1. Pine nemene matre tro sa atre pengöne la itre angela?

IEHOVA a ajane tro sa atre la itre ka sine la lapa i Nyidrë, tune la itre angela. Tusi Hmitrötr a hë angatre ka hape, “itre nekö i Akötesie.” (Iobu 38:7) Nemene la huliwa ne la itre angela? Nemene la aqane xatuane angatre la itre atr ekö ngöne la itre drai hnapan? Atreine kö angatre xatua së enehila?—Wange ju la Ithuemacany 8.

2. Drei la ka xupe la itre angela, nge ala ije angatr?

² Ame la hnapan, tro sa atre laka, hnei Akötresieti hna xupe la itre angela, ngo Iesu la hnei Nyidrëti hna pane xup. Kolose 1:16 a qaja ka hape: “Hna xupe la nöjei ewekë asëjëihë, nöjei ewekë e hnengödrai, me e celë fen.” Öni Tusi Hmitrötr, itre hadredre lao milio la etrune la itre angela.—Salamo 103:20; Hna Amaman 5:11.

3. Nemene la hna amamane ngöne Iobu 38:4-7 göne la itre angela?

³ Tusi Hmitrötre fe a amaman laka, hna pane xupe la itre angela, nge pine pë hë la ihnadro. Nemene la aqane goeëne la itre angela, la ihnadro? Önine la tusi Iobu, ka tru la madrine i angatr. Ame petre kö ekö, lapa ka cahae angatr, ke angatre asë hi a ce nyi hlue i Iehova.—Iobu 38:4-7.

4. Nemene la ka amamane laka, hna wangatrune la aqane ujë së hnene la itre angela?

⁴ Ka tru kowe la itre angela la aqane ujë së itre atr, memine fe la aja i Akötresie kowe la fen. (Ite Edomë 8:30, 31;  1 Peteru 1:11, 12) Celë hi matre hna ahleuhleunyi angatre fe, la Adamu me Eva a icilekeu me Akötresie. Nge the qaja palaha enehila la kola alanyimu la itre ka tha drei Iehova. Ngo ame la kola ietra hnene la ketre atr me bëeke koi Iehova, ke atraqatre la madrine i angatr. (Luka 15:10) Ka tru catre koi angatr la itre ka nyi hlue i Akötresie. Jëne la itre angela, Iehova a xatuane me thupëne la itre hlue i  Nyidrëti e celë fen. (Heberu 1:7, 14) Tro sa ce wange la itre ceitun.

5. Nemene la aqane xatuane la itre hlue i Akötresie hnene la itre angela?

⁵ Qëmekene la tro Iehova a apatrene e Sodoma me Gomora, hnei Nyidrëti hna upe la lue angela troa amele Lota me lapa i angeic. (Genese 19:15, 16) Itre macatre thupen, hna kuië Daniela perofeta e hnine la hnaope i liona. Ngo goi pë fe eatre i nyidrë ke, “hnei Akötesingö hna upe la angela i nyidë, me ahumune la ite qe ite liona.” (Daniela 6:22) E thupen, hnei Iehova hna upe la ketre angela troa thepe Peteru aposetolo qa hnine la kalabus. (Itre Huliwa 12:6-11) Hna xatua Iesu fe hnene la itre angela, lo nyidrëti e celë fen. Tune lo kola ase bapataiso nyidrë, hnene la itre angela hna, “nyi hlue i anganyidë.” (Mareko 1:13) Qëmekene la tro nyidrëti a mec, hnene la ketre angela “hna aegöcatenyi nyidrë.”—Luka 22:43.

6. (a) Easa atre tune ka laka, itre angela palahi a xatuane la itre hlue i Akötresie? (b) Nemene la itre hnyinge hne së hna troa sa?

