1. Nemene la thithi ka hlemu hne së hna troa ce ithanatan?

NYIMUTRE la itre atr ka atre lo thith hna hape, Angakaka. Hnei Iesu hna inine la itretre drei nyidrë, la aqane troa thith. Nemene la itre ewekë hnei nyidrëti hna thithi fë? Nge hnauëne laka ka nyipiewekë koi së lai thith?

2. Nemene la köni ewekë ka sisitria, hnei Iesu hna amamai së troa thithi fë?

² Öni Iesu: “celë hi mate thithi ju nyipunieti tune la, ka hape, Tretretro huni e koho hnengödrai, epi hmitrötre la ëje i Cilie. Epi traqa pi la Baselaia i Cilie. Epi tro fe a eje la aja i Cilie e celë fen tune e koho hnengödrai.” (E jë la Mataio 6:9-13, MN.) Pine nemen matre Iesu a ini së troa thithi thatraqane la köni ewekë cili?​—Wange ju la Ithuemacany 20.

3. Nemene la itre hne së hna troa atre göne la Baselaia i Akötresie?

³ Atre hë së laka, ame la ëje i Akötresie ke, Iehova. Atre fe hë së la aja i Akötresie kowe la nöjei atr, memine la ihnadro. Ngo ame la Iesu a qaja ka hape, “E pi traqa pi la Baselaia i Cilie”, ke kola hapeue lai? Tro sa ce wang ngöne la mekene celë, la pengöne la Baselaia memine la hnene ej hna troa kuca, memine fe la aqane tro ej a ahmitrötrëne la ëje i Akötresie.

4. Nemene la Baselaia, nge drei la Joxu?

⁴ Hnei Iehova hna acile la ketre musi e koho hnengödrai. Tusi Hmitrötr a hëne la musi cili ka hape, Baselaia i  Akötresie, nge Iesu la Joxu. Haawe, Iesu la “Joxu ne la nöjei joxu, me Tane la nöjei tan.” (1 Timoteo 6:15) Ka draië kö la musi Iesu hune la nöjei musi ne fen, ke sisitria la mene i nyidrë.

5. E kaa la Baselaia i Akötresie? Nge nemene la hna troa musi kow hnene lai Baselaia?

⁵ Hna amele Iesu hmaca, nge 40 lao drai thupen, hnei nyidrëti hna elë hnengödrai eë. Thupene lai, hnei Iehova hna acili Iesu matre troa Joxu ne la Baselaia i Nyidrë. (Itre Huliwa 2:33) Tusi hmitrötr a qaja ka hape, ame la Baselaia i Akötresie ke, “Baselaia i Nyidrë e hnengödrai.” (2 Timoteo 4:18) Nge tro nyidrëti a musi kowe la fen qa koho hnengödrai.​—Hna Amamane 11:15.

6, 7. Pine nemen matre sisitria catre kö Iesu hune la nöjei joxu ne fen?

⁶ Tusi Hmitrötr a qaja ka hape, sisitria catre kö Iesu hune la itre joxu ne fen, ke nyidëti hi la “ka shewengönie [ka mel] palua kö.” (1 Timoteo 6:16) Haawe, tha ceitu i Iesu kö memine la itre hene ne politik ne la fen, ke itre atr ka troa mec. Ngo ame Iesu, ke tha tro jë kö nyidrëti a hane mec. Ame la itre hnei Iesu hna kuca koi së ke, itre ka troa cile huti epine palua.

⁷ Hna perofetane hnei Tusi Hmitrötr ka hape, tro Iesu a Joxu ka meköt nge ka tru ihnimin. Kola qaja ka hape: “Troa të hui nyidë la Uati Iehova, u ne inamacane me trotrohnin, u ate qeje pengöne me egöcat, u ne wangate hmekune me qoue Iehova, mate tro nyidëti a madi ngöne la kola qoue Iehova.” Tha tro kö nyidrëti a amekötin thenge la itre hnei nyidrëti hna öhne hi, maine thenge la itre hna qaja koi nyidrë. Kolo fe a qaja ka hape: “Ngo tro nyidëti a ishenyin [isin] amekötine kowe la ite ka pë ewekë.” (Isaia 11:2-4) Hapeu, aja i epuni fe kö troa hane musinë epun hnene la ketre joxu ka tune lai?

