1, 2. (a) Nemene la itre ahnahna ka ketri epun? (b) Pine nemen matre ahnahna ka sisitria la thupene mel?

HETRE ahnahna kö hnei epuni hna hane kapa, ka ketre la hni epun? Nyipici, ame la kola amadrinë së hnene la ketre ahnahna ke, tha hnene kö laka, ka tru la thupen. Ngo hnene pe laka, ka ketre la hni së.

² Nyimutre la itre ahnahna së qaathei Akötresie. Ngo ca ka sisitria pala kö, nge ka nyipi ewekë kowe la mele së. Tha ka ceitu kö la ahnahna cili memine la itre xan. Kola amamane hnene la tane celë laka, hnei Iehova hna upi Iesu kowe la fen, matre tro sa hetrenyi la mele ka tha ase palua kö. (E jë la Mataio 20:28.) Kola amamane hnene la aqane huujëne Iehova la neköi Nyidrë laka, ka tru catre la ihnimi Nyidrëti koi së.

3. Hnauëne laka easa mec?

³ Hnei Iehova hna hnëkëne la thupene mel, matre troa thepe së qa ngöne la ngazo me mec. Tro sa trotrohnine lai jëne lo ewekë ka traqa ekö ngöne la qaan, e hnine la hlapa e Edena, laka itre thauzane hë lao macatre. Hnene lo lue pane keme së me thine së hna ena la wathebo i Akötresie. Ame la pune koi nyidro, ke mec. Tha koi nyidroti hmekuje kö, ngo koi së fe itre matra i nyidro.—Efeso 1:7; wange ju la Ithuemacany 9.

4. Drei ekö lae Adamu?

⁴ Ame la Iehova a xupi Adamu lo pane atr, hnei Nyidrëti hna hamëne la ewekë ka sisitria, ene la mele ka pexej. Ka  pexeje la mekuna i Adamu, me ngönetrei angeic ka pë ethan. Celë hi matre tha hane fe kö angeice wezipo, me qatre trootro, me mec. Ketre, Iehova la ka xupe meköti Adamu, matre kösë sipu keme i angeice hi Nyidrë. (Luka 3:38) Iehova a ithanata meköti me angeic, tune la Nyidrëti a qaja koi angeic la hnëqa ka tru, ngo ka troa hamë madrine pe koi angeic.—Genese 1:28-30; 2:16, 17.

5. Nemene la aliene la hna hape, hna xupi Adamu “hnaiji Akötresie”?

⁵ Hna xupi Adamu “hnaiji Akötresie.” (Genese 1:27) Hna xupi angeic cememine la itre thiina i Akötresie, tune la ihnim, me inamacan, me meköt, me men. Tha hna xupi angeice kö tune la ketre “robo”. Hnei Nyidrëti pe hna hamë angeice la atreine troa ië ewekë. Celë hi matre, maine hnei angeice ju hna drengethenge Akötresie, ke tro kö angeic a mele palua ngöne la paradraiso.

6. Ame lo Adamu a tha idrei, nemene la hnei angeice hna aluzin? Nge nemene la thangane lai koi së?

⁶ Ame la kola nue triji Adamu hnei Akötresie pine la hnei angeic hna tha idrei, ke luzi pi hi lo aqane imelekeu i angeice me Nyidrë. Ketre, luzi fe hë lo mel ka mingöming, me ka pexej, memine la paradraiso. (Genese 3:17-19) Pine la hnei Adamu me Eva hna tha idrei, pëhë jëne mele koi nyidro. Jëne Adamu, “traqa ha la ngazo kowe la fene hnengödrai, nge meci fe pine la ngazo, tune lai hna traqa la meci kowe la nöjei ate asë, ke ngazo asë hë.” (Roma 5:12) Ame la Adamu a tha idrei, ke angeice hi lai a sipu “huujë” angeice kö, matre troa nyihluene la ngazo me mec. Ketre, angeice fe a huujë së itre matra i angeic. (Roma 7:14) Hapeu, hetre ketre jëne mele hmaca koi së? Eje hi. Hnei Iehova hna hnëkëne la thupene mel.

