1, 2. Drei la hne së hna troa qale kow enehila?

PANE mekune jë ka hape, epuni a tro ngöne la gojeny, nge kola ngazo drai. Miti hë la hnengödrai, kola samek me hedreng, nge kola hlupi lai mani. Epuni a thele hnë tro epuni a zae. Tha hmitre ju kö, nge epuni a öhne la ketre hnë zae ka lolo. Madrine jë hi epun!

² Ceitune hi lai memine la hne së hna melën enehila. Kolo palahi a ngazo catre trootro la fen, matre epuni a thele ka hape, e kaa la göhnë ka loi hnë tro epuni a lapa qal. Hnene la ketre hlue i Akötresie hna cinyihane ka hape: “Tro ni a ulatine koi Iehova, Cilieti la hniteng, me hnāpong, me Akötesingö; ini a lapaune kow.” (Salamo 91:2) Iehova a xatua së me thue mejiune së kowe la itre drai hnapin.

3. Nemene la nyine tro sa kuca matre tro Iehova a thupë së?

³ Nemene la aqane thupë së hnei Iehova? Atreine hi Nyidrëti xatua së troa cile kowe la nöjei pengöne jol. Ka tru catre kö la mene i Nyidrë hune la nöjei ithupëjia asë. Ngacama traqa ju hë la ketre jol, ngo ka xecie koi së laka, tro Iehova a nyinyine la nöjei akötre së. Tusi Hmitrötr a ithuecatre koi së troa lapa qale “ngöne la ihnimi Akötesie.” (Iuda 21) Maine tro sa lapa qale koi Nyidrë, tro hë Nyidrëti a xatua së troa cile catr kowe la nöjei pengöne jol. Ngo tro sa tune ka?

4, 5. Nemene la aqane amamane Iehova la ihnimi Nyidrëti koi së?

⁴ Maine tro sa lapa qale koi Iehova, ke, tro sa pane trotrohnine hnyawa la etrune la ihnimi Nyidrëti koi së. Pane  mekune jë la nöjei ewekë hnei Nyidrëti hna kuca koi së. Hnei Nyidrëti hna xupe la ihnadro ka lolo, me hnënge öni, me itre feja ka mingöming. Hnei Nyidrëti fe hna hamëne la nöjei pengöne xeni ka lolo, memine la tim. Jëne la Tusi Hmitrötr, Nyidrëti a amamai së la ëje i Nyidrë me itre thina ka mingöminge i Nyidrë. Ame la ewekë ka sisitria catr, tre, hnei Nyidrëti hna amamane la ihnimi Nyidrëti koi së, la Nyidrëti a upi Iesu lo nekö hnimina i Nyidrë troa nue la mele i nyidrëti koi së. (Ioane 3:16) Hnene la huuje i Iesu hna hamë së la mejiune ka mingöming göne la itre drai hnapin.

⁵ Hnei Iehova hna acile la ketre Baselaia, musi hna cilëne hnene la Mesia. Ame la Baselaia cili, tre, ej e koho hnengödrai. Tro ej a apatrene la nöjei akötr asë me acile la paradraiso e celë fen, nge tro la nöjei atr a mele madrine me tingeting epine palua. (Salamo 37:29) Iehova a amamane koi së la ihnimi Nyidrë, me qejepengöne la aqane tro sa mele madrin. Nyidrëti fe a ithuecatre koi së troa thithi lapa ke, Nyidrëti a drei së. Celë hi aqane amamane hnyawane Iehova la ihnimi Nyidrëti koi së isa ala cas.

6. Hna ketri epuni kö hnene la ihnimi Iehova?

⁶ Hapeu, hna ketri epuni kö hnene la aqane hnimi së hnei Iehova? Maine eje hi, loi e troa amamane la hni ne ole i epuni kowe la itre hnei Nyidrëti hna kuca. Xalaithe hi la itre atr ka hetre hni ne ole enehila. Ceitune hi lai memine lo Iesu e celë fen. Ame la nyidrëti a aloine lo treene lao ka lepera, ala casi hi la ka olene koi nyidrë. (Luka 17:12-17) Easa ajane troa hane ujë tune la atre cili laka, tro palahi sa amamane la hni ne ole së koi Iehova.