8. Nemene la ka amamane ka hape, tha tro kö Iesu a musi cas?

 ⁸ Hnei Akötresieti hna iëne la itre atr, matre troa ce musi me Iesu e koho hnengödrai. Öni Paulo aposetolo koi Timoteo ka hape: “Maine eësha xomi hni, tro sha ce joxu me nyidë.” (2 Timoteo 2:12) Ala ije la itre ka troa ce musi me Iesu?

9. Ala ije la itre ka troa ce joxu me Iesu? Nge eu la ijine Iehova a nyiqaane ië angatr?

⁹ Ame ngöne lo Mekene 7 ne la tusi celë, ke kola qaja la hna meköle goeëne hnei Ioane aposetolo. Angeic a öhnyi Iesu Joxu memine lo itre xa joxu e hnengödrai, ala 144 000. Drei la itre joxu cili? Öni Ioane, angatr “lo hna cinyihane la atesiwa i nyidrë [ëje i Iesu] me atesiwa i Tetetro i nyidrë hune la ite göpadi angat.” Nge öni angeic fe ka hape: “Angate lai itete xöte thenge la Arenio kowe la hnei nyidëti hna jötëti [tro] kow. Angate lai ite hna itöne qa nyipine la nöjei ate.” (E jë la Hna Amaman 14:1, 4.) Ame la 144 000 lao atr, tre, itre hlue i Iehova ka mele nyipici, nge hnei Nyidrëti hna iën matre troa ce musi me Iesu kowe la fen. Ame la angatr a mec ke, kola amele angatr hmaca a tro hnengödrai. (Hna Amaman 5:10) Qaane lo ijine i ange aposetolo, Iehova a iëne la itre Keresiano ka mele nyipici, matre troa hane sine lai ala 144 000.

10. Pine nemene laka, ihnimi Iehova koi së, la Nyidrëti a aijijë Iesu memine la ala 144 000, troa musi koi së?

¹⁰ Atraqatr la ihnimi Iehova koi së. Celë hi matre Nyidrëti a aijijëne la itre atr troa hane ce musi me Iesu. Ka lolo la aqane tro Iesu a musi elany. Canga tro hi nyidrëti a trotrohni së, ke hnei nyidrëti hna mel e celë fen, nge hnei nyidrëti fe hna hane akötr. Hnei Paulo hna qaja ka hape, tru la hnei Iesu hna utipi së, ke atre hi nyidrëti la itre kucakuca së. “Hna tupathi nyidë ngöne la nöjei ewekë asëjëihë tui eëshë.” (Heberu 4:15; 5:8) Ketre tune la ala  144 000 laka, tro fe hi angatr a hane trotrohni së, ke hnei angatre hna hane isi memine la itre aja i ngönetrei, maine wezipo pena. Haawe, madrine catre së, laka, troa trotrohni së hnyawa hnei Iesu, memine la ala 144 000.

11. Pine nemen matre Iesu a inine la Itretre dreng troa thith matre eatre pi la aja i Akötresie e koho hnengödrai?

¹¹ Hnei Iesu hna inine la Itretre dreng la aqane troa thith, matre eatre pi la aja i Akötresie e koho hnengödrai. Pine nemen? Hne së hna wang ngöne lo Mekene 3 laka, hnei Satana Diabolo hna icilekeu me Iehova. Ngo hnei Iehova kö hna pane nue la hnepe ijine koi Satana, memine la itre angela i angeic, ene lo itre dremoni, troa lapa e koho hnengödrai. Celë hi matre, ngöne la ijine cili, tha itre angela asë kö la ka kuca la aja i Akötresie e koho hnengödrai. Tro pë hë sa ce wange la itre xa ithuemacanyi göi Satana me itre dremoni, ngöne la Mekene 10.

12. Nemene la lue ewekë ka sisitria ka traqa ekö, nge hna qaja ngöne Hna Amaman 12:10?

¹² Tusi Hmitrötr a qaja ka hape, troa acili Joxu Iesu, nge thupene lai, tro nyidrëti a isi me Satana. (E jë la Hna Amaman 12:7-10. *) Ame ngöne Hna Amamane 12:10 kola qaja la lue ewekë ka sisitria. 1) Musi hë la Baselaia i Akötresie e hnengödrai, nge Iesu la joxu. 2) Hna helëne triji Satana qa koho hnengödrai a tro celë fen. Lue ewekë lai ka traqa ha ekö, ngo tro pë sa ce ithanatan e thupen.

