1-3. Nemene la ewekë ka othi së asë? Nge nemene la hnei Iehova hna troa kuca, matre thepe së qa ngön?

PANE mekune jë së laka, kola upe zö së, ka hape, hne së hna humuth la ketre atr, ngo tha hne easë pe. Ame e cili, hna amekötine laka, tro pë hë së a lapa palua e kalabus. Pëkö ka atreine troa xatua së, matre pëhë mejiune së. Ngo drenge jë hi së laka, hetre atr ka ijije troa alö së qa kalabus, nge ketre hnei angeice hna qaja hnyawa ka hape, tro angeic a xatua së. Nemene jë hi e cili la mekuna së?

² Hna othi së asë hi hnene la mec, nge pëkö ka atreine troa thepe së qa cili. Iehova hmekuje hi la ka atreine troa amele së qa ngöne la mec. Nge ase hë Nyidrëti thingehnaean, ka hape, ame la “mec ithupëjia hnapine hna troa apaten.”—1 Korinito 15:26.

³ Pane mekune jë la ijine troa patre palua elanyi la mec. Drei la ketre madrine ka tru koi së! Tha Iehova hmekuje kö a troa apatrene la mec. Ngo Nyidrëti mina fe a troa amelene hmaca la itre ka mec. Kola hapeue lai? Iehova a thingehnaean, ka hape, troa mele hmaca “la itre wezipo.” (Isaia 26:19) Celë hi hna hëne hnei Tusi Hmitrötr, ka hape, mele hmaca.

4. (a) Nemene la ka xatua së ngöne la kola meci la ketre atrene la hnepe lapa së maine ketre sinee së? (b) Drei lo itre sinee i Iesu?

⁴ Ame la kola meci hnene la ketre atrene la hnepe lapa së maine ketre sinee së, ke easa hleuhleu me akötr.  Nyipici thatreine kö së amele angeic. Ngo Tusi Hmitrötre pe a akeukawane hnyawa la hni së. (E jë la 2 Korinito 1:3, 4.) Tro sa ce wange la ketre ceitune ka amamane laka, tru la aja i Iehova me Iesu troa amelene hmaca la itre atr hne së hna hnim. Hnei Iesu palahi hna tro troa wai Lazaro me Maretha me Maria, lo itre sinee i nyidrë. Tusi Hmitrötr a qaja ka hape: “Iesu a hnimi Maretha, me tejine me nyido, me Lazaro fe.” Ngo ame ngöne la ketre ijin, meci pi hi Lazaro.—Ioane 11:3-5.

5, 6. (a) Nemene la aqane ujë i Iesu ngöne la nyidrëti a öhne la kola akötr la itre sinee i Lazaro? (b) Pine nemene matre kola akeukawanyi së la aqane ujë i Iesu, ngöne la kola meci hnei Lazaro?

⁵ Hnei Iesu hna tro troa xatua Maretha me Maria, ngöne la akötr ka eje thei nyidro. Ame la kola drenge hnei Maretha ka hape, Iesu a troa traqa, canga tro jë hi angeice a troa ixelë me nyidrë. Madrine catre Maretha troa iöhnyi me Iesu, matre öni angeice jë hi koi nyidrë ka hape: “Joxu maine hne i cilieti kö la, maine tha meci kö la xang.” Ame koi Maretha ke, tha hnei Iesu kö hna canga traqa. Nge hnei Iesu hna öhnyi Maria e treij. Ame la nyidrëti a öhne ka hape, kola treije la itre atr, ke nyidrëti a utipi angatr me ce treije me angatr. (Ioane 11:21, 33, 35) Ame la aqane hleuhleu i nyidrë ke, ceitune hi memine la easa akötr, ngöne la kola mec hnene la ketre sinee hne së hna hnim.

⁶ Kola akeukawane la hni së laka, atre pengöne hi Iesu la itre akötre së. Kolo hi lai a amamane laka, methi Iesu la mec. Nge pine laka ce mekune i Iesu hnyawa hi me Iehova, haawe methi Iehova mina fe la mec. (Ioane 14:9) Easenyi catre hë matre apatrene palua pi Iehova la mec, matre eatrëne jë la aja i Nyidrë.

7, 8. Pine nemene matre xele kö Maretha e troa xometrije la etë ka thinge la hua i Lazaro? Nge nemene la hna kuca hnei Iesu?

⁷ Hna amë la ketre etë ka tru, matre troa thinge la hua i Lazaro. Nge ame la Iesu a traqa qëmekene lai hua, ke öni nyidrë, ka hape, “Xomepi la etë.” Ngo xele kö Maretha e troa xometrije ej, ke foa ha lao drai ne meci Lazaro. (Ioane 11:39) Thatre kö angeic la ewekë hna troa kuca hnei Iesu koi Lazaro.

