1. Drei la ka hamë së la mel?

IEHOVA la “Akötesie ka shewengönie [ka mel].” (Ieremia 10:10) Nyidrëti la ka Xupi së nge ka hamë së la mel. Tusi Hmitrötr a qaja ka hape: “Ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.” (Hna Amamane 4:11) Easa mel, pine laka aja i Iehova, matre ame la mele së, ketre ahnahna ka sisitria qaathei Akötresie.—E jë la Salamo 36:9.

2. Nemene la nyine tro sa kuca matre troa tro loi la mele së?

² Iehova a hamë së la ka ijije nyine tro sa mel, tune la xen me nyine ij. (Itre Huliwa 17:28) Ngo Nyidrëti fe a ajane tro sa madrin. (Itre Huliwa 14:15-17) Troa tro loi la mele së e hne së hna xötrethenge hnyawa la itre wathebo i Nyidrë.—Isaia 48:17, 18.

3. Nemene la thangane koi Kaina thupene la hna humuthi Abela?

³ Tusi Hmitrötr a amamane laka, ka nyipiewekë catre la mele së koi Iehova. Tro sa xome la ketre ceitun. Hnei Kaina lo pane neköi Adamu me Eva, hna elëhni koi Abela, jini angeic. Hnei Iehova hna hmekë Kaina troa xomehnöthe la elëhni angeic. Ngo tha drei Nyidrëti kö hnei Kaina. “Ame hnei Kaina hna mejë koi Abela jini angeic, me humuthi angeic.” (Genese 4:3-8) Matre hnei Iehova hna eji Kaina. (Genese 4:9-11) Ngazo catre la troa elëhni me imethinë ke, ka upi së troa ihumuth, nge ka troa thinge jë së kowe la mele ka tha ase palua kö. (E jë la 1 Ioane 3:15.) Aja i Iehova tro sa hnime la nöjei atr.—1 Ioane 3:11, 12.

4. Nemene la hna ini së hnene la wathebo göi humu atr?

 ⁴ Itre thauzane lao macatre thupen, hnei Iehova hna hamë Mose la treene lao wathebo. Hna qaja ngöne la ketre wathebo ka hape: “The tro kö eö a ihumuth.” (Deuteronomi 5:17) Ame la ka humu atr tre, tro fe a humuthi angeic.

5. Nemene la mekuna i Iehova göi thi upune?

⁵ Nemene la mekuna i Akötresie göi thi upune? Ame koi Iehova tre, ka tru koi Nyidrëti la mele ne la nekönatr e kuhu hni thin. Iehova a qaja e hnine la ketre wathebo koi angetre Isaraela ka hape, e troa eatre la föe ka upune nge meci pi hi la medreng e kuhu hni, ke troa humuthe lai atrekë zön. (E jë la Esodo 21:22, 23; Salamo 127:3.) Kola amamane koi së laka, ame la thi upune tre, ewekë ka ngazo catre qëmeke i Iehova.—Wange ju la Ithuemacany 28.

6, 7. Nemene la aqane tro sa amamane koi Iehova laka, ka nyipiewekë catre la mel koi së?

⁶ Nemene la aqane tro sa amamane koi Iehova laka, ka nyipiewekë catre la mele së, me itre xan? Tro sa hmekën, wanga eatre jë itre xan. Ka tune la ufi sixa, maine xomi dorog. Ame la ufi sixa me xomi dorog tre, ka angazone la mele së, nge hna mecin.

⁷ Iehova la ka xupe la ngönetrei së me hamëne koi së la mel. Matre tro sa metrötrëne thenge la aja i Nyidrë. Tro sa nyihnyawane la ngönetrei së, matre tro palahi sa hmitrötr qëmeke i Iehova. (Roma 6:19; 12:1; 2 Korinito 7:1) E tha hne së kö hna nyipiewekëne la mel, ke tha ijiji së kö troa nyihlue i Iehova. Tha ka hmaloi kö troa nue la itre hna majemin, ngo e hne së pala hi hna wangatrune la mel, ke tro Iehova a xatua së.

8. Nemene la aqane tro sa hmekën matre tha tro kö a eatre la itre xan?

⁸ Hne së lo hna wange laka, ame la mel tre, ketre ahnahna ka nyipiewekë catr. Nge mejiune hi Iehova laka, tro palahi sa hmekën wanga eatre jë së, me itre xan. Tune la  easa xomi loto maine ti moto laka, tro pala hi sa hmek. Tha easë fe kö a hane kuca lo itre elo ka catr nge hna mecin. (Salamo 11:5) Easa hmekëne ngöne la hnalapa së, wanga eatre jë itre xan. Hnei Iehova hna amekötine kowe la angetre Isaraela ka hape: “Maine eö a xupi uma ka hnyipixe tro eö a nyi öline [eköhagen] fe xöteithe la uma i ’ö e koho.”—Deuteronomi 22:8.