13. Nemene la ka traqa e koho hnengödrai thupene la hna helëne triji Satana?

¹³ Tusi Hmitrötr a qejepengön ka hape, ame la kola helëne triji Satana me itre dremoni qa koho hnengödrai, ke  atraqatre la madrine ne la itre angela ka mele nyipici. Kola hape: “Madinejë, nöjei hnengödrai, me angete lapa ngön’ it’ ej.” (Hna Amamane 12:12) Haawe, tingetingë hë me cas e koho hnengödrai, ke itre angela asë hë a kuca la aja i Akötresie.

14. Nemene la ka traqa e celë fen thupene la hna helëne triji Satana qa koho hnengödrai?

¹⁴ Ngo ame e celë fen, ke akötr atraqatr. Pine nemen? Pine laka, “hna utipi koi angatr la Diabolo ka tru tenge elëhni, ke trotrohnine hë nyëne laka xoxopate pe hi la ijine i nyën.” (Hna Amamane 12:12) Ka tru la trenge elëhni Satana. Hna upe triji angeice qa hnengödrai, nge atre hi angeice laka, easenyi hë troa lepe apatrenyi angeic. Celë hi matre angeic a kuca asë la hnei angeice hna atrein, matre troa ajojezine me akötrëne la itre atr.

15. Nemene la aja i Akötresie kowe la fen?

¹⁵ Casi pala hi la aja i Akötresie kowe la fen. Nyidrëti a ajane tro la itre ka meköt a mele palua ngöne la paradraiso e celë fen. (Salamo 37:29) Ngo nemene la hna troa kuca hnene la Baselaia, matre troa eatr la aja i Akötresie?

16, 17. Nemene la hne së hna inine ngöne Daniela 2:44, göne la Baselaia i Akötresie?

¹⁶ Hna perofetane ngöne Daniela 2:44, ka hape: “Nge ngöne la ite drai ne la ite joxu cili tro Akötesieti ne hnengödrai a axulune la kete baselaia ka tha tro kö a apaten’ epine palua, nge tha tro kö a nue la baselaia cili kowe la ite xa nöj, tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.” Nemene la hna ini së hnene la hna perofetane celë, göne la Baselaia i Akötresie?

¹⁷ Ame la hnapan, tro la Baselaia i Akötresie a nyiqaane musi “ngöne la ite drai ne la itre joxu cili.” Kolo lai a hape, ame la kola troa nyiqaane musi la Baselaia i Akötresie, ke hetre itre musi pala kö e celë fen. Ame la hnaaluen, tro  ej a cile hut, nge tha tro kö a nyihnane ej hnene la ketre mus. Ame la hnaakönin, tro la Baselaia i Akötresie a isi memine la itre musi ne fen, nge tro ej a hun. Ame hë e cili, musi ju pe hi la Baselaia i Akötresie, nge madrinë hë me tingetinge la fen.

18. Nemene la ëjene la isi ne la Baselaia i Akötresie memine la itre musi ne fen?

¹⁸ Amagedo la ëjene la isi ne la Baselaia i Akötresie memine la itre musi ne fen. Nemene la itre ewekë ka troa traqa qëmekene la isi cili? Tro la itre dremoni a amenune la “nöjei joxu e celë fen’ asë, mate troa icasinekeu angate kowe la ishi ngöne la drai atraqat  i Akötesie kapucatinasë.” Tro la itre musi ne fen a isi memine la Baselaia i Akötresie.—Hna Amaman 16:14, 16; wange ju la Ithuemacany 10.

19, 20. Pine nemene matre ka hetre eloine koi së la Baselaia i Akötresie?

¹⁹ Pine nemene matre ka nyipi ewekë koi së la Baselaia i Akötresie? Hetrenyi la köni kepin. Ame la hnapan, tre, itre ka tha pexeje kö së, matre easa wezipo me mec. Ngo Tusi Hmitrötr a qaja ka hape, ame la kola troa musi elanyi la Baselaia i Akötresie e celë fen, ke tro hë sa mele uti hë epine palua. Kola qaja ngöne Ioane 3:16, ka hape: “Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.”

