Hna isa thue qane la itre atrene la lapa ne la Bethela, matre troa sajuëne la huliwa ne cainöje ngöne hi la ca nöj, maine nyimu nöje pena. Itre xan a huliwa göi ujë qene hlapa; ame itre xan, kola fejane la itre zonal, me kuci itus, me hnëkë tusi troa iupi fë, me kuca la itre CD nyine drenge me goeën, me itre xa huliwa hmaca ju kö.

Kometr ne la itre Bethela la ka wai emekötine la huliwa ne cainöj. Lapa Ne Xomi Meköt a nue kowe la Kometr ne la Bethela, troa elemekene la huliwa hna kuca e cili. Nge hna cilëne lai hnene la könitre maine nyimutre pena lao qatre thupe ka maca hnyawa. Hnëqa ne la Kometr troa thuemacane la Lapa Ne Xomi Meköt la aqane kökötre trootro la huliwa ne cainöj, memine la itre jole ka traqa koi angatr ngöne la itre nöje hnei angatre hna thupën. Itre ithuemacanyi lai ka troa hamë mekune kowe la Lapa Ne Xomi Meköt, göne la tro angatr a hnëkëne hnyawane la itre tane la itre itusi nyine troa kuca, me itre tane la itre icasikeu me asabele. Ame la “itre ka tro fë maca ne la Lapa Ne Xomi Meköt,” tre, hna upi angatr troa wange trongëne la itre Bethela. Ame la sipu jole ne la ka tro fë maca, tre, ene la troa wange lapane la itre kometr ne la itre hnë huliwa cili, me xatua angatre troa eatrëne pala hi la itre huliwa i angatr. (Ite Edomë 11:14) Ame ngöne la ijine icasikeu ka ketre pengön, tro lai atre thupe ka wange trongëne la itre Bethela a hamëne la ketre ­cainöje nyine ithuecatre kowe la itre atrene la nöje cili.

Ixatua hna hamëne kowe la itre ekalesia ne la nöj. Tro la itre trejine ka cilë mekene la Bethela a amekötine ka hape, ijije hë troa acile la ketre ekalesia. Angatre mina fe mina fe la ka wai emekötine la huliwa ne la itre pionie me itre mesinare, memine la itretre thupëne la sirkoskripsio, ka huliwa ngöne la teritoare hna thupëne hnene la Bethela. Angatr la ka hnëkëne la nöjei pengöne asabele, me amekötine la aqane troa xupe la itre Uma Ne Baselaia, me wange ka hape, hna iupi fë hnyawa kö la itre itus kowe la itre ­ekalesia, matre hetre jia ne huliwa i angatr. Itre huliwa lai hna kuca hnene la Bethela, matre meköti me tro loi la huliwa ne cainöj.​—1 Korinito 14:​33, 40.

• Nemene la ixatua hna hamëne hnene la itre Bethela kowe la Lapa Ne Xomi Meköt?

• Nemene la itre huliwa nyine kuca hnene la Bethela?