1. Nemene la hnei epuni hna atre, ngöne la epuni a inine la itre trenge nyipici qa hnine la Tusi Hmitrötr?

AME la epuni a inine la itusi celë, epuni hi lai a atre la itre trenge nyipici ne la Tusi Hmitrötr. Tune la nyipici göne la itre ka mec, göi mele hmaca, me göi mejiun kowe la mele ka tha ase palua kö. (Ate Cainöj 9:5; Luka 23:43; Ioane 5:28, 29; Hna Amaman 21:3, 4) Maine jë hnei epuni hë hna hane sine la itre icasikeu ne la Itretre Anyipici Iehova, nge epuni a öhne laka ma angatre hi ngöne la nyipi hmi. (Ioane 13:35) Ketre, epuni ha nyiqane eköthe la aqane imelekeu i epuni me Iehova, nge aja i epuni hë troa nyihlue i  Nyidrë. Ngo epuni a pane hnyinge ka hape, ‘Nemene jë la nyine tro ni a kuca matre troa nyihlue i Akötresie?’

2. Pine nemene matre ajane jë la atre Aithiope troa xomi bapataiso?

² Ame ngöne lo hneijine i Iesu, hnene la ketre atre Aithiope hna hnyingëne la nyine tro angeic a kuca matre troa nyihlue i Akötresie. Thupene lo hna amele Iesu hmaca, hnei Filipo, ketre atre drei Iesu, hna cainöj kowe lo lai atre Aithiope me anyipicine laka, Iesu hi la Mesia. Hna ketre hnyawa la hni ne la atre Aithiope matre canga öni angeice jë hi: “Hana lola tim, hape u, ngazo troa bapataiso ni?”—Itre Huliwa 8:26-36.

3. (a) Nemene la hnei Iesu hna amekötine kowe la itretre drei nyidrë? (b) Nge nemene la aqane troa xomi bapataiso?

³ Tusi Hmitrötr a qaja hnyawa ka hape, maine epuni a ajane troa nyihlue i Iehova, nyipiewekë tro epuni a xomi bapataiso. Hnei Iesu hna amekötin me upe la itretre drei nyidrë ka hape: “Tro jë nyipunie a inine la nöjei nöj’ asëjëihë, me bapataiso angate.” (Mataio 28:19) Iesu a amamai tulu ngöne la nyidrëti a xomi bapataiso. Tha hna xölane kö la he i nyidrë hnei wamine tim, ngo hna lö asë la ngönetrei nyidrë hnine la tim. (Mataio 3:16) Ame ngöne la kola xomi bapataiso hnene la ketre Keresiano, ke troa hetine la ngönetrei angeic me alöne asë e hnine la tim.

4. Nemene la hna amamane ngöne la easa xomi bapataiso?

⁴ Ame la easa xomi bapataiso ke, easë hi lai a amamane kowe la nöjei atr ka hape, easa ajane troa ce sinee me Akötresie, me nyihlue i Nyidrë. (Salamo 40:7, 8) Maine jë tro epuni a hnying ka hape, ‘Nemene la nyine tro ni a kuca matre troa xomi bapataiso?’

5. (a) Nemene la nyine tro epuni a kuca qëmekene troa xomi bapataiso? (b) Nge pine nemene matre ka nyipiewekë catre la itre icasikeu?

⁵ Qëmekene tro epuni a xomi bapataiso, loi e tro epuni  a atre Iehova hnyawa me Iesu. Epuni a trotrohnine lai, qa ngöne la hnei epuni hna ini Tusi Hmitrötr. (E jë la Ioane 17:3.) Ngo tha tro kö a hmaca e cili ke, Tusi Hmitrötr a qejepengöne ka hape, “matre tiqa nyipunie hnene la trotrohnine la aja i nyidrë me wangate hmekun.” (Kolose 1:9) Nge tro fe la itre icasikeu ne la Itretre Anyipici Iehova, a xatua epuni troa acatrene la aqane imelekeu i epuni me Iehova. Celë hi kepine matre nyipiewekë catr troa sine lapane la itre icasikeu.—Heberu 10:24, 25.

6. Qëmekene tro epuni a xomi bapataiso, nemene la itre ini ne la Tusi Hmitrötr nyine tro epuni a pane atre?

⁶ Ame koi Iehova, tha nyipiewekë kö tro sa atre asë la Tusi Hmitrötr, matre troa xomi bapataiso. Tha hnei Nyidrëti kö hna treqene tro la atre Aithiope a atre asë la Tusi Hmitrötr, matre troa xomi bapataiso. (Itre Huliwa 8:30, 31) Eje hi laka, tha tro jë kö së lai a atre asë la itre pengöi Akötresie. (Ate Cainöj 3:11) Matre ame la ka nyipiewekë qëmekene troa xomi bapataiso, tre, troa pane atre hnyawa, me kapa la itre trepene ini ne la Tusi Hmitrötr.—Heberu 5:12.