⁶ Ame enehila, ke tha öhne kö së hnei lue meke së la itre angela. Ngo Iehova a jëne angatre palahi troa xatua së. Öni Tusi Hmitrötr: “Kola lapa la angela i Iehova xöteithi angete qoue nyidë, me amele angat.” (Salamo 34:7) Pine nemene matre nyipi ewekë troa hetre ka thupë së? Pine laka hetrenyi la itre ithupëjia ka catre kö hu së. Itre drei angatr? Ka xulu angatre qaa ka? Nge nemene la aqane ajolë së hnei angatr? Tro sa pane wange la ewekë ka traqa thupene la hna xupi Adamu me Eva, matre troa sa la itre hnyinge cili.

7. Pine nemene matre Satana a amenune la itre atr?

⁷ Hne së hna wange ngöne lo Mekene 3 laka, hnene la ketre angela hna icilekeu me Akötresie. Angeice fe a  ajane troa musinëne la itre xan. Tusi Hmitrötr a hë angeice ka hape, Diabolo me Satana. (Hna Amaman 12:9) Aja i angeice fe tro la itre atr a icilekeu me Akötresie. Matre hna nyiqane amenu Eva hnei angeic memine la ka ala nyimu. Ngo hetre itre ka mele nyipici koi Akötresie tui Abela, Enoka me Noa.—Heberu 11:4, 5, 7.

8. (a) Hna tune ka hnene la itre xa angela matre itre dremoni pi angatr? (b) Nge nemene la hnei angatre hna kuca matre mele pi angatr?

⁸ Ame ngöne lo hneijine i Noa, hnene la itre xa angela hna icilekeu me Akötresie. Hnei angatre hna uti qa hnengödrai troa mel e celë fen. Pine nemen? Tusi Hmitrötr a qaja ka hape, hnei angatre hna piine la itre jajiny. (E jë la Genese 6:2.) Ngo ka isazikeu memine la hna amekötine hnei Akötresie. (Iuda 6) Hnene la itre matrane la itre angela cili hna ihumuth me akötrëne la itre atr. Celë hi matre hnei Iehova hna apatrenyi angatr hnene la ketre iwë ka tru. Ngo hnei Nyidrëti pe kö hna amelene la itre hlue i Nyidrëti ka nyipici. (Genese 7:17, 23) Ame lo itre angela ka ngazo, hnei angatre hna kötre mele hnengödrai eë. Tusi Hmitrötr a hë angatre ka hape, itre dremoni. E cili, hnei angatre hna xötrethenge Satana, nge Satana la joxu i angatr.—Mataio 9:34.

9. (a) Nemene la hnei Iehova hna kuca kowe la itre dremoni, la angatre a bëeke hnengödrai eë? (b) Nemene la hne së hna troa ce wang ngöne la itre götrane thupen?

⁹ Pine laka hna pi tru hnene la itre dremoni, hna upe trije palua angatre hnei Iehova. (2 Peteru 2:4) Ngacama thatreine hë angatre nyi ngönetrei ne atr, ngo angatre palahi a “amenune la fene hnengödrai asëjëihë.” (Hna Amaman 12:9; 1 Ioane 5:19) Tro sa ce wange la aqane amenune angatre la nöjei atr.—E jë la 2 Korinito 2:11.

10. Nemene la aqane amenune la itre atr hnei itre dremoni?

¹⁰ Nyimu aqane amenune la itre atr hnene la itre dremoni. Tune la itre ka kuci haze laka, angatre a ce tro memine la itre dremoni, ka tune la itre guérisseur me ka ithanata me itre ka mec. Celë hi matre Tusi Hmitrötr a upi së troa kötrene la itre ka kuci haze. (Galatia 5:19-21) Pine nemen? Pine laka, ame la aqane ami thethi ne la ketre öni hnene la ka tra theth, ke ceitune hi lai me itre dremoni, laka aja i angatre tro sa jötre ngöne la itre thethi angatr. Nge e jötre hë së ke, thatre kö së laka, easë pë hë lai a kuca la itre aja i angatr.—Wange ju la Ithuemacany 26.

