1. Nemene la hna amekötine hnei Akötresie kowe la itre atr?

KA MINGÖMINGE catr la aja i Akötresie kowe la itre atr (wange ju la Ithuemacany 6). Hnei Nyidrëti hna xupi Adamu me Eva lue pane atr, matre troa mele hnine la ketre hlapa ka mingöming. E cili, tro nyidroti a hetre nekönatr me nyi aliene la ihnadro, uti hë la troa paradraiso la fen. Nge tro fe nyidroti a thupëne la itre öni.—Genese 1:28; 2:8, 9, 15.

2. (a) Tro sa atre tune ka laka, tro pala kö a eatr la hnei Akötresieti hna qaja? (b) Thenge la Tusi Hmitrötr, drei la itre ka troa lapane palua la ihnadro?

² Ame koi epun, ke tro kö sa mel e ketre ijin e hnine la paradraiso? Öni Iehova: “Ase hë ni qaja nge tro ni a eatrën’ ej.” (Isaia 46:9-11; 55:11) Ame la hnei Iehova hna qaja, ke tro kö Nyidrëti a eatrën, nge pëkö troa sewe Nyidrë. Öni Iehova ka hape, tha hnei Nyidrëti kö “hna xupe gufane” la ihnadro. (Isaia 45:18) Aja i Nyidrëti troa lapane ej. Itre drei la ka troa lapane ej, nge uti hë eu? Öni Tusi Hmitrötr: “Tro ha la ange ka meköti a hetrenyi la nöj, me lapa palua kö ngön’ ej.”—Salamo 37:29; Hna Amaman 21:3, 4.

3. Nemene jë la hne së hna hnyingëne thel, ngöne la kola wezipo me meci la itre atr?

³ Ame enehila, kola wezipo me meci la itre atr, nge kola isi me itö ihumuth e cailo fen. Tha celë kö lo aja i Akötresieti ekö. Nemene la ewekë ka traqa? Tusi Hmitrötr hmekuje hi la ka atreine troa sa.

4, 5. (a) Drei la ka ithanata koi Eva jëne la un? (b) Hnauëne laka, atrekënö pi la atr ka meköt?

⁴ Tusi Hmitrötr a amamane laka, hna icilekeu me Akötresie hnene la ketre angela “hna hëne ka hape, Diabolo me Satana” (wange ju la Ithuemacany 7). Hnei Satana hna nyi jëne la un, matre troa ithanata me Eva ngöne la hlapa e Edena. (Hna Amamane 12:9; Genese 3:1) Hnei angeice hna kuca lai, matre tro Eva a mekun laka, une la ka ithanata me angeic.

⁵ Hapeu, hnei Akötresieti hna xupi Satana Diabolo? Ohea! Ame la Akötresieti a hnëkëne la ihnadro koi Adamu me Eva, ke tru catre fe la itre angela e koho hnengödrai (wange ju la Ithuemacany 8). Hnene la ketre angela hna saze, thupene lai, Diabolo hë angeic. (Iobu 38:4, 7) Hna tune ka lai? Tro sa pane xome la ketre ceitun. Hnauëne laka atrekënö pi la ketre atr ka meköt? Ame la kola hnaho angeic, ke tha ka atrekënö kö angeic. Ngo ame ngöne la ketre ijin, piine jë hi angeic la ewekë i ketre atr. Angeice pala hi a mekun o drai, uti hë la kola lapane la hni angeic. Ame ju hi ngöne la ketre drai, atrekënö pi hi angeice lo lai ewekë. Haawe, e cili, ketre atrekënö hë angeic.—E jë la Iakobo 1:13-15.

6. Hnauëne laka icilekeu jë la ketre angela me Akötresie?

⁶ Celë hi ka traqa kowe lai angela. Thupene la hna xupi Adamu me Eva, hnei Iehova hna upi nyidro troa hnaho, me “atiqane la i hnadro.” (Genese 1:27, 28) Maine jë hnene lai angela hna mekune ka hape, ka loi tro la itre atr a thili koi angeic. Matre, hnene la hnei angeice hna mekune lapaane, ene pe, pi xome jë hi angeice la hnëqa i Akötresie. Angeic a ajane tro la itre atr a nyihlue i angeic, matre hnei angeic hna thoi, me iaö Eva. (E jë la Genese 3:1-5.) Ame hë e cili, Diabolo nge Satana hë angeic, ke ka icilekeu me Akötresie.

7. (a) Hnauëne laka meci pi Adamu me Eva? (b) Pine nemen matre easa qatre trootro me mec enehila?

