1, 2. Nemene la itre ewekë hne së hna thel?

KA HNYINGE lapa la itre nekönatr. Ame la easa qeje pengöne la ketre ewekë koi nyudren, tre nyudren a hnying ka hape, ‘hnauën?’ Ame ju hi la easa tupath troa sa, nyudreni hmaca kö a hnying me hape, ‘Ö ngo hnauën?’

² Ka hnying asë hi së. Maine jë tro sa thele la nyine tro sa xen, me aqane tro sa heetr, me nyine tro sa itön. Easë fe a hane thel la aliene la mel memine la pengöne la itre drai elany. Ngo e pëkö ka sa la itre hnyinge së, xele ju hi së ma hnying.

3. Pine nemen matre ame kowe la itre xaa atr, jole catr koi angatr troa sa la itre hnying?

³ Tusi Hmitrötre kö a sa la itre hnyinge së ka nyipiewekë? Öni itre xan, eje hi, ngo ame pe, jole catr koi angatr troa trotrohnin la Tusi Hmitrötr. Ame koi angatr, itre hene ne hmi hmekuje hi me itre ka hamë ini, la ka ijij troa sa la itre hnying. Itre xan a hmahma, ke, thatreine kö angatr sa la itre xa hnying. Nemene fe la mekuna  i epun?

4, 5. Nemene la itre hnyinge i epun? Pine nemene matre nyipiewekë tro palahi epuni a thel troa sa la itre hnyinge i epun?

⁴ Maine jë epuni a thele troa sa la itre hnying celë. Nemene la pengöne la mele ce? Nemene la pengö së la easa mec? Nge ka tune ka lae Akötesie? Öni Iesu lo Atre Ini ka tru, ka hape, “Siponejë, ame hna hamë nyipunieti pi ; thelejë, ame hna öhnejë nyipunie; fenafenajë, ame hna thawapi koi nyipunie.” (Mataio 7:7) Haawe, catre jë kö epuni thel. Tro hë epuni lai a öhne la itre mekune ka sa hnyawa la itre hnyinge i epun.

 ⁵ Maine tro palahi epuni a ‘thel’, eje hi laka, ame la itre mekun ka sa la itre hnyinge i epun, itre eje hi e hnine la Tusi Hmitrötr. (Ite Edomë 2:1-5) Tha ka jole kö troa trotrohnine itre ej. Tro hë la itre ini qa ngön ej a hamë madrin me mejiune i epun, enehila me kowe la itre drai elany. Tro pena sa ce wang la ketre mekun ka ajolëne la itre atr.

6. Pine nemen matre nyimu ka mekun, ka hape, tha hna hane fe kö hnehengazo së hnei Akötresie?

⁶ Nyimutre la itre atr ka mekun ka hape, tha Akötresieti fe kö a hane meku angatr. Öni angatr, maine Akötresieti ju a hane hnehengazo së, ke, tro pala kö a ketre pengöne la fen. Kola lapa xötreithi së hnei isi, me imethinë, me iakötrë. Kola tithe la itre atr hnei mec, angatr a akötr me mec. Matre itre xan a hnying ka hape, ‘Maine nyipici laka Akötresieti a hnehengazo së, ngo hnauëne laka tha apatrene kö Nyidrëti la itre akötr?’

7. (a) Pine nemen matre tru hnei ka qaja ka hape, ame Akötresie ka iaxösisi? (b) Pine nemen matre tha tro kö sa upe zö Akötresie?

⁷ Hnene la itre hene ne hmi hna qaja, ka hape, ame Akötresie ka iaxösisi. E traqa ju kö la ketre hulö, ke öni angatr, qaathei Akötresie. Nge kola upe zö Nyidrë. Ngo Tusi Hmitrötr pe a ini së laka, tha Akötresieti kö la qaane la itre akötr. Kola qejepengöne ngöne Iakobo 1:13, ka hape, tha Akötresieti kö a tupathi së hnene la itre ewekë ka ngazo. Kola hape, “The tro kö kete ate a qaja e kola tupathi angeic, ka hape, Hna tupathi ni qa thei Akötesie; ke tha’ teine kö troa tupathi Akötesie hnei ngazo, kete tha hnei nyidëti kö hna tupathi kete ate.” Haawe, maine nyipici laka hnei Akötresieti hna nue la itre akötr, ngo tha nyidrëti kö la ka afetrane itre ej. (E jë la Iobu 34:10-12.)

