Hnaewekë qene Heberu la Bethela, nge kola hape “ēnē i Akötesie.” (Genese 28:17, 19) Aqane hëne hi la itre hnë huliwa ne la Itretre Anyipici Iehova lai; hna acile itre eje e cailo fen matre troa amekötine la aqane tro fë la huliwa ne cainöj, me hamëne la itre ixatua ka ijij. E Neweyok la Hnalapa Ne Xomi Meköti ne la Itretre Anyipici Iehova, nge kola huliwa e cili hnene la Lapa Ne Xomi Meköt, matre troa wai emekötine la itre huliwa nyine troa kuca ngöne la itre Bethela e cailo fen. Ame la itre atr ka huliwa ngöne la itre hnë huliwa cili, tre angatre hi lo itre atrene la lapa ne la Bethela. Tune la hnepe lapa ka cas, angatr a ce mele me ce huliwa, me ce xeni me ce inine la Tusi Hmitrötr.​—Salamo 133:⁠1.

Hnë huliwa ka ketre pengön, ke itre atrene la lapa cili a isa hamëne gufane asë la hnei angatre hna atrein. Ame ngöne la itre Bethela asë, hnene la itre trahmanyi me föe hna sipu iëne troa ce huliwa drai ka pexej, göi troa kuca la aja i Akötresie me ce huliwa thatraqane la Baselaia. (Mataio 6:33) Hna hamë hnahage ne meköle i angatre asë hi nge kola ithua i angatr, nge hetre hnepe mani hna hamën, nyine tro hi a meku angatr. Hna isa thewe huliwa i angatre ngöne la Bethela; matre itre xan a cilë biero, itre xan a kuci xen, nge itre xan a ati peleitr. Itre xane a huliwa ngöne la itre hna fejane me kuci tus, itre xan a nyidrawa uma, me wasi mano; itre xane fe a wange la itre nyine kuca matre lolo pala hi la Bethela, me itre xa huliwa ju kö.

Ketre hnë huliwa göi troa sajuëne la huliwa ne cainöje trootro. Ame la pane hnëqa nyine troa kuca hnene la itre Bethela, tre ene la troa fe gojenyine la nyipici matre troa ketr la nöjei pengöne atr. Kola eatrëne la mekune cili hnene fe la sine boroshüre celë. Hna cinyihane eje thenge la aqane amekötine hnene la Lapa Ne Xomi Meköt; nge hna up e cailo fene jëne la itre ordinatör, kowe la itre ka ujë qene hlapa ngöne la fene hnengödrai. Nge kuci tusine jë hë, jëne la itre masine ne feja itus ka huliwa nyimenyim, me iupi fë pi hë kowe la 110 000 nge hetre munëne lao ekalesia. Ame la isa pengöne huliwa hna isa athipe celë, tre hna eatrëne hnene la lapa ne la itre Bethela asë, matre troa sajuëne la hnëqa ka sisitria catr, ene la troa cainöjëne la maca ka loi.​—⁠Mareko 13:10.

• Drei la itre ka huliwa ngöne la itre Bethela, nge nemene la hna kuca thatraqai angatr?

• Nemene la huliwa ka sisitria catr hna sajuëne hnene la itre hna kuca hnine la itre Bethela?