⁸ Thupene la hna ukune lai etë, öni Iesu jë hi, “Lazaro fe! löpi.” Kola sesëkötre hnei Maretha me Maria. Nyidroti a öhne la kola lö pi hnei Lazaro qa hnine la hua. (Ioane 11:43, 44) Mele hmaca ha Lazaro! Angeic hmaca ha me itre sine i angeic. Angatr a imadri me ithanata hmaca me angeic. Drei la ketre iamamanyikeu ka tru!

9, 10. (a) Drei la ka hamë mene koi Iesu troa amelene hmaca la itre ka mec? (b) Pine nemene matre ka hamë mejiune koi së la itre hna cinyihan göne lo itre hna amelene hmaca?

⁹ Hapeu, hnei Iesu kö hna amelene hmaca la itre ka mec, jëne la sipu trengecatre i nyidrë? Ohea. Qëmekene tro Iesu a amele hmaca Lazaro, hnei nyidrëti hna pane thithi koi Iehova. Nge hnei Iehova hna hamë Iesu la mene ne troa amelene hmaca la itre ka mec. (E jë la Ioane 11:41, 42.) Tha Lazaro hmekuje kö la hnei Iesu hna amelene hmaca. Tusi Hmitrötr fe a qaja la nekö jajinyi ka tro ha mec, nge ka 12 lao macatre. Pëhë hna atreine kuca hnei Iairo matre troa nyinyine la meci ne la nekö i angeic. Celë hi matre tro jë Iairo troa sipo iele Iesu, matre troa aloine la meci nyën, ke casi fe hi la neköi angeic. Angeic petre kö a ithanata me Iesu, nge traqa pi hi la maca, ka hape, ‘Meci hë la neköi nyipëti jajiny, nyine ue troa  ajolëne la Atre ini?’ Ngo öni Iesu jë hi koi Iairo, ka hape: “The qou kö, ngo lapauneju, nge tro hë nyën’ a mel.” Thupene lai, hnei Iesu hna ce tro me Iairo kowe la hnalapa i angeic. Traqa ju hi nyidroti a öhne la kola itreijeny. Öni Iesu jë hi: “The iteijenyi kö ; tha meci kö nyën, ngo kola meköl.” Maine jë hnei keme me thin hna hnying ka hape, nemene la alien la trengewekë i Iesu? Ame hnei Iesu hna qaja jë kowe la itre atr troa pane lö qa hnine la uma. Nyidrëti a xome jë la iwanakoime i nyën, me qaja ka hape: “Jajinyi fe, ini a qaja koi’ö, cilejë.” Cile jë hi la jajinyi me tro. Pane mekune jë së la madrine ne la keme me thin, ke mele hmaca ha la nekö i nyidro. (Mareko 5:22-24, 35-42; Luka 8:49-56) Qane ju hi la drai cili, tha thëthëhmine kö nyidroti la hnei Iehova hna kuca, jëne Iesu. *

¹⁰ Ame lo itre hna amelene hnei Iesu, ke hnei angatr hmaca kö hna mec. Ngo ame la itre hna cinyihan göne lo itre hna amelene hmaca, ke ka hamë mejiune koi së. Kola amamane laka Iehova a ajane troa amelene hmaca la itre ka mec, nge tro kö Nyidrëti a eatrëne lai.

11. Nemene la mekun ngöne Ate Cainöj 9:5 göi Lazaro?

¹¹ Tusi Hmitrötr a qaja ka hape: “Tha ’te kö la kete ewekë hnei ite ka meci hë.” (Ate Cainöj 9:5) Hna anyipicine lai hnene la meci Lazaro. Ame lo Lazaro e hnine la hua, ke ‘pëkö hnei angeic hna atre’. Celë hi matre qaja jë Iesu ka hape, kösë angeice hi a meköl.—Ioane 11:11.

12. Nemene la ka anyipicine ka hape, mele hmaca ha Lazaro?

 ¹² Ala nyimu la itre atr ka öhnyi Iesu e amele Lazaro. Hnene fe la itre ka icilekeu me Nyidrë hna öhne la iamamanyikeu cili. Celë hi ka anyipicin la hna amele Lazaro hmaca. (Ioane 11:47) Ala nyimu la ka traqa troa iöhnyi me Lazaro, matre trotrohnine ju hi angatre laka, Iesu hi lo hna upe hnei Akötresie. Ngo tru catre kö la elëhni ne la itre ka icilekeu me Iesu. Celë hi kepine matre angatre a thele troa humuthi nyidrëti me Lazaro.—Ioane 11:53; 12:9-11.

