Ala nyimu la itre atr ka mekune ka hape, ka hnyipi fetra hi la hmi ne la Itretre Anyipici Iehova. Ngo hnei Akötresieti hna qaja kowe la itre hlue i Nyidrëti ekö, a traqa ha koi 2 700 lao macatre enehila, ka hape itretre “anyipici” Nyidrëti angatr. (Isaia 43:​10-12) Hna pane ati ëjene la Itretre Anyipici Iehova ekö ka hape, Les Étudiants de la Bible (Kola hape Itretre Ini Tusi Hmitrötr), uti hë lo macatre 1931. Ngo pine nemene kö matre saze pi pena koi, Itretre Anyipici Iehova?

Kola amamane ka hape, drei la Akötresi hun. Ame ngöne la itre pepa hna ewath ekö, tre traqa koi itre thauzane la kola mama la ëje i Akötresie, ene Iehova, ngöne la Tusi Hmitrötr. Ngo nyimu pengöne aqane ujëne hë la ëje cili hnene la itre xa Tusi Hmitrötr; kola nyihnane la nyipi ëje hnene la itre xa hnaewekë, tui Akötresie, maine Joxu. Ngo hnei Akötresieti hna amamane hnyawa koi Mose la sipu ëje i Nyidrë, ene Iehova, me hape: “Celë hi ëjenge epine palua.” (Esodo 3:15) Celë hi matre isapengöi Nyidrëti catre memine la itre xa haze. Kola elë la madrine hun e troa hë huni thenge la ëje i Akötresie.

Kola amamane hnyawa la hnëqa hun. Qaane ju hi Abela ekö, ala nyimu catre la itre atr, ka anyipici Iehova, lo Akötresie hnei angatre hna lapaune kow. Celë hi hna hane kuca hnei Noa, me Aberahama me Sara, me Mose, me Davita, me itre xane ju kö ka hane sine la trongene “la itete anyipicine ka ala nyimu.” (Heberu 11:​4–12:⁠1) Ame mina fe enehila, eahuni a catre qaja la nyipici göi Akötresie, tune lo atr trene hnëqa ngöne hna kootr, ka thele troa anyipicine me nyixölëne la ketre atr hna jele ngazone menun.

Eahuni a xome la tulu i Iesu. Tusi Hmitrötr a qeje nyidrëti ka hape, “ate anyipicine ka nyipici me meköt.” (Hna Amamane 3:14) Ketre hnei Iesu mina fe hna qaja ka hape hnei nyidrëti hna ‘amamane koi itre atr la atesiwa i Akötresie’ me ‘anyipicine la nyipici’ göi Iehova. (Ioane 17:26; 18:37) Qa ngöne lai, hnëqa ne la itretre xötrethenge Keriso troa anyipicine me qaja la ëje i Iehova. Celë hi hnëqa lai hna thele troa eatrëne hnene la Itretre Anyipici Iehova.

• Pine nemene matre saze ëje pi lo itre hna hëne ekö ka hape, Les Étudiants de la Bible (Kola hape Itretre Ini Tusi Hmitrötr) nge tro pena ha a Itretre Anyipici Iehova?

• Qaane eue hë la kola hetre itretre anyipici Iehova e celë fen?

• Drei la Atre Anyipici Iehova ka sisitria?