Ala nyimu la itre atr ka tha hane hmaca kö sine la itre hmi, pine laka pëhë ekeukawane itre ej, nge pëhë atre amamai gojenyi ngöne la götrane ua. Ngo pine nemene matre ka loi koi nyipunie troa hane sine la itre icasikeu ne la Itretre Anyipici Iehova? Nemene la hnei nyipunieti hna troa öhne e cili?

Lolo la hna ikep hnene la lapa trene ihnim nge ka inyipi. Ame ekö ngöne lo itre macatre hneijine i Keriso, itre Keresiano a ce huliwa hnine la itre ekalesia, me icasikeu troa atrunyi Akötresie, me inine la Tusi Hmitrötr, me ithuecatrekeu. (Heberu 10:​24, 25) Keukawa angatr e hnine la itre icasikeu, ke drenge hi angatr ka hape, angatr e nyipine la itre nyipi sinee, ene lo itre trejine me angatr ngöne la götrane la ua. (2 Thesalonika 1:3; 3 Ioane 14) Celë hi madrine lai hne huni hna hane kapa enehila, thenge la tulu ka lolo hnei angatre hna amë.

Lolo la aqane ini së troa trongëne la itre trepene meköti ne la Tusi Hmitrötr. Tune la tulu hna amë hnine la Tusi Hmitrötr, itre trahmanyi me föe, me itre nekönatr enehila a ce sine pala hi la itre icasikeu. Kola ini huni hnene la itre ka atreine hamë ini, troa trotrohnine la aqane troa trongëne la itre trepene meköti ne la Tusi Hmitrötr, ngöne la nöjei drai ne mele hun. (Deuteronomi 31:12; Nehemia 8:⁠8) Eahuni a amamane la mejiune hun qa ngöne la itre mekune hne huni hna ce thawa me itre nyima hne huni hna ce thing ngöne la itre icasikeu.​—Heberu 13:15.

Kola acatrene la lapaune së koi Akötresie. Hnei Paulo aposetolo hna qaja kowe la ketre ekalesia ne la hneijine i nyidrëti ka hape: “Atraqate la pi tro ni a iöhnyi me nyipunie,. . . mate troa ce akeukawanyi ni me nyipunie, hnene la ce lapaune shë.” (Roma 1:​11, 12) Jëne la hna sine lapane la itre icasikeu memine la itre xa Keresiano, tre kolo hi lai a acatrene la lapaune hun, me aja huni troa mele tune la Keresiano.

Maine ijije koi nyipunie troa hane sine la itre icasikeu ne la ekalesia, ange traqa pi, matre ketre sipu öhne jë kö nyipunie la itre ewekë cili. Tro ha xöle kapa nyipunie e cili. Pë pena kö kuië mani.

• Nemene la tulu hna xome hnene la itre ekalesia göne la itre icasikeu?

• Nemene la aqane tro nyipunieti a sipu öhnyi manathithi qa ngöne la itre icasikeu ne la ekalesia?