7. Nemene la aqane xatua epuni hnene la ini Tusi Hmitrötr?

⁷ Tusi Hmitrötr a qaja ka hape: “Ngo tha’teine kö troa amadi nyidrë e pëkö lapaun.” (Heberu 11:6) Matre nyipiewekë tro epuni a pane hetrenyi la lapaune koi Akötresie, qëmekene troa xomi bapataiso. Tune la angetre Korinito, thupene la hna ini angatr hnene la itretre drei Iesu, hnei itre xan e angatr “hna denge me lapaun, nge hna bapataison.” (Itre Huliwa 18:8) Ketre tune mina fe, hnene la ini Tusi Hmitrötr hna xatua epuni troa lapaune kowe la itre hna thingehnaeane hnei Akötresie. Hna aijijë epuni fe troa lapaune kowe la mel hnei Iesu hna huujën, ka troa thepe epuni qa ngöne la ngazo me mec.—Iosua 23:14; Itre Huliwa 4:12; 2 Timoteo 3:16, 17.

8. Tro epuni a hetre aja tune ka troa ce thawa me itre xan la hnei epuni hna inin?

⁸ Maine tro epuni a inine hnyawa la Tusi Hmitrötr, tro hë epuni lai a öhne la eloin, nge troa kökötre la lapaune i epun. E cili, tro ha hetre aja i epuni troa ce thawa me itre xan la hnei epuni hna inin. (Ieremia 20:9; 2 Korinito 4:13) Ngo tro epuni a ce thawa me drei la itre ini hnei epuni hna kapa?

9, 10. (a) Tro epuni a ce thawa me drei la itre hnei epuni hna inin? (b) Nemene la nyine tro epuni a kuca, e aja i epuni hë troa ce cainöje trootro memine la ekalesia?

⁹ Maine jë epuni a ajane troa ce thawa la hnei epuni hna inine memine la itre atrene la hnepe lapa i epun, me itre sine huliwa me itre ka lapa easenyi epun. Pëkö engazon, ngo kuca jë cememine la menyik me ipië. Nge e thupen, tro hë epuni lai a ajane troa ce cainöje trootro memine la ekalesia. E drenge hë epuni la aja e kuhu hni epun, qaja jë hë kowe la ka ini tusi me epun. Nge e öhne hë angeice laka, epuni a mele thenge la itre trepene meköti ne la Tusi Hmitrötr, tro epone lai a ce wange la lue qatre thup ne la ekalesia.

¹⁰ Nemene la aliene la troa wange la lue qatre thup? Tro nyidroti a ce wang ka hape, trotrohnine hë epun me mejiun kowe la itre ini qa hnine la Tusi Hmitrötr. Nyidroti fe a troa ce wange me epun laka, epuni kö a xötrethenge la hna qaja hnei Tusi Hmitrötr, nge aja i epuni hë troa hane Atre Anyipici Iehova. The cile kö troa qaja kowe la itre qatre thup la mekuna i epun. The thëthëhmine kö laka, hnëqa i angatr troa thupëne la itre atrene la ekalesia me epuni fe. (Itre Huliwa 20:28; 1 Peteru 5:2, 3) Thupene la hnei epuni hna ce ithanata, tro nyidroti a thuemacanyi epun laka, ijiji epuni hë maine ohea, troa ce cainöje trootro memine la ekalesia.

11. Pine nemene matre ka nyipiewekë catr la itre qatre thup a qaja ka hape, hetre nyine tro pala kö a saze ngöne la mele i epun?

 ¹¹ Maine jë tro la itre qatre thup a qejepengöne laka, hetre itre nyine tro pala kö a saze ngöne la mele i epun, qëmekene troa cainöje trootro memine la ekalesia. Pine nemene matre ka nyipiewekë catre lai? Pine laka, ame la easa qeje Iehova koi itre xan ke, easë hi lai a nyitrengewekë i Nyidrë. Matre loi e tro pala hi sa atrunyi Nyidrë.—1 Korinito 6:9, 10; Galatia 5:19-21.

12. Pine nemene matre nyipiewekë tro epuni a ietra?

¹² Hetre ketre ewekë pala kö nyine tro epuni a kuca qëmekene troa xomi bapataiso. Hnei Peteru aposetolo hna qaja ka hape: “Qa ngöne lai ietraju nyipunie, me ujëjë mate troa köle tije; la nöjei ngazo i nyipunie.” (Itre Huliwa 3:19) Nemene la aliene la hna hape, “ietraju”? Kola hape, troa hetrenyi la hleuhleu e kuhu hni së pine la itre ewekë ka ngazo hne së hna kuca. Maine hnei epuni hna kuca la ketre ewekë ka ngazo, tune la nyixetë, loi e tro epuni a ietra. Ngacama hnei epuni palahi hna thele troa kuca la loi, ngo tro pala kö epuni a ietra. Nyipici itre atr ka tha pexeje kö së, matre tro palahi sa sipo Akötresie troa nuetrije la itre ngazo së.—Roma 3:23; 5:12.

