Qëmekene tro Iesu a mec, hnei nyidrëti hna qaja ka hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.” (Mataio 24:14) Ngo troa cainöjëne tune kaa la maca ka loi ngöne la fen asë? Ene la troa xötrethenge la tulu hna amë hnei Iesu ekö, lo nyidrëti e celë fen.​—Luka 8:⁠1.

Eahuni a thele jëne troa ketr la itre atr ngöne la itre hnalapa i angatr. Hnei Iesu hna inine la itretre drei nyidrë troa cainöjëne la maca ka loi ngöne la ketre hnalapa me ketre hnalapa. (Mataio 10:​11-​13; Ite Huliwa 5:​42; 20:20) Hna thawa kowe la itre pane Keresiano ekö la itre götran, hnë tro angatr a cainöje ngön. (Mataio ­10:5, 6; 2 Korinito 10:13) Tune mina fe enehila, ketre hna hnëkëne hnyawa la itre götrane hnë tro huni a cainöje ngön, matre troa haöthe asë la itre hnë huliwa cili hnene la itre ekalesia. Celë hi ­aqane tro huni lai a eatrëne la hna upi huni hnei Iesu, “troa cainöje kowe la nöj, me anyipicine.”​—Ite Huliwa 10:42.

Eahuni a catre thele troa ketr la nöjei pengöne atr. Hnei Iesu hna cainöje ngöne la nöjei götrane gaa hetre atr; ezine hnagejë, maine ezine tim. (Mareko 4:1; Ioane 4:​5-​15) Eahuni fe a hane ithanatane la Tusi Hmitrötr memine la itre atr ngöne la nöjei götrane hne huni hna öhnyi angatre ngön, tune e kuhu gojeny, maine ngöne la itre hnei angatre hna huliwa, maine ngöne itre fene sinöe hnë mano, lo hna hape park, nge eahuni mina fe a ketr la itre xan, jëne telefon. Eahuni fe a cainöje kowe la itre ka lapa ezi huni me itre sine huliwa hun, me itre sine ini hun, memine fe la itre atrene la lapa hun, e kola traqa la ijin. Jëne la itre pengöne aqane tro fë la huliwa celë, itre milio lao atr e cailo fene hnengödrai a drenge la maca ka loi ne “iamele i nyidë.”​—Salamo 96:2.

Drei la hnei nyipunieti hna ajane troa cainöjëne kow la maca ne la Baselaia i Akötresie, nge nemene hë elany la manathithi hnei angatr hna troa kapa qa ngön? The cipane kö la maca ne ithue ­mejiune cili!

• Nemene “maca ka loi” la nyine troa cainöjën?

• Tune kaa la aqane xötrethenge hnene la Itretre Anyipici Iehova la itre aqane cainöje i Iesu?