KOLA qaja hnene la itre ka lapaune kowe la ini ne la Trinité ka hape, ame Akötresieti tre, ka ala kön: Tretretro, me Hupuna, me Uati Hmitrötr; kola hape köni atr ngo caasi hi angatr. Hna qaja fe ka hape, ka ceitun asë hi lai köni atr cili, ka pucatin’ asë hi angatr, nge ka pëkö qaane i angatr asë isa ala caas. Haawe, thenge la hna inin hnene la Trinité, Akötresie la Tretretro, Akötresie la Hupuna, nge Akötresie la Uati Hmitrötr, matre caasi hi la Akötresie, ngo ka könitre pe.

 Ala nyimu catre la angetre lapaun kowe la ini hna hape Trinité. Atrehmekune hnyawa hi angatre ka hape, thatreine kö angatr troa qejepengöne lai ini cili. Nge angatre fe a mekun ka hape, ketre ini lai hna xom qa hnine la Tusi Hmitrötr. Ngo ame la “Trinité,” tre, ketre hnëewekë lai ka paatre kö e hnine la Tusi Hmitrötr. Ngo hapeu, hetre itre mekune kö e hnine la Tusi Hmitrötr nyine qejepengöne la Trinité? Loi e tro sa pane goeën la ketre xötr ne la Tusi Hmitrötr hna majemine xom hnene la itre ka lapaune kowe la Trinité, matre troa sajuën la ini cili.

Kola qaja ngöne Ioane 1:1 ka hape: “Ngöne la qane la Logo, nge thei Akötesieti la Logo nge Akötesieti la Logo.” Kola amamane pë hë e thupen hnei Ioane aposetolo, ngöne pala hi la mekene ka caas, ka hape, ame la “Logo” tre, Iesu. (Ioane 1:​14) Ngo pine pe laka hna hëne la Logo ka hape Akötresie, haawe, öni itre xane jë hi ka hape, ame la Hupuna memine la Tretretro, tre, caasi hi nyidro, Akötresieti ka caasi hi lai.

Tro pe sa mekune hnyawa laka, ame la götrane la Tusi Hmitrötr celë, tre, hna cinyihane eje ekö ngöne la qene Heleni. Thupene pë hë, kola ujëne jë pe qa ngöne la qene Heleni kowe la itre xaa qene hlapa. Ngo hetrenyi la itre xaa ka ujën la Tusi Hmitrötr ka thaa hane kö xome la hnëewekë celë, hna hape, “Akötresieti la Logo.” Pine nemene laka thaa hnei angatre kö hna hane ujëne tune lai? Pine laka, hna nyi trepene la atrehmekune i angatr ngöne la qene Heleni ekö, nge hna hane cinyihane fe la Tusi Hmitrötr ngöne la qene hlapa cili, ene pe traqa ju hi la mekune koi angatre troa ujën ketre pengönene lai xötrehnëewekë hna hape, “Akötresieti la Logo.” Nemene ju hë la aqane ujëne ngöne la itre Tusi cili? Hanawang la itre hnepe ceitun: “Ame la Logo [trenge ewekë] tre ketre ua ka tui Akötresie.” (Louis Segond ) “Ame la Logo tre, ketre akötresie.” (The New Testament in an Improved Version) “Ce Logo ekö me Akötresie, nge ce pengö i nyidroti hi.” (The Translator’s New Testament) Qa ngöne la itre mekune celë, mama ha la pengöne la Logo: thaa Akötresieti kö nyidrë. * Ngo ame pe, pine laka, draië catre la Logo hune la nöjei hna xup hnei Iehova, haawe, ene qaja jë hë ka hape, ame la Logo, tre, “ketre akötresie.” Ame la alien la hnëewekë celë “akötresie” tre, kola hape “ketre trene men.”

Ala nyimu la itre atr ka thatre la Tusi Hmitrötr qene Heleni. Haawe,  tune kaa la aqane tro epuni a atre hnyawa la aliene la trenge ewekë hna cinyihan hnei Ioane aposetolo? Mekune ju la ceitune celë: Kola qejepengöne la ketre topik hnene la ka ini kowe la itre hnainin. Ngo thupene hë lai, isapengöne kö la aqane trotrohninene la itre hnainin. Tune kaa la aqane tro la itre hnainin a senge la jole cili? Tro angatr a sipone kowe la ka ini troa hamën la itre xaa ithuemacany. Eje hi laka, ame hë la angatr a atre la itre xaa mekun, tro ha xatua angatre troa trotrohnine hnyawa la topik hna ithanatan. Ceitune hi lai memine la troa atre hnyawa la alien la Ioane 1:​1, laka, ijije hi tro epuni a goeën la Evangelia i Ioane matre troa xome la itre xaa ithuemacanyi ngöne la göhmeku i Iesu. Ame hë la epuni a kapa la itre xaa mekun ngone la topike cili, eje hi lai laka, tro ha xatua epuni troa traqa kowe la aliene mekune ka meköt.

