1. Nemene la itus ka amamane koi së la itre drai elany?

AME la easa goeëne lapaan la itre nuvel ka ngazo ngöne televizio, öni së ju hi, ‘kolo palahi a jole catre la fen’. Pine laka tru catr la iangazo me akötr, itre xa atr a mekune ka hape, easenyi hë la pune la fen. Hapeu, nyipici kö lai? Ijije kö tro sa atre la pengöne la itre drai elany? Ijije hi. Ngo Iehova la ka troa qaja koi së la itre ewekë ka troa traqa elany. Tusi Hmitrötr a amamane koi së la itre drai elany, ewekë hna thatreine kuca hnei atr.—Isaia 46:10; Iakobo 4:14.

2, 3. Nemene la hna hnyingëne hnene la itretre drei Iesu, nge nemene la aqane sa i nyidrëti koi angatr?

² Ame la Tusi Hmitrötr a qaja ka hape, troa nyipune la fen, ke tha kolo kö a qaja ka hape, troa patre la ihnadro. Ngo kolo pe a qaja ka hape, troa patre la iakötrë memine la ngazo. Hnei Iesu hna qaja ka hape, tro la Baselaia i Akötresie a musinëne la fen. (Luka 4:43) Hnene la itretre drei nyidrë hna hnyingëne la ijine tro la Baselaia i Akötresieti a traqa. Öni angatr: “Epi qaja jë koi hun, troa traqa eue la itre ewekë cili, nge nemene la hatrene laka cilieti hë la, memine la hneijin ne kola troa nyipune la fen?” (Mataio 24:3, MN) Tha hnei Iesu kö hna qaja mekötine la drai, ngo hnei nyidrëti pe hna qaja la itre ewekë ka troa traqa, qëmekene troa nyipune la fen. Nge easë hi a melëne itre ej enehila.

³ Ame ngöne la mekene celë, tro sa ce wang la itre hatrene  ka anyipicine laka, easë hi la a melëne la itre drai ne la pun. Ngo tro sa pane ithanatane la ketre isi ka traqa e koho hnengödrai, matre tro sa trotrohnine la kepine matre, kolo palahi a ngazo catr la fen.

4, 5. (a) Nemene la ewekë ka traqa thupene la hna acili Joxu Iesu? (b) Thenge la Hna Amamane 12:12, nemene la thangane kowe la fen, la hna helëne triji Satana qa hnengödrai?

⁴ Ame ngöne lo Mekene 8, hne së hna wang laka, hna acili Joxu Iesu e hnengödrai lo macatre 1914. (Daniela 7:13, 14) Hnene la tusi Hna Amamane hna qejepengöne la ka traqa e thupene me hape: “Nge kola ishi e hnengödrai ; Mikaela me ite angela i nyidë a ishi memine la drakona ; nge drakona me ite angela i nyën’ a itö ishi me angat.” * Hna ngaa Satana me itre dremoni angeic, nge hna helëne triji angatr qa hnengödrai. Madrin atraqatre thene la itre angela! Ngo tune kaa e celë fen? Tusi Hmitrötr a qaja ka hape, atraqatre la akötr e celë fen. Pine nemen? Pine laka tru la trenge elëhni Satana ke, “xoxopate pe hi la ijine i nyën.”—Hna Amaman 12:7, 9, 12.

⁵ Diabolo a kuca matre troa traqa itrai la nöjei pengöne akötr koi së itre atr. Tru la trenge elëhni angeic, ke atre hi angeic laka easenyi hë matre apatrenyi angeice pi hnei Akötresie. Tro pena sa ce wange la aqane qejepengöne Iesu la itre drai hnapin.—Wange ju la Ithuemacany 24.

6, 7. Nemene la hna perofetane hnei Iesu göne la itre isi me jiin, nge nemene la ka anyipicine lai?

⁶ Itre isi. Öni Iesu: “Ke tro ha cile la kete nöje kowe  la kete nöj, me kete baselaia kowe la kete baselaia.” (Mataio 24:7) Tru catre kö hnei ka mec ngöne la itre isi, ngöne hi la hneijine së, hune ekö. Önine la ketre itus ka hape, qane hi lo macatre 1914, 100 milio lao atr ka mec ngöne la itre isi. Matre tru catre kö hnei ka meci ngöne lai hnepe ijine cili, hune la itre ka mec ngöne lo 1 900 lao macatre ka ase hë. Nyine qaja ka hape, tru catre la hna angazone la mele ne la atr hnene la itre isi!

⁷ Jiin. Öni Iesu: “Nge tro ha jin.” (Mataio 24:7) Ngacama kola mana la xen, ngo tru catre kö hnei ka mecijin. Pine nemen? Pine laka pëkö manie nyine itö xen, maine hnë troa eënyi pena. Hna sasaithe la 1 miliar lao atr ka nango mele memine hi la 100 fara ngöne la drai. Önine la Organisation mondiale de la santé (OMS), itre milio lao nekönatre ka wezipo me mec hnei mecijin, ngöne hi la ca macatre.