7, 8. Nemene la thupene mel?

⁷ Nemene la thupene mel? Ame la thupene mel ke, kola itöne hmaca la ketre mel, maine ketre ewekë pena. Tusi  Hmitrötr a qaja ka hape, ame la thupene mel, ke nyine troa nyi thupen, matre troa nyihnyawane hmaca la ewekë hna angazon.

⁸ Tha ewekë ka co kö la hna aluzin hnei Adamu, ke, meci la pune koi së. Matre drei la atr e celë fen, ka ijije troa itön hmaca la mel hna aluzin, memine lo paradraiso? Pëkö ala cas. Celë hi matre, hnei Iehova hna hnëkëne la thupene mel, matre troa thepe së qa ngöne la ngazo me mec. Tro sa ce wang la aqane hnëkëne Iehova la thupene mel, memine la itre manathithi hne së hna troa kapa qa ngön.

9. Nemene la nyine hamën troa thupene mel?

⁹ Pëkö atr e celë fen ka ijije troa itöne hmaca la mele hna aluzin hnei Adamu. Pine nemen? Pine laka itre atr ka ngazo asë hi së. (Salamo 49:7, 8) Ame la mele hnei Adamu hna aluzin ke, mele ka pexej. Celë hi matre troa itöne la mele ka pexeje cili, hnene hmaca kö la ketre mele ka pexej. Kola qaja hnei Tusi Hmitrötr ka hape, “nyine anyipicine ngöne la ijine ka ijij.” (1 Timoteo 2:6) Haawe, loi e troa ihmeku hnyawa la thupene mel, memine lo mele hna aluzine hnei Adamu.

10. Nemene la aqane hnëkëne Iehova la thupene mel?

¹⁰ Nemene la aqane hnëkëne Iehova la thupene mel? Hnei Iehova hna upe la Neköi Nyidrëti ka cas, lo Nekö ne hnimina i Nyidrë nge Haetra ne la nöjei hna xupe asë. (1 Ioane 4:9, 10) Hnei Iesu hna nue xecie la mele i nyidrë e hnengödrai, memine fe la Keme i nyidrë. (Filipi 2:7) Hnei Iehova hna kuca matre tro Iesu a mele e celë fen. Matre ame la kola hnaho Iesu, ke ka pexeje nyidrë, nge ka pë ethan.—Luka 1:35.

11. Nemene la ka aijijë Iesu troa itöne la mele ne la nöjei atr asë?

¹¹ Qa ngöne la hna tha idrei hnei Adamu lo pane atr,  tha pexeje hë la itre atr. Ngo hapeu, ijije kö troa amelene qa hna meci la itre matra i Adamu? Ijije hi. (E jë la Roma 5:19.) Ka pexeje Iesu, ke pëkö ngazo i nyidrë. Celë hi kepin matre hnei nyidrëti hna nue la mele i nyidrë, troa thupene mele së. (1 Korinito 15:45) Mele i nyidrëti ka pexej la ka thapa la nöjei matra i Adamu, qa ngöne la mec.—1 Korinito 15:21, 22.

12. Nemene la kepine matre Iesu a xomi akötr?

¹² Tusi Hmitrötr a qejepengöne la aqane akötrë Iesu qëmekene lo tro nyidrëti a mec. Hna lep angazo nyidrë, nge jei fao nyidrëti jë hë hune la sinöe ne iaxösisi. Hnei nyidrëti hna xomi akötr uti hë la meci nyidrë (Ioane 19:1, 16-18, 30) (wange ju la Ithuemacany 15). Nemene la kepine matre Iesu a xomi akötre tune lai? Pine laka hnei Satana hna qaja ka hape, maine kola akötre la atr, ke, sasaqe hi angeice nue Akötresie. Ngo hnei Iesu hna amamane ka hape, ijije hi tro la atr ka pexej a mele nyipici koi Akötresie, uti hë la pun. Hnei Iesu hna amadrinëne la Keme i nyidrë.—Ite Edomë 27:11.