13. Nemene la ka anyipicine laka tro Iehova a amelene hmaca la itre ka mec?

¹³ Öni Iesu, “tro la nöjei ate ngöne la itre hua” a mele hmaca. (Ioane 5:28) Kola hape, hetre itre atr hna amë ngöne la mekune i Iehova hna troa amelene hmaca. Tro Iehova a amelene hmaca la atr hnei Nyidrëti hna atrepengöne hnyawa. Hapeu, atreine kö Nyidrëti eatrëne lai? Eje hi. Hetrenyi la itre miliar lao wëtresij. Ngo öni Tusi Hmitrötr, atre asë hi Iehova la ëjene la nöjei wëtresij. (E jë la Isaia 40:26.) Haawe, maine atre hi Iehova la ëjene la nöjei wëtresiji asë, ke tha jole kö koi Nyidrë troa mekune la nöjei atr hna troa amelene hmaca. Nge ketre, pine laka Iehova la Atre Xup asë, atreine hi Nyidrëti troa amelene hmaca lo itre ka mec.

14, 15. Nemene la ini hne së hna xom qa ngöne la hna qaja hnei Iobu, göne la mele hmaca?

¹⁴ Iobu ekö la ketre atr ka mele nyipici koi Iehova. Hnei angeice hna hnying ka hape: “Maine meci hë la atr, hape u, tro angeic’ a mele hmaca?” Öni angeic koi Iehova: “Tro cilieti a könieti [hë], nge tro ni a gemie [sa] koi cilie ; tro cilieti a fetesietine [öhne hmaca] la huliwa ne la lue themie [iwanakoime] i cilie.” Catrecatre la mejiune i Iobu  kowe la mele hmaca. Atre hnyawa hi angeice laka, Iehova a treqene hnyawa la ijine tro Nyidrëti a amelene hmaca lo itre ka mec.—Iobu 14:13-15.

¹⁵ Nemene la mekuna së göne la mele hmaca? Ame la easa atre laka tru la aja i Iehova troa amelene hmaca la itre ka meci ke, kola akeukawane la hni së. Ngo maine jë hne së hna hnying, ka hape, “Tro fe kö a amelene hmaca elanyi la itre sineenge ka mec?” Drei la hna troa amelene hmaca? Nge troa mele e kaa la itre hna amelene hmaca hnei Akötresie? Tro sa ce wang la hna qaja hnei Tusi Hmitrötr.

16. Nemene la pengöne la mele ne la itre hna troa amelene hmaca elany e celë fen?

¹⁶ Ame ekö, hnene la itre hna amelene hmaca hna ce mel memine lo itre sinee i angatr e celë fen. Tro fe hi lai a tune elany, ngo tro pala kö a sisitria. Pine nemen? Pine laka ame la itre hna troa amelene hmaca ke, ijiji angatre hë troa mel epine palua. Ame e cili, pëhë isi, pëhë ihumuth, nge pë fe hë mec.

17. Drei la itre atr hna troa amelene hmaca?

¹⁷ Drei la itre atr hna troa amelene hmaca? Öni Iesu: “Tro la nöjei ate ngöne la ite hua a denge la aqane ewekë i angeic, me tropi.” (Ioane 5:28, 29) Nge kola qaja ngöne Hna Amamane 20:13, ka hape: “Nge hna hamëne hnei hnagejë la nöjei ka meci then’ ej, nge meci me hedis a kete hamëne la nöjei ka meci thene lu’ ej.” Itre miliar lao atr hna troa amelene hmaca. Öni Paulo aposetolo mina fe, ka hape, “Tro ha mele hmaca la nöjei ka meköt, me ka tha meköti kö.” (E jë la Itre Huliwa 24:15.) Kola hapeue lai?

18. Drei la itre “ka meköt” hna troa amelene hmaca?

 ¹⁸ Ame la itre “ka meköt”, tre, ene lo itre hlue i Iehova ekö ka mele qëmekene tro Iesu a traqa e celë fen. Tui Noa, me Aberahama me Sara me Mose me Rutha me Esetera, angatre fe la itre hna troa amelene hmaca elany e celë fen. Ame ngöne Heberu mekene 11, ke, kola qaja la itre xan e angatr. Nge ame la itre hlue i Iehova ka meci ngöne la  hneijine së, ke hapeu, tro kö a amele angatr hmaca elany? Eje hi, pine laka angatre fe la itre “ka meköt.” 

