1, 2. Pine nemen matre hetre eloine e itre xaa ijin la troa hnying?

MEKUNE hi nyipunieti lo aqane hnyingene la itre nekönatr? Ala nyimu nyudren angetre nyiqaane hnying nge kolo petre hi a xötrei ithanata. Pane goeë së ju hi me hnyinge koi së ka hape: Pine nemen matre kola bulu la hnengödrai? Hna kuca hnei nemen la itre wëtresij? Drei la ka inin la itre waco troa ho? Maine jë tro nyipunie a thele jëne troa sa hnyawa pala hi la itre hnying; ngo thaa ewekë ka hmaloi kö hnene laka, ame hmaca ju hi la ketre mekune ka lolo hnei nyipunie hna xom nyine troa sa lai hnying, kolo hmaca fe hi lai a nyi jëne ju la ketre hnying: Pine nemen?

² Thaa itre nekönatr hmekuje kö la itre ka hnying. Ame la easë a tru trootro, hetrenyi pala hi la itre ewekë hne së hna pi atre. Easë a hnyingëne la jë së, maine easë a hnying matre troa atre la itre ewekë ka ngazo nyine troa neën, maine pena matre qaja jë koi së la itre ewekë hne së hna pi atre. Ngo ala nyimu mina fe la itre atr ka thaa hane hmaca kö hnying, ngacama kolo ju hë lo itre hnying ka nyipi ewekë catr. Haawe, thaa thele hmaca kö angatr troa sa la itre hnying.

3. Pine nemen matre nyimutre la itre atr ka thaa hane hmaca kö thele troa atre la itre mekune ka sa la itre hnying ka nyipi ewekë?

³ Pane mekune ju la hnying ngöne la icetrön la itusi celë, ka tune mina fe la itre xan ka mama ngöne la qaan la itus, memine la itre hnying ka eje ngöne la qaane la mekene celë.  Celë hi la itre xaa mekune lai ka nyipi ewekë catr hne së hna pi atre, ngo nyimutre la itre atr ka thaa hane hmaca fe kö ajan troa atre la itre mekun ka sa la itre hnying celë.” Pine nemen? Hapeu, eje kö e hnine la Tusi Hmitrötr la itre mekun ka sa la itre hnying celë? Ame itre xan, angatr a mekun, ka hape, jole catr koi angatr troa trotrohnin. Ame itre xan, tre angatr a xou troa hnying wanga ahmahmanyi angatre jë. Ame itre xan, tre, angatr a mekun, ka hape, ame la itre hnyinge cili, tre, thatraqane hmekuje hi la itre hene ne hmi me itre ka hamë ini. Tune kaa fe nyipunie?

4, 5. Nemene la itre xaa hnying ka tru hne së hna isa thel ngöne la mele së, nge pine nemen matre loi e tro sa thele la itre mekune ka sa itre ej?

⁴ Nyipici laka, troa hetrenyi la aja thei nyipunieti tro fe a hane sa la itre hnyinge i epun, ene lo itre hnyinge ka nyipi ewekë kowe la mel. Maine ame ngöne la itre xaa ijin, tre, nyipunie a thele ka hape: ‘Nemene la aliene la mel? Nemene jë la pengöne la mele celë, meci jë hi la pune kowe ej? Ka tune kaa lae Akötresie?’ Ka lolo catr troa sa la itre hnyinge celë, nge the sixele kö, loi pe e troa catre thele pala hi la itre mekun ka sa hnyawa la itre hnyinge cili. Hna qaja hnei Iesu Keriso ketre atre ini ka hlemu, ka hape: “Sipone, ame hna hamë nyipunieti pi ; thelejë ame hna öhnejë nyipunie ; fenafena ame hna thawa pi koi nyipunie.”​—Mataio 7:7.

⁵ Maine tro nyipunie a “thel” la itre mekune ka sa la itre hnyinge ka nyipi ewekë, tro hë epuni a öhne la eloine la troa thele ewekë. (Ite Edomë 2:​1-5) Ngacama hna sa la itre hnyinge i epun hnene la itre xaa atr, ngo hetrenyi kö la itre mekune ka sa hmekune hnyawa itre ej, nge ijije hi tro sa xome itre ej e hnine la Tusi Hmitrötr. Thaa ka jole menu kö troa trotrohnine itre ej. Ame la ketre eloine itre ej, tre, ka ithue mejiun me madrin koi së. Nge ijije hi tro itre ej a xatua nyipunie troa hetrenyi la mele ka loi enehila. Ame la hnapan, tre, loi e tro sa pane wang la ketre mekun ka ajolën la mele ne la itre atr ka nyimutre.