9. Nemene la aqane tro fe sa metrötrëne la itre öni?

⁹ Ka tru fe koi Iehova la mele ne la itre öni. Tro hi a humuthe nyine öni, maine pena la kola troa heji së maine thinyi së. (Genese 3:21; 9:3; Esodo 21:28) Tha hna nue së kö troa qanangazone itre ej, maine pena troa humuthe menune itre ej.—Ite Edomë 12:10.

10. Easa atre tune ka laka, ame la madra tre, hatrene hi la mel?

¹⁰ Ka hmitrötre la madra koi Iehova, ke celë hi ka nyihatrene la mel. Thupene la hna humuthi Abela hnei Kaina, öni Iehova koi angeic: “Kola teije la madra ne la jini ’ö koi ni qa kuhu hnadro.” (Genese 4:10) Hna nyihatrene la mele i Abela hnene la madra i angeic. Hnei Iehova hna eji Kaina pine humuthi Abela. Thupene lo Iwë Atraqatr, hnei Nyidrëti hmaca hna amexeje ka hape, ame la madra tre, hatrene hi la mel. Öni Iehova koi Noa me hnepe lapa i angeice ka hape: “Tro ha nune [nyine] öni nyipunie la ite öni asë ka tro agö ka mel, asesë hë ni hamëne koi nyipunie tune lo ite sinöe ka lapalapa ka hate.” Ngo hnei Iehova hna ahnithe hnyawa koi angatre ka hape: “Ngo ame la ijöne memine la mele ne ej, ene la madra ne ej’, te, the tro kö nyipunie a öni.”—Genese 1:29; 9:3, 4; wange ju la Ithuemacany 17.

11. Nemene la wathebo göi madra hna hamëne hnei Akötresie, koi angetre Isaraela?

¹¹ Eitre hadredre lao macatre thupene la hnei Iehova  hna qaja koi Noa ka hape, tha tro kö a öni madra, hnei Nyidrëti hmaca hna amexeje koi angetre Isaraela ka hape: “Nge ame la ate Isaraela, maine ate ne kete nöj’ a lapa tenyiwa thei nyipunie, troa hnö öni ne hnit, maine öni ka sheshë nune öni, te, tro angeic’ a anenine la madra ne ej me kelem’ eje hnei dro.” Öni Nyidrëti hmaca jë: “The trojë kö nyipunie a öni madra.” (Levitiko 17:13, 14) Aja i Iehova palahi enehila tro la itre hlue i Nyidrëti a metrötrëne la madra. Tro hi angatr a öni la mitr, ngo tha madra fe kö. E tro angatre a humuthe la ketre öni, loi e troa pane anenine la madra e kuhu hnadro, me kelem.

12. Tune ka la aqane ahmitrötrëne la madra hnene la itre Keresiano ekö?

¹² Itre macatre thupene la hna meci hnei Iesu, hnene la itre aposetolo me itre qatre thup ne la ekalesia e Ierusalema hna icasikeu. Hnei angatre hna ce axeciën ka hape, nemene la itre wathebo hna hamëne ekö kowe la angetre Isaraela, nyine troa xötrethenge hnene la itre Keresiano. (E jë la Itre Huliwa 15:28, 29; 21:25.) Hnei Iehova hna xatua angatr troa trotrohnine laka, ka hmitrötre palahi la madra koi Nyidrë, nge tro fe la itre Keresiano a ahmitrötrën. Ame ngöne la ijine cili, tha ka öni madra kö la itre Keresiano, maine iji pena. Ketre tha angatre kö a öni la mitr tha hna aneni madrane kö. Ceitune hi la öni madra me thili koi idrola, kuci ngazo me nyi xetë, ka ngazo asë hi. Hnene palahi la itre Keresiano ekö hna thipëne troa öni la madra, maine iji pena. Tune ka fe enehila? Aja i Iehova palahi tro sa ahmitrötrëne la madra.

13. Pine nemene matre tha itre Keresiano kö a xomi madra?

¹³ Kolo kö lai a hape, tro la itre Keresiano a thipëne la kola hamë madra jëne none? Eje hi. Iehova a amekötine koi së laka, tha tro kö a öni la madra, maine iji pena. Maine tro la ketre droketre a wathebo epuni troa iji kahaitr ke, hapeu, tro kö epuni a xome la kahaitr jëne none? Ohea.  Ketre tune fe, maine hne së hna thipëne troa öni madra maine iji ke, tha tro kö së lai a xome pena jëne la itre none.—Wange ju la Ithuemacany 29.

14, 15. (a) Nemene la aqane metrötrëne la mel hnene la itre Keresiano? (b) Nemene la ka nyipiewekë koi angatr: troa drei Akötresie maine thele troa mel aqeany? Qeje pengöne jë.

