HNA mele hnei perofeta Daniela, 500 lao macatre qëmekene troa hnaho Iesu. Ngo hnei Iehova hna amamane koi Daniela la ketre ithuemacany ka aijijën la itre Keresiano, troa atrehmekun la ijine troa ië Iesu matre tro nyidrë a Mesia maine Keriso. Hna qaja koi Daniela ka hape: “Ate hmekune jë, me trotrohnine laka qan’ e tro la tenge  ewekë troa xupe hmaca Ierusalema uti hë la Mesia Joxu, te, [“Seven lao wiik,” MN ], me [“sikisitre tru lao wiik,” MN ].”​—Daniela 9:​25.

Ame la nyine troa pane kuca matre troa atrehmekune hnyawa la ijine traqa la Mesia, tre, ene la troa atre ka hape nyiqaane eu la hneijin, ene lai hatren ka troa tro xomi së kowe la Mesia. Thenge la hna perofetan, tre, “qan’ e tro pi la tenge ewekë troa xupe hmaca Ierusalema.” Eu la kola nyiqaane “tro la trenge ewekë” cili? Thenge la hna qaja hnene la atre cinyihan la tusi Nehemia hnine la Tusi Hmitrötr, hna tro la tenge ewekë troa xupe hmaca la itre hna xupi hag e Ierusalema “ngöne la macate ka caate i Aretaseta joxu.” (Nehemia 2:​1, 5-8) Kola anyipicine hnene la itretre inin la aqane trongen la mele ne la atr, ene lo itre historiens, ka hape, ame ngöne lo macatre 474 M.P.K.  tre, kolo hi a pexeje la pane macatre ne musi Aretaseta. Qa ngöne lai, ame la hnaatruedre ne macatre ne musi nyidrë, tre, 455 M.P.K. Haawe, atre hë së enehila la ijine nyiqaane lo hna perofetan hnei Daniela göne la Mesia, ene la macatre 455 M.P.K.

Kola amamane hnei Daniela la eqean la hneijin ka nyiqaane ngöne lo lai macatre 455 M.P.K., uti hë la kola traqa la “Mesia la joxu.” Kola qaja hnene la hna perofetan ka hape, ‘seven lao wiik, me sikisitre tru lao wiik’​—matre 69 asë lao wiik. Ijetre la eqeane la hneijine cili? Nyimutre la itre Tusi Hmitrötr ka qaja ka hape, thaa itre wiik ka sevene kö lao drain, ngo itre wiik, laka, e caa drai, tre, caa macatre. Haawe, matre e caa wiik, tre seven lao macatre. Thaa ka sihngödri kö koi angetre Iudra ekö, la aqane trotrohnine la itre wiik ka seven lao macatre. Drei la ketre ceitun, hnei angatr hna metrötrën la ketre feet hna hape macatre hna asabathin, ngöne la nöjei hnaasevenene macatre. (Esodo 23:​10, 11) Qa ngöne lai, ame la etrune lo 69 lao wiik, tre, pine laka e caa wiik, ke kösë 7 lao macatre; haawe e sevene lao wiik, tre, traqa kowe la 483 lao macatre la etrune asë.

Haawe, tro së enehila a nyiqaane e la 483 lao macatre, troa nyiqaan lo macatre 455 M.P.K., kola traqa meköti ngöne la macatre 29 M.K. Celë hnyawa hi lo macatre ne Bapataiso Iesu, matre Mesia hë nyidrë! * (Luka 3:​1, 2, 21, 22) Hapeu, thaa celë kö la ketre aqane eatre hnyawa la hna perofetane hnei Tusi Hmitrötr?