Iehova la ëje i Akötresie. Ame la aliene ej, ke kola hape, “troa aejën.” Iehova la Ka Pucatinasë nge Nyidrëti la ka xup la nöjei ewekë asëjëihë. Atreine hi Nyidrëti eatrën la nöjei mekuna i Nyidrë.

Ame ngöne la qene Heberu, ke hna cinyihan la ëje i Nyidrë hnene la foa lao mataitus. Ame ngöne la qene Wiwi ke ka ihmeku itre ej me YHWH maine JHVH. Hetre 7 000 lao mama la ëje i Akötresie ngöne la itre hna cinyihan qene Heberu hnapan. Ame ngöne la fen asëjëihë, ke isa aqane hëne kö la hna hape “Iehova”. Angatre kö a isa hën, thenge la hna majemin ngöne la isa qene hlapa i angatr.

▸ Mek. 1, par. 15

Ewekë i Akötresieti la Tusi Hmitrötr, ngo hnei Nyidrëti pe hna upe la itre atr troa cinyihan ej. Tune la ketre maseta ka upe la seketere troa cinyihan la ketre tus. Jëne la uati hmitrötr, hnei Akötresieti hna xatuane la itre atr troa cinyihan la itre mekuna i Nyidrë. Nyimutre la itre aqane xatuane la itre atr hnene la uati hmitrötr. Tune lo hna meköle goeën, maine hna puje pena, nge hna cinyihane pë hë e thupen.

▸ Mek. 2, par. 5

Ame la itre trepene meköt e hnine la Tusi Hmitrötr, ke itre trenge nyipici ka xatua së troa atreine waiewekë. Tro sa xom la lue ceitun. 1) “Ame la itre sine ce tro ka ngazo ke ka angazon la itre hna majemin ka loi.” (1 Korinito 15:33) Kola ini së hnene la trepene meköti celë ka hape, ame la itre atr hne së hna majemine ce tro memin, ke ijiji angatre hi troa huli së troa kuca la loi, maine troa kuca la ngazo.  2) “Ame la hna trane hnei ate, celë hi hnei angeice hna tro ha menuën.” (Galatia 6:7) Kola ini së hnene la trepene meköti celë ka hape, tro kö sa xeni pune la hne së hna traan.

▸ Mek. 2, par. 12

Ame la hna perofetaan ke, ketre maca qathei Akötresie. Maine jë kola qeje pengön la aja i Nyidrë, maine ketre ini me ketre eamo, maine ketre iameköti. Maine pena, ketre ithuemacany göne la ka troa traqa epin. Nyimutre hë la itre hna perofetaane e hnine la Tusi Hmitrötr ka eatre hë.

▸ Mek. 2, par. 13

Iesu la ka eatrën la itre hna perofetaan göne la Mesia. Wange ju la i tabolo hna hape, itre hna perofetaan göne la Mesia, götrane 209.

▸ Mek. 2, par. 17

Hnei Iehova hna xupe la ihnadro matre troa paradraiso, nge troa lapaan hnene la itre atr ka hnimi Nyidrë. Tha saze kö la aja i Nyidrë. Easenyi hë matre apatrene pi hë Nyidrëti la ngazo, nge tro Nyidrëti a hamën la mel ka tha ase palua kö kowe la itre hlue i Nyidrë.

▸ Mek. 3, par. 1

Satana la angela ka nyiqane icilekeu me Iehova. Hna hë angeic ka hape Satana, kolo lai a hape “ka icilekeu”, ke hnei angeic hna icilekeu me Akötresie. Hna hë angeice fe ka hape Diabolo, kolo lai a hape “ka ixöjetrij”, ke hnei angeic hna sili trengathoi Akötresie matre troa amenun la itre atr.

