Atre fe hi nyipunieti la kepine matre kola madrine cahu itre atr? Pine laka angatre hi cahu a sin la ketre asabele hun. Tune la hna amekötine kowe la itre hlue i Akötresieti ekö, laka troa a köni a icasikeu ngöne la macatre, enehila mina fe, eahuni a treqene troa hane sine la itre Asabele huni katru. (Deuteronomi 16:16) E nöjei macatre, köni asabele hun, lue Asabele ne sirkoskripsio ka ca drai, nge ca Asabele Katru ka köni drai. Nemene la itre eloine la itre asabele cili?

Kola acatrene catrëne la ihnimekeu hun. Tune la madrine ka eje thene la angetre Isaraela ekö troa atrunyi Iehova “ngöne la ite icasikeu,” atraqatre mina fe la madrine hun troa ce atrunyi Nyidrë ngöne la itre asabele. (Salamo 26:12; 111:1) Itre ijine hi lai ka aijijë huni troa itronyi memine la itre xa ka Anyipici Iehova, ka traqa qa ngöne la itre xa ekalesia maine itre xa nöj. Nge kola nyi xane la itre ewekë ne la ua hne huni hna kapa hnene la ketre madrine katru, ene la troa ce hutihut memine la itre trejine e hnaipajö ngöne la hna Asabele. (Ite Huliwa 2:​42) Drenge kö huni la ewekë ka ieakeu hun, ene la ihnimi ne la “ange tejin” e cailo fen.​—1 Peteru 2:​17.

Kola xatua huni troa kökötre ngöne la götrane ua. Hetre madrinene la angetre Isaraela ekö, lo angatr a “ate hmekune la tenge ewekë” hna qejepengöne koi angatr qa ngöne la Itre Hna Cinyihan. (Nehemia 8:​8, 12) Tru mina fe la madrine huni troa kapa la itre ini qa ngöne la Tusi Hmitrötr, jëne la itre asabele. E ca asabele, tro pala hi a ca tan, hna xomi trepene qa hnine la Tusi Hmitrötr. Jëne la nöjei pengöne cainöj, me aqane kuci elone la itre ewekë hna melëne hnene la itre trejin, kola ini huni troa kuca la aja i Akötresie ngöne la mele hun. Ketre mina, ame la eahuni a drenge la itre ewekë hna melëne hnene la itre xa Keresiano, ngöne la kola traqa la itre jole koi angatr, kolo fe lai a thuecatre hun. Ame ngöne la itre asabele katru, hna kuci elone la itre edromë qa hnine la Tusi Hmitrötr, nge eahuni fe hi lai a hane xomi ini qa ngön. Ngöne la nöjei ijine asabele, hetrenyi la itre bapataiso thatraqane la itre atr ka amamane ka hape, angatr a nue la mele i angatre koi Akötresie.

• Pine nemene matre itre ijine madrine koi huni la kola sin la itre asabele?

• Nemene la aqane tro nyipunieti a hane kepe eloine la itre asabele?