Mekene 24

Wange Kö, Ke, Hane Jë Fe Eö Atrekënö Elany!

HANE kö atrekënö la ketre ewekë i eö?— Nemene ju hë la aqane ujë i eö?— Pëkö ka pi wange la ka atrekënö. Ngo hnei nemene kö matre atrekënö jë la ketre atr? Hapeu, ka atrekënö hë angeice qa kuhu hni thin?—

Ase hë së lo inine ka hape, hna hnaho së asë hnine la ngazo, nge itre ka tha pexeje asë hi së. Ngo ame la ka atrekënö, tre, tha hna hnaho angeice kö hnei thine a ka atrekënö hë. Ngacama ka hlemu loi me mele nyipici la keme me thin me itre trejine me angeic, ngo angeic a atrekënö hnei pi hetre mo me mani.

Ame koi eö, drei lo ka pane atrekënö ekö?— Tro sa ce wange la pengö i angeic. Atre angeice hnyawa hi hnene la Atre Hamë Ini Ka Sisitria, lo nyidrëti petre kö e hnengödrai. Ketre angela hi. Ngo hnauëne kö laka atrekënö jë angeic, ngo itre ka pexej asë pe la itre angela hna xupe hnei Akötresie?— Ase hë së lo wange ngöne la Mekene 8, laka hnene la angela cili hna meciune la ifekë ewekën. Atre fe hi eö la ewekë cili?—

Hnene la angela cili hna ajane tro la lue pane xupuna i Akötresie, trahmanyi me föe, a thili koi angeic. Ngo tha meköti kö tro angeic a kapa la ewekë i Akötresie, ke, Nyidrëti hmekuje hi la nyine troa thili kow. Hnei angeice hna thapa la göhmeku i Akötresie! Ame hi lai angeic a iaö Adamu me Eva troa thili koi angeic, tre, angeice hi lai a atrekënö. Qaane ju hi lai, hë angeice jë hi ka hape, Satana Diabolo.

Nemene la ka upe la atr troa atrekënö?— Hnene la hna meciune la ifekë ewekën. E catre hë la aja cili, canga tro hi eje a akeine la atre loi thiina kowe la ngazo. Ame la itre xan, nyiqaane jë hi angatre atrekënö, nge jole jë hi koi angatre troa inue memine la hna majemine ka ngazo  cili. Hna ujë hi tune lai hnene lo ketre aposetolo i Iesu, ene Iudra Isakariota.

Atre hnyawa hi Iudra laka, ewekë ka ngazo la troa atrekënö, ke, hnei angeice hna inine la Wathebo i Akötresie qane lo kola co. Atre fe hi angeic, ka hape, hnei Akötresieti ekö hna ithanata qa hnengödrai, me qaja kowe la nöje i Nyidrë, ka hape: “The tro kö eö a ënö.” (Esodo 20:15) Ame ngöne la ketre ijin, hnei Iudra hna öhne la Atre Hamë Ini Ka Sisitria, me hane xötrethenge nyidrë. Iesu pë hë a hane ië angeice jë troa sine lo ala 12 lao aposetolo.

Ame ngöne la nöjei tronge i angatr, hnei Iesu me itre aposetolo i nyidrë hna ce xeni pala hi. Casi hi la itrengene manie i angatr, matre hnei Iesu hna hamë Iudra tro hi a thupën, ngo ame la manien, tre, tha ewekë i Iudra hmekuje kö. Atre fe hi eö la ewekë hnei angeice hna kuca e thupen?—

Hnei Iudra hna nango nyiqaane atrekënö la manie qa hnine la itrengen. Majemine hë angeice huliwa qene atrekënö. Ame hna traqa pi la meciun, ke, ase hë jilapane la hni angeice hnene la aja mani. Tro pe nyiso a pane ce wange la aqane huli Iudra kowe la ngazo hnene la pi hetreny, itre drai qëmekene troa humuthe lo Atre Hamë Ini Ka Sisitria.

Hnei Maria, xa i Lazaro lo enehmu i Iesu, hna xome la ketre wakacu ka tru thupen, me nenge kowe la lue ca i Iesu. Hnei Iudra hna ewekë pin la aqane ujë cili. Atre fe hi eö la kepin?— Kola nyijëne hnei angeice troa salemëne la wakacu cili, matre nyine ithue manien la itre puafala. Ngo kolo hi matre nyi aliene jë la itrengene mani, matre tru la nyine tro angeic a atrekënö.—Ioane 12:1-6.

Hnei Iesu hna sa koi Iudra ka hape, the qeje Maria kö hnei angeic, ke, lolo la hnei nyiidro hna kuca. Hnei Iudra hna drenge akötrëne la trenge ewekë i Iesu, ene pe mejë triji angatre jë hnei angeice troa wange la itre hene ne hmi, ene lo itre ithupëjia me Iesu. Hnene la itre atr cili hna thupë jidrine troa xolouthi Iesu, wanga öhnyi angatre jë.

 Hnei Iudra hna qaja kowe la itretre huuj, ka hape: ‘Maine tro nyipunieti a nyi thupeng, tro ni a amamane koi nyipunie la aqane troa xolouthi Iesu. Ngo tro nyipunieti a hamë ni la ijetre?’

Sa jë hi hnene la itretre huuj, ka hape: ‘Tro huni a hamë eö la thötre lao sileva.’—Mataio 26:14-16.