7. Nemene la aqane tro sa amamane la ihnimi së koi Iehova?

⁷ Tro fe sa amamane laka, tru la ihnimi së koi Iehova. Hnei Iesu hna qaja kowe la itretre drei nyidrë ka hape, tro angatr a hnimi Iehova “hnene la hni angatr ka pexej,” memine  la “u i angatr ka pexej,” memine la “mekune i angatr ka pexej.” (E jë la Mataio 22:37.) Kola hapeue lai?

8, 9. Nemene la aqane tro sa amamane la ihnimi së koi Iehova?

⁸ Hapeu, ijije kö la tro hi a qaja ka hape, easa hnimi Iehova? Ohea. Maine easa hnimi Nyidrë “hnene la hni së ka pexej,” memine la “u së ka pexej” memine la “mekune së ka pexej,” ke, tro së lai a amamane qa ngöne la itre hne së hna kuca. (Mataio 7:16-20) Tusi Hmitrötr a qaja hnyawa ka hape, ame la easa hnimi Akötresie, tre, tro fe sa trongëne la itre wathebo i Nyidrë. Hapeu, jole kö koi së troa trongëne itre ej? Ohea ke, “tha hace kö la ite wathebo i Nyidë.”—E jë la 1 Ioane 5:3.

⁹ Maine tro sa drengethenge Iehova, tro hë sa mele madrin. (Isaia 48:17, 18) Ngo nemene la nyine tro sa kuca, matre troa xatua së troa lapa qale koi Nyidrë?

10. Pine nemene matre tro palahi epuni a thele troa atrepengöi Iehova hnyawa?

¹⁰ Hnei epuni hna easenyi Iehova tune ka? Jëne la ini Tusi Hmitrötr, hnei epuni hna atre Nyidrëti matre kökötre jë hi la ihnimi epuni koi Nyidrë. Ka ceitu hi lai memine la eë laka, tro palahi ej a mel, e hne së hna ipicone lapan. Haawe, tro fe a kökötre la ihnimi epuni koi Iehova, e hnei epuni palahi hna thele troa atrepengöi Nyidrëti hnyawa.—Ite Edomë 2:1-5.

11. Nemene la thangane la itre hnei epuni hna inin e hnine la Tusi Hmitrötr?

¹¹ E tro epuni a inine lapane la Tusi Hmitrötr, ke, troa ketre la hni epuni hnene la itre ewekë hnei epuni hna inin. Tune la ka traqa kowe la lue atre drei Iesu, ngöne la nyidrëti a qejepengöne la itre hna perofetan e hnine la Tusi Hmitrötr. Öni nyidro: “Tha së [sesëkötre] kö la lue wenethëhmi sho, ngöne lo hnei nyidëti hna ithanata me  nyisho e kuhu gojeny, me shenge koi nyisho la ite hna cinyihan?”—Luka 24:32.

12, 13. (a) Nemene la ka troa traqa e itre xa ijin kowe la ihnimi së koi Akötresie? (b) Ngo nemene la aqane tro sa kuca matre troa cile hut la ihnimi së koi Akötresie?

¹² Hna ketr la hni ne la itretre drei Iesu la angatr a trotrohnine la itre hna cinyihan. Maine jë hnei epuni hna hane madrine la epuni a nyiqane inine la Tusi Hmitrötr. Celë hi ka xatua epuni troa atrepengöi Iehova me hnimi Nyidrë. Ngo hmekëne kö wanga nanazije pi, maine ae pena, la ihnimi epuni koi Nyidrë.—Mataio 24:12.