 ⁷ Hnei Adamu me Eva hna tha idrei, ngöne la nyidroti a xeni la wene sinöe hna wathebone hnei Iehova. (Genese 2:17; 3:6) Hnei nyidroti hna ena la wathebo me ngazo xajawa i Iehova (wange ju la Ithuemacany 9). Celë hi matre meci la pune koi nyidro, tune lo hnei Iehova hna amekötin. (Genese 3:17-19) Qa ngöne laka ngazo hë la itre nekö i Adamu me Eva, meci fe hë la pune koi angatr. (E jë la Roma 5:12.) Tro sa xome la ketre ceitun. Ame la easa sane la itre gato e hnine la i pala ka hnyiwa nge ka cipa la ketre götran, ke tro asë hi la itre gato a cipa tune lai pala. Celë hi matre, ame la kola tha drei Iehova hnei Adamu, ke atre ka ngazo pi hi angeic. Pine laka itre matra i Adamu së, haawe, tha ka pexeje hë së nge itre atr ka hetre ethan. Celë hi matre easa qatre trootro me mec.—Roma 3:23.

8, 9. (a) Nemene la aqane iaö Adamu me Eva hnei Satana? (b) Pine nemene matre tha humuthe kö Akötresie la itre ka icilekeu me Nyidrë?

⁸ Hnei Satana hna nyiqaane icilekeu me Iehova, ngöne la angeic a uku Adamu me Eva troa tha drei Iehova. Hnei angeice hna sili trenga thoi Iehova. Öni angeice ka hape, hnei Iehova hna thoi koi nyidro. Hnei angeice fe hna jelengazone la aqane musi Nyidrë. Öni angeic, tha Iehova kö a hane hnehengazo nyidro. Satana fe a qaja ka hape, tha nyipiewekë kö la musi Akötresie kowe la itre atr. Angeic fe a qaja ka hape, ijiji Adamu hi me Eva troa sipu atrehmekune la loi me ngazo. Nemene la hnei Iehova hna troa kuca? Maine ju, tro Nyidrëti a humuthe la itre ka icilekeu me Nyidrë. Ngo hapeu, tro kö lai a amamane laka, ka thoi Satana? Ohea.

⁹ Tha hnei Iehova kö hna humuthi nyidro ngöne la ijine cili. Hnei Nyidrëti pe hna nue ijine kowe la itre atr troa ketre sipu musinëne la mele i angatr. Celë hi ka troa  amamane laka, Iehova hmekuje hi la ka atre hnyawa la pengö së, nge ka thoi Satana. Tro pë hë la mekene 11 a qejepengöne hnyawa lai. Haawe, nemene la mekuna së ngöne la aqane axecië mekune i Adamu me Eva? Ka loi kö la hnei nyidroti hna kuca, ngöne la nyidroti a mejiune koi Satana, me tha drei Iehova? Hetrenyi asë hi nyidro la nöjei ewekë qaathei Iehova. Pexeje la mele i nyidro. Ketre, nyidroti a  mele ngöne la ketre götrane ka mingöming, nge tha ka jole kö la huliwa hna ahnithe koi nyidroti hnei Iehova. Ngo ame Satana, pëkö hnei angeice hna hamëne koi nyidro. Maine epuni ju lai, ke nemene la hnei epuni hna troa kuca?

10. Nemene la mekune ka sisitria nyine tro sa isa iën?

¹⁰ Haawe, tui Adamu me Eva, isa qanyi së axecië mekun. Tha tro kö sa wange ahmaloeën, ke ame la pune lai, mel maine mec. Ijije hi tro sa iëne la musi Iehova, me anyipicine laka, ka thoi Satana. Nge ketre, ijije fe hi tro sa iëne troa lapa fene la musi Satana. (Salamo 73:28; e jë la Ite Edomë 27:11.) Xalaithe hi la itre ka drengethenge Akötresie. Nge loi e tro fe sa atre laka, tha Akötresieti kö la ka musinëne la fene celë. Ngo drei kö?

11, 12. (a) Nemene la hnei Satana hna hamë Iesu? Nemene la hna amaman e cili koi së? (b) Nemene la itre xötre ne la Tusi Hmitrötr ka amamane lai?