8, 9. Pine nemen matre tha meköti kö troa upe zö Akötresie la itre jole së? Qaja jë la ketre ceitun.

 ⁸ Tro sa xom la ketre ceitun. Hetre nekö trahmany ka lapa pala kö thei keme me thin. Hnimi angeice catr hnene la keme i angeic, nge hnei nyidrëti hna ini angeic troa axecië mekun hnyawa. Ame ju hi la ketre ijin, mekune jë hi angeic troa tro trije la hnalapa. E cili, hnei angeic hna kuca la itre ewekë ka ngazo, ame hna traqa pi la itre jol ka tru koi angeic. Hapeu, zö i keme kö la kola traqa la itre jol, ke, hnei nyidrëti hna nue angeic? Ohea! (Luka 15:11-13) Ame la itre xa atr, hnei angatre hna sipu mekune troa tha idrei me kuca la itre ewekë ka ngazo xajawa i Akötresie. Ngo ceitu i Iehova hi memine lo lai kem, laka, hnei Nyidrëti hna pane nue angatr troa isa axecië mekun. The thëthëhmine kö së laka, ame la kola traqa koi së la ketre ewekë ka ngazo, tha Akötresieti kö la atrekë zön. Haawe, tha meköti kö troa upe zö Akötresie.

⁹ Pine nemen matre tha apatrene pala kö Akötresie la itre akötr? Hetre kepine lai. Ame ngöne la Mekene 11, Tusi Hmitrötr pë hë a troa qejepengöne la mekune cili. Ngo ka xecie hnyawa koi së laka ame Akötresie, ka ihnim nge tha Nyidrëti kö la qaane la itre jole së. Eje hi, Nyidrëti hmekuje hi la ka atreine troa nyinyine la itre jol.​—Isaia 33:2.

10. Pine nemen matre xecie koi së, laka tro Akötresieti a apatren la iakötrë?

¹⁰ Ka hmitrötr lae Akötresie. (Isaia 6:3) Ame la nöjei ewekë hnei Nyidrëti hna xup, ke, ka pë ethan nge ka lolo. Matre ijije hi tro sa mejiune koi Nyidrë. Ngo tha ka ceitune kö la itre atr me Akötresie, pine laka itre ka ngazo angatr. Thatreine kö la ketre hene ne politik troa apatrene la iakötrë, ngacama ka nyipici ju hë angeic. Pëkö ka ceitu me Akötresie. Akötresieti hmekuje hi la ka atreine troa apatrene palua la itre akötr, memine la ngazo.​—E jë la Salamo 37:9-11.

11. Tune kaa Akötresie ngöne la easa akötr?

¹¹ Nemene jë la mekuna i Akötresie ngöne la Nyidrëti a goeëne la itre atr e akötr, memine la itre ewekë ka traqa e celë fen? Tusi Hmitrötr a ini së ka hape, ame Nyidrëti ke, “ka ajane la meköt.” (Salamo 37:28) Tha Nyidrëti kö a wangacone la itre hna kuca ka loi me ka ngazo. Xele Nyidrëti ma wang la kola akötr la itre atr. Tusi Hmitrötr a qaja ka hape, hna “teije la hni nyidë” ngöne la Nyidrëti a goeëne la etrun la ngazo e celë fen. (Genese 6:5, 6) Tha ka saze kö Akötresie. (Malaki 3:6) Tusi Hmitrötr a qaja ka hape, Nyidrëti a meku së.​—E jë la 1 Peteru 5:7.

12, 13. (a) Pine nemene matre easa hnime la itre atr? Tune kaa la easa goeëne la itre akötr ngöne la fen? (b) Pine nemene matre ka xecie koi së, laka tro Nyidrëti a apatrene la itre akötr me iangazo?

¹² Tusi Hmitrötr a amaman ka hape, hnei Akötresieti hna xupi së hnaiji Nyidrë. (Genese 1:26) Kola hape, hetrenyi fe the së la itre thiina ka lolo i Nyidrë. Matre ame la easa hace ngöne la kola akötre la itre atr, ke tru catr pala kö la akötre i Akötresie. Nemene la ka amamane lai?