▸ Mek. 3, par. 4

Hnei Iehova hna xupe la itre angela, nge itre macatre thupen, Nyidrëti a xupe la ihnadro. Hna xupe la itre angela troa mel e koho hnengödrai. Hna e la 100 milio nge hetre munën la etrui angatr. (Daniela 7:10) Isa hetre ëje i angatr asë hi, nge isa pengöi angatre kö. Ame la itre angela ka nyipici koi Akötresie, ke, itre ka hni ka ipië angatr. Tha aja i angatre kö tro la itre atr a thili koi angatr. Hetre itre angela ka tru hnëqane kö hune la itre xan. Nyimutre la itre angela ka nyihlue i Iehova ngöne la therone i Nyidrë, itre xan a trofë itre maca, itre xan a thupën me xatuan la itre hlue i Nyidrëti e celë fen. Angatre fe a troa aeatrën la itre hnei Nyidrëti hna amekötin, me xatuan la huliwa ne cainöje trotro. (Salamo 34:7; Hna Amaman 14:6; 22:8, 9) Ame ngöne la isi Amagedo, ke tro angatr a ce tro me Iesu.—Hna Amaman 16:14, 16; 19:14, 15.

▸ Mek. 3, par. 5; Mek. 10, par. 1

Ame la pengöne la ngazo ke, ene la easa dreng ekuhu hni së, me mekun, maine kuca la ketre ewekë hna xele ma wang hnei Iehova. Maine pena, easa kuca la ketre ewekë ka icilekeu memine la aja i Nyidrë. Ame la ngazo ke ka aiananyi së me Iehova. Celë hi kepin matre hnei Iehova hna hamë së la itre wathebo me itre trepene meköt nyine thupë së. Itre ej a xatua së matre tha tro kö sa kuca la itre ewekë hnei Nyidrëti hna xele ma wang. Ame la nöjei hnei Iehova hna xup ngöne la qaan, ke ka pexej asë hi. Ngo hnei Adamu me Eva hna iën troa tha idrei, matre ngazo pi hi nyidro nge tha lue ka pexej hmaca kö nyidro. Ame e cili, nyidroti a qatre trotro utihë la mec. Nge jëne la ngazo i Adamu, easë fe a hane qatre trotro, me mec.

▸ Mek. 3, par. 7; Mek. 5, par. 3

Celë hi isi Akötresie. Ngöne la ijine cili, troa apatrene la fene i Satana memine la ngazo.

▸ Mek. 3, par. 13; Mek. 8, par. 18

Celë hi mus hnei Akötresieti hna acil e koho hnengödrai nge ka troa musinën la fen. Iesu Keriso la Joxu ne la Baselaia. Nge jëne ej, tro Iehova a apatrene la ngazo.

▸ Mek. 3, par. 14

Hnei Iehova hna xupi Iesu qëmeken troa xup la nöjei ewekë asë. Hnei Iehova hna upi nyidrëti kowe la fen troa meci pi së itre atr. Thupene la hna humuthi nyidrë, hnei Iehova hna amele nyidrëti hmaca. Enehila, nyidrëti a musi e koho hnengödrai, me cilëne la Baselaia i Akötresie.

▸ Mek. 4, par. 2

Hna perofetaan e hnine la Tusi Hmitrötr laka, troa traqa la Mesia ngöne la pune lao 69 lao wiik. Hna nyiqaan lai 69 lao wiik, ngöne lo macatre 455 M.P.K, nge hna nyipune ngöne lo macatre 29 M.K.

Tro sa atre tune ka laka hna nyipun lai 69 lao wiik, ngöne lo macatre 29 M.K? Hna nyiqaan lai 69 lao wiik, ngöne lo macatre 455 M.P.K, ngöne lo ijine Nehemia a traqa troa xupe hmaca e Ierusalema. (Daniela 9:25; Nehemia 2:1, 5-8) Ngöne la ca wiik, easa e la 7 lao drai. Ngo ame ngöne la hna perofetaane celë, ke tha tro kö sa e la 7 lao drai ngöne la ca wiik. Ame ngöne la itre hna perofetaan, ke hna amekötin laka troa, “ca drai kowe la ca macatre”. (Numera 14:34; Ezekiela 4:6) Matre ame la ca wiik ke, 7 lao  macatre. Haawe, ame la 69 lao wiik ke, 483 lao macatre (69 x 7). Ame la easa e la 483 lao macatre, qaane lo macatre 455 M.P.K, ke tro sa traqa kowe la macatre 29 M.K (pëkö macatre 0). E cili hnyawa hi la macatre ijine kola bapataiso Iesu, nge ijine nyidrëti a Mesia!—Luka 3:1, 2, 21, 22.