¹¹ Atre hnyawa hi Iesu la ka musinëne la fen. Ame ngöne la ketre drai, hnei Satana hna “amamai nyidëti la nöjei baselaia asë e celë fen” me hape: “Tro ni a hamë cilie la nöjei ewekë cili, e tro cilieti a kei a thili koi ni.” (Mataio 4:8, 9; Luka 4:5, 6) Pane mekune jë së, laka, maine tha itre ewekë i Satana ju la itre baselaia, hapeu, tro kö angeic a hamëne itre eje koi Iesu? Ohea. Kolo hi a amamane laka, Satana hi la ka musinëne asë itre ej.

¹² Maine jë tro sa isa hnying, ka hape: ‘Hnauëne laka Satana la ka musinëne la fen? Tha Iehova kö la ka xup la nöjei ewekë asë, nge Kapucatinasë?’ (Hna Amamane 4:11) Nyipici laka Iehova la Atre Xupe la nöjei ewekë asë. Ngo hnei Iesu hna qaja hnyawa ka hape, Satana la “tane celë fen.” (Ioane 12:31; 14:30; 16:11) Ketre, hnei Paulo aposetolo hna hë Satana ka hape, “haze ne la fen.” (2 Korinito 4:3, 4) Nge hnei Ioane aposetolo hna cinyihan, ka hape:  “fene hnengödrai asëjëihë a meköle thene la ate ka ngazo.”—1 Ioane 5:19.

13. Pine nemene matre easa ajane la ketre fene ka hnyipixe?

¹³ Kolo pala hi a ngazo catr la fene celë. Nyimutre la itre isi, me itre iangazo, me huliwa thoi me iaö. Itre atre palahi a isa thele la aqane troa nyinyine la itre jole cili, ngo thatreine kö angatr. Easenyi hë matre apatrene pi Akötresie la fene celë, ngöne la ijine isi Amagedo. Nge tro Nyidrëti a acile la fene ka hnyipixe, nge ka meköt.—Hna Amaman 16:14-16; wange ju la Ithuemacany 10.

14. Drei la hnei Iehova hna iën troa joxu ne la Baselaia i Nyidrë? Nemene la hna thingehnaeane hnei Tusi Hmitrötr göi Iesu?

¹⁴ Ase hë Iehova acili Iesu matre troa joxu ne la Baselaia i Nyidrë e koho hnengödrai (wange ju la Ithuemacany 11). Ase hë qaja ekö hnei Tusi Hmitrötr, itre thauzane hë lao macatre, ka hape, Iesu la ka troa “Joxu ne tingeting.” Nge tro la musi cili a cile huti epine palua. (Isaia 9:6, 7) Hnei Iesu hna inine la itretre drei nyidrë troa thithi thatraqane la musi cili. Öni nyidrë: “Epi traqa pi la Baselaia i Cilie. Epi tro fe a eje la aja i Cilie e celë fen tune e koho hnengödrai.” (Mataio 6:10, MN) Tune la hne së hna troa wang ngöne la mekene 8, laka, tro la Baselaia i Akötresie a lepe apatrene la itre musi ne la fen celë. (E jë la Daniela 2:44.) Nge e cili, tro Nyidrëti a acile hmaca la paradraiso ka mingöming e celë fen.

15. Nemene la hna hape, “fene hnengödrai ka hnyipixe”?

¹⁵ Hnei Tusi Hmitrötr hna qaja amë hë, ka hape: “Tro sha treqene la hnengödrai ka hnyipixe memine la fene hnengödrai ka hnyipixe, nge eje la thina ka meköti e cili.” (2 Peteru 3:13; Isaia 65:17) Ame itre xa ijin, Tusi Hmitrötr a xome la hnaewekë hna hape, “fene hnengödrai.” Kolo hi  lai a qaja la itre atr ka mel e celë fen. (Genese 11:1) Celë hi matre ame la kola qaja la “fene hnengödrai ka hnyipixe” ka meköt, ke kola qaja la itre atr ka drengethenge Akötresie, nge ka kapa la manathithi qaathei Nyidrë.

16. (a) Nemene la ahnahna ka tru hna troa kapa hnene la itre atr ka troa mel e hnine la fen ka hnyipixe? (b) Nemene la nyine tro sa kuca matre troa hane kapa la ahnahna cili?

¹⁶ Hnei Iesu hna thingehnaean laka, ame ngöne la fene ka hnyipixe, tro la itre atr a kapa la “mele ka tha ase palua kö.” (Mareko 10:30) Nemene la nyine tro sa kuca matre troa kapa la ahnahna cili? E jë la Ioane 3:16 me Ioane 17:3, matre troa sa la hnying. Tro sa ce wang la hna qaja hnei Tusi Hmitrötr, göne la mel e hnine la Paradraiso e celë fen.

