1, 2. Nemene la hnyinge ne la itre atr?

HNA apatrene la ketre traon hnene la ketre sunami. Hna kuqane la itre atr hnene la ketre trahmanyi e hnine la ketre uma ne hmi. Nyimu ka eatr me ka mec. Ca föe ka meci fë kaser hna meci trije la faifi lao neköi eahlo.

² Ame la kola traqa la itre hulö me itre akötr ke, hnene la itre atre hna hnyinge ka hape, hnauëne la kola tiqa la fene hnei imethinë me iakötrë? Maine jë hnei epuni hna hane hnyinge tun?

3, 4. (a) Nemene la itre hnyinge i Habakuka? (b) Nge nemene la aqane sa i Iehova?

³ Tusi Hmitrötr a qaja ka hape, hna hnyinge fe hnene la itre ka lapaune koi Iehova. Tui Habakuka, la angeic a hnyingë Iehova ka hape: “Ngöne nemene enëtilai a amamane koi ni la ngazo me ötetëtine [goeën] la aköt? nge eje qëmekenge la ithöeë [thepewekë] me iangazo; nge ite xan’ a aciane la ikelikelë me iwatratra [iwesitrë].”—Habakuka 1:3.

⁴ Hnei Akötresieti hna sa koi Habakuka ngöne Habakuka 2:2, 3, laka tro kö Nyidrëti a amekötin. Tru la ihnimi Iehova koi së. Tusi Hmitrötr a qaja ka hape, “ke nyidëti a meku nyipunie.” (1 Peteru 5:7) Hace pi hë Nyidrëti troa goeëne la itre atre e akötr. (Isaia 55:8, 9) Ngo hnauëne kö la kola elë la akötr?

5. Nemene la hna qaja hnene la itre hene ne hmi göne la itre akötr? Ngo nemene la hna ini së hnei Tusi Hmitrötr?

⁵ Ame la kola akötre la ketre atr, hna majemine qaja  hnene la itre hene ne hmi, ka hape, aja i Akötresieti lai. Öni angatr e itre xa ijin ka hape, hna amekötin hë lai hnei Akötresie koi angeic, nge thatreine kö së troa qeje pengön. Tune la kola mec la ketre atre maine nekönatr pena, öni angatr, hnei Akötresieti lai hna xom troa ce me Nyidrëti e koho hnengödrai. Ngo trenga thoi lai. Tha qaathei Iehova kö la itre akötr. Tusi Hmitrötr a qaja ka hape, “Loi e iananyi la ngazo me Akötesie, kete tune la thina ka ngazo me Kapucatinasë.”—Iobu 34:10.

6. Pine nemene matre nyimutre la itre atr ka upezö Akötresieti la itre akötr?

⁶ Nyimutre la itre atr ka upezö Akötresieti la itre akötr. Pine nemen? Pine laka angatr a mekune ka hape, Nyidrëti la ka musinëne la fen. Ngo hne së lo hna wang ngöne la Mekene 3 laka, Satana Diabolo la ka musinëne la fen.

7, 8. Pine nemene matre hna haöthe la fene hnene la akötr?

⁷ Tusi Hmitrötr a qaja ka hape, “nge fene hnengödrai asëjëihë a meköle thene la ate ka ngazo.” (1 Ioane 5:19) Ame Satana ka iakötrë, nge “ate amenune la fene hnengödrai asëjëihë.” (Hna Amaman 12:9) Nge ka tiqa la fene hnei ka tui angeic. Celë hi kepine matre hna haöthe la fene hnei thoi, imethinë me iakötrë.

⁸ Hetre xa kepine kö matre tru la akötr e celë fen. Jëne la hna tha idrei hnei Adamu me Eva, ka ngazo asë hi la itre matra i nyidro. Hnene la ngazo matre itre xa atr a akötrëne la itre xan, me pi musinëne la itre xan. Angatr a iwesitrë, me iakötrë, me itö isi. (Ate Cainöj 4:1; 8:9) Nge ame la itre xa akötr, ke sesëkötre ju hi së la kola traqa, tune la hna qaja ka hape, “la ijine memine la ewekë ka xulu.” (Ate Cainöj 9:11) Ame itre xa ijin ke tha hne së kö hna thel, nge pëkö qaan, ngo eatre pi hi së, maine pena  traqa pi hi la ketre hulö. Kolo ke hne së hna traqa kowe la götrane me ijine ka ngazo.