Hna amamane fe ngöne la hna perofetaane cili laka, ca ketre wiik hna nyixan, kolo lai a hape, 7 lao macatre hna nyixan. Ngöne la ijine cili, ngöne la macatre 33, ke troa humuth la Mesia. Nge qaane la macatre 36, tro ha cainöjën  la maca ka loi ne la Baselaia i Akötresie, tha koi angetre Iudra hmekuje kö, ngo e cailo fen asë.—Daniela 9:24-27.

▸ Mek. 4, par. 7

Önine la itre hmi ka qejepengön la Tirinite ka hape, ame Akötresie me Iesu me Uati Hmitrötr, ke köni pengön ngo caasi hi. Ngo Tusi Hmitrötr a qaja ka hape, Iehova la Atre Xup, nge Iesu la hnei Nyidrëti hna pane xup. (Kolose 1:15, 16) Tha Iesu kö la Akötresie Kapucatinasë. Tha hane fe kö nyidrëti qaja ka hape, ceitui nyidrëti me Akötresie. Öni nyidrëti pe: “Atraqate Tetetroti hung”. (Ioane 14:28; 1 Korinito 15:28) Tha hna cinyihane kö la “Tirinite,” e hnine la Tusi Hmitrötr. Ame la Tirinite ke, trengathoi.

Ame la uati hmitrötr ke, mene i Akötresie, trenge catr ka tha mama kö, hna huliwaane matre eatrën la aja i Nyidrë, ngo tha ketre atre kö. Ame la itre pane keresiano ke, “hna tiqa angat’ asë hnei uati hmitöt.” Nge öni Iehova: “Tro ni a nenge la Unge hune la nöjei ate asëjëihë.”—Itre Huliwa 2:1-4, 17.

▸ Mek. 4, par. 12; Mek. 15, par. 17

Tha itre nyipi Keresiano fe kö a hane hmi koi Akötresie jëne kuluse. Pine nemen?

1. Hnene la hmi ka thoi hna huliwaan pala hi la kuluse, qaanë hë ekö. Hna huliwaane ej hnene la itre wanaithihlë ngöne la itre hna majemine ka sis, me nyine troa thili kowe la itre hna xup. Thupene la hna meci hnei Iesu, ame ngöne la 300 lao macatre, tha hnene fe kö la itre nyipi Keresiano hna xome la kuluse troa hmi koi Akötresie. Hnene la ketre joxu ne Roma, Constantin la ëjen, hna amekötin laka, tro hë la kuluse a nyi hatren la hmi Keresiano. Pine nemen? kolo matre tro la hmi Keresiano a hlemu e cailo. Ngo, trenyiwa  la kuluse koi Iesu Keriso. Hna qejepengön hnene la ketre itus katolik ka hape, “traqa pë hë Iesu Keriso e celë fen, nge ekö hë huliwaan la kuluse hnene la itre hmi wanaithihlë.”

2. Tha hnei Iesu kö hna meci hune la kuluse. Ame la itre hna ewekë qene Heleni, ka ujën la hna ewekë, “kuluse”, ke kola qaja la, “sinöe hna acil”, maine “sinöe”, maine pena “i sinöe”. Hnene la ketre Tusi Hmitrötr ne ini (The Companion Bible) hna qejepengön ka hape, “Ame ngöne la Isisinyikeu Ka Hnyipixe qene Heleni, ke pëkö hna qeje lue hnepe sinöe.” Haawe, kolo lai a hape, hnei Iesu hna meci hune la sinöe ngo tha hune kö la kuluse.

3. Tha ajane kö Iehova tro sa hmi koi Nyidrë jëne la itre iatr, maine pena jëne itre ewekë ka nyihatren.—Esodo 20:4, 5; 1 Korinito 10:14.

