THAA hnei Tusi Hmitrötre kö hna qaja la drai ne mala Iesu. Ngo hnene eje pe hna hamën la nyipi kepin matre, thaa ijije kö tro sa qaja ka hape, hna hnaho nyidrë ngöne la treu Diseba.

Pane mekune ju la pengöne la drai ngöne la treu Diseba e Betheleema, lo nöj hna hnaho Iesu ngön. Ame la treu Kiselu koi angetre Iudra (kola qaja la Nofeba/Diseba) tre, celë hi ketre ijine hnötr nge manie lapaa. Thupene lai, tre, kola xejë la treu Tebeth (Diseba/Januare). Kolo hi lo ijine ngöne la macatre, kola hnötre catr matre kola wië la itre hene wetr hnei kiona. Tro sa wang la hnei Tusi Hmitrötr hna qaja göne la pengöne drai ngöne la itre götrane cili.

Kola amamane hnei Ezera ketre atre cinyihan la Tusi Hmitrötr laka, ame la treu Kiselu, tre, thaa sihngödre kö la treu cili kowe la itre atr, pine laka, ketre treu ka hnötre catr nge ijine manie lapaa. Thupene la hnei Ezera hna qaja ka hape, hna traqa itronyi la ka ala nyimu e Ierusalema “ngöne la teu ka ekengemen [hna naenene treu, Kiselu] nge drai caate [truedre] ne la teu.” Nyidrëti fe a qaja ka hape ame la itre atr, ke, “kola hmengöhmengöne pine . . . la mani.” Qa ngöne la engazon la drai ngöne la ijine cili ne la macatre, hna qaja hnene la itre atr ka icasikeu ka hape: “Ijine mani, nge tha ’teine kö huni troa cil’ e kuhu  qëhnelö.” (Ezera 10:​9, 13; Ieremia 36:22) Pëkö caa atre thupë mamoe ka atreine lapa e kuhu qëhnelö e jidr me ume mamoe i angeic, ngöne la treu Diseba!

Ngo, kolo pe a qaja hnei Tusi Hmitrötr ka hape, ame la itretre thupë mamoe, tre, angatr e kuhu trön la itre uma memine la itre si angatr, ngöne la jidri ne mala i Iesu. Eje hi laka, kola amamane hnyawa hnei Luka, ketre ka cinyihan la Tusi Hmitrötr, ka hape, ame ngöne la ijine cili, ame la itretre thupë mamoe, tre, angatr “ngöne la hlapa cili, angat’ a hmekëne e jidi la ite mamoe i angat” ezine e Betheleema. (Luka 2:​8-​12) Kola mama hnyawa laka ame la itretre thupë mamoe, tre, angatr ngöne la hne hlapa, e kuhu trön, thaa tro fë hmekuje kö la itre öni ngöne la drai, ngo ce angatr mina fe memine itre ej e jidr ngöne la hlapa. Hapeu, ijije kö troa mele e kuhu trön ngöne la kola hnötr me manie lapaa e Betheleema ngöne la treu Diseba? Ohea. Haawe, kolo hi lai a amamane hnyawa jëne la itre ithuemacanyi celë laka, thaa hna hnaho Iesu kö ekö ngöne la treu Diseba. *

Kola qejepengöne hnyawa koi së hnene la Wesi Ula i Akötresie lo ijine meci Iesu, ngo coco catre la itre ithuemacany hna hamën göi ijine mala i nyidrë. Kola amekunë së la itre trenge ewekë i Solomona Joxu, kola hape: “Nyipi ewekë la hlemu loi hune la wakacu ka loi, nge nyipi ewekë la drai ne meci hune la drai ne traqa shë.” (Ate Cainöj 7:1) Haawe, thaa sesëkötre kö së la Tusi Hmitrötr a hamën la itre ithuemacanyi göne la huliwa ne cainöje i Iesu memine la meci nyidrë, ngo co pë hë göne la ijine mala i nyidrë.