1-3. (a) Nemene la hnyinge ne la itre atr, göne la mec? (b) Nge nemene la aqane sa hnene la itre hmi?

HNEI Tusi Hmitrötr hna thingehnaean, ka hape, “pa hmaca kö mec.” (Hna Amaman 21:4) Hne së lo hna wang ngöne la Mekene 5 laka, jëne la thupene mel, tro ha paatre la mec. Ngo ame enehila, tha traqa pala kö së kowe lai. (Ate Cainöj 9:5) Celë hi matre kola hnyinge hnene la itre atr, ka hape, “ekaa la itre ka mec?”

² Ame la kola meci hnene la ketre sinee së, maine jë hne së hna hnyinge ka hape, ekaa ha angeic? Angeice kö a akötr? Öhnyi ni kö hnei angeic? Ijiji angeice kö troa xatua ni? Hapeu tro hmaca kö ni a iöhnyi me angeic?

³ Isa pengöne kö la aqane sa la itre hnyinge celë hnene la itre hmi. Hetre itre xan ka qaja ka hape, tro la itre ka loi a tro hnengödrai, nge tro pëhë a dreuthe lo itre ka ngazo ngöne la i hu eë. Ame itre xa hmi, öni angatr, e meci hë la atr, mele pe kö la u, nge angeice a ce mele memine lo itre xa sinee i angeice ka meci hë. Nge itre xa hmi a qaja ka hape, hetre ihnyingë e thupene la mec. Nge thupene lai, easa mele e hnine la ketre ngönetrei, maine pena ngöne la ketre öni.

4. Nemene la mekune hna ce qaja hnene la itre hmi, göne la mec?

⁴ Nyimutre la itre ini hna hamëne hnene la itre hmi göne la mec. Ngo itre eje asë hi a qaja ka hape, e meci hë la atr, ke ngönetrei hi la ka troa patr, ngo mele pe kö la u. Hapeu, ka nyipici kö lai?

5, 6. Nemene la pengö së e meci hë së?

⁵ Atre hnyawa hi Iehova la pengöne la mec. Öni Nyidrëti  ka hape, ame la kola meci la atr, ke pune hi la mele i angeice lai. Ka isapengöne catre la mel me mec. Celë hi matre ame la kola meci la atr, ke meci fe hë la mekun. * Pë hmaca kö hna öhn, nge pë hmaca kö hna dreng.

⁶ Hna cinyihane hnei Solomona joxu ka hape: “Tha ’te kö la kete ewekë hnei ite ka meci hë.” Pëhë ihnim me imethinë thei angatr. Nge “pëkö huliwa, me mekun, me wangate hmekun, me inamacan, ngöne la hua.” (E jë la Ate Cainöj 9:5, 6, 10.) Kola qaja ngöne Salamo 146:4 ka hape, e meci hë la atr, “ke patë hë la ite mekune i angeic.”

7. Nemene la aqane qejepengöne Iesu la mec?

⁷ Ame la kola meci hnei Lazaro, ketre sinee i Iesu, öni nyidrëti kowe la angetre dreng ka hape: “Mekölë hë Lazaro, sine shë.” Ngo tha Iesu kö lai a qaja ka hape, Lazaro hi a meköl, ke canga öni nyidrëti ju fe kö: “Meci hë Lazaro.” (Ioane 11:11-14) Iesu a aceitunëne la mec, memine la kola meköl. Tha hnei nyidrëti kö hna qaja ka hape, Lazaro e koho hnengödrai, maine pena, ce angeice memine la itre sinee i angeic ka meci hë. Ketre tha hnei nyidrëti kö hna qaja ka hape, Lazaro e hnine la hu eë. Nge tha ase kö nyidrëti qaja ka hape, mele hmaca ha Lazaro nge hnei angeice hna saze ngönetrei. Ngo Iesu pe a aceitunëne la meci Lazaro, memine la angeic a meköl. Itre xa xötre ne la Tusi Hmitrötr a aceitunëne la mec, memine la easa meköl thatre. Tusi Hmitrötr a qaja ka hape, ame ngöne lo ijine kola humuthi Setefano ke, angeic “a meköle ju.” (Ite Huliwa 7:60) Ketre, hna cinyihane mina fe hnei Paulo ka hape, hetrenyi la itre ka “meköl ngöne la mec.”—1 Korinito 15:6.

8. Nemene la ka amamane koi së laka, hna xupi së troa mel epine palua?

 ⁸ Ame lo Iehova a xupi Adamu me Eva ke, tha aja i Nyidrëti kö tro nyidroti a mec. Ngo hnei Nyidrëti pe hna xupi nyidro matre troa mele epine palua e celë fen. Hnei Nyidrëti fe hna amë e kuhu hni nyidro la aja troa mele epine palua. (Ate Cainöj 3:11) Ame la aqane jole kowe la keme me thin troa goeëne la itre neköi nyidro e qatre trootro me mec, ke ka ceitu hi lai me Iehova. Haawe, nga maine hnei Iehova hna xupi së troa mele epine palua, hnauëne kö laka easa mec?