13. Hna hamëne tune ka la thupene mel?

¹³ Hna hamëne tune ka la thupene mel? Ame lo macatre 33, ngöne lo drai 14 ne la treu Nisan koi angetre Iudra, hna humuthi Iesu hnene la itre ithupëjia me nyidrë. (Heberu 10:10) Nge köni drai thupen, hnei Iehova hna amele Iesu, matre ketre angela hmaca nyidrë. Thupene lai, hnei nyidrëti hna bëeke hmaca hnengödrai eë kowe la Tretretro i nyidrë. E cili, hnei Iehova hna kapa la thupene mel, ene lo mele ka pexeje i Iesu hna huujën. Kösë lo Iesu a hamë Akötresieti la mele ka pexeje i nyidrë troa mele e celë fen, matre nyine thupene mele pe kowe la itre matra i Adamu. (Heberu 9:24) Haawe, pine laka ase hë Iesu itöne la mele së, ase hë thepe së qa ngöne la ngazo me mec.—E jë la Roma 3:23, 24.

14, 15. Nemene la nyine tro sa kuca matre troa senge la ite ngazo së?

¹⁴ Ijije hi tro sa kapa la itre manathith qa ngöne lai ahnahna ka tru enehila, me ngöne fe la mele së elany. Tro sa ce wange ka hape, tune kaa.

¹⁵ Kola senge la itre ngazo së. Nyipici, easa ajane troa kuca pala hi la loi, ngo ame pe, thatreine kö së. Ame itre xa ijin, easa tria ngöne la aqane ithanata së me ngöne la aqane ujë së. (Kolose 1:13, 14) Ngo nemene la nyine tro sa kuca, matre troa senge la itre ngazo së? Loi e tro sa pane ietrane la itre ewekë ka ngazo hne së hna kuca. Easa sipo Iehova troa senge itre ej cememine la hni ka ipië. Ame la easa dreng laka tingetinge hë së, kolo hi lai a hape, ase hë Nyidrëti senge la itre ngazo së.—1 Ioane 1:8, 9.

16. Nemene la nyine tro sa kuca matre troa wië la mekuthetheu së?

¹⁶ Troa wië la mekuthetheu së. Ame la kola qajaqaja hnene la mekuthetheu së ka hape, tha ka loi kö la ewekë hne së hna kuca, ke drenge hi së lai e kuhu hni së. Ame itre xa ijin, traqa pi hi la itre mekun ka ahleuhleune la hni së. Ngo ame pe tha tro pi kö sa kucakuca. Tro pe sa xëwe fë la itre ngazo së, me sipo iele Iehova troa senge itre ej. (Heberu 9:13, 14) Loi e troa xecie koi së laka, Nyidrëti a drenge la thithi së, nge nyidrë ti fe a troa senge la itre ngazo së. (Heberu 4:14-16) E cili, tro ha tingeting la aqane imelekeu së me Akötresie.

17. Nemene la itre manathithi hne së hna kapa qa ngöne la hna meci hnei Iesu?

¹⁷ Easa mejiune kowe la mele ka thaa ase palua kö. “Ame la thupene la ngazo, te, mec, ngo ame la ahnahna i Akötesie, te, mele ka tha ase palua kö göi Iesu Keriso Joxu shë.” (Roma 6:23) Haawe, jëne la meci Iesu, ijiji së hë troa hane kapa la mel ka epine palua, nge pë hmaca kö mec.  (Hna Amaman 21:3, 4) Ngo nemene la nyine tro sa kuca matre troa hane kapa la itre manathithi cili?