9. Pine nemene matre xecie koi së laka, hetre nyipi kepine la Iehova a nue la itre akötr?

⁹ Tha Iehova kö la qaan la itre akötr, tune la itre isi, me ihumuth, me iakötrë, memine la itre wene, me iwë, me sa, me sunami. Maine jë epuni a hnying ka hape, maine Kapucatine asë Iehova, hnauëne kö la Nyidrëti a nue së troa akötre tune la? Atre hi së la aqane hnimi së hnei Iehova. Matre ka xecie koi së laka, ame la Iehova a nue la itre akötr, ke hetre ketre kepine ka nyipiewekë catr. —1 Ioane 4:8.

10. Hna sili trengathoi Iehova tune ka hnei Satana?

¹⁰ Hna amenu Adamu me Eva ekö hnei Satana, ngöne la hlapa e Edena. Öni angeic, ka ngazo la aqane musi Akötresie. Öni angeice fe ka hape, hnei Iehova hna juetrëne la ketre ewekë ka loi koi nyidro. Satana a iaö nyidro matre tro nyidroti a qale koi angeic me thipe triji Iehova.—Genese 3:2-5; wange ju la Ithuemacany 27.

11. Nemene la hnyinge hne së hna troa sa?

¹¹ Hnei Adamu me Eva hna tha drei Iehova me icilekeu me Nyidrë. Hnei nyidroti hna mekune laka, tro kö nyidroti a sipu mus. Matre nemene la aqane amamane Iehova laka, ka tria catre nyidro, nge Nyidrëti hmekuje hi la ka atreine mus?

12, 13. (a) Pine nemene matre tha hna canga apatrenyi Adamu kö me Eva hnei Iehova? (b) Pine nemene matre Iehova a nue Satana troa musinëne la fen? (c) Nge pine nemene matre Nyidrëti a nue la itre musi ne fene troa sipu mus?

¹² Tha hnei Iehova kö hna canga apatrenyi Adamu me Eva thupene la hnei nyidroti hna icilekeu. Hnei Nyidrëti hna nue nyidro troa hetre nekönatr. Nge ame la itre matra  i nyidro ke, tro pë hë angatr a isa iëne la ka troa musi koi angatr. Ame la aja i Iehova ke, troa lapaane la fene hnene la itre atr ka pexej. Nge celë hi ka troa traqa, ngacama icilekeu ju hë Satana.—Genese 1:28; Isaia 55:10, 11.

¹³ Hna jele thoi Akötresie hnei Satana qëmekene la itre milio lae angela. (Iobu 38:7; Daniela 7:10) Matre hnei Iehova hna nue ijine koi Satana troa amamane ka hape, hapeu, nyipici kö la itre hnei angeic hna qaja? Hnei Nyidrëti fe hna nue ijine kowe la itre atr troa amamane ka hape, atreine kö angatre troa ketre sipu mus? Matre hnei Nyidrëti hna nue la itre musi ne fen troa sipu mus ngo, fene la musi Satana.

14. Nemene la hna amamane hnene la musi atr ngöne la itre macatre?

¹⁴ Itre thauzane lao macatre hnene la itre atr hna thele troa sipu mus, ngo thatreine kö angatr. Nyine tro hi a amamane laka, ka thoi lae Satana. Haawe, nyipiewekë kowe la itre atr troa thele ixatua thei Akötresie. Matre nyipici la hna perofetane hnei Ieremia ka hape, “Iehova fe, ate hë ni laka tha qâ i ate kö la jë i angeic; tha qâ i ate troa amekötine la ite hna feke ca hnei angeic.”—Ieremia 10:23.

15, 16. (a) Pine nemene matre Iehova a nue aqeane la itre akötr? (b) Pine nemene matre tha hnei Iehova kö hna canga apatrene la itre jol?

¹⁵ Pine nemene matre Iehova a nue aqeane la itre akötr? Iehova a nue ijine koi së matre tro sa öhne hnyawa ka hape, ka ngazo la musi Satana? Hnene la itre atr hna acil la itre musi e celë fen, ngo pëkö ka atreine troa aloine la mele ne la atr. Ngacama tru la inamacane me  atrehmekun ngöne la götrane la sias, ngo ame ngöne la ketre götran, kolo jë pe ka hape, catre hnine jë la iakötrë me ihumuth me isi. Nyine tro hi a amamane laka, thatreine kö la atr troa sipu mus.