13. Kola hapeu la hna qaja ka hape, “ujëjë”?

¹³ Hapeu, tro hmekuje hi epuni a ietrane la itre ngazo hnei epuni hna kuca? Ohea. Peteru a qaja ka hape, “ujëjë.” Kola qaja ka hape, tro sa nuetrije la itre aqane ujë së ka ngazo me kuca la loi. Tro sa xome la ketre ceitun: Epuni a xötrei trongëne la ketre götran. Öhne jë hi epun laka, triane hë epuni la gojeny. Tro epuni a kuci nemen? Maine jë, tro epuni a tro hmidra, me cil, me “ujë,” kolo lai a hape, tro epuni a bëeke hmaca me xötrëne la nyipi gojeny. Ceitune hi lai memine la epuni a ini Tusi Hmitrötr laka, tro epuni a trotrohnine la itre ewekë nyine saze ngöne la mele  i epun me itre hna majemine ka ngazo. Canga “ujëjë”, kola hape, saze pi la aqane mele i epun, nge thele jë troa kuca la loi.

14. Kola hapeu la hna qaja ka hape, “sa xepu koi Iehova”?

¹⁴ Hetre ketre ewekë nyine tro epuni a kuca qëmekene troa xomi bapataiso, tro epuni a sa xepu koi Iehova. Ame la epuni a sa xepu koi Akötresie, epuni hi lai a qaja xeciëne jëne la thith ka hape, Nyidrëti hmekuje hi la hnei epuni hna troa thili kow me nyihluen ngöne la mele i epun.—Deuteronomi 6:15.

15, 16. Nemene la ka upi epuni troa sa xepu koi Iehova?

¹⁵ Ame la easa qaja xeciëne ka hape, Iehova hmekuje hi la nyine tro sa nyihluen tre, ka ceitune hi lai memine la easa qaja kowe la ketre atr hne së hna hnim ka hape, angeice casi hi la hne së hna troa ce mele memin, uti hë la pun. Tro sa xome la ketre ceitun: Ka catre la ihnimi ne la ketre trahmanyi kowe la ketre föe. E tro la trahmanyi a thele troa atre hnyawa la föe, tro hë lai a acatrene la ihnimi angeice kowe la föe nge aja i angeice hë troa faipoipo memine la föe. Ketre mekune lai ka sisitria catr. Pine laka tru hë la ihnimi trahmanyi kowe la föe, haawe ijiji angeice hë troa kapa la itre hnëqa e hnine la faipoipo.

¹⁶ Ame la epuni a atre Iehova hnyawa ke, tro hë epuni lai a hnime catrë Nyidrë, nge tro ha kökötre la aqane imelekeu i epuni me Nyidrë. Celë hi ka upi epuni troa sa xepu koi Iehova jëne la thith. Tusi Hmitrötr a qaja ka hape, ame la atr ka ajane troa xötrethenge Iesu, tre, tro angeic “a xele angeice kö.” (Mareko 8:34) Kolo lai a hape, ame la troa drengethenge Iehova, ke celë hi ka nyipiewekë ngöne la mele së. Kolo fe a hape, sisitria catre kö la aja i Iehova hune la itre sipu aja së me itre hne së hna thel.—E jë la 1 Peteru 4:2.

17. Pine nemene matre tha sa xepu kö itre xan koi Iehova?

¹⁷ Hetre itre xa atr ka cile troa sa xepu koi Iehova. Angatr a xouene laka, ma thatreine kö angatr eatrëne la hna sisiny, nge xele kö angatr troa ahleuhleunyi Nyidrë. Maine pena, angatr a mekune laka, e traqa ju angatre tria, ke, tro Akötresieti a upe zö angatr.

18. Nemene la ka xatua epuni troa amadrinë Iehova?

¹⁸ Tro la ihnimi epuni koi Iehova a xatua epuni troa amadrinë Nyidrë ngacama traqa ju hë la itre jol. Nge ijiji epuni hë troa eatrëne la hna sa xepu. (Ate Cainöj 5:4; Kolose 1:10) Tha tro kö epuni a mekune laka, ka jole troa kuca la aja i Iehova. Hnei Ioane aposetolo hna cinyihane ka hape: “Ke dei lola aja koi Akötesie, laka eësha denge thenge la ite wathebo i nyidë; nge tha hace kö la ite wathebo i Nyidë.”—1 Ioane 5:3.