18. Nemene la ka amamane ka hape, Iehova a hnimi së?

¹⁸ Maine easa kapa la ketre ahnahna ka mingöming, tro lai a tru la madrine së. Ame la thupene mel ke, ahnahna hi lai ka sisitria. Celë hi matre kola upi së troa amamane la hni ne ole së koi Iehova. Ame ngöne Ioane 3:16 kola hape: “Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas.” Nyipici, tru la ihnimi Iehova koi së, nge kola mama lai ngöne lo ijine Nyidrëti a nue Iesu, Nekö hnimina i Nyidrë. Ketre, atraqatre fe la ihnimi Iesu koi së, pine laka hnei nyidrëti hna huujëne la mele i nyidrëti koi së. (Ioane 15:13) Easa öhne hnyawa laka, jëne la thupene mel, Iehova me Iesu a hnimi së.—Galatia 2:20.

19, 20. (a) Nemene la aqane tro sa nyi sinee i Iehova? (b) Nemene la ka amamane ka hape, easa lapaune kowe la thupene mel?

¹⁹ Atre hnyawa ha së enehila laka, atraqatr la ihnimi Iehova koi së. Ngo nemene la nyine tro sa kuca matre nyi sinee i Iehova? Nyipici tha ka hmaloi kö ke, thatre Nyidrëti hnyawa kö hne së. Kola qaja ngöne Ioane 17:3, ka hape, ijije hi tro sa thele troa atrepengöi Iehova. Maine tro sa catre thele troa atre hnyawa Iehova, tro hë lai a kökötre trootro la ihnimi së koi Nyidrë, me hetre aja troa amadrinëne la hni Nyidrë, me hane ketre sinee i Nyidrë. Haawe, catre pi së troa inine la Tusi Hmitrötr.—1 Ioane 5:3.

²⁰ Lapaune jë kowe la thupene mel. Öni Tusi Hmitrötr: “Hetenyi hë la mele ka tha ase palua kö hnene la ate lapaune kowe la Hupuna.” (Ioane 3:36) Nemene la aliene la kola hape, “troa lapaun”? Kola hape, troa kuca la huliwa hna upi së hnei Iesu. (Ioane 13:15) Tha ene hmekuje kö la troa qaja ka hape, ka lapaune fe hi së koi Iesu. Troa  mama la lapaune së, hnene la itre huliwa së. Ame ngöne Iakobo 2:26, ke kola hape: “Ke meci hë la ngönetei e pë u.”

21, 22. (a) Pine nemene matre ka nyipiewekë koi së, troa sine e nöjei macatre la Drai Ne Amekunëne La Meci Iesu? (b) Nemene la hne së hna troa ce wange ngöne la mekene 6 me 7?

²¹ Atrune jë la Drai Ne Amekunëne La Meci Iesu. Iesu a ajane tro pala hi sa mekune laka, hnei nyidrëti hna huujëne la mele i nyidrëti ka pexej thatraqai së. Ame ngöne lo hej qëmekene tro nyidrëti a mec, öni nyidrëti kowe la itretre drei nyidrëti ka hape: “Kuca jë la nyine mekune koi ni.” (E jë la Luka 22:19.) Celë hi kepin matre, e nöjei macatre, kola atrune hnene la Itretre Anyipici Iehova lo hna hape, “Drai Ne Amekunën” maine “Xeni Ne Jidi Ne La Joxu.” (1 Korinito 11:20; Mataio 26:26-28) Ame la easa sine la “Drai Ne Amekunën,” easa hi lai a amamane laka ka tru koi së la thupene mel, memine la aqane hnimi së hnei Iehova me Iesu (wange ju la Ithuemacany 16).

²² Pëkö ketre ahnahna ka tune la thupene mel. (2 Korinito 9:14, 15) Ketre, kolo fe a troa hane kepe thangane hnene la itre milio lao atr ka mec. Tro pëhë sa ce wange ngöne la mekene 6 me 7 la aqane troa eatrëne lai.