17, 18. Pine nemene matre qaja jë së ka hape, tro ha tingeting me lapa xetietë elanyi e celë fen?

¹⁷ Pëhë iangazo, pëhë isi, pëhë ihumuth nge pëhë iakötrë. Pëhë atr ka ngazo thina. (Salamo 37:10, 11) Hnei Akötresieti hna qaja ka hape, “Kola nyi pune la ite isi.” (Salamo 46:9; Isaia 2:4) Tro la itre ka hnimi Akötresie me ka drengethenge Nyidrëti a nyi aliene la ihnadro, nge tro ha tingetinge uti hë epine palua.—Salamo 72:7.

¹⁸ Lapa xetietë hë la nöjei atr. Ame la angetre Isaraela ekö ka drengethenge Akötresie, ke angatre a lapa xetietë pine laka Nyidrëti a thupë angatr. (Levitiko 25:18, 19) Ame e hnine la paradraiso elany, tha tro hmaca kö sa xou, ke tingetinge hë la fen!—E jë la Isaia 32:18; Mika 4:4.

19. Pine nemene matre xecie koi së laka , troa mana la xen?

¹⁹ Tro ha mana la xen. “Loi e eje la qite ka nyimute ngöne la nöj”, me “hune la hene la ite wet.” (Salamo 72:16) Tro Iehova, “Akötresi së a amanathithi së”, nge “troa hamëne la xen hnene la i hnadro.”—Salamo 67:6.

20. Tro sa atre tune kaa laka tro ha paradraiso la fene celë?

²⁰ Tro ha paradraiso la fen asëjëihë. Tro hë la itre atr a hetrenyi la itre uma me hlapa ka mingöming. (E jë la Isaia 65:21-24; Hna Amaman 11:18.) Tro ha mingöminge la  ihnadro, tune lo hlapa ekö e Edena. Tro Iehova a hamë së la nöjei ewekë hne së hna ajan, thatraqane la mele së. Tusi Hmitrötr a qeje Nyidrëti ka hape: “Cilieti a sathe la iwanakoime i cilie, me amejine la ite ewekë ka mele asëjëihë.”—Salamo 145:16.

21. Tro sa atre tune ka laka tro ha ce mel la itre atr memine la itre öni?

²¹ Tro ha ce mel la itre atr me itre öni. Pë hmaca kö öni ka ses. Goi tro fe la itre nekönatr a elo memine la itre öni.—E jë la Isaia 11:6-9; 65:25.

22. Nemene la hnei Iesu hna troa kuca kowe la itre ka wezipo ?

²² Pë hmaca kö atr ka wezipo. Ame lo Iesu e celë fen, hnei nyidrëti hna aloin la meci ne la itre atr ka ala nyimu. (Mataio 9:35; Mareko 1:40-42; Ioane 5:5-9) Ngo ame ngöne la nyidrëti ha joxu ne la Baselaia i Akötresie, tro nyidrëti a aloin la itre meci ne la nöjei atr asë. Pë hmaca kö ka troa qaja ka hape: “Ini a mec.”—Isaia 33:24; 35:5, 6.

23. Nemene la hna thingehnaeane hnei Akötresie göne la itre ka mec?

²³ Mele hmaca ha lo itre ka mec. Hnei Akötresieti hna thingehnaeane ka hape, tro Nyidrëti a amelene hmaca la itre milio lao atr ka mec, nge tro hë angatre a mele epine palua. “Tro ha mele hmaca la nöjei ka meköt, me ka tha meköti kö.”—E jë la Ioane 5:28, 29; Itre Huliwa 24:15.

24. Hapeu, aja i epuni kö troa hane mel e hnine la paradraiso? Pine nemen?

²⁴ Isa iëne jë pë hë së. Tro sa inine troa atrepengöi Iehova, me kuca la aja i Nyidrë, maine pena, tro sa isa kuci mekun. Maine tro sa iëne troa kuca la aja i Iehova, tro hë sa hetrenyi la ketre mel ka loi elany. Hnene la ketre trahmany hna sipo Iesu troa meku angeic ngöne la Nyidrëti a mele hmaca. Hnei Iesu hna thingehnaean koi angeic ka hape: “Tro eö a ce me ini ngöne la paradraiso.” (Luka 23:43) Nyimutre pala kö la itre ewekë hnei Iesu hna melën, ngo tro pë hë sa ce wang ngöne la itre mekene thupen. Tro fe sa wang e cili la aqane tro Iesu a eatrëne la itre hnei Akötresieti hna thingehnaean ka mingöming.