Mekene 2

Tusi Qaathene La Akötresie Ka Hnimi Së

NEMENE la itusi hnei eö hna ajane catrën?— Itre xa nekönatr a ajane la itre itusi ka amamane la aqane mele ne la itre öni. Ame pena itre xan, ka loi la itre itusi ka nyimu iatren. Kolo itre itusi lai hne së hna pi e.

Ngo ame kö la itre itusi ka sisitria, tre, kolo itre ka amamane koi së la nyipici göi Akötresie. Nge ca ka sisitria pala kö hune la itre xan. Nemen?— Tusi Hmitrötr.

Pine nemen matre kola qaja ka hape, ka nyipi ewekë catre la Tusi Hmitrötr?— Pine laka ka xulu eje qaathei Akötresie. Eje lai a qaja koi së la pengö i Nyidrë memine la itre ewekë ka lolo hnei Nyidrëti hna troa kuca thatraqa së. Eje mina fe a qaja la nyine tro sa kuca göi troa amadrinë Nyidrë. Kösë tusi hnei Akötresieti hna cinyihane koi së.

Maine ju tro hi Akötresieti a upe koi së la Tusi Hmitrötr hnei Nyidrëti hna cinyihane qa hnengödrai. Ngo hnei Nyidrëti pe hna upe troa cinyihane eje hnene la itre atr ka nyi hlue i Nyidrëti e celë fen nge ka tro fë la itre mekuna i Nyidrë.

Nemene la aqane kuca i Akötresie?— Tro sa xome la ketre ceitun nyine xatua eö troa trotrohnin. Ame la easa drenge la ketre atr a ithanata ngöne la ketre ipoos, ngacama angeice e ga nany, ngo drenge hi së la nine ithanata i angeic. Ketre tune fe la easa goeë televizio, laka easa öhne la itre atr a ithanata, ngo angatre pe ngöne la itre nöje ga nany.

Ketre tune fe lo itre atr ka elë a tro koho ngöne treu. Atre fe hi eö laka, ijiji angatre fe troa iupi fë maca qa koho kowe la fen?— Maine atreine hi la itre atr troa iupi fë maca qa hnengödrai, nemene la ejolene lai koi Akötresie, ijiji Nyidrëti kö troa hane ujë tune lai?— Tha nyine tro kö a isenyine lai! Nge ka qane hë ekö catre la Nyidrëti a iupi fë maca; ka hnyipi traqa pe hi la ipoos me televizio.

 Mose la ketre atr ka drenge la kola ewekë hnei Akötresie. Tha öhnyi Akötresieti kö hnei angeic ngo ame pe, drenge hi angeice la aqane ula i Nyidrë. Traqa koi itre milio la itre atr ka sine me drenge la ewekë cili. Hnei Akötresieti hna enijëne la wetr, nge kola sameke me ulile la iume hedreng. Atre hnyawa hi la itre atr ka hape, hnei Akötresieti hna ewekë, nge pine laka atraqatr la xou i angatr, hnei angatr hna qaja koi Mose ka hape: “The tro kö Akötesieti a ulati koi hun, ke mecipi hun.” Ame pë hë e thupen, hnei Mose hna cinyihane la hnei Akötresieti hna qaja koi angeic. Nge ame la hnei angeice hna cinyihan, tre, eje enehila e hnine la Tusi Hmitrötr.—Esodo 20:18-21.

Hnei Mose hna cinyihane lo faifi lao pane tusi ne la Tusi Hmitrötr. Ngo hetrenyi kö lo itre xa atr ka cinyihane la Tusi Hmitrötr, ala fotre angatr itre trahmanyi hnei Akötresieti hna iëne thatraqane la huliwa cili. Ka mele  angatre ngöne lo itre hneijine ekö, nge nyimutre catre la itre macatre hna xome matre troa umuthe la Tusi Hmitrötr. Traqa koi 1 600 la etrune la itre macatre cili! Ngo ame la hna haine hnene la itre atr, tre, ngacama ithatre kö angatre ngo ka ce tro xötrë hnyawa me ka cepunikë la itre mekune hnei angatre hna cinyihan.

Ame la itre xa hnei Akötresieti hna iëne troa cinyihane la Tusi Hmitrötr, tre, ka hlemu itre xan, nge aminatre itre xan. Goeëne ju hi së la pengö i Mose, ka thupë mamoe lo, ngo e thupene hë, hnei angeice hna elemekene la nöje Isaraela. Ame pena ha Solomona, tre, joxu nyidrë nge ka inamacan me trenamo, pëkö ka tui nyidrë e cailo fen. Ame pena ha Amosa, tre, atre tra hmejieng.

Droketre, la ketre atr ka hane cinyihane la Tusi Hmitrötr. Atre fe hi eö la ëje i angeic?— Luka. Ame fe la ketre ka cinyihan, tre, telona. Mataio la ëjen. Atre ne wathebo la ketre ka atre hnyawa la itre wathebo i mus, me itre wathebo ne la hmi i angetre Iudra. Nyimu tusi ne la Tusi Hmitrötr hnei angeice hna cinyihan. Atre fe hi eö la ëje i angeic?— Paulo. Ame pena Peteru me Ioane, lue ka nyi ie ngo hnei nyidroti fe hna hane cinyihane la Tusi Hmitrötr.

Ame qaathene la itre atr cili, nyimutre la itre ka cinyihane la itre ewekë hnei Akötresieti hna troa kuca ngöne la itre drai ka calemi. Hnei angatre hna atre tune kaa la itre ewekë cili?— Hnei Akötresieti kö hna qaja koi angatr.

