe la itre dremoni troa iaxoueny. Ame e itre xa ijin, angatre a iamamanyikeu me nyi atr ka meci hë. Atreine fe angatre troa nyitipune la aqane ithanata ne la itre ka mec. Angatr a ujë tune lai, matre troa ukune la itre atr troa mekune ka hape, ngacama meci hë la ngönetrei ne la atr, ngo ka mele pala kö angeic, nge ijije pala kö la itre ka mec troa ithanata me itre ka mel. Eje hi, qaathei itre dremoni matre xoue ka meci jë hnene la itre atr.

 Qa ngöne lai, nyipi ewekë tro sa thupëne matre tha tro kö a amenu së hnei Satana memine la itre dremoni angeic. Kola hmekë së hnei Tusi Hmitrötr, ka hape: ‘Satana a sipu ujë angeice kö nyine angela ka lolo, nge kolo fe a ujë tune lai hnene la itre hlue i angeic.’ (2 Korinito 11:14, 15) Ngo ame la pengöi itre dremoni, tre, itre ka pi iakötrë angatr. Tro sa pane ce wange la aqane ujë i angatr, göi troa huli së troa nyitipu angatr.

E kaa la hna öhne hnene la itre atr la itre ka iakötrë, me ka kuci ngazo, me itre tepolo?— Hapeu, tha itre eje kö a mama ngöne itre film ngöne televizio maine sinema, maine ngöne ordinatör, maine pena ngöne la itre itus? Hapeu, drei la hnene la itre ewekë cili, hna aeasenyi së kow, Akötresie, maine Diabolo me itre dremoni angeic? Tune kaa la hnei eö hna mekun?—

Drei la ka ajane tro sa drenge me goeëne la itre ewekë ka ngazo?— Satana me itre dremoni angeic. Haawe, nemene hö la nyine tro sa kuca?— Tro sa e, me drenge me goeëne la itre ewekë ka loi kowe la mele së, nge ka troa xatua së troa nyi hlue i Iehova. Nemene la itre xa ewekë ka loi nyine tro sa kuca?—

Maine tro pala hi sa kuca la ewekë ka loi, haawe, thatreine jë kö tro sa xouene la itre dremoni. Easa öhne la pengö i Iesu, laka ka catre kö nyidrë hui angatr, nge angatr a xoue nyidrë. Ame ngöne la ketre ijin, hnei angatre hna hnyinge koi nyidrë, ka hape: “Hape u, hlepëti cilieti troa apatenyi hun ?” (Mareko 1:24) Epi troa canga traqa hnei Iesu troa lepe apatrenyi Satana me itre dremoni angeic; tune kaa la mekuna i eö?— Ngo ame enehila, tha sihngödri kö koi së laka, tro Iesu a thupë së qa ngöne la iajojezi ne la itre dremoni, e hne së hna lapa qale catre koi nyidrë me kowe la Tretretro i nyidrë e koho hnengödrai.

Maine kola ajane troa atre la nyine troa kuca, e jë la 1 Peteru 5:8, 9 me Iakobo 4:7, 8.

[Iatr ne la götran 57]

Nemene la ewekë ka ngazo hna kuca hnene la itre angela celë?

[Iatr ne la götran 58]

Pine nemene matre catrehnine catre kö la ngazo enehila hune lo itre hneijine ekö?

[Iatr ne la götran 60]

Nemene la ewekë ka troa traqa, e hne së hna goeëne la itre aqane iakötrë?

[Iatr ne la götran 61]

Nemene la ewekë ka loi nyine tro sa kuca?