¹⁴ Tune ka e tro la ketre droketre a qaja ka hape, tro epuni lai a mec e xele kö epuni ma xomi madra? Isa qanyi së kö troa axecië mekun ka hape, tro kö sa drengethenge la wathebo i Akötresie göi madra, maine ohea. Ka tru la metrötre ne la itre Keresiano kowe la mel, ahnahna i Akötresie. Celë hi kepine matre angatr a thele la itre xa jëne troa nyinyine la itre meci angatr, ngo ame göi xomi madra ke, tha angatre kö a kapa.

¹⁵ Eahuni a hmekëne matre tha tro kö huni a wezipo. Ngo tha eahuni kö a xomi madra, pine laka ame la madra, ke hatrene hi la mel, nge ka hmitrötre koi Akötresie. Nyipiewekë koi huni troa drengethenge Iehova, hune la troa thele la aqane mele aqeany, maine sasaithe la itre wathebo i Nyidrë. Öni Iesu: “Ke ame la ate pi amelene la mele i angeic, te, tro ha pate lai, ngo ame la ate nue la mele i angeice pi ini, te, tro ha hetenyi lai.” (Mataio 16:25) Eahuni a drengethenge Iehova hnene la ihnimi huni koi Nyidrë. Xecie koi huni laka, atre hnyawa kö Nyidrëti la ewekë ka loi koi hun. Matre eahuni a nyitipu Nyidrë troa nyipiewekëne la mel, me ahmitrötrën.—Heberu 11:6.

16. Pine nemene matre itre hlue i Akötresieti a drengethenge Nyidrë göi madra?

¹⁶ Itre hlue i Akötresie a ajane troa drengethenge hnyawa la wathebo göi madra. Tha angatre kö a öni maine iji pena, me hane xome la madra nyine aloine la itre mec. *  Eje hi laka ka tru koi angatre la mel. Celë hi kepine matre angatre a kapa la itre xa drösinöe, ngo tha madra fe kö. Iehova la ka hamëne la mel memine la madra, nge atre kö Nyidrëti la ka loi koi së. Hapeu, xecie fe kö koi epuni laka Nyidrëti hi la ka atreine aloine la itre mec?

17. Ame ekö e Isaraela, nemene hmekuje hi la hna amekötin hnei Iehova göi madra?

¹⁷ Hna qaja ngöne la wathebo i Mose kowe la angetre Isaraela ka hape: “Ke mele ne la ngönetei la madra, nge hnenge hna hamën’ eje koi nyipunie hune la ita ne huje mate nyi thupene mele i nyipunie, ke qâ ne la madra troa nyi thupene mele ne la at.” (Levitiko 17:11) Ame ngöne lo angetre Isaraela a ietrane ekö la itre ngazo i angatr, ke tro angatr a huujëne la ketre öni koi Iehova. Nge tro la atre huuj a anenine la madra ne la öni, e hune la ita ne huuj. E cili hmekuje hi la hnei Iehova hna amekötine koi angetre Isaraela la aqane troa huliwane la madra.

18. Nemene la hna aijijëne koi së hnene la huuje i Iesu?

¹⁸ Hnene la huuje i Iesu hna nyipune la wathebo göne la itre öni hna huujën. Hna tune ka? Hnei nyidrëti hna hamëne la mele maine madra i nyidrë, nyine huuje matre troa sengetrije la itre ngazo së. (Mataio 20:28; Heberu 10:1) Sisitria catre kö la mele i Iesu hune la itre öni hna huujën, ke hnei Iehova hna amele nyidrëti hmaca. Nge jëne la huuje i nyidrë, ijiji së hë itre atr, troa mele epine palua.—Ioane 3:16; Heberu 9:11, 12; 1 Peteru 1:18, 19.

19. Nemene la nyine tro sa kuca matre “gufa kö së ene la madra ne la nöjei ate asë”?

¹⁹ Hnei Iehova hna hamë së la mel, matre hetre hni ne ole së kowe la ahnahna ka tru cili. Easa ajane troa qaja  koi itre atr ka hape, e tro angatre a lapaune koi Iesu, ke ijiji angatre fe troa hane mele epine palua. Easa hnime la itre xa atr, matre easa kuca asë la hne së hna atreine troa ini angatr, la aqane troa hetrenyi la mele ka tha ase palua kö. (Ezekiela 3:17-21) Matre tui Paulo aposetolo, ijije tro sa hane qaja ka hape: “Gufa kö ni ene la madra ne la nöjei ate asë. Ke pëkö hnenge hna juetëne la nöjei hna mekuatin’[mekune] asë hnei Akötesie.” (Itre Huliwa 20:26, 27) Qeje Iehova jë së kowe la itre xan, me amamai angatre ka hape, ka tru aliene la mel koi Nyidrë. Easë hi lai a amamane laka, hetre metrötre së kowe la mele memine la madra.