¹³ Tusi Hmitrötr a ini së ka hape, “Akötesieti la ihnim.” (1 Ioane 4:8) Hnei Akötresieti hna kuca la nöjei ewekë cememine la ihnim. Hetrenyi the së la ihnim, pine laka ka ihnimi Nyidrë. Maine atreine ju epuni apatrene la itre akötr me itre iangazo, hapeu tro kö epuni lai a apatren? Eje hi, ke tru la ihnimi epun kowe la itre atr. Ame Akötresie, atreine hi Nyidrëti apatren la itre akötr me iangazo. Hnene la ihnimi Nyidrëti koi së, tro kö Nyidrëti lai a eatrën. Ame la itre hna thingehnaean hna qaja ngöne la pane götrane ne la itusi celë, ke tro kö Nyidrëti lai a aejën. Tha tro jë kö lai a tria. Ngo epi tro epuni a mejiun kowe la itre hna thingehnaeane cili, ke nyipiewekë tro epuni a pane atre hnyawa la pengöi Akötresie.

14. Drei la ëje i Akötresie? Nemene la ka amaman laka tro sa hëne la ëje i Nyidrë?

¹⁴ Ame la easa ajan troa sinee së la ketre atr, ke nemene la hne së hna troa pane qaja koi angeic? Ëje i easë. Nge tune kaa Akötresie, hetre ëje i Nyidrëti kö? Nyimutre la itre hmi ka qaja ka hape, ame la ëje i Nyidrë, ke, “Akötesie” maine “Joxu”. Tha itre ëje kö lai, ngo itre aqane hëne hi, tune la hna hape, “Joxu” maine “perezida.” Öni Akötresie, Iehova la ëje i Nyidrë. Ame ngöne Salamo 83:18, hna qaja ka hape: “Cilieti la Kasisitia hmekuje hune la fene hnengödrai asëjëihë, nge Iehova la atesiwa [ëje] i Cilie.” Hnene la itre ka cinyihane la Tusi Hmitrötr hna anyimua xom la ëje i Akötresie, a 7 000 lao cinyihane ej. Iehova a ajane tro sa atre me xome la ëje i Nyidrë, nge aja i Nyidrëti fe tro sa itre sinee i Nyidrë.

15. Nemene la aliene la ëje i Iehova?

¹⁵ Ka hetre aliene catr la ëje i Akötresie. Ame la aliene la ëje i Nyidrë, ke, ka atreine troa aejën la itre hnei Nyidrëti hna thingehnaean asë. Pëkö ka atreine troa sewe Nyidrë. Iehova hmekuje hi la ka ijije troa xom la ëje cili. *

16, 17. Nemene la aliene la kola hape (a) “Kapucatinasë”? (b) “Joxu ka epine palua”? (c) “Atre Xup”?

 ¹⁶ Hna Amaman 15:3, a qaja ka hape, “Hmapati [Atraqatr] me nyine haine la ite huliwa i cilie, Joxu Akötesieti KaPucatinasë; meköti me nyipici la ite kala [jë] i cilie, cilieti Joxu ne la nöjei nöj.” Nemene la aliene la kola hape, “Kapucatinasë”? Kola hape ame Iehova ke, ka tru catre kö la trengecatre i Nyidrë. Nge nemene la aliene la kola hape, “Joxu ka epine palua”? Kola hape, pëkö qaane i Nyidrë. Salamo 90:2 a qaja ka hape, pëkö qaane i Nyidrë, nge ka uti hë epine palua. Nyipici, ka sisitria catre pala kö Nyidrë.

 ¹⁷ Iehova hmekuje hi la Atre Xup. Hna Amaman 4:11 a qaja ka hape, “Ijiji enëtilai Joxu Akötesi hun, troa kapa la nyine atrun, me nyine adraiën, me men; ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.” Nemene la aliene la hna hape, “Atre Xup”? Kola hape, hnei Iehova hna xup la nöjei ewekë asë, ene la itre angela, me itre wëtresij, me itre wene sinöe, me itre öni memine la nöjei ewekë asë.

18. Pine nemene matre itre xan a mekun, ka hape, tha ijiji angatre fe kö troa hane ce sinee me Akötresie? Nge nemene la hna qaja hnei Tusi Hmitrötr göne la mekune cili?

¹⁸ Ame la itre xan a xötrei atre la itre thiina ka sisitria i Iehova, canga öni angatre ju hi ka hape, “Ka tru la mene  i Akötresie, ka draië catre Nyidrë, nge ka nanyi catre Nyidrë. Nemene ni matre tro Nyidrëti a hane hnehengazo ni?” Ngo hapeu, mekuna i Iehova kö lai? Ohea. Ame la aja i Akötresie ke, tro sa nyi sinee i Nyidrë. Tusi Hmitrötr a qaja ka hape, “tha iananyi kö nyidë me eëshë asëjëihë.” (Itre Huliwa 17:27) Akötresieti a ajane tro sa hane easenyi Nyidrë, ‘nge tro Nyidrëti a easenyi koi easë.’​—Iakobo 4:8.