▸ Mek. 5, par. 12

Hnei Iesu hna upe la itretre drei nyidrë, troa atrun la Drai Ne Amekunën la meci nyidrë. Hnei angatre pala hi hna eatrën e nöjei macatre, ngöne lo 14 Nisan, drai ne lo angetre Isaraela a atrune la Paseka. Ame ngöne la Drai Ne Amekunën, ke kola ihamënekeun la falawa memine la waina, ka nyihatren la ngönetrei memine la madra i Iesu. Ame la itre ka troa ce musi me Iesu e koho hnengödrai, ke angatr la itre ka xeni la falawa me iji la waina. Ame pë hë la itre ka mejiun troa mel epin palua e celë fen, ke angatre pe hi a hane sine me metrötrën la Drai Ne Amekunën, ngo tha angatre fe kö a xeni la falawa me iji la waina.

▸ Mek. 5, par. 21

Ame ngöne la Tusi Hmitrötr Traduction du monde nouveau, ame la hnaewekë, “u”, ke kola qaja la, 1) ketre atr, 2) ketre öni, 3) mele ne la ketre atr maine ketre öni.

•  Ketre atr. “Celë hi hna amelene la ala xalaith, ene la ala köningemene [lao u] ngöne la iwë.” (1 Peteru 3:20) Ame la hnaewekë “u” e celë, ke kola qaja la itre atr, ene Noa me föi nyidrë, köni neköi nyidrë me köni föi angatr.

• Ketre öni. Öni Akötresie: “Tro la hnagejë a amamane la ite öni ka wewë a mano, me ite öni ka sheshë [u ka mel] troa sheshë hune la hnadro.” Öni Nyidrëti fe: “Tro la hnadro a aciane la ite öni a mano [u ka mel] thenge la ite pengön’it’ej, ite öni ka eke ca, me ite öni ka wewë, me ite öni ne hnite thenge la ite pengön’it’ej.”—Genese 1:20, 24.

• Melene la ketre atr maine ketre öni. Hnei Iehova hna qaja koi Mose ka hape: “Meci hë la nöjei ate asë itete thele troa humuthi ’ö [la u i’ö].” (Esodo 4:19) Ame ngöne la Iesu petre kö e celë fen, öni nyidrë: “Ini la ate thupëne aloine la ite mamoe ; ame la ate thupëne aloine la ite mamoe, angeic’ a hamëne la mele i angeice [la u i angeic] nyine göline la nöjei mamoe.”—Ioane 10:11.

  Ketre, ame la easa kuca la ketre ewekë memine la “u së ka pexej”, ke easa kuca ce memine la madrin, memine la hne së hna atrein. (Mataio 22:37; Deuteronomi 6:5) Tusi Hmitrötre fe a qaja la ka mec, maine ngönetrei ne la atr ka mec ka hape: “u ka mec”.—Numera 6:6; Hagai 2:13.

▸ Mek. 6, par. 5; Mek. 13, par. 10; Mek. 15, par. 17

Ame ngöne la Tusi Hmitrötr Traduction du monde nouveau ke, ame la itre hna ewekë qene Heberu me qene Heleni ka ujëne la hna ewekë, “ua” ke, ka nyimu alien. Ngo kola qaja palahi la itre ewekë ka tha mama kö, tune la eny, hnamano ne la atr, maine hnamano ne la öni. Kolo fe a qaja la itre angela, maine uati hmitrötr ene lo mene i Akötresie. Pëkö hna qaja e hnine la Tusi Hmitrötr ka hape, e meci hë la atr, ke hetre ka mele pe kö.—Esodo 35:21; Salamo 104:29; Mataio 12:43; Luka 11:13.

▸ Mek. 6, par. 5; Mek. 15, par. 17

Hetrenyi la ketre hnathup ekö, e trön e Ierusalema, hna hën ka hape, Gena, hnë troa trij me dreuthe trije la itre salite. Pëkö ka anyipicin laka, ame e cili, ngöne la ijine i Iesu ekö, ke hna axösisin maine hna dreuth amelen pena la itre öni, me itre atr. Matre ame la gena ke, tha ka nyihatrene kö lo hna hape, hnë troa axösisin me dreuthe epin palua la itre ka mec. Ame la Iesu a qaja ka hape, hetre itre atr hna troa kuiën e Gena, ke nyidrëti a hape, troa apatrenyi angatr, epine palua.—Mataio 5:22; 10:28.