8, 9. Nemene la hna perofetane hnei Iesu göne la itre sa me itre mec, nge nemene la ka anyipicine lai?

⁸ Itre sa. Öni Iesu: “Nge tro  ha hete ite sha atraqate.” (Luka 21:11) Hna qaja hnene la itre ka kuci sias ka hape, troa hetre sa atraqatr e nöjei macatre. Qane lo 1900, hna sasaithe la 2 milio lao atr ka meci hnei sa. Ame enehila, itre ka inamacane a qaja ka hape, ijije hi troa hmekë së qëmekene troa traqa la sa, ngo tru palahi hnei ka mec.

⁹ Itre mec. Hnei Iesu fe hna perofetane ka hape, “tro ha hete mec.” Tru hnei ka mec hnene la itre meci ka ixötrekeu. (Luka 21:11) Thatreine kö la itre droketre troa nyinyine asë la itre mec. E nöjei macatre, itre milio lao atr ka mec hnei sine mec, tune la meci hmanono, me paludisme me choléra. Ame ngöne la 40 lao macatre ka ase hë, hna öhne hnei itre droketre la 30 lao meci ka hnyipixe. Nge ame la itre xan, ke ka pëkö nyin.

10. Kola eatre tune kaa la hna qaja hnei 2 Timoteo 3:1-5 enehila?

¹⁰ Hna qaja ngöne 2 Timoteo 3:1-5, ka hape: “Tro ha traqa la nöjei ijine ka aköte ngöne la ite  drai hnapin.” Hnei Paulo aposetolo hna qaja la aqane ujë ne la itre atr ngöne la itre drai hnapin. Öni nyidrë, tro la itre atr a

• mele cas

• meciu mani

• tha drei keme me thin

• tha inyipicikeu

• tha ihnimikeu

• thatreine xomehnöth

• iakötrë

• ajane la nyine madrin, hui Akötresie

• kösë thina ka aja Akötresie, ngo xele pe ma drei Nyidrë

11. Tune la hna qaja ngöne Salamo 92:7, nemene la ka troa traqa kowe la itre atre ka ngazo?

¹¹ Hapeu, ka ujë kö tune lai la itre atr ngöne la nöje i epun? Nyimutre la itre atr e cailo fen ka hane ujë tune lai. Ngo tha hmitre pe kö matre kuca jë Iehova la ketre ewekë. Hnei Nyidrëti hna thingehnaeane ka hape: “E kola elehmeu [cia hlöeë] tune la hnënge haö la nöjei ka ngazo, me enge la angete kuca la ngazo asë, celë hi mate tro palua kö angat’ a pat.”—Salamo 92:7.

12, 13. Nemene la hna qaja hnei Tusi Hmitrötr göne la itre drai hnapin?

¹² Tusi Hmitrötr a thingehnaeane ka hape, ame ngöne la itre drai hnapin, ke tro ha elë la iakötrë me hleuhleu. Ngo eje fe a qaja ka hape, tro fe kö a traqa la itre ewekë ka loi.

¹³ Troa trotrohnine hnyawa la Tusi Hmitrötr. Hna cinyihane hnei Daniela perofeta göne la itre drai hnapin ka hape: ‘Troa kökötr la inamacan.’ (Daniela 12:4) Nge tro Akötresieti a xatuane la itre hlue i Nyidrë, troa trotrohnine hnyawa la Tusi Hmitrötr. Celë hi hnei Nyidrëti hna kuca qaane lo 1914. Tune la Nyidrëti a xatua së troa nyipiewekëne la ëje i Nyidrë. Nyidrëti fe a xatua së troa trotrohnine la aja i Nyidrë kowe la fen, memine la thupene mel, me pengöne la mec, memine fe la mele hmaca. Atre hë së ka hape, tro hmekuje hi la Baselaia i Akötresie a nyinyine la nöjei jol asë. Ketre tun, atre hë së la nyine kuca matre troa mele ka loi, me aqane troa amadrinë Akötresie. Ngo hapeu, hnene kö la itre hlue i Akötresieti hna lapa fë la itre hnei angatr hna inin? Hetre hna perofetane ka sa la hnyinge celë.—Wange ju la itre Ithuemacany 21 me 25.

14. E kaa la hna cainöjëne la maca ka loi ne la Baselaia i Akötresie? Nge drei la itre ka cainöjën?

¹⁴ Troa cainöjëne la maca ka loi e cailo fen. Hnei Iesu hna qaja göne la itre drai hnapin ka hape: “Nge tro ha cainöjëne la maca ka loi celë ne la baselaia e cailo fene.” (Mataio 24:3, 14) Hna cainöjëne la maca ka loi ngöne la 230 lao nöj, me 700 lao qene hlapa. Hetre Itretre Anyipici Iehova ka “qa ngöne la ite xöte nöj’ asë, me ite tribu” ka cainöjëne la maca ka loi e cailo fen. Angatr a xatuane la itre atre troa atrepengöne la Baselaia  i Akötresie, memine la hnene ej hna troa kuca. (Hna Amaman 7:9) Tha hna hë thupene kö. Ngacama hna qanangazon me xele ma wai angatr, tune lo hna qaja hnei Iesu, ngo ame pe, pëkö ka atreine troa sewe angatr troa cainöj.—Luka 21:17.