11. Nemene la kuci haze nge pine nemene matre tro sa kötren?

¹¹ Ame la kuci haze ke, ketre aqane iamenu ne la itre dremoni, jëne la itre men ka iangazo, maine itre trene u ne ta (médium), me perofeta thoi. Angatr a thele la itre ewekë ka traqa koi së elanyi jëne itre ihano, maine lo itre wene bul ver lo hna hape boule de cristal. Maine pena, jëne itre pu maine itre wëtresij. Tune lo troa goeë hnatrapaim. Hna mekune hnei itre atre laka, pëkö engazone lai, ngo hna mecine pe, matre loi e tro sa kötren. Tusi Hmitrötr a amamane ka hape, ame la itre perofeta thoi, ke hna löthi angatr hnene la itre dremoni. Ite Huliwa 16:16-18, a qaja la ketre jajinyi “tene u ne ta.” Ame la Paulo a helëne trije la dremoni qa thene la jajiny, ke pë pi hi mene i angeic.

12. (a) Nemene la ketre aqane amenu së hnene la itre dremoni? (b) Hnauëne laka itre hlue Akötresieti a thipetrije la itre hna majemine kuca göi itre ka mec?

¹² Itre dremoni fe a amenu së me hape, ijije hi tro sa hane ithanata me itre ka mec. Angatre lai a kuca matre tro sa mekun ka hape, ngacama meci hë la atr, ngo ce easë  palahi me angeic, nge atreine hi la ka mec troa xatua së, maine iangazo pena. Tune la kola meci la ketre sinee së, hnene la itre xane hna troa wai guérisseur, maine perofeta thoi (voyant). Ame la itre xa guérisseur, ke qaja pi hi angatr la ketre ewekë ka ej, göne lai atr ka meci hë. Ame itre xan, ke kola amamane koi së ka hape, kolo hi lo sinee së ka mec la ka ithanata. (1 Samuela 28:3-19) Nyimutre la itre ewekë hna majemine kuca, tune la kola feetëne la drai ne mec me itre xa aqane ju kö, ka amamane ka hape, ce easë palahi memine lo ka meci hë. Ame la itre aqane ujë cili, ke hna thipe trij hnene la itre hlue i Akötresie. Celë hi kepin, matre hna qajangazo angatr. Ame koi angatr, e meci hë la atr, ke patre hnyawa ha angeice qaathe së. Thatreine hmaca kö la itre ka mec troa ithanata me easë, maine xatua së, maine iangazo pena. (Salamo 115:17) Haawe, thupëne kö ke trojë së a hane thelejëne troa ithanata me itre ka mec. The tro kö sa hane lö hnine la itre ewekë ka ce tro memine la kuci haze.—E jë la Deuteronomi 18:10, 11; Isaia 8:19.

13. Hapeu, tro pala kö sa xouen la itre dremoni enehila?

¹³ Tha itre dremoni hmekuje kö a amenune la itre atr, ngo angatre fe a axouenyi së. Atre hi Satana me itre dremoni enehila ka hape, “xoxopate pe hi la ijine i nyën”, ke easenyi hë matre apatrenyi angatre pi hnei Akötresie. Celë hi kepine matre kola catrehnine la aqane iangazo i angatre enehila. (Hna Amaman 12:12, 17) Ngo ame pe, ala nyimu hë hnei itre ka tha xou e angatr. Nemene la ka xatua angatr?

14. Tune la angetre Efeso, nemene la aqane tro sa ananyine la itre dremoni?

¹⁴ Tusi Hmitrötr a amamai së la aqane troa ananyine la  itre dremoni, me aqane troa thupë së. Tune la angetre Efeso ekö, qëmekene la tro angatr a itre keresiano, alanyimu la itre ka lö hnine la kuci haze. Ngo nemene la ka xatua angatre troa nuetrije lai? Önine la Tusi Hmitrötr ka hape: “Ala nyimu fe angete nyinyithina a icasikeune la ite tusi angat, me dreuthe tije it’ eje qëmeke ne la nöjei ate asë.” (Itre Huliwa 19:19) Ngo pine laka aja i angatre hë troa nyi hlue i Akötresie, hnei angatre hna dreuthe trij asë la itre itusi ne kuci haze i angatr. Ame enehila, e mekune hë së troa nyihlue i Iehova, loi e tro sa dreuthe trije la nöjei ewekë së ka ce tro memine la kuci haze. Tune la itre itus, me miuzik, me film, me itre elo, me itre iatr, me itre xa ewekë ju kö hne së hna mekune laka pëkö engazon. Ketre tune fe lo itre xa ewekë maine wene drösinöe hna xome trongën nyine thupë së.—1 Korinito 10:21.