▸ Mek. 7, par. 20

Celë hi thith hnei Iesu hna upe la itretre drei nyidrë troa inin. Hna hëne ka hape, tulu ne thith. Hnei Iesu hna ini së troa thithi tune la:

• “Jiniati e hmitöte la atesiwa i enëtilai.”

  Easa thith matre tro Iehova a awiën la ëje i Nyidrë, ke hna adrone ej hnene la nöjei trengathoi.

• “Jiniati e hlepëtipi la baselaia i enëtilai.”

  Easa thith matre tro la musi Akötresie a apatren la fene i Satana, me musinëne pe la ihnadro uti hë la troa paradraiso.

• “Longëtinejë la hanengë i enëtilai e celë fewatine.”

  Easa thith matre troa ej la aja i Akötresie e celë fen. Aja i Akötresie tro la itre atr ka drengethenge Nyidrë a hetrenyi la mel ka pexej, me mel palua ngöne la Paradraiso. Hnei Nyidrëti hna xupe la itre atr matre aejëne lo aja i Nyidrë.

▸ Mek. 8, par. 2

Hnei Iehova hna hamën la thupene mel matre troa thapa la itre atr qangöne la ngazo me mec. Thupene mel la ka troa itön la mele ne la atr ka pexej, hna aluzin hnei Adamu. Thupene mel la ka aijijën troa aloine hmaca la aqane imelekeu ne la atr me Iehova. Hnei Akötresieti hna upi Iesu kowe la fen, matre troa meci pine la nöjei atr ka ngazo. Jëne la meci Iesu, tro la itre atr a hetrenyi la mel ka pexej ka epine palua.

▸ Mek. 8, par. 21; Mek. 9, par. 13

Hna perofetaan ngöne Daniela mekene 4 ka hape, tro Akötresieti a acil la Baselaia i Nyidrë lo macatre 1914.

Hna perofetaan. Jëne la ketre pu, hnei Iehova hna amaman koi joxu Nebukaneza la kola satrij la isinöe atraqatr. Ngo tro pekö a acatrene la iwan hnene la otren fao me kopa, matre tha tro kö ej a cia ngöne la “seven lao ijin.” Thupene la “seven lao ijin”, tro hmaca ej a cia.—Daniela 4:1, 10-16.

Alien la hna perofetaan cili. Ame la isinöe tre kola nyihatren la musi Akötresie. Ngöne la itre macatre ka nyimutre, hnei Iehova hna acil la itre xötre joxu e Ierusalema, troa elemekene la nöje Isaraela. (1 Aqane lapa ite joxu 29:23) Ngo tha hnene kö la xötre joxu cili hna drengethenge Iehova, matre hna nyipun la musi angatr lo ijin kola lepe apatren e Ierusalema, lo macatre 607 M.P.K. Macatre cili hi la kola nyiqane la “seven lao ijin.” (2 Ite Joxu 25:1, 8-10; Ezekiela 21:25-27) Ame la Iesu a qaja ka hape: “tro ha waja Ierusalema hnene la nöjei ethen, uti hë e pexejë hë la ite ijine i angete ethen”, ke nyidrëti hi lai a perofetaan la “seven lao ijin.” (Luka 21:24) Matre ame lo Iesu petrekö e celë fen, ke tha fenesi palakö la “seven lao ijin.” Hnei Iehova hna thingehnaean laka troa acil la ketre  joxu, ngöne la kola fenes la “seven lao ijin.” Haawe, tro hë la musi Iesu, Joxu ka hnyipixe, a hamën kowe la itre hlue i Akötresie la itre manathith ka tru, ka epine palua.—Luka 1:30-33.

Eqean la “seven lao ijin.” Ame la eqean la “seven lao ijin” ke, 2520 lao macatre. Ame la easa e la 2520 lao macatre, qaane lo macatre 607 M.P.K, ke tro sa traqa koi macatre 1914 (pëkö macatre 0). Macatre cili hi la Iehova a acili Iesu Keriso, troa Joxu hune la Baselaia i Nyidrë e koho hnengödrai.