6. Pine nemen matre nyimutre la itre atr ka mekun, ka hape, thaa Akötresieti kö a hnehengazone la atr ngöne la kola traqa la itre akötr koi angeic?

⁶ Nyimutre la itre atr ka sa ka hape, eje hi. Öni angatr ka hape, ‘Maine hnei Akötresieti ju hna hane hnehengazo së, tune kaa, thaa tro jë kö la ihnadro a ketre göhnë ka sisitria?’ Ame la easë a goeëne xötreithi së e celë fen enehila, tiqa ha eje hnene la isi, me imethinë,  me jiin. Nge hna tithi së asë hi hnei mec, ce akötre asë hi së, hetrenyi asë hi së la itre sinee së ka mec. Celë hi matre kola qaja hnene la itre atr ka ala nyimu ka hape, ‘Maine hnei Akötresieti ju hna hnehengazo së memine la itre jole the së, tune kaa thaa tro jë kö Nyidrëti a hmekën matre thaa tro kö a traqa la itre ewekë cili koi së?’

7. (a) Tune kaa la aqane ini ne la itre hene ne hmi matre kola mekune menune hnene la itre atr ka ala nyimu ka hape, hna thinge la hni Akötresie? (b) Nemene la ini hna hamën hnei Tusi Hmitrötr göne la itre akötre së?

⁷ Ame la ketre engazone lai, tre hnene la itre ini hna hamëne hnene la itre hene ne hmi kowe la itre atr, ene pe mekune jë hi angatr, ka hape, hnei Akötresie hna thinge la hni Nyidrë. Nemen la ka nyi jëne la mekune cili? Hnene la hna traqa la itre hulö, öni angatr, ka hape, aja i Akötresieti lai. Eje hi laka, kola upe zö Akötresie la itre ewekë ka ngazo hnene lo lai itre ka hamë ini. Ngo hapeu, celë kö la nyipici lai hna atë hui Akötresie? Nemene la nyipici hna inin hnei Tusi Hmitrötr? Kola sa la hnying ngöne la tusi Iakobo 1:​13, kola hape: “The tro kö kete ate a qaja e kola tupathi angeic, ka hape, Hna tupathi ni qa thei Akötesie ; ke tha ’teine kö troa tupathi Akötesie hnei ngazo, kete tha hnei nyidëti kö hna tupathi kete ate.” Haawe, kola mama hnyawa laka thaa Akötresieti kö la qaan la nöjei akötre ka traqa kowe la fen enehila. (Iobu 34:​10-​12) Nyipici, hnei Nyidrëti hna nue la itre ewekë ka ngazo. Ngo isapengöne kö la easë a qaja ka hape, hna nue troa kuca la ketre ewekë memine la troa qaja ka hape, Nyidrëti la qaan la ewekë cili.

8, 9. (a) Tune kaa la aqane tro sa amamane la eisapengönen lo kola qaja ka hape, kola nue la iakötrë, memine la kola qaja ka hape, qaan la iakötrë? (b) Pine nemen matre thaa meköti kö e troa qaja angazon la mekune i Akötresie, ene la hna nue la itre atr troa xötrethenge la gojenyi ka ngazo?

⁸ Hanawang la ketre ceitun, pane mekune ju së la pengöne la ketre keme ka inamacan nge trene ihnim ; ka tru hë la nekö i nyidrë trahmany, ngo koilo pala kö thei keme me thin. Ame hë la kola icilekeu me mekun hnene la nekön troa tro trije la hnalapa, thaa hnei keme kö hna sewe angeic. Kola kuca hnene la nekön la itre ewekë ka ngazo ngöne la mele i angeic, nge angeice fe a xeni pune la aqane ujë ka menu i angeic. Hapeu, tro kö a upe kowe la keme la zön la itre jole ka traqa kowe la nekön? Ohea. (Luka 15:​11-​13) Ketre tune mina fe, thaa hnei Akötresieti kö hna sawa la itre atr e iëne jë angatre troa xötrën la gojenyi ka ngazo, celë hi matre thaa ijije kö troa upe koi Nyidrë la zön la itre jole ka traqa koi angatr. Nyipici, kola mama hnyawa laka, thaa meköti kö tro sa upe zö Akötresie la nöjei hulö ka traqa kowe la itre atr.