19. Pine nemene matre tha tro kö epuni a xou troa sa xepu koi Iehova?

¹⁹ Ame koi Iehova, tha nyipiewekë kö tro epuni a pexej matre troa sa xepu koi Nyidrë. Tha tro kö Nyidrëti a thele the së la hne së hna thatreine kuca. (Salamo 103:14) Tro kö Nyidrëti a xatua epuni troa kuca la loi. (Isaia 41:10) Maine tro epuni a catre lapaune koi Nyidrë, “tro pena nyidëti a amekötine la ite jë i epun.”—Ite Edomë 3:5, 6.

20. Nemene la hnei epuni hna troa kuca e ase hë epuni sa xepu koi Iehova?

²⁰ Hapeu, hnëkë hë epuni troa sa xepu koi Iehova? E ase hë epuni sa xepu koi Iehova, ijiji epuni hë troa xomi bapataiso.

21, 22. Nemene la aqane tro epuni a “qaja amamane” la lapaune i epun?

²¹ Maine ase hë epuni sa xepu koi Iehova, nge aja i epuni hë troa xomi bapataiso, qaja jë kowe la qatre thup  kordinatör ne la ekalesia. Tro nyidrëti a upe la itre qatre thup troa ce wange me epuni la itre trepene meköt qa hnine la Tusi Hmitrötr. Nge e mama ha koi angatr laka ijiji epuni hë troa xomi bapataiso, tro angatr a thuemacanyi epuni laka, tro ha bapataiso epuni ngöne la Asabele ne la Itretre Anyipici Iehova ka troa xulu. Ame ngöne la Asabele, tro la ketre cainöj a qejepengöne la aliene la bapataiso. Tro la atre ka cile fë cainöj a hamëne la lue hnyinge ka hmaloi kowe la itre  ka troa xomi bapataiso. Ame la epuni a sa la lue hnyinge cili, tre, epuni hi lai a “ukeineqë” [qaja amamane] la lapaune i epun.—Roma 10:10.

²² Thupene lai, kola bapataiso epun. Tro hë lai a hetine asë la ngönetrei epuni e kuhu hnine la tim. Ame la epuni a xomi bapataiso, tre, epuni hi lai a amamane koi nöjei atr  laka, ase hë epuni sa xepu koi Iehova. E cili, ketre Atre Anyipici Iehova hë epun.

23. Nemene la aliene la kola hape, troa bapataiso “kowe la atesiwa i Tetetro, me Hupuna, me uati hmitöt”?

²³ Hnei Iesu hna qaja ka hape, tro ha bapataison la itretre drei nyidrë “kowe la atesiwa i Tetetro, me Hupuna, me [u]ati [h]mitöt.” (E jë la Mataio 28:19.) Kolo lai a hape, tro sa kapa la musi Akötresie. Tro fe sa hane kapa la hnëqa i Iesu ngöne la aja i Akötresie. Nge tro fe sa kapa la aqane huliwane i Akötresie la uati hmitrötre i Nyidrë, matre troa eatrëne la aja i Nyidrë.—Salamo 83:18; Mataio 28:18; Galatia 5:22, 23; 2 Peteru 1:21.

24, 25. (a) Nemene la aliene la bapataiso? (b) Nemene la hnyinge hna troa sa hnene la mekene tixenuë?

²⁴ Ame la bapataiso tre, ka tru aliene catr. Ame la kola heti epuni e hnine la tim, tre, kösë epuni hi lai a mec göne la aqane mele i epuni hnapan. Kola amamane e cili laka, ase hë epuni nuetrije la aqane mele i epuni ekö. Nge ame hë la epuni a mejë qa hnine la tim, kolo lai a hape, epuni ha nyiqane la ketre aqane mel ka hnyipixe, ene la troa nyihlue i Akötresie. Kola amamane ka hape, ka nyihlue i Iehova hë epun. The thëthëhmine kö ka hape, tha hnei epuni kö hna sa xepu koi ketre atr, maine koi ketre organizasio, maine koi ketre huliwa pena, ngo koi Iehova.

²⁵ Tro la hnei epuni hna sisinyi koi Iehova a xatua epuni troa acatrene la aqane imelekeu i epuni me Nyidrë. (Salamo 25:14) Tha kolo kö lai a hape tro ha amele së ke, ase hë së bapataiso. Hnei Paulo aposetolo hna cinyihane ka hape: “Huliwanejë la mele i nyipunie ngöne la qou me hmengöhmengön.” (Filipi 2:12) Ame la epuni a xomi bapataiso, tre, epuni petre hi a nyiqane nyihlue i Iehova. Ngo nemene la aqane tro epuni a ce sinee me Iehova? Tro pë hë a sa ngöne la mekene tixenuë.