Easa atre tuneka laka, ame la “seven lao ijin”, ke 2520 lao macatre? Tusi Hmitrötr a qaja ka hape, ame la köni ijin nge sin, ke 1260 lao drai. (Hna Amaman 12:6, 14) Matre ame la “seven lao ijin” ke, 2520 lao drai (1260 x 2). Ngo ame ngöne la itre hna perofetaan, ke hna amekötin laka, “ca drai kowe la ca macatre.” Haawe, ame la 2520 lao drai, ke 2520 lao macatre.—Numera 14:34; Ezekiela 4:6.

▸ Mek. 8, par. 23

Ame la hnaewekë, “angela ka sisitria”, ke kola hape, “joxu ne la itre angela.” Tusi Hmitrötr a amamane laka, casi hi la angela ka sisitria, ene Mikaela.—Daniela 12:1; Iuda 9.

Mikaela la Joxu ne la tronge ne isi Akötresie, ene la itre angela ka mele nyipici koi Nyidrë. Hna qaja ngöne Hna Amaman 12:7 ka hape: “Mikaela me ite angela i nyidë a ishi memine la drakona . . . me ite angela i nyën.” Hna qaja fe hnene la Tusi Hna Amamane laka, Iesu la Tan la tronge ne isi Akötresie. Haawe, ame la ketre ëje i Iesu ke, Mikaela.—Hna Amaman 19:14-16.

▸ Mek. 8, par. 12

Ame la hnaewekë celë, ke kola qaja la ketre hnepe ijin qëmekene tro la Baselaia i Akötresie a apatren la fene i Satana. Tusi Hmitrötr a qejepengöne ka hape, ngöne la ijine cili, troa traqa la itre ewekë ka tru alien. Ame la itre hnaewekë tune la, “puatine la fewatin” [nyipune la fen] memine la kola, “traqa hmaca la Neköi at”, ke itre hatren la hneijine cili. (Mataio 24:3, 27, 37) Hna nyiqan la “itre drai hnapin” lo 1914, ijine kola acil la Baselaia i Akötresie e koho hnengödrai. Troa nyipun la “itre drai hnapin” e Amagedo, ijine kola apatrene la fene i Satana.—2 Timoteo 3:1; 2 Peteru 3:3.

▸ Mek. 9, par. 2

Ame la Akötresieti a amelene hmaca la atr ke, Nyidrëti a hamëne hmaca pi la mano ne mel. Tusi Hmitrötr a amaman la naene lao atr hna amelene hmaca hnei Elia, Elisaia, Iesu, Peteru me Paulo. Ame asë hi la itre iamamanyikeu cili, ke hna jëne hmekuje hi la men qathei Akötresie. Hnei Iehova hna thingehnaean laka, tro Nyidrëti a amelene hmaca e celë fen la itre “ka meköt” me itre “ka tha meköt.” (Itre Huliwa 24:15) Tusi Hmitrötre fe a amamane laka, hetre itre hna iën hnei Akötresie, ka troa mele hmaca e koho hnengödrai me Iesu.—Ioane 5:28, 29; 11:25; Filipi 3:11; Hna Amaman 20:5, 6.

▸ Mek. 9, par. 13

Ame la pengöne la kuci haze ke, ene la troa thel troa ithanata meköti me itre ua, jëne la ketre trene iöni, maine pena jëne lo itre ka ithanata me itre ka mec. Ketre hna majemine lai ka ngazo koi Iehova. Hna amenu angatr hnene la trengathoi ka hape, ame la kola meci la atr, ke hetre u pe kö ka mel, nge ka troa nyi ketre ua ka catr. Aqane kuca i itre dremoni lai matre troa sawa la itre atr  troa drei Akötresie. Tune la troa thele ewekë jëne la itre wëtresij, itre xa aqane kuci haze hi lai. Alanyimu la itre hna iaön hnene la horoscope me itre itus, itre film me itre iatr, tune la itre nyima, ka hape, tha ka ngazo kö la itre dremoni. Ceitu memine la magicien me itre iamamany (surnaturel) laka, hna mekun ka hape tha ka ngazo kö ke, nyine elone hi maine nyine iamadrinë. Ame la itre hna majemine kuca göne la itre ka mec, tune la nyi ahnahna koi itre ka mec, lever de deuil, anniversaire ne la itre ka mec, me veillée wezipo, ke ka ce tro memine la kola ithanata me itre dremoni. Ame la itre xan, ke angatr a ufi dorog matre troa löthi angatr hnei itre dremoni.—Galatia 5:20, 21; Hna Amaman 21:8.