 ⁹ Hetrenyi la itre nyipi kepin matre Akötresieti a nue la itre atr troa xötrën la gojenyi ka ngazo. Pine laka Nyidrëti la Atre xupi së ka inamacan nge ka men, haawe thaa ijiji së kö tro sa sei kepin matre tro Nyidrëti a qejepengöne la mekune cili. Ngo qa ngöne la ihnimi Nyidrë, ene pe Nyidrëti a amamane jë koi së la itre kepine cili. Tro sa atre hnyawa la itre kepine cili ngöne la Mekene 11. Ngo loi e xecie hnyawa koi së laka thaa Akötresieti kö la qaan la itre jol hne së hna qëmeke kow. Nyidrëti pe a hamë së la sipu mejiun matre nyinyin la itre jole cili!​—Isaia 33:2.

10. Pine nemen matre easë a mejiune koi Akötresie laka, tro Nyidrëti a apaatren la nöjei thangane asë ne la iakötrë?

¹⁰ Ka hmitrötre lae Akötresie. (Isaia 6:3) Kolo lai a hape, pë ethane nge wië Nyidrë. Pëkö hnepe engazo i Nyidrë. Haawe, ijije tro sa mejiune hnyawa koi Nyidrë. Thaa ijije kö tro la itre atr a traqa kowe la pengöne cili, pine laka ka tro pala hi angatr a kuca la ngazo. Ngacama tru ju hë la ajan thene la itre atr ka mus troa apaatren la itre ethanyine qa ngöne la aqane ujë ne la itre atr ka ngazo, ngo thatreine jë kö troa ie. Ngo ame Akötresie, tre, ka pucatin asë Nyidrë. Atreine hi Nyidrë nge tro Nyidrëti a apaatren la itre thangane la iakötrë qaa la fen. E traqa ha elanyi la ijin, tro hi Akötresieti lai a kuca matre troa paatre palua la ngazo!​—Salamo 37:​9-​11.

11. (a) Nemene la mekuna i Akötresie göne la itre ewekë ka thaa meköti kö? (b) Tune kaa la mekuna i Akötresie ngöne la itre akötre së?

¹¹ Nemene jë fe la hnei Akötresieti enehila hna hane mekun, qa ngöne la aqane trongene la fen memine la mele së? Eje hi, kola ini së hnei Tusi Hmitrötr ka hape, ame Akötresie, tre, Nyidrëti a “ajane la meköt.” (Salamo 37:28) Haawe, thaa Nyidrëti kö a cile hutrö kowe la itre hna kuca ka loi me ka ngazo. Nyidrëti a methinën la nöjei aqane huliwa asë ka thaa meköti kö. Kola qaja hnei Tusi Hmitrötr ka hape, ame Akötresieti tre, “kola teije la hni nyidë” qa ngöne lo hna tiqa ekö la fen hnene la ngazo. (Genese 6:​5, 6) Thaa ka saze kö Akötresie. (Malaki 3:6) Enehila, Nyidrëti mina fe a methinën la iakötrë ka eje e celë fen. Nge thaa madrine kö Nyidrëti la kola akötr la itre atr. Kola qaja hnei Tusi Hmitrötr ka hape: “Nyidëti a meku nyipunie.”​—1 Peteru 5:7.

12, 13. (a) Pine nemen matre hetrenyi the së la itre thiina ka loi tune la ihnim, nge tune kaa la aqane tro la ihnimi a hetre thangane kowe la aqane goeëne së la fen? (b) Nemene la ka aijijë së troa qaja, ka hape, tro kö Akötresieti elanyi a kuca la ketre ewekë thatraqane la itre jol ka eje ngöne la fen?

¹² Nemene la ka aijijë së troa qaja ka hape thaa madrine kö  Akötresieti la kola akötre la atr? Hetrenyi la ketre nyine troa anyipicin. Kola ini së hnei Tusi Hmitrötr, ka hape, hna xupe la atr hnaiji Akötresie. (Genese 1:​26) Qa ngöne lai, hetrenyi fe së la itre thiina ka lolo, pine laka eje thei Akötresie la itre thiina cili. Hanawang la ketre ceitun, akötre fe kö koi nyipunie la kola öhne la akötre ne la itre xaa atr? Maine epuni a hnehengazone la itre ewekë cili ka thaa meköti kö, haawe, eje hi laka tro kö a sisitria catr la akötre i Akötresie pine la itre ewekë cili.

