1, 2. Nemene la aja i Iehova kowe la itre hnepe lapa?

IEHOVA la ka acile la faipoipo. Hnei Nyidrëti hna isilekeune la pane trahmany me pane föe. Tusi Hmitrötr a amamane laka, hnei Nyidrëti hna xupe la pane föe “me tro sai angeice koi Adamu.” Ka tru la madrine i Adamu, öni angeic: “June sine la ite juneng, me ijöne sine la ijöng.” (Genese 2:22, 23) Celë hi ka amamane laka, aja i Iehova tro la itre ka faipoipo a mele madrin.

² Ame la ejolen ke, tru hnei atr ka pë madrin ngöne la hnepe lapa i angatr. Ngo hetrenyi e hnine la Tusi Hmitrötr la itre trepene meköt, nyine xatuane la itre atrene la hnepe lapa, troa mele madrin.—Luka 11:28.

3, 4. (a) Nemene la aqane tro la trahmanyi a metrötrëne la föi angeic? (b) Pine nemene matre nyipiewekë tro la lue trefën a iqejemenukeu?

³ Tusi Hmitrötr a qaja ka hape, tro la trahmanyi a hnime me metrötrëne la föi angeic. E jë la Efeso 5:25-29. Tro la trahmanyi a hnime me metrötrëne la föi angeic, nge tro fe angeic a nyihnyawane me thupë nyidro. Tha tro pi kö la trahmanyi a qanangazone la föi angeic.

⁴ Nemene la aqane tro la trahmanyi a kuca, e hetre tria ne la föi angeic? Tusi Hmitrötr a qaja ka hape: “Ange trahmany, isa hnimeju la ite ifënekö i nyipunie, nge the akötë angat.” (Kolose 3:19) Itre trahmany, the thëthëhmine kö laka, ka hane fe epuni tria. Nge tro Iehova a kapa la ietra i epun, e hnei epuni hna kapa la menu ne la itre föi epun.  (Mataio 6:12, 14, 15) Troa hetre madrin e hnine la faipoipo, e tro la lue trefën a hmalahnine troa iqejemenukeu.

5. Pine nemene matre tro la trahmanyi a metrötrëne la föi angeic?

⁵ Hnei Iehova hna amekötin laka, tro la trahmanyi a metrötrëne la föi angeic. Qa i trahmanyi troa mekune la itre ka ijije kowe la föi angeic, ngöne la götrane la ngönetrei, memine la pengöne trefën. Ka nyipiewekë catr. E tha hna metrötrëne kö hnene la trahmany la föi angeic, ke tha tro kö Iehova a drenge la itre thithi angeic. (1 Peteru 3:7) Nyidrëti a hnime ceitune la itre föe me itre trahmany. Ame la ka amadrinë Iehova ke, ene la ihnimi ne la atre koi Nyidrë.

6. Ame la trahmanyi me föe ke, “ca ngönetei” hë. Kola hapeue lai?

⁶ Iesu a qejepengöne ka hape, ame la trahmanyi memine la föi angeic ke, “tha ala lue hmaca kö, ngo ca ngönetei hë.” (Mataio 19:6) Nge tro nyidroti a inyipicikeu. (Ite Edomë 5:15-21; Heberu 13:4) Tro la trahmanyi a thele troa amadrinëne la föi angeic, ngöne la götrane ce meköle trefën. Ketre tune la föe, tro angeic a amadrinëne la föi angeic ngöne la götrane ce meköle trefën. (1 Korinito 7:3-5) Nge tha tro kö la trahmanyi a thëthëhmine laka, “pa pala kö ate xelene la ngönetei angeice kö, ngo hna ithu ane me thupën’ ej.” Kola hape, tro la trahmanyi a hnime la föi angeice me nyihnyawa nyidro. Nge ame la ajane la föe ke, troa lolo la thina ne la föi angeic, nge tro fe a hnimi angeic.—Efeso 5:29.

7. Pine nemene matre nyipiewekë troa hetre he ne la hnepe lapa?

⁷ Nyipiewekë e troa hetre hen e hnine la hnepe lapa. Kola hape, ketre ka troa iujine la hnepe lapa, matre tro angatre a ce huliwa. Easa e ngöne la 1 Korinito 11:3 ka hape: “Keriso la he ne la nöjei trahmany, nge trahmanyi la he i fö, nge Akötesieti la he i Keriso.”