Traqa pë hë Iesu lo Atre Hamë Ini Ka Sisitria e celë fen, nge ase hë cinyihane la götrane ga tru ne la Tusi Hmitrötr. Pine laka ka mele nyidrëti ekö e koho hnengödrai, haawe, öhne hnyawa hi nyidrëti la hna kuca hnei Akötresie. Hapeu, ka mejiune kö Iesu ka hape, qaathei Akötresieti la Tusi Hmitrötr?— Eje hi.

Hnei Iesu pala hi hna xome la Tusi Hmitrötr, matre troa qaja kowe la itre atr la itre huliwa i Akötresie. Nge e itre xa ijin, nyidrëti a qaja koi angatre la mekuna i Akötresie ka eje e hnine la he i nyidrë. Hnei Iesu mina fe hna ithuemacanyine la itre xa ewekë ka tru qaathei Akötresie. Öni nyidrëti ka hape: “Ame la nöjei ewekë hnenge hna denge thei nyidë, ini a qaja lai kowe la fene hnengödrai.” (Ioane 8:26) Pine laka ce nyidrëti ekö me Akötresie e koho hnengödrai, haawe, nyimutre catre la itre ewekë hnei Iesu hna dreng.  Haawe, tro sa thele eka la itre ithuemacanyi cili?— E hnine la Tusi Hmitrötr. Kola cinyihane la Tusi Hmitrötr, matre tro sa e.

Eje hi, hna cinyihane la Tusi Hmitrötre hnene la itre atr ngöne la isa qene hlapa i angatr. Xalaithe hi la itre hnepe hna cinyihan qene Suria, ngo tru pe kö la munëne hna cinyihane qene Heberu me qene Heleni. Ngo pë hmaca kö ka atreine troa e enehila ngöne la itre qene hlapa cili. Celë hi matre hna ujëne la Tusi Hmitrötre ngöne la itre qene hlapa hna ithanatane ngöne la hneijine së. Traqa koi 2 260 la etrune la itre qene hlapa hna ujëne la Tusi Hmitrötre ngön, itre xane ka pexej nge itre xan, tre, sine hi. Pane mekune jë eö lai! Ame la Tusi Hmitrötr, tre, celë hi tusi Akötresieti lai kowe la itre atr e celë fen. Ngacama anyimua fejane ju hë ej, ngo ame pe tha saze kö la maca hna qatreng hnene ej; eje kö la maca qaathei Akötresie.

Ka nyipi ewekë catre koi së la maca cili. Ngacama ekö catre hë cinyihane la Tusi Hmitrötr, ngo eje pe a qaja  la itre ewekë ka traqa ngöne la hneijine së. Eje fe a thuemacanyi së la hnei Akötresieti hna troa kuca ngöne la itre drai ka troa calemi catr. Ewekë lai hne së hna lapa treqene hnyawa! Eje fe a hamëne koi së la ketre mejiune ka lolo catr.

Kolo mina fe a ini së hnei Tusi Hmitrötr la aqane mele hnei Akötresieti hna ajane tro sa xom. Eje a qeje pengöne koi së la ewekë ka loi memine la ewekë ka ngazo. Nyipi ewekë tro nyiso a atre la itre ewekë cili. Tusi Hmitrötr a qaja la itre ewekë ka ngazo hna kuca hnene la itre atr memine la itre ethane kowe la mele i angatr, celë hi matre kola hmekë së matre tha tro kö sa hane xeni pune fe la itre aqane ujë cili. Kolo mina fe a qaja la itre atr ka kuca la loi memine la itre thangane ka loi hnei angatre hna kapa. Hna cinyihane asë la Tusi Hmitrötre nyine loi koi së.

Ngo maine easa ajane troa hetre menene ka loi la Tusi Hmitrötre kowe la mele së, haawe, loi e tro sa atre la mekune ka sa la hnyinge celë: Drei la ka hamëne koi së la Tusi Hmitrötr? Tune kaa la mekuna i eö?— Qaathei Akötresieti la Tusi Hmitrötr. Qa ngöne lai, nemene la aqane tro sa amamane ka hape, ka nyipi inamacane së?— Loi e tro sa drei Akötresie me kuca la hnei Nyidrëti hna qaja koi së.

Celë hi matre nyipi ewekë catre tro sa xomi ijine troa e la Tusi Hmitrötr. Ame ngöne la kola cinyanyi koi së hnene la ketre atr hne së hna hnim, tre, tha mano kö së e la tusi angeic pine laka, eje a akeukawane la hni së. Ceitune hi lai memine la Tusi Hmitrötr, laka, ketre tusi lai hne së hna kapa qaathene la Atre hnime catrë së. Eje hi, celë hi tusi lai hna hamëne hnene la Akötresieti ka tru ihnimin.

Pane xome jë la itre xa menetre matre troa e la itre xötre celë ka amamane ka hape, Wesi Ula i Akötresieti la Tusi Hmitrötr, nge hna cinyihane eje nyine loi koi së: Roma 15:4; 2 Timoteo 3:16, 17; me 2 Peteru 1:20, 21.

[Iatr ne la götran 17]

Easa atre tune kaa ka hape, ijije hi tro Akötresieti a ithanata koi së qa ga nany?

[Iatr ne la götran 19]

Atre fe hi eö la ëje ne la itre atr celë ka cinyihane la Tusi Hmitrötr?

[Iatr ne la götran 20]

Nemene fe la itre xa ewekë hnei eö hna troa atre qa ngöne la hna e la Tusi Hmitrötr?