¹³ Ame la ketre ewekë ka sisitria thene la itre atr, tre ene laka ka hetrenyi the së la ihnim. Iahnue lai ka fetra qaathei Akötresie. Kola ini së hnei Tusi Hmitrötr ka hape, “Akötesieti la ihnim.” (1 Ioane 4:8) Hetrenyi the së la ihnim, pine laka ka ihnimi Akötresie. Hapeu thaa tro jë kö la ihnimi cili a upi epuni troa apën la akötr memine la itre ewekë ka thaa meköti kö e celë fen? Maine hetrenyi ju thei epun la trenge catre troa aejën la mekune cili, tro kö epuni a kuca? Eje hi laka, celë hi hnei epuni lai hna troa kuca! Haawe, nyine tro hi lai a amamane nge ewekë ka xecie hnyawa koi së laka, tro Akötresieti elanyi a apaatren la iakötrë memine la itre ewekë ka thaa meköti kö. Ame la itre hna thingehnaean hna qaja ngöne la qaan la itusi celë, tre, thaa pu ne jidri kö me itre trenge ewekë ka gufa. Xecie hnyawa koi së laka troa eatre hnyawa la itre hnei Akötresie hna thingehnaean! Maine nyipunieti a ajan troa lapaune kowe la itre hna thingehnaeane cili, nyipi ewekë tro epuni a atre hnyawa la pengö i Akötresie Atre thingehnaeane itre ej.

14. Drei la ëje i Akötresie, nge pine nemen matre loi e tro sa xome me amaman ej?

¹⁴ Maine epuni a ajan troa atrepengöi epuni hnene la ketre atr, nemene la nyine tro nyipunieti a kuca? Hapeu, tro kö epuni a hane qaja la ëje i epuni koi angeic? Tune kaa, hetre ëje i Akötresieti kö? Nyimutre la itre  hmi ka sa, ka hape, ame la ëje i Nyidrë, tre “Akötresie” maine “Joxu,” ngo thaa sipu ëje i Akötresieti kö lai. Itre pengö i Nyidrëti lai matre hë Nyidrëti jë tun, kola ceitune memine la easë a hëne la ketre atr ka hape, “joxu” me “perezida,” thaa ëjene kö lai atr, ngo itre pengö i angeice pe. Kola ini së hnei Tusi Hmitrötr la nöjei pengöne aqane hë Akötresie. Tune hi lai hna hape “Akötresie” me “Joxu,” laka lue xaa pengö i Nyidrëti hi lai. Ngo Tusi Hmitrötre fe a ini së ka hape, hetre sipu ëje i Akötresie: Iehova la ëje i Nyidë. Kola qaja ngöne Salamo 83:18 ka hape: “Cilieti la Kasisitia hmekuje hune la fene hnengödrai asëjëihë, nge Iehova la atesiwa i cilie.” Maine paatre kö la ëje cili hnine la Tusi Hmitrötre i epun, maine jë loi e tro epuni a goeën la Itre Xaa Mekun ngöne la itusi celë götrane 195-197, matre troa atre la kepine lai. Ame la nyipici tre, anyimua mama la ëje i Akötresie e hnine la Tusi Hmitrötr ekö ngöne la qaan, traqa koi itre thauzane la hna  cinyihan la ëje cili. Haawe, Iehova a ajan tro fe së a hane atre la ëje i Nyidrë, me hane xome ej. Kösë Nyidrëti a xome la Tusi Hmitrötr nyine troa sipu amamanyi Nyidrë koi së.

15. Nemene la aliene la ëje hna hape Iehova?

¹⁵ Hnei Akötresie hna ketre ati ëje i Nyidrë, nge ketre ëje ka tru aliene catr. Ame la ëje i Nyidrë, ene Iehova tre, kola hape Akötresie ka atreine troa aejëne la itre hnei Nyidrëti hna thingehnaean asë, nge ka atreine eatrën la itre mekuna i Nyidrë. * Ka ketrepengöne catre kö la ëje i Akötresie. Nyidrëti hmekuje hi la ka troa xome la ëje cili. Ngöne la itre götrane ka nyimutre, pëkö ka atreine troa tui Iehova. Ngöne nemene götran?

16, 17. Nemene la hne së hna atre qa ngöne la itre pengöne aqane hë Iehova hna hape: (a) “Kapucatin’ asë”? (b) “Joxu [“ka epine palua,” MN]”? (c) “Atre Ixup”?