¹³ Troa cile huti la ihnimi epuni koi Akötresie, e hnei epuni hna catre thele troa atrepengöi Nyidrëti me Iesu. Thele jë la aqane tro epuni a melëne la hnei epuni hna inin. (Ioane 17:3) Ame ngöne la epuni a e maine inine pena la Tusi Hmitrötr, ke, hnyinge jë ka hape: ‘Nemene la pengöi Iehova ka mama koi ni? Ame ngöne la itre xötre celë, nemene la ka xatua ni troa hnimi Iehova cememine  la hning ka pexeje memine la ung ka pexej?’—1 Timoteo 4:15.

14. Pine nemene matre ame la thith tre, ka xatua së troa acatrene la ihnimi së koi Iehova?

¹⁴ Troa catr la aqane imelekeu së memine la ketre sipu sinee së, e hne së hna iöhnyi lapa me angeic. Ka ceitu hi lai memine la easa ithanata lapa me Iehova jëne la thith. Celë hi ka troa acatrene la ihnimi së koi Nyidrë. (E jë 1 Thesalonika 5:17.) Ame la thith tre, ketre ahnahna ka sisitria qaathene la keme së e koho hnengödrai. Tro palahi sa thithi koi Nyidrë qa kuhu hni së. (Salamo 62:8) Tha loi kö e tro sa thith jëne la itre hna e gufan, ngo loi pe qa ngöne la itre sipu mekuna së. Tro palahi a catr la ihnimi së koi Iehova, e hne së hna catre inine la Tusi Hmitrötr, me thithi lapa koi Nyidrë qa kuhu hni së.

15, 16. Ka nyipiewekë kö koi epun la troa cainöje trootro?

¹⁵ Troa acatrene la ihnimi së koi Iehova, e hne së hna amamane la lapaune së koi itre xan. Ame la easa qeje Iehova koi itre xan, tre, celë hi ketre ahnahna ka tru. (Luka 1:74) Ketre hnëqa lai ka tru hnei Iesu hna hamëne kowe la nöjei Keresiano asë. Tro asë hi sa cainöjëne la maca ka loi ne la Baselaia i Akötresie. Maine jë epuni a hane cainöje trootro?—Mataio 24:14; 28:19, 20.

¹⁶ Ame koi Paulo aposetolo, ketre ewekë ka sisitria catr la troa cainöje trootro. Öni nyidrë, ketre “tenga mo” ka tru alien. (2 Korinito 4:7) Ame la troa qeje Iehova memine la itre aja i Nyidrë ke, celë hi huliwa ka nyipiewekë catr nyine tro sa hane sin. Aqane tro hi së lai a nyihlue i Iehova. Tru catr la madrine i Nyidrë e tro sa kuca la aja i Nyidrë. (Heberu 6:10) Nge ketre, ame la troa cainöje trootro, tre, ka hamë manathith koi itre ka drei epun, me koi epuni fe. Tro lai a xatuane la itre xan me epuni fe troa easenyi catr  koi Iehova, me hetrenyi la mele ka tha ase palua kö. (E jë la 1 Korinito 15:58.) Hapeu, hetre ketre huliwa kö ka troa hamë madrine koi epun?

17. Pine nemene matre nyipiewekë troa kuca nyimenyimëne la huliwa ne cainöj?

¹⁷ Ame la huliwa ne cainöj tre, ketre huliwa nyine troa kuca nyimenyimën. Matre, loi e tro sa “catre cainöjëne la wesi ula.” (2 Timoteo 4:2) Tro la nöjei atr asë a drenge la kola qaja la maca ka loi ne la Baselaia i Akötresie. Tusi Hmitrötr a qaja ka hape: “Eashenyi hë la drai ka tru i Iehova, eashenyi hë, nge saqe catë hë,” “nge tha tro kö a hmit.” (Zefania 1:14; Habakuka 2:3) Eje hi, easenyi catre hë matre apatrene pi Iehova la fene i Satana. Ngo qëmekene lai, tro la itre atr a pane atre la itre ewekë ka troa traqa, matre ijije tro angatr a iëne troa nyihlue i Iehova.