19. Drei la itre “ka tha meköti kö”? Nge nemene la mejiune hnei Iehova hna hamëne koi angatr?

¹⁹ Ame thene la itre ka “tha meköti kö” ke, itre miliar lao ka mec, nge ka tha atre Iehova kö. Tha hna thëthëhmi angatre kö hnei Iehova. Tro Nyidrëti a amele angatr hmaca, matre tro angatr a thele troa hane atre Nyidrë.

20. Drei la itre atr hna tha troa amelene hmaca?

²⁰ Hapeu, nöjei ka meci asë hi la hna troa amelene hmaca? Ohea. Öni Iesu, hetre itre ka tha tro kö a mele hmaca. (Luka 12:5) Drei la ka troa amekötine lai? Iehova hmekuje hi. Ngo hnei Nyidrëti fe hna acili Iesu, matre troa “hnyingëne la ite ka mele me ite ka mec.” (Itre Huliwa 10:42) Drei la itre tha hna troa amelene pe? Kolo itre hna amekötin ka hape, ka ngazo, ke, itre ka xele ma ietra.—Wange ju la Ithuemacany 19.

21, 22. (a) Ka tune kaa la ngönetrei ne la itre hna amelene hmaca a tro hnengödrai? (b) Drei la hna pane amelene hmaca troa mel e koho hnengödrai?

²¹ Tusi Hmitrötr a qaja ka hape, hetre itre ka troa mel e koho hnengödrai. Ame la itre hna amelene hmaca e hnengödrai, ke tha angatre hmaca kö memine la ngönetrei ne atr. Ngo ngönetrei ne u pë hë angatr, tune lo itre angela.

²² Iesu la hna pane amelene hmaca, matre troa mel e koho hnengödrai. (Ioane 3:13) Hna amele nyidrëti hmaca hnei Iehova, köni drai thupen la hna humuthi nyidrë. (Salamo 16:10; Itre Huliwa 13:34, 35) Tha hna amele nyidrëti kö e hnengödrai memine la ngönetrei ne atr. Kola qeje pengöne hnei Peteru aposetolo ka hape, “hna humuthi nyidë ene la ngönetei, ngo hna amelene ene la u.”  (1 Peteru 3:18) Ketre angela hmaca ha Iesu. (1 Korinito 15:3-6) Ngo Tusi Hmitrötr a qaja ka hape, hetre itre xane kö hna troa amelene hmaca, matre mel e koho hnengödrai.

23, 24. Drei lo lai “ala xalaith” hna qaja hnei Iesu? Nge ala ije angatr?

²³ Qëmekene tro Iesu a mec, öni nyidrëti kowe la angetre drei nyidrë, ka hape, “Ini a tro troa nyihnyawane la hne i nyipunie.” (Ioane 14:2) Kolo lai a hape, hetre itre xan e angatr hna troa amelene hmaca troa mele me nyidrë e koho hnengödrai. Ala ije angatr? Öni Iesu, “ala xalaithe hi.” Kolo lai a hape, tha ala nyimu kö angatr. (Luka 12:32) Hnei Ioane aposetolo hna qaja hnyawa la etrun. Hnei angeic hna öhnyi Iesu, “kola cile hune la wete Ziona, nge thei nyidëti la ala hadede nge luate nge ekete la o thausan.”—Hna Amaman 14:1.

²⁴ Eu la ijine troa amelene hmaca lai ala 144 000? Tusi Hmitrötr a amamane ka hape, troa nyiqane amele angatr hmaca, thupene la hna acili Joxu Iesu e koho hnengödrai. (1 Korinito 15:23) Easë hi la a melëne la ijine cili, nge ala nyimu hë la itre hna amelene hmaca a tro hnengödrai. Ngo ame la itre xan e angatr ka mel petre kö e celë fen, ame la angatr a mec, ke canga amele angatre ju fe kö a tro hnengödrai. Nge ame la ka ala nyimu, tro pë hë a amele angatr hmaca e celë fen, ngöne la Paradraiso.

25. Nemene la hne së hna troa wang ngöne la mekene ka troa xulu?

²⁵ Easenyi catre hë matre thepe së pi qa ngöne la mec hnei Iehova. Matre pë hmaca kö mec. (E jë la Isaia 25:8.) Ngo nemene la hna troa kuca hnene lo ala 144 000, e koho hnengödrai? Öni Tusi Hmitrötr, angatr a troa ce musi me Iesu ngöne la Baselaia. Tro pë hë sa wange la itre xa pengöne la Baselaia, ngöne la mekene ka troa xulu.