²⁰ Ame la hnaaluen tre, kola lapa xötreithi së hnene la nöjei atr ka ngazo, ka thoi me ka iaö, me iangazo. Thatreine kö së troa sewe angatr troa kuca la itre ewekë cili. Ngo ame hë e Amagedo, tro Iehova a apatrene la itre ka xele ma hane ietra. (E jë la Salamo 37:10.) Ame la hnaakönin, tre, ala nyimu la itre atr ka musi e celë fen, ka iakötrë me iaö. Ketre, tha angatre kö a xatuane la itre atr troa thele  Akötresie. Öni Tusi Hmitrötr: “kete ate a musinëne la kete mate angazo nyëne kö.”​—Ate Cainöj 8:9.

21. Nemene la aqane tro la Baselaia a eatrëne la aja i Iehova e celë fen?

²¹ Thupene la isi Amagedo, tro la Baselaia i Akötresie a kuca la aja i Iehova e celë fen. Tro ej a apatrenyi Satana me ite dremoni angeic. (Hna Amaman 20:1-3) Nge e cili, pë hë ka troa wezipo, nge pë fe hë mec. Jëne la thupene mel, tro la nöjei atr ka meköt a mele epine palua ngöne la paradraiso. (Hna Amamane 22:1-3) Tro la Baselaia a ahmitrötrëne la ëje i Akötresie. Kolo lai a hape, ame la ijine kola troa musi hnene la Baselaia e celë fen, ke, tro hë la nöjei atr asë a atrune la ëje i Nyidrë.—Wange ju la Ithuemacany 21.

22. Easa atre tune ka, laka tha hna canga acili Joxu Iesu kö lo nyidrëti e celë fen, maine pena ngöne lo nyidrëti a mel qa hna mec?

²² Hnei Iesu hna inine la itretre drei nyidrë troa thith, ka hape: “Jiniati e hlepëtipi [Epi traqa pi] la baselaia i enëtilai [Cilie].” Kolo lai a hape, tro la Baselaia i Akötresie a traqa e thupen, e celë fen. Tro Iehova a pane acile la Baselaia i Nyidrë, me acili Iesu troa Joxu. Hna canga acili Joxu Iesu kö lo ijine nyidrëti a bëeke a tro hnengödrai? Ohea.  Hnei nyidrëti hna pane itreqe. Easa atre tune kaa? Thupene lo hna amele Iesu hmaca, hnei Peteru me Paulo hna qaja ka hape, ame lo hna thingehnaeane ngöne Salamo 110:1 ke, kolo hi a qeje Iesu. Iehova a qaja koi Iesu ka hape, “Lapaju nyipëti ngöne la götrane macang,” me itreqe “uti hë la tro ni a celohmëne la ite ithupëjia me nyipë nyine tane lue ca i nyipë.” (Itre Huliwa 2:32-35; Heberu 10:12, 13) Nge uti hë eu la tro Iesu a itreqe?

23. (a) Eu la kola acili Iesu troa joxu ne la Baselaia i Akötresie? (b) Nemene la hne së hna troa ce wang ngöne la ketre meken?

²³ Itre macatre qëmekene lo 1914, hnene la ketre gurupe ne la itre Keresiano, hna inine la itre hna perofetan hnei Tusi Hmitrötr. Nge trotrohnine hë angatr laka, ame la macatre 1914 ke, ketre macatre ka sisitria. Qaane lo la macatre cili, kola anyipicine hnene la itre ewekë ka traqa e celë fen, laka nyipici catre la hnei angatre hna qaja. Nge mama pi hi laka, Joxu hë Iesu e koho hnengödrai. (Salamo 110:2) Tha hmitre ju kö, nge kola helëne triji Satana a tro celë fen. Ketre, “xoxopate pe hi la ijine i nyën.” (Hna Amaman 12:12) Tro sa ce wang ngöne la ketre meken, la itre ewekë ka anyipicin laka, easë hi la melëne la “ijine ka xoxopate” cili. Ketre, tro fe sa atre laka, jëne la Baselaia, easenyi hë troa eatre la aja i Iehova e celë fen.—Wange ju la Ithuemacany 22.