▸ Mek. 10, par. 10; Mek. 16, par. 4

Iehova la Joxu Kapucatin Asë, Atre xupe la hnengödrai memine la fen hnengödrai asëjëihë. (Hna Amaman 15:3) Nöjei ewekë i Nyidrëti asë hi. Nyidrëti la Atre mus hune la nöjei musi asë, nge Nyidrëti la ka amekötin la nöjei hnei Nyidrëti hna xup. (Salamo 24:1; Isaia 40:21-23; Hna Amaman 4:11) Hnei Nyidrëti hna amë la itre hna amekötin, göne asë la itre hnei Nyidrëti hna xup. Nyidrëti la ka troa acil la itre ka troa mus. Easa sajuën la musi Nyidrë, ngöne la easa drengethenge Nyidrë cememine la ihnim.—1 Aqane lapa ite joxu 29:11.

▸ Mek. 11, par. 10

Ame la föe ka thi upune, ke angeic a humuth la medreng e kuhu hni angeic. Tha qa ngöne hna eatre kö, maine tha ka uthithi pena kö. Eje hi laka, ame la kola nyiqane cia upune la föe ke, ame la nekönatr, tha ketre götrane hmekuje kö la ngönetrei angeic, ngo ketre atrë hë lai hna xup hnei Iehova.

▸ Mek. 13, par. 5

Ketre aqane inyië, laka troa hamë madra ka pexej kowe la atr, maine pena ketre ne la foa lao götran ne la madra. Maine jë sipu madra ne kö lai atr hna hnëkën amë, maine pena ke madra i ketre atr. Ame la foa lao götrane ne la madra ke, plasma, globules rouges, globules blancs me plaquettes.

▸ Mek. 13, par. 13

Ame e hnine la Tusi Hmitrötr, ame la hnaewekë “ihaji”, ke tha kolo hmekuje kö a qaja la kola lep hnei jia. Ame ngöne la kola haji së, ke ene la kola ini së, me eatrongë së, me ameköti së. Ame la Iehova a hajine la ketre atr, ke tha ka elëhni kö Nyidrë me iakötrë pena. (Ite Edomë 4:1, 2) Ketre tulu ka lolo kowe la itre kem me thin. Ame la ihaji qathei Iehova, ke ka hetre thangan ka lolo, nge ka xatuane la atr troa kapa madrin la ihaji. (Ite Edomë 12:1) Hnime catre Iehova la itre hlue i Nyidrë. Nyidrëti a eatrongë angatr, me ini angatr troa amekötin la aqane waiewekë i angatr. Aja i Iehova tro la kem me thin a hajin la itre nekönatr. Tro angatr a xatua nyudren troa trotrohnin la enyipiewekëne troa drengethenge. Loi e troa ini nyudren troa hnimi Iehova, me itre trepene meköt memine la Wesi Ula i Nyidrë.

▸ Mek. 14, par. 13

Ame la itre dremoni ke, itre ua ka tha mama kö, nge ka hetre men. Itre angela ka ngazo catr. Hnei angatr hna xele ma drei Akötresie ene pe ngazo hë angatr. (Genese 6:2; Iuda 6) E cili, ithupëjia ha angatr me Akötresie. Hnei angatr hna xötrethenge Satana troa icilekeu me Iehova.—Deuteronomi 32:17; Luka 8:30; Itre Huliwa 16:16; Iakobo 2:19.

▸ Mek. 16, par. 4