¹⁶ Easë a öhne ngöne Salamo 83:18 lo hna qaja hnei Iehova ka  hape: “Cilieti la Kasisitia hmekuje.” Ketre, hna hë Iehova hmekuje hi ka hape, “Kasisitia.” Kola qaja ngöne Hna Amamane 15:3 ka hape: “Hmapati me nyine haine la ite huliwa i cilie, Joxu Akötesieti Kapucatinasë ; meköti me nyipici la ite kala i cilie, cilieti Joxu [“ka epine palua,” Les Saintes Écritures — Traduction du monde nouveau (MN )].” Ame la pengö i Akötresie hna hape “Kapucatinasë,” tre kola ini së ka hape, pëkö ka trene mene tui Iehova. Ka sisitria la mene i Nyidrë; ka draië catre ej. Nge ame la hna hape “Joxu [“ka epine palua,” MN ],” tre kola amekunë së ka hape, ame Iehova tre, hetre ketre götran, laka ka ketrepengöne kö Nyidrë. Ka pëkö qaane i Nyidrë. Kola qaja ngöne Salamo 90:2 ka hape: “Qan’ ekö palua uti hë epine palua cilieti la Akötesie.” Tune kaa, thaa atraqatre fe kö la xou së memine la metrötre së kowe la mekune ka sisitria celë?

¹⁷ Ame la ketre götrane ka amaman ka hape, pëkö ka ceitu me Iehova tre, ene la kola qeje Nyidrë ka hape, Atre Ixup. Easë a e ngöne Hna Amamane 4:​11 ka hape: “Ijiji enëtilai Akötesi hun, troa kapa la nyine atrun, me nyine adraiën, me men ; ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.” Hetrenyi la itre ewekë hne së hna mekun, qaane ju hi la itre ua e koho hnengödrai uti hë la itre wëtresiji ne la jidr, me wene sinöe e hune la picine sinöe uti hë la itre ie ne hnagejë me itre ie ne hneopegejë​—itre eje asë a mel pine laka, Iehova la Atre Xupe la nöjei ewekë asë!

18. Pine nemen matre kola mekune hnene la itre xaa atr, ka hape, thatreine pi kö tro angatr a hane easenyi Akötresie, ngo nemene la hna ini së hnei Tusi Hmitrötr?

¹⁸ Ame la kola öhne hnene la itre xaa atr la angatre a e la itre thiina ka tru i Iehova, hetrenyi ju hi angatr la xoue Nyidrë. Angatr a xouen pine laka ka draië catr Akötresieti koi angatr, matre kösë thaa ijiji angatre kö troa hane easenyi Nyidrë me mekune pena ka hape, ma thaa nyipi ewekë angatre fe kö hnei Nyidrë. Ngo tune kaa, ka meköti kö la mekune cili? Kola ini së hnei Tusi Hmitrötr, laka, tria kö la mekune cili. Ej a qeje Iehova ka hape: “Loi pe ke tha iananyi kö nyidë me eëshë asëjëihë.” (Ite Huliwa 17:27) Kolo fe a ithuecatre koi së hnei Tusi Hmitrötr ka hape: “Eashenyijë koi Akötesie, nge tro nyidëti a eashenyi koi nyipunie.”​—Iakobo 4:8.

19. (a) Tune kaa la aqane tro sa nyiqaane easenyi koi Akötresie nge nemene la thangane ka loi koi së? (b) Nemene la itre thiina i Akötresie ka ketr hnyawa la itre hni nyipunie?

 ¹⁹ Tro së a easenyi Akötresieti tune kaa? Ame la hnapan, tre loi e tro sa catre kuca la itre ewekë hne së hna kuca enehila, ene la troa thele troa atrepengöi Akötresie. Hnei Iesu hna qaja ka hape: “Nge dei lo la mele ka tha ase palua kö, laka tro angat’ a atehmekua cilie la nyipi Akötesie ka cas, me Iesu Keriso la hnei cilieti hna upengëtin.” (Ioane 17:3) Nyipici, Tusi Hmitrötr a ini së laka, ame la troa atrepengöi Iehova me Iesu, tre, jëne troa tro kowe la “mele ka tha ase palua kö”! Tune la hna amamane hë, “Akötesieti la ihnim.” (1 Ioane 4:​16) Nyimutre mina fe la itre xaa thiina i Iehova ka lolo nge nyine hain. Hanawang la ketre ceitun, kola qaja hnei Tusi Hmitrötr, ka hape, ame Iehova tre, “Akötresie, ate utipine me ka ihnim, ate xomi hni ahoean, nge ka tru loi me nyipici.” (Esodo 34:6) Ka “loi [Nyidrë] me ate seng.” (Salamo 86:5) Ka xomihniahoeanyi Akötresie. (2 Peteru 3:9) Ka nyipici Nyidrë. (Hna Amamane 15:4) Maine tro sa catre e pala hi la Tusi Hmitrötr, tro hë së a öhne la aqane amamane Iehova laka eje thei Nyidrë la itre thiina ka loi celë, nge nyimutre la itre xaa thiina nyine hain.