9. Pine nemene matre tha jole kö koi Adamu me Eva, troa trongëne la wathebo?

⁹ Hnei Iehova hna qaja koi Adamu ngöne la hlapa e Edena ka hape: “Tro eö a xeni qa ngöne la nöjei sinöe asëjëihë ngöne la hlapa, ngo the tro kö eö a xeni qa ngöne la sinöe ne ate hmekune la loi me ngazo, ke tro eö a meci ngöne la drai ne xeni eö qa ngön’ ej.” (Genese 2:9, 16, 17) Trotrohnine hnyawa hi nyidro lai wathebo hna hamën, nge tha ka jole kö e troa trongën. Nge ketre, Iehova la ka mus, matre atre hi Nyidrëti ka hape, ka loi maine ka ngazo la koi nyidro. Maine drengethenge ju nyidro, tro hë lai a mama la metrötre i nyidro koi Iehova. Nge nyidroti fe lai a amamane ka hape, madrine catre nyidro troa kapa la itre ewekë qaathei Iehova.

10, 11. (a) Nemene la aqane amenu Eva hnei Satana? (b) Pine nemene matre ka ngazo catr la hna kuca hnei Adamu me Eva?

¹⁰ Ngazo pe, hnei nyidroti hna isa iëne troa tha drengethenge Iehova. Hnei Satana hna hnyinge koi Eva ka hape: “Hape u, ase hë ulatine hnei Akötesie, ka hape, The tro kö nyipoti a xeni qa ngöne la nöjei sinöe asëjëihë ne la hlapa?” Nge Eva a sa ka hape: “Tro nyiho a xeni la wene la nöjei sinöe ne la hlapa, ngo ame la wene la sinöe ngöne nyipine la hlapa, te hna ulatine hnei Akötesie, ka hape, The tro kö nyipoti a xeni wen’ ej, nge the kete kö eje hnei nyipo, ke meci pi. ”—Genese 3:1-3.

¹¹ Öni Satana jë hi: “Tha trojë kö nyipo a mec, ke ate hmekune kö Akötesie laka ngöne la drai ne tro nyipoti a xeni wen’ ej, [ . . . ] kösë lue Akötesie nyipo, mate ate hmekune la loi me ngazo.” (Genese 3:4-6) Ame la aja i Satana, ke, tro kö Eva a ketre sipu mus. Celë hi matre hnei angeic hna thoi koi Eva me hape, tha tro jë kö angeic a mec, e tro angeic a xen la wene sinöe. Ka upi Eva hi lai troa huje la wene sinöe, me xen, me hamë Adamu e thupen. Atre  hnyawa hi Adamu me Eva la wathebo laka, tha tro kö a xeni la wene sinöe. Ngo hnei nyidroti pë hë hna sipu axeciën troa tha drei Iehova. Mama pi hi e cili laka, pëkö metrötre i nyidro kowe la Keme ka hnimi nyidro. Ame e cili, ke pëkö xa atrekë zön, nyidroti hmekuje hi.

12. Tune kaa la Iehova a öhne ka hape, pëkö metrötre i Adamu me Eva koi Nyidrë?

¹² Hleuhleu me hace la hni Iehova la Nyidrëti a öhne ka hape, pëkö metrötre i Adamu me Eva koi Nyidrë. Hanawange la ketre ceitun. Easa kuca la hne së hna atrein, matre troa inine hnyawa la nekö së. Ngo tru jë hi nyën a tha idrei, me pë metrötr me pi tru. Hapeu, ka hmaloi kö lai koi së? Ohea, tro pe lai a akötrë së.

13. Nemene la aliene la Iehova a qaja koi Adamu, ka hape, “Ke xaxau eö, nge tro hmaca eö kowe la xaxau”?

¹³ Ame la thangane la tha idrei Adamu me Eva, ke pë hmaca kö mel epine palua koi nyidro. Öni Iehova koi Adamu ka hape: “Ke xaxau eö, nge tro hmaca eö kowe la xaxau.” (E jë la Genese 3:19.) Kolo lai a hape, tro hmaca Adamu a trepadro. Kösë tha ase ju kö xupi angeic. (Genese 2:7) Thupene la hna tria hnei Adamu, meci pi hi angeic me patre palua.