19. (a) Nemene la aqane tro sa nyi sinee i Akötresie? (b) Nemene la thiina i Iehova ka ketr hnyawa la hni së?

¹⁹ Nemene la aqane tro epuni a hane nyi sinee i Akötresie? Öni Iesu, ‘Nge drei lo la mele ka tha ase palua kö, laka tro angat’ a ate cilie la nyipi Akötesieti ka cas, me Iesu Keriso la hnei cilieti hna up.’ (Ioane 17:3) Thele jë troa atre pengöi Iehova me Iesu. Ka aijijë epuni hi lai troa hetrenyi la mele ka tha ase palua kö. Kola hape, pë hmaca kö troa mec. Tune lo hnei epun hna inin ka hape, “Akötesieti la ihnim.” (1 Ioane 4:16) Nge nyimutre mina fe la itre xaa thiina i Akötresieti ka lolo. Tusi Hmitrötr a qaja ka hape, “Akötesie ate utipine, me ka ihnim, ate xomi hni ahoeany, nge ka tru loi me nyipici.” (Esodo 34:6) Ame Iehova tre, “ka loi Nyidrë me atre sheng.” (Salamo 86:5) Ka xomihni ahoeane fe Nyidrë, nge ka nyipici. (2 Peteru 3:9; Hna Amaman 15:4) Ame la easa e la Tusi Hmitrötr, tro hë së lai a atrepengöi Akötresieti hnyawa, memine fe la itre thiina i Nyidrëti ka lolo.

20, 21. Nemene la aqane tro sa nyi sinee i Akötresie, ngacama tha öhnyi Nyidrëti kö hne së?

²⁰ Nemene la aqane tro sa nyi sinee i Akötresie, ngacama tha öhnyi Nyidrëti kö hne së? (Ioane 1:18; 4:24; 1 Timoteo 1:17) Ame la easa e la Tusi Hmitrötr, ke tro hë së lai a atrepengöi Nyidrëti hnyawa. (Salamo 27:4;  Roma 1:20) E atre Iehova hnyawa ha hne së, tro hë së lai a hnimi Nyidrë, nge tro hë lai a acatrene hnyawa la aqane imelekeu së me Nyidrë.

²¹ Tro hë së lai a trotrohnine laka, Iehova la Keme së. Nyidrëti hi la ka hamëne la mele koi së, nge aja i Nyidrëti tro sa mele madrin. (Mataio 6:9) Celë hi aja ne la nöjei keme ka hnimi kuku. (Salamo 36:9) Tusi Hmitrötr a ini së ka hape, ijiji së fe hi troa hane nyi sinee i Akötresie. (Iakobo 2:23) Iehova la Atre Xup la hnengödrai memine la fene hnengödrai, nge aja i Nyidrëti tro sa nyi sinee i Nyidrë.

22. Nemen la nyine tro sa kuca, e traqa ju sewe së hnei itre xan troa ini Tusi Hmitrötr?

²² Maine jë tro itre xan a sewe së troa inine la Tusi Hmitrötr. Ma angatre jë a xouen laka tro sa saze hmi. Ngo tha tro pi kö sa nue angatre troa sewe së, troa acatrene la aqane imelekeu së me Akötresie. Pëkö ketre atr nyine tro sa nyi sineene ka lolo tui Iehova.

23, 24. (a) Nemene la kepin matre loi e tro palahi sa hnying? (b) Nemene la nyine tro sa ce wang ngöne la mekene 2?

²³ Hetre itre xa mekun e hnine la Tusi Hmitrötr ka jole troa trotrohnin. Ngo the xou kö troa hnying me sipo ixatua. Öni Iesu lo ka hape, tro sa tune la itre nekönatr. (Mataio 18:2-4) Tha ka hmahma fe kö nyudren troa hnyinge lapa. Ame Akötresie, aja i Nyidrë tro sa thele la itre mekun ka sa la itre hnyinge së. Inine hnyawa jë së la Tusi Hmitrötr, matre mama pi koi së laka, nyipici hi lai.​—E jë la Ite Huliwa 17:11.

²⁴ Ame la nyipi aqane tro sa atrepengöi Iehova, ke ene la troa inine la Tusi Hmitrötr. Tro la Mekene 2 a amamane laka, pëkö xa itus ka ceitu memine la Tusi Hmitrötr.