1, 2. Ngöne nemene götrane matre kola qaja ka hape, ame la Tusi Hmitrötr, tre, ketre ahnahna ka nyipi lolo catr?

PANE mekune jë la ijine kola hamën koi epuni la ketre ahnahna ka lolo hnene la ketre sinee hnei epuni hna hnim? Thaa epuni hmekuje hi a haine lai ahnahna, ngo atraqatre mina fe la madrine i epun. Eje hi laka, ahnahna lai a qajaqaja la pengöne la ka ham, kola amamane la enyipiewekën la aqane imelekeu i epon. Nyipici laka, canga saqe i epuni olene lai ahnahna hna hamën cememine la hni ka ajan.

² Ame la Tusi Hmitrötr, tre, ahnahna qaathei Akötresie, ijije tro sa olene hnyawa koi Nyidrëti la ahnahna cili