14. Pine nemene matre easa mec?

¹⁴ Maine hnei Adamu ju me Eva hna drengethenge Iehova, ke ka mele pala hi nyidroti enehila. Ngo meci hë nyidro, pine la hnei nyidroti hna tha  idrei. Ame la ngazo, ke, ceitune hi memine la ketre meci ka pë nyin nge ka ixötrekeu, hnei Adamu me Eva hna hamëne koi së itre matra i nyidro. Itre atr ka ngazo hë së, matre meci la pune koi së. (Roma 5:12) Ngo tha kolo kö lo aja i Akötresieti ngöne la qaan. Xele Iehova tro la itre atr a mec. Celë hi matre, öni Tusi Hmitrötr, “ithupëjia” la mec.—1 Korinito 15:26.

15. Nemene la ka thepe së qa ngöne la itre ini ka thoi göne la mec?

¹⁵ Ame la easa atre la nyipici göne la mec, ke kolo hi lai a thepe së qa ngöne la itre ini ka thoi. Tusi Hmitrötr a amaman laka, pëhë akötr me hleuhleu thene la itre ka mec. Tha ijiji së hmaca kö troa ithanata me xatua angatr, nge ketre tui angatr koi së. Thatreine hmaca kö angatr troa kuca la ketre ewekë ka ngazo koi së. Celë hi matre tha tro pi kö sa xoue angatr, ngacama itre xaa hmi a qaja ka hape, ce easë palahi me itre ka mec. Itre hene ne hmi a qaja ka hape, ijije hi troa xatuane la itre ka mec, ngo troa pane kuië mani koi angatr. Ngo e trotrohnine hë së la nyipici göne la mec, tha jole hë koi së troa thipe trije la itre ini ka thoi.

16. Nemene la itre ini hna qaja hnene la itre hmi göne la itre ka meci hë?

¹⁶ Satana a amenu së jëne la itre hmi me itre ini ka thoi, tune la kola hape, mele kö la itre ka meci hë. Kola qaja hnene la itre xaa hmi, ka hape, e meci hë la atr, ke mele pe kö la u. Hapeu, ketre ini ne la hmi epuni la? Eje kö a ini epuni la hna qaja hnei Tusi Hmitrötr? Hnei Satana hna ajojezine la itre atr hnene la itre ini ka thoi, matre tha tro kö angatr a atre Iehova.

17. Hnauëne laka, kola akötrë Iehova hnene la ini hna hape, troa dreuthe la itre atr ngöne la hu eë?

¹⁷ Ame la itre ini qaathene la itre xaa hmi ke kola  axouenyi së. Tune la kola qaja ka hape, ame la itre atr ka ngazo ke, troa dreuthi angatr ngöne la hu eë. Ketre trenga thoi lai ka akötrë Akötresie, ke ame Nyidrë, ka ihnim, nge thatreine kö Nyidrëti troa axösisine la atr. (E jë la 1 Ioane 4:8.) Hanawange la ketre ceitun. Hnene la kem hna dreuthe la iwanakoime ne la nekö i angeic ngöne eë, pine laka hnei nyëne hna tha idrei. Tune kaa la keme celë? Tro hë së lai a mekune ka hape, ketre keme lai ka pë ihnimin. Nge tha pi tro kö sa atre nyidrë. Celë hi lai hna thele hnei Satana, laka tro sa mekun ka hape, ame Iehova, ke ka iaxösisi.

18. Pine nemen matre tha tro kö sa xouene la itre ka mec?

¹⁸ Kola qaja hnene la itre xaa hmi ka hape, e meci hë la atr, ke mele pe kö la u. Angatre fe a qaja ka hape, nyipiewekë tro sa metrötrëne me xouene la itre ka mec, ke ijije hi tro angatr a xatua së, maine pena, troa itre ithupëjia ka catr. Alanyimu la itre atr ka jele nyipicine la ini ka thoi cili. Celë hi matre angatr a xouene me nyihluene pena la itre ka mec, nge thëthëhmi Iehova pë hë. Ngo Tusi Hmitrötr a qaja ka hape, pë hmaca kö hna dreng hnene la itre ka mec. Haawe, tha tro kö sa xoue angatr. Iehova la Atre Xupi së. Nyidrëti la nyipi Akötresie, nyine tro sa thili kow.—Hna Amaman 4:11.

19. Nemene la eloin la easa kapa la nyipici göne la mec?

¹⁹ Ame la easa kapa la nyipici göne la mec, tre kola thepe së qa ngöne la itre ini ka thoi qaathene la itre hmi. Ketre, kola xatua së troa catre mejiun kowe la itre hna thingehnaean asë hnei Iehova, göne la mele së elany.

20. Nemene la hne së hna troa ce wang ngöne la mekene thupen?

²⁰ Hnene la ketre hlue i Iehova ekö, Iobu la ëjen, hna hnying ka hape: “Maine meci hë la at, hape u, tro angeic’ a mele hmaca?” (Iobu 14:14) Tro pë sa wange la mekune cili, ngöne la mekene thupen.