Drei la ketre ceitun, pane wange ju së lo hnei Ioane hna cinyihan ngöne la mekene 1, xötre 18: “Pa palua kö ate hna goeë Akötesie [ka pucatin’ asë].” Ngo hnene la itre atr hna öhnyi Iesu, lo Hupuna, ke, kola qaja hnei Ioane ka hape: “Hna angöneteine la Logo [Iesu], nge nyidëti a hunuma the shë, nge öhnë hë huni la lolo i nyidë.” (Ioane 1:​14) Haawe, thatreine kö troa qaja ka hape, ame la Hupuna, tre, Akötresieti hi ka pucatin’ asë. Kola qaja fe hnei Ioane ka hape, “thei Akötesieti” la Logo. Matre hapeu, atreine kö tro la ketre atr a ce memine la ketre, nge kolo fe a qaja ka hape angeice hi lai atr hna ce memin? Ketre, tune la hna cinyihan ngöne Ioane 17:​3, Iesu a amamane la eisapengöi nyidrë memine la Tretretro e koho hnengödrai. Nyidrëti a hën la Tretretro i nyidrë ka hape, “nyipi Akötesie ka cas.” Nge ame hë ngöne la pune la Evangelia, hnei Ioane hna amexeje hmaca lo lai itre hnepe mekun me qaja ka hape: “Ase hë cinyihane la nöjei ewekë cili, mate lapaune nyipunie, laka Iesu la Keriso, Hupuna i Akötesie.” (Ioane 20:31) Epuni a öhne laka, thaa hna hë Iesu kö e celë ka hape Akötresie, ngo Hupuna i Akötresie. Hna hamën la itre xaa ithuemacanyi celë ngöne la Evangelia i Ioane, nge kola amamane la aqane troa trotrohnin la Ioane 1:1. Iesu la Logo, ene la “ketre akötresie,” nge ame la aliene lai, tre, ka draië la göhmeku i nyidrë, ngo thaa Akötresie ka Pucatin’ asë kö nyidrë.

Pane mekune hmaca jë lo ceitunene la ka ini memine la itre hnainin. Maine jë hetrenyi petre kö la itre xan e angatr ka luelue, ngacama hna qejepengöne atrune hë hnene la ka hamë ini. Nemene la nyine tro angatr a kuca? Tro angatr a tro kowe la ketre ka hamë ini, matre tro pala kö a thele ithuemacany ngöne lai topike ka caas. Maine ceitune hi la hna qejepengöne hnei angeic memine lo hnapan, haawe,  tro ha xecie hnyawa kowe la itre hnainin la enyipicine lo lai itre mekun hna kapa ha. Ketre tune mina fe laka, maine thaa xecie hnyawa kö koi epuni la alien la hna qaja hnei Ioane, ngöne la pengö i Iesu memine la Akötresie ka Pucatin’asë, wange ju pena la itre xaa ithuemacany thene la ketre ka cinyihan la Tusi Hmitrötr. Wange ju la hna cinyihan hnei Mataio, matre nyine ceitun. Angeic a xome la itre trenge ewekë i Iesu ngöne la pune la fene celë, öni nyidrë ka hape: “Ngo ame la drai memine la haua cili, te, pëkö ate ate, kete tha ’te kö la ite angela e hnengödrai, memine la Nekön, ngo Kakati hmekuje hi.” (Mataio 24:36) Tune kaa la aqane acatren hnene la itre trenge ewekë celë laka, thaa Akötresie ka Pucatin’ asë kö Iesu?

Iesu a qaja ka hape atre hnyawa kö la Tretretro hune la Hupuna. Ngo maine Akötresie ka Pucatin’ asë ju Iesu, tro hi nyidrëti a hane atre tune la Tretretro i Nyidrë. Mama hnyawa hi e celë, ka hape, ka draië catre kö la Tretretro hune la Hupuna. Ngo tro pena itre xan a qaja ka hape: ‘Lue pengö i Iesu. Ame e celë tre, nyidrëti a ithanata ngöne la ngönetrei ne atr.’ Nga maine nyipici lai, tune kaa pë hë la uati hmitrötr? Maine ame ju la Uati Hmitrötr memine la Tretretro, tre, Akötresieti hi nyidro, pine nemene kö laka thaa hane fe kö Iesu qaja ka hape, atre fe hi hnei uati hmitrötr la hna atre hnene la Tretretro?

Ame ngöne la nyipunie a sisedrën me inine la Tusi Hmitrötr, haawe tro hë epuni a majemine troa xome la itre xötr ne la Tusi Hmitrötr ka nyimutre, nge ka itretrengekeu memine la topike cili. Itre eje a acatrene hnyawa la nyipici göne la Tretretro, me Hupuna, me Uati Hmitrötr.​—Salamo 90:2; Ite Huliwa 7:​55; Kolose 1:​15.