8. Tune kaa la aqane tro la föe a metrötrëne la föi angeic?

⁸ Ka tria asë hi la nöjei trahmany. Ngo e tro la föe a ca mekun memine la föi angeic, ce memine la hni ka pexej, ke  troa hetre thangane ka loi kowe la hnepe lapa. (1 Peteru 3:1-6) Tusi Hmitrötr a qaja ka hape: “Nge ame la föe kete troa metrötrëne la trahmanyi.” (Efeso 5:33) Matre maine tha ka hmi kö la trahmany, ngo tro palahi la föe a metrötrëne hnyawa la föi angeic. Tusi Hmitrötr a qaja ka hape: “Loi e tune fe nyipunie ite fö, denge thenge ju la ite fö’ i nyipunie, thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula, e goeëne hnei angate la thina i nyipunie a pë ethan, nge kola qou.” (1 Peteru 3:1, 2) Tro la thina ka lolo ne la föe, a xatuane la föi angeice troa trotrohnin, me metrötrëne la hmi angeic.

9. (a) Tro la föe a tune kaa e tha itrotrohni kö me trahmany? (b) Nemene la itre eamo koi itre föe ngöne Tito 2:4, 5?

⁹ Tro la föe a tune ka, e tha itrotrohni kö nyidro? Tro la föe a qaja hnyawa la mekuna i angeic cememine la hni ka ipië. Tro sa xome la ceitune i Sara. Hnei angeice hna qaja koi Aberahama föi angeic, la ketre ewekë hnei Aberahama hna xele ma dreng. Ngo hnei Iehova hna qaja koi Aberahama ka hape: “Ngo cengöne denge thenge ju la hna qaja koi ’ö hnei Sara.” (Genese 21:9-12) Ame la trahmanyi Keresiano, ke tha  hna majemine kö xomi mekune ka isazikeu memine la hna qaja hnei Tusi Hmitrötr. Celë hi kepine matre tro la föe a xatuane la föi angeic. (Itre Huliwa 5:29; Efeso 5:24) Ame la föe ka inamacan, ke angeice a thele jëne troa tingetinge palahi la hnepe lapa i angeic. (E jë la Tito 2:4, 5.) Nge ame la kola öhne hnene la trahmanyi me itre neköi nyidro la aqane catre huliwa ne la thine koi angatr, ke tro pala kö a tru la ihnimi angatr me metrötr kowe la thin.—Ite Edomë 31:10, 28.

10. Nemene la hna qaja hnei Tusi Hmitrötr göi isa lapa me sei hna cil?

¹⁰ Ame itre xa ijin, canga nyimenyime hi isa lapa, maine sei hna cil hnene la lue trefën. Ngo Tusi Hmitrötr a qaja ka hape: “The tro kö la fö’ a tro tije la trahmany.” Eje fe a qaja ka hape: “The tro kö la trahmanyi a helëne la fö’ i angeic.” (1 Korinito 7:10, 11) Ame itre xa ijin, ngöne la mele ne la lue trefën, hetre itre kepine ka aijijë nyidro troa isa lapa. Ngo qëmekene troa isa lapa, nyipiewekë troa pane mekune hnyawa. Ngo, nemene la hna qaja hnei Tusi Hmitrötr göi sei hna cil? Hna amamane laka, ame hmekuje hi la kepine ka ijij matre troa sei hna cil, ke, e hnene la ketre e nyidro hna nyixetë. Kola hape, hnene la ketre e nyidro hna ce meköle trefën me ketre atr.—Mataio 19:9.

11. Nemene la ka nyipiewekë kowe la itre nekönatr?

¹¹ Itre keme me thin, xomi ijine jë troa ce memine la itre nekö i epun. Ame la hnei nyudreni hna ajan, ke troa ce me epun, keme me thin. Nge nyipiewekë catre tro epuni a xatua nyudreni troa atrepengöi Iehova.—Deuteronomi 6:4-9.

12. Nemene la aqane tro la itre keme me thin a thupëne la itre neköi angatr?

¹² Kolo pala hi a ngazo catre trootro la fene i Satana. Itre xane a thele troa akötrëne la itre neköi epun, maine angazo nyudreni pena. Ame itre xa keme me thin, kolo itre ewekë  lai, laka tha nyine tro kö a ithanatan. Ngo nyipiewekë troa hmekë nyudren. Qejepengöne jë koi nyudreni la aqane troa ananyin me kötrene la itre atr ka tune lai. Itre keme me thin, thupëne hnyawa kö itre neköi epun. *—1 Peteru 5:8.