Hnei Iudra hna kapa la thupen, nyine amamane ka hape, ase hë angeice salemë Iesu kowe la itre atr cili! Öhne hi eö la engazone la aqane ujë i angeic?— Ka tune hi la mele ne la ka atrekënö lai, ene lo ka hni koi mani. Joxu hë koi angeice la mani, nge co pë hë la ihnim i angeice kowe la itre atr, me koi Akötresieti fe.

Maine jë öni eö ju hi e kuhu hni eö: ‘Iehova casi hi la hnenge hna hnim, nge pëkö ketre.’ Lolo catre la mekune cili. Ma ka tune jë fe hi ekö la mekuna i Iudra lai, qëmekene troa ië angeice hnei Iesu troa aposetolo i nyidrë. Hna mekune tune fe hi lai hnene la itre atr ka loi ekö, nge atrekënö ju pë hë e thupen. Tro fe sa hane ce wange la itre xan e angatr.

Akana la ketre hlue i Akötresie ka mele ekö qëmekene troa hnahone la Atre Hamë Ini Ka Sisitria. Ame ngöne la ketre drai, hnei Akana hna öhne la ketre ixetre ka mingöming, me gol me sileva, ngo tha itre ewekë i angeice kö. Tusi Hmitrötre pe a qaja ka hape, itre ewekë i Iehova, pine laka hna thapa qaathene la itre  ithupëjia memine la nöje i Nyidrë. Ngazo pe hna traqa la meciun koi Akana, ene pe angeic a atrekënö ju itre ej.—Iosua 6:19; 7:11, 20-22.

Hanawange la ketre ceitun. Hnei Iehova ekö hna ië Davita nyine joxu ne Isaraela. Ame ngöne la ketre drai, öhnyi Batheseba ju hi, ketre föe ka mingöming hnei Davita. Hnei nyidrë hna goeëne huti eahlo, ene pe traqa ju hi la mekune troa xomi eahlo kowe la hnalapa i nyidrë. Ngo ka faipoipo hë eahlo me Uria. Haawe, nemene jë ekö la nyine tro Davita a kuca?—

Ijije hi tro angeice ekö a lepe trije la mekune celë, ene la troa ce lapa me Batheseba. Ngo ngazo pe, xomi eahlo jë hi hnei nyidrë kowe la hnalapa i nyidrë, me thele jëne troa humuthi Uria. Pine nemene matre kuca jë Davita la itre ewekë ka ngazo cili?— Pine la hna meciune la ifekë föen.—2 Samuela 11:2-27.

 Qa ngöne la hna ietra hnei Davita, ame hna nue amele nyidrëti ju hnei Iehova. Ngo ame itre ngazo i nyidrë, tro kö nyidrëti a xeni pun. Hna ithepe musi me Davita hnei Abasaloma nekö i nyidrë. Ame la nöjei atr ka traqa troa wai Davita, tre, hnei Abasaloma hna canga tro troa ihaluthe me idremi memin. Celë hi matre, Tusi Hmitrötr a qaja ka hape: “Hnei Abasaloma hna ënöne la ite hni angete Isaraela.” Kola thele jëne tune lai hnei Abasaloma, matre ajane jë angatre troa acili angeice nyine hna i Davita joxu.—2 Samuela 15:1-12.

Hapeu, ase fe hë eö hane meciune la ketre ewekë, tune la hna kuca hnei Akana me Davita me Abasaloma?— Maine easa xome la ifekë ewekën, haawe, easë hi lai a atrekënö. Mekune pala kö eö lo ewekë hna meciune hnei Satana, ene lo pane atrekënö ekö?— Ame la aja i angeic, tha tro hmaca kö la itre atr a thili koi Akötresie, ngo koi angeice pe. Haawe, ame hi lo angeice a iaö Adamu me Eva troa drengethenge angeic, angeice hi lai a atrekënö.

Ame la atre trene ewekë, angeice hmekuje hi la ka ijij troa nue la ewekë i angeice troa huliwane hnei ketre atr. Tro sa wange la ketre ceitun, könë eö jë hi hnene la ketre sinee i eö troa ce elo me angeice ngöne la hnalapa i angeic. Tro kö eö a xome la mo i angeice kowe la hnalapa i eö?— Tro eö a xom, e hna nue koi eö hnene la keme maine thine i angeic. E xome hë së la ketre ewekë ngo tha hna sipone kö, haawe, easë hi lai a atrekënö.

Pine nemene matre tupathi së jë ngöne la ketre ijin, troa atrekënö?— Hnene la hne së hna meciune la ifekë ewekën. Ngacama pë ju hë ka öhnyi eö, ngo drei hmekuje hi lo Atr ka atreine troa öhnyi eö?— Iehova Akötresie. The thëthëhmine kö eö laka, methi Nyidrë la atrekënö. Maine tha ajane kö eö troa jele atrekënö eö, haawe, akökötrene catrëne pi la ihnimi eö koi Akötresie me kowe la atre lapa easenyi eö.

Tusi Hmitrötr a amamane hnyawa laka tha ka loi kö e troa atrekënö. E jë la Mareko 10:17-19; Roma 13:9; me Efeso 4:28.

[Iatr ne la götran 129]

Pine nemene matre atrekënö jë Iudra?

[Iatr ne la götran 130]

Nemene la itre mekune ka ngazo ka traqa koi Akana me Davita?

[Iatr ne la götran 130]

Hnei nemene matre qeje Abasaloma jë ka hape, ka atrekënö?