18. Pine nemene matre nyipiewekë tro sa nyihlue i Iehova cememine la itre xa nyipi Keresiano?

¹⁸ Iehova a ajane tro sa nyihlue i Nyidrë cememine la itre xa nyipi Keresiano. Tusi Hmitrötr a qaja ka hape: “Nge tro sha imekunekeune mate troa aciane la ihnimi me ite huliwa ka loi; tha tro kö a tije la icasikeu shë tune la thina i ite xan; ngo loi pe troa eamo [itö ithuecatr], nge nue catëne jë e tro nyipunie a goeëne la drai a eashenyi hë.” (Heberu 10:24, 25) Tro sa kuca asë la hne së hna atreine matre troa sine lapane la itre icasikeu. Celë hi ka xatua së troa ithuecatrekeu.

19. Nemene la ka xatua së troa hnime la itre trejine me easë, föe me trahmany?

¹⁹ Ame la epuni a sine lapane la itre icasikeu, tre, epuni hi lai a ce sinee me itre xan ka troa xatua epuni troa nyihlue i Iehova. Hetrenyi la itre xa trejin ka tui epuni e cili, laka angatr a kuca asë la hnei angatr hna atrein, troa nyihlue i Iehova. Ngo tu së fe, itre ka tha pexeje kö angatr, matre itre ka tria fe angatr, ngo loi e tro epuni a atreine xomihni. (E jë la Kolose 3:13.) Thele jë pe la itre thina i  angatr ka loi. Celë hi ka troa xatua së troa hnimi angatr me easenyi catr koi Iehova.

20, 21. Nemene la “nyipi mel”?

²⁰ Iehova a ajane la mel ka mingöming kowe la itre ka hnimi Nyidrë. Tusi Hmitrötr a amamane koi së laka, ketre pengöne kö la mele së elany.

²¹ Ame elany, tha easë hmaca kö a troa mel koi 70 maine 80 hi lao macatre, ngo easë pë hë a troa “mel palua.” Tha easë hmaca kö a mel e hnine la kucakuca me mec, ngo mel ka mingöminge pë hë me tingeting ngöne la paradraiso. Tusi Hmitrötr a qejepengöne lai ka hape, “nyipi mel.” Iehova a thingehnaeane koi së la mele cili. Isine jë së troa “xölehuje” la nyipi mel, qane enehila.—1 Timoteo 6:12, 19.

22. (a) Nemene la aqane tro sa “xöle huje la nyipi mel”? (b) Pine nemene matre tha qaathene kö la trengecatre së la nyipi mel?

²² Nemene la aqane tro sa “xöle huje la nyipi mel”? Loi e tro sa “kuca la loi” me “mana ngöne la nöjei huliwa ka loi.” (1 Timoteo 6:18) Kolo lai a hape, tro sa trongëne la itre hne së hna inin e hnine la Tusi Hmitrötr. Matre ame la nyipi mel ke tha qaathene kö la trengecatre së ke, “ihnimi gufa” i Iehova lai koi së. (Roma 5:15) Celë hi ahnahna ka tru hnei Nyidrëti hna hnëkëne thatraqane la itre ka nyihlue i Nyidrë.

23. Pine nemene matre loi e tro epuni a canga ië ewekë hnyawa enehila?

²³ Tro sa isa hnying ka hape, ‘Eni kö a nyihlue i Akötresie thenge la aja i Nyidrë?’ Maine hetre itre nyine troa saze ngöne la mele i epun ke, enehila hi la ijin. E tro sa isine troa drengethenge Iehova, nge e tro sa lapaune koi Nyidrë, tro hë Nyidrëti lai a Hnë zae së. Tro Nyidrëti a thupëne la itre hlue i Nyidrë, ngöne asë hi la itre drai tixenuë ne la  fene i Satana. Nge tro Nyidrëti a kuca matre tro sa mel e hnine la paradraiso epine palua, tune la hnei Nyidrëti hna thingehnaean. Maine tro epuni a canga atreine ië ewekë hnyawa enehila, ijiji epuni fe hi troa melëne la nyipi mel!