13. Nemene la aqane tro la itre keme me thin a inine la itre nekönatr?

¹³ Hnëqa ne la itre keme me thine troa inine la itre nekönatre troa loi thiina. Nemene la aqane tro epuni a ini nyudren? Nyipiewekë troa ini nyudren me haji nyudren ngöne la menyik. The catre kö la itre hni epun, nge the lepi  nyudreni kö. (Ieremia 30:11) Kolo lai a hape, the wesitrë nyudreni kö ngöne la epuni a elëhni. The jelë nyudreni kö, ke kolo lai a akötrë nyudren, “kösë hna thine hnei taua.” (Ite Edomë 12:18) Qejepengöne jë koi nyudren la enyipiewekëne troa drengethenge.—Efeso 6:4; Heberu 12:9-11; wange ju la Ithuemacany 30.

14, 15. Pine nemene matre tro la itre nekönatr a drengethenge la itre keme me thin?

¹⁴ Hnei Iesu pala hi hna drengethenge la Keme i nyidrë, ngacama jol e itre xa ijin. (Luka 22:42; Ioane 8:28, 29) Tune la aqane drengethenge i Iesu, tro la itre nekönatr a drengethenge la itre keme me thine i angatr, thenge la aja i Iehova.—Efeso 6:1-3.

¹⁵ Itre nekönatr, maine jë tha ka hmaloi kö troa drengethenge la keme me thine i epun. Ngo mekune pala kö laka, ame la epuni a drengethenge tre, epuni hi lai a amadrinë Iehova, me keme me thine i epun. *—Ite Edomë 1:8; 6:20; 23:22-25.

16. (a) Tune ka la aqane uku epuni hnei Satana, troa kuca la itre ewekë ka ngazo? (b) Nge pine nemene matre nyipiewekë tro la itre sine ce elo i epuni a hane atrepengöi Iehova?

¹⁶ Jëne la itre sine ce elo i epuni maine itre xa thöth, ijije hi tro Satana a uku epun, troa kuca la itre ewekë ka ngazo. Atre hi angeice ka hape, ka jole koi epuni troa cile catr, e traqa ju huli epuni hnei itre xan. Tro sa ce wange la tulu i Dina, lo nekö i Iakobo jajiny. Hetre itre sine ce elo i angeic ka thatre Iehova kö. Celë hi ka afetrane la itre jole ka tru koi angeic, me kowe fe la hnepe lapa i angeic. (Genese 34:1, 2) Maine ka thatre Iehova kö la itre sine ce elo i epuni ke, tro angatre a uku epuni troa kuca la ketre ewekë hna sisine hnei Iehova. Nge e ngazo hë la aqane ujë i epun, ke tro epuni a  ahleuhleune la hnepe lapa i epun, me Akötresieti fe, nge akötre pë hë la pune koi epun. (Ite Edomë 17:21, 25) Celë hi matre nyipiewekë tro la itre sine ce elo i epuni a hane atrepengöi Iehova.—1 Korinito 15:33.

17. Nemene la aja i Akötresie kowe la itre atrene la hnepe lapa?

¹⁷ Maine tro la itre atrene la hnepe lapa a xötrethenge la hna amekötine hnei Akötresie, ke nyimutre la itre jole hnei angatre hna atreine troa neën. Itre trahmany, hnime ju la itre föi epun, nge metrötrë angatre ju. Nge itre föe, loi e tro epuni a hetre hni ka ipië me metrötrëne la itre föi epun, tune la föe hna qaja ngöne Ite Edomë 31:10-31. Itre keme me thin, inine jë la itre neköi epuni troa hnimi Akötresie. (Ite Edomë 22:6) Itre kem, iujine “aloine” jë la hnepe lapa i epun. (1 Timoteo 3:4, 5; 5:8) Itre nekönatre fe, drengethenge ju la keme me thine i epun. (Kolose 3:20) The thëthëhmine kö laka, itre atre ka tha pexeje kö së. Matre loi e tro sa hetre hni ka ipië, me atreine iqejemenukeu. Itre atre ne la hnepe lapa, Iehova a hamëne la itre eamo e hnine la Tusi Hmitrötr, nyine xatua epun isa ala cas.