20-22. (a) Hapeu, qa ngöne laka thatreine kö së troa öhnyi Akötresie, ke, thatreine kö tro sa hane easenyi koi Nyidrë? Qejepengöne jë. (b) Nemene la hna upe iele epuni troa kuca hnene la itre xaa atr ka mekune ka hape, angatre a kuca la nyine loi koi epun, ngo nemene la nyine tro nyipunieti a kuca?

²⁰ Nyipici, thaa öhnyi Akötresieti kö hne së, pine laka ketre ua Nyidrë. (Ioane 1:​18; 4:​24; 1 Timoteo 1:​17) Maine tro sa thele troa atrepengöi Nyidrë jëne la Tusi Hmitrötr, ijije hi tro sa hane atre Nyidrë tune la aqane atre së la ketre atr. Tune la hna qaja hnene la atre cinyihane la Salamo, ijije hi tro sa “goeëne la lolo i Iehova.” (Salamo 27:4; Roma 1:​20) Eje hi lai laka, maine tro nyipunieti a catre thele troa atrepengöi Iehova, thaa tro hmaca kö Nyidrëti a sihngödri koi nyipunie, nge ketre kepine lai ka troa aciane la ihnimi nyipunieti koi Nyidrë nge tro fe nyipunieti a easenyi catre koi Nyidrë.

²¹ Tro hë nyipunieti a trotrohnine hnyawa la kepin matre Tusi Hmitrötr a ini së troa mekun ka hape, Iehova la Tretretro së. (Mataio 6:9) Thaa qa ngöne hmekuje kö laka Nyidrëti la qaan la mele së, ngo hnene laka, Nyidrëti a ajan tro sa mele ka loi, tune lo itre keme ka ihnim kola ajane la loi kowe la itre nekö i angatr. (Salamo  36:9) Kola ini së mina fe hnei Tusi Hmitrötr laka ijije hi tro la itre atr a hane itre enehmu i Iehova. (Iakobo 2:​23) Pane mekune jë nyipunie, ijije hi tro nyipunieti a hane ce sinee ne la Atre Xupe la hnengödrai memine la fen!

²² Qa ngöne laka atrepengöne trootro hë nyipunie la Tusi Hmitrötr, traqa pi hi la itre xaa atr ka mekune troa sewe nyipunie troa inine la Tusi Hmitrötr, angatr a mekun ka hape, loi la hnei angatre hna kuca. Maine jë angatr a hnehengazo wanga tro nyipunie a saze hmi. Ngo thaa tro pi kö nyipunie a nue la ketre atr troa sewe nyipunie troa eköth la aqane imelekeu i nyipunieti me Iehova, enehmu ka sisitria.

23, 24. (a) Pine nemen matre loi e tro së a catre hnyingë pengön la itre hne së hna inin? (b) Nemene la topik ne la mekene thupen?

²³ Eje hi laka, ame ngöne la qaan, hetrenyi pala hi la itre ewekë thaa hnei nyipunieti kö hna trotrohnine hnyawa. E hetre hni ka ipië, thaa jole kö e troa sipo ixatua, ngo loi e thaa tro pi kö la hmahma a ajolë epun. Hnei Iesu hna qaja ka hape, ka lolo catr troa ipië, tune la nekönatr. (Mataio 18:​2-4) Tune la hne së hna atre, ame itre nekönatr tre nyimutre la itre hnyinge i nyudren. Aja i Akötresie troa sa la itre hnyinge i nyipunie. Kola qaja aloine hnei Tusi Hmitrötr la itre atr ka canga thele troa atrepengöi Akötresie. Hnei angatr hna thele hnyawa la itre ithuemacanyi hnine la Tusi Hmitrötr, matre troa xecie hnyawa koi angatr laka, ame la hnei angatr hna inin tre, celë hi la nyipici.​—Ite Huliwa 17:11.

²⁴ Ame la sipu aqane troa atrepengöi Iehova hnyawa, tre ene la troa inin la Tusi Hmitrötr. Ka ketrepengöne kö la Tusi Hmitrötr hune la itre xaa itus. Ngöne nemene götran? Tro pë hë së a wange la topike celë ngöne la mekene thupen.