¹⁶ Tha hnei Iehova kö hna nyinyine la itre jol hna axulune hnei Satana, ke maine ju, Nyidrëti hë lai a xatua Satana. Ngo tha tro pi kö Nyidrëti a sajuën la musi Diabolo. Ketre, wanga mekune jë la itre atr laka ijiji angatre fe hi troa sipu mus. Ngo tha eje kö lai, thatreine jë kö Iehova kuca la ketre ewekë nyine amenu së. Thatreine kö Iehova troa thoi.—Heberu 6:18.

17, 18. Nemene la hnei Iehova hna troa kuca göne la itre akötr ka xulu qaathei Satana?

¹⁷ Tru catre la itre akötr ka xulu qa ngöne la icilekeu i Satana me itre atr ka ce me angeic. Atreine kö Iehova troa aloine hmaca? Eje hi. Pëkö hna thatreine hnei Akötresie. Atre kö Iehova la ijine troa amamane, la itre trenga thoi Satana. Ame e cili, ke tro ha paradraiso la ihnadro tune lo hnei Nyidrëti hna thingehnaean. Nge tro hë la “nöjei ate ngöne la ite hua” a mele hmaca. (Ioane 5:28, 29) Pë hë atr ka troa wezipo me mec. Tro Iesu a nyihnyawane la hna angazone hnei Satana. Nge jëne Iesu, tro Iehova “a apatene la ite huliwa i diabolo.” (1 Ioane 3:8) Easa madrine laka hnei Iehova hna xomihni së. Nyidrëti a nue ijine koi së troa thele troa atre Nyidrë me iëne troa lapa fene la musi Nyidrë. (E jë la 2 Peteru 3:9, 10.) Nge ame la easa akötr, ke Nyidrëti a hamë ixatua koi së.—Ioane 4:23; e jë la 1 Korinito 10:13.

¹⁸ Tha Iehova kö a musinë së troa lapa fene la musi Nyidrë. Hnei Nyidrëti hna hamë së la ketre ahnahna ka lolo ene la mekuthetheu, kola hape, atreine troa ië ewekë. Tro sa wange la aqane tro sa huliwane la ahnahna cili.

19. Nemene la ahnahna hna hamë së hnei Iehova? Nge pine nemene matre tro sa kapa madrine la ahnahna cili?

¹⁹ Ame la mekuthetheu ke, ene la atreine troa ië ewekë. Ketre ahnahna lai ka sisitria qaathei Akötresie, ke kola mama hnyawa la isapengö së memine la itre öni. Ame la itre öni ke itre ej a mele thenge la hna amekötine hë koi itre ej. Thatreine kö itre ej axecië mekun. Ngo ame së itre atr, atreine hi së iëne la aqane tro sa mel me aqane troa amadrinë Iehova. (Ite Edomë 30:24) Ketre, tha ceitu së kö me itre robo, laka troa musinë së matre troa kuca la aja ne la ka kuci robo. Ijije hi tro sa isa ië mekun. Maine pena, tro sa iëne la itre sinee së, memine fe la itre hne së hna troa kuca. Ame la aja i Iehova, ke, tro sa mele madrin.

20, 21. Nemene la nyine tro sa iëne hnyawan enehila?

²⁰ Iehova a ajane tro sa hnimi Nyidrë. (Mataio 22:37, 38) Tune la ketre kem ka madrine la kola qaja hnei kuku ka hape, “eni a hnimi Nyipë” memine la hni nyën ka pexej. Iehova a nue së tro sa sipu iëne troa nyihlue i Nyidrë. Hnei Satana, me Adamu, me Eva hna sipu iëne laka tha tro kö angatr a nyihlue i Iehova. Nge tune ka fe epun? Nemene la aqane tro epuni a huliwan la mekuthetheu i epun?

²¹ Itre milio lao atr ka iëne troa nyihlue i Iehova me thipetriji Satana. Haawe, ijiji fe hi tro sa isa iëne troa nyihlue i Iehova. (Ite Edomë 27:11) Ame ngöne la fene ka hnyipixe, ke tro Nyidrëti a apatren asë la nöjei akötr. Nemene la nyine tro epuni a kuca enehila, matre tro epuni a hane mel e hnine la fene ka hnyipixe? Tro pë hë la mekene thupen a sa la hnyinge cili.