AME ngöne la itre qene hlapa hna cinyihane la Tusi Hmitrötre ngön, tre, traqa koi 70 la etrun la hnëewekë qene Heberu hna hape sheʼohlʹ me qene Heleni hna hape haiʹdes. Caasi hi la aliene la lue hnëewekë celë. Lue hnëewekë ka qaja la pengöne la mec. Ame ngöne la itre xaa Tusi Hmitrötr, tre, kola ujëne itre ej ka hape, hua, maine hnaop. Tro sa pane wang la aqane ujëne la itre hnëewekë cili ngöne la itre xaa mekene la Tusi Hmitrötr.

Kola qaja ngöne Ate Cainöj 9:​10, ka hape: “Pëkö huliwa, me mekun, me wangate hmekun, me inamacan, ngöne la hua [sheʼohlʹ] eö a tro kow.” Hapeu, kolo lai a qaja ka hape ame la sheʼohlʹ, tre, kolo göhnë hnë troa kelem la ketre atr hne së hna hnim? Ohea. E kola qaja hnei Tusi Hmitrötr la ketre hnë kele wezipo, maine hua, tre, kolo kö lo itre xaa hnëewekë qene Heberu me qene Heleni la hna xom, thaa sheʼohlʹ kö me haiʹdes. (Genese 23:​7-9; Mataio 28:1) Ketre, ame la Tusi Hmitrötre a qaja la hnëewekë hna hape sheʼohlʹ, thaa kolo kö a qaja la ketre hua ka tru, nyine troa ce kelem la ka ala nyim, tune lo itre hua nyine ce kelem la itre atren la hnepe lapa ka caas, maine itre xaa atr pena.​—Genese 49:​30, 31.

Haawe, nemene pengöne kö la göhnë hna qaja hnene la sheʼohlʹ? Kola qaja hnene la Wesi Ula i Akötresie laka, ame la sheʼohlʹ, maine haiʹdes, tre, kola qaja la ketre ewekë ka tru catre kö hune la hua ka atraqatr. Drei la ketre ceitun ngöne Isaia 5:​14, kola qaja laka, ame la hedis maine sheʼohlʹ, tre, hna “atrun’ eje kö me nganga atrune nge tha hna tuluth.” Thatreine kö troa e la etrune la itre ka mec hnene la sheʼohlʹ hna ulum, nge kösë thaa nga pala kö. (Ite Edomë 30:​15, 16) Thaa ceitu kö memine la itre hna kele wezipo, laka, hna tuluthe hi la etrun la itre atr ka mec nyine troa keleme ngön, ngo ‘thaa meji kö la hedis [sheʼohlʹ].’ (Ite Edomë 27:20) Pëkö hna hane tiqa la Sheol. Ka pëkö ifegon. Haawe, kola mama hnyawa ka hape, ame la sheʼohlʹ, maine haiʹdes, tre, thaa ketre götrane ihnadro hnë kele wezipo kö. Ngo nyine tro pe a qaja la pengö i itre ka meköle itreqe, kösë nyine nyihatren la imeköle treqe ne la itre ka mec ka ala nyim.

Kola xatua së hnene la ketre ini ne la Tusi Hmitrötr, ene la melehmaca, troa trotrohnin la alien la sheʼohlʹ me haiʹdes. Kola ieakeune hnene la Wesi Ula i Akötresie la sheʼohlʹ me haiʹdes memine  la mec, e hetre melehmaca. * (Iobu 14:13; Ite Huliwa 2:​31; Hna Amamane 20:13) Kola amamane fe hnene la Wesi Ula i Akötresie, laka, ame la itre ka meci e hnine la sheʼohlʹ, maine haiʹdes, tre, thaa itre ka nyihlue i Iehova hmekuje kö, ngo kolo mina fe lo itre atr ka thaa hane kö nyihlue i Nyidrë. (Genese 37:35; Salamo 55:15) Qa ngöne lai, kola inin hnei Tusi Hmitrötr laka, tro ha “mele hmaca la nöjei ka meköt, me ka tha meköti kö.”​—Ite Huliwa 24:15.