15. (a) Easë kö a melëne la itre drai hnapin, nge pine nemene matre epuni a mekune tun? (b) Nemene la ka troa traqa kowe la itre ka drengethenge Iehova, me kowe la itre ka icilekeu me Nyidrë?

¹⁵ Hapeu, mama kö koi epun laka, easa melëne la itre drai hnapin? Nyimutre hë la itre hna perofetane ka eatre enehila. Easenyi hë matre nyipune pi hë Iehova la huliwa ne cainöj, nge ame hna traqa pi la “pun.” (Mataio 24:14) Nemene la kola hape, “pun”? Kolo isi Amagedo, ijine tro Iehova a apatrene la ngazo. Nge jëne Iesu me itre angela ka catr, Nyidrëti hë a troa apatrene la itre ka icilekeu me Nyidrë. (2 Thesalonika 1:6-9) Ame hë e cili, thatreine hë Satana me itre dremoni angeic amenune la itre atr. Ame la itre ka drengethenge Akötresie, memine la Baselaia i Nyidrë, ke tro hë angatr a kapa la itre manathith hnei Nyidrëti hna thingehnaean.—Hna Amaman 20:1-3; 21:3-5.

16. Nemene la nyine tro epuni a kuca, ngöne la epuni a öhne laka, easenyi catre hë la pun?

¹⁶ Easenyi hë matre lepe apatrene pi hë la fene celë hna musinëne hnei Satana. Matre nyipiewekë koi së isa ala cas troa hnyinge ka hape, ‘Nemene la nyine tro ni a kuca?’ Ame la aja i Iehova ke, tro sa thele troa inine hnyawa la Tusi Hmitrötr. (Ioane 17:3) Hetre itre icasikeu ne la Itretre Anyipici Iehova e nöjei wiik, ka xatuane la itre atr troa trotrohnine la Tusi Hmitrötr. Nyipiewekë catr tro sa hane sine la itre icasikeu cili. (E jë la Heberu 10:24, 25.) Ame la easa trotrohnine laka, hetre itre ewekë  nyine tro sa saze ngöne la mele së, ke tha tro kö sa seseu, ngo melëne jë pe. Nge tro hë lai a acatrene la aqane imelekeu së me Iehova.—Iakobo 4:8.

17. Pine nemene matre troa sesëkötre la itre atr ngöne la kola troa traqa la pun elany?

¹⁷ Hna qaja hnei Paulo aposetolo ka hape, ame ngöne la ijine troa apatrene la itre atr ka ngazo ke, troa asesëkötrëne la itre atr, “tune la ate kë ’nö e jid.” (1 Thesalonika 5:2) Hnei Iesu hna perofetane laka, nyimutre la itre ka troa wangesixane la itre hatrene ka anyipicine laka, easë hë a melëne la itre drai hnapin. Öni nyidrë: “Troa traqa hmaca la Nekö i ate [maine itre drai hnapin], tune la ijine i Noa. Ke ngöne la ijine pate pete kö la iwë, angat’ a lapa xen, me ij, me faipoipo, me ihamë föeë, uti hë ngöne la drai hnei Noa hna lö hnine la aka, nge tha ‘te kö [tha jele nyipiewekëne kö] angate uti hë traqa ha la iwë, me cengöne thei angat’ asë pi, kete troa tune la traqa hmaca la Nekö i at.”—Mataio 24:37-39.

18. Nemene la aqane hmekë së hnei Iesu?

¹⁸ Hnei Iesu hna hmekë së ka hape: “Nge wange kö nyipunie, wanga hace pi la ite hni nyipunie hnene la hna xeni atrun, me hna iji atrun, me kuke hnine kowe la mele celë.” Öni nyidrë ka hape, troa traqa la pun “kösë hnö.” Nyidrëti mina fe a qaja ka hape: “Tro ej a traqa kowe la nöjei ate asë angete lapane la fen’ asë.” Matre öni nyidrë: “Hmekëneju nyipunie, me lapa thith [thithi iele] mate ateine nyipunie troa kötene la nöjei ewekë asë celë ka tro ha traqa, me troa icilenyi qëmeke ne la Nekö i ate.” (Luka 21:34-36) Pine nemene matre ka nyipiewekë koi së troa trongëne la hna qaja hnei Iesu? Pine laka easenyi catre hë matre lepe apatrene pi la fene i Satana. Ame e cili, tro pë hë a mele palua lo itre atr ka meköt ngöne la fene ka hnyipixe.—Ioane 3:16; 2 Peteru 3:13.