15. Nemene la itre xa nyine tro sa kuca matre tro sa cile catre koi Satana me itre dremoni?

¹⁵ Itre macatre thupene la hna dreuthe la itre itusi hnene la angetre Efeso, hnei Paulo aposetolo hna xatua angatr matre “tha tro kö a cil”, troa isi memine “la ite u ka ngazo.” (Efeso 6:12) Ngacama ase hë angatre dreuthe trije la itre itus, ngo tro pala kö itre dremoni lai a thele troa akötrë angatr. Matre nemene la itre xa nyine tro angatr a kuca? Öni Paulo: “Xomejë fe la pete ene la lapaune, mate cate nyipunie troa apine la ite jo ne hazo eë ne la ka ngazo.” (Efeso 6:16) Ame la kola isi ke, tro la petr a thupëne la sooc, tune la lapaun, eje la ka troa thupë së. E ka xecie hnyawa koi së laka tro Iehova a thupë së, tro hë së lai a atreine troa cile catre koi Satana me itre dremoni.—Mataio 17:20.

16. Nemene la aqane tro sa acatrene la lapaune së koi Iehova?

¹⁶ Nemene la aqane tro sa acatrene la lapaune së koi Iehova? Tro sa catre e la Tusi Hmitrötr e nöjei drai. Tro fe sa mejiune laka Akötresieti a thupë së. E catre la lapaune  së koi Iehova, thatreine kö Satana me itre dremoni angeic troa easenyi së.—1 Ioane 5:5.

17. Nemene la nyine tro sa kuca matre tro Iehova a thepe së qaathene la itre dremoni?

¹⁷ Hetre ketre ewekë pala kö nyine tro la angetre Efeso a kuca? Pine laka angatr a mel e hnine la traon ka tiqa hnei haze, öni Paulo koi angatr: “Thithi jë ngöne la nöjei ijin.” (Efeso 6:18, MN ) Tro palahi angatre a sipo ixatua thei Iehova, matre troa thupë angatr. Ketre tu së fe enehila, easa mel e hnine la fene ka kuci haze. Matre catre pi së sipo Iehova troa thupë së. Nge e tro sa thith, ke tro sa qaja la ëje i Iehova. (E jë la Ite Edomë 18:10.) E tro pala hi sa thithi koi Iehova troa thepe së qaathei Satana, ke tro Nyidrëti a kapa la itre sipo së.—Salamo 145:19; Mataio 6:13.

18, 19. (a) Nemene la ka xatua së troa ngaa Satana me itre dremoni? (b) Nemene la hnyinge nyine tro sa ce wange ngöne la mekene thupen?

¹⁸ Xometrije pi la itre ewekë ka ce tro memine la kuci haze. Mejiune ju laka aja i Akötresie troa thupë së me hamë së la atreine troa cile catre koi Satana me itre dremoni. The tro kö sa xoue angatr. (E jë la Iakobo 4:7, 8.) Ka catre kö Iehova hui angatr. Hnei Nyidrëti hna thaipië angatr lo ijine i Noa, nge tro Nyidrëti a apatrene palua angatre elany. (Iuda 6) Mekune hnyawa kö së, laka tha easë casi kö la ka isi me Satana me itre dremoni, ke jëne la itre angela, tro Iehova a thupë së. (2 Ite Joxu 6:15-17) Drei la sa i Iehova? E xecie hnyawa koi së laka Iehova a thupë së, ke ijije hi tro sa ngaa Satana me itre dremoni angeic.—1 Peteru 5:6, 7; 2 Peteru 2:9.

¹⁹ Kolo palahi a elë la iakötrë i Satana me itre dremoni e celë fen, ngo pine nemene laka tha canga apatrenyi angatre kö hnei Akötresie? Tro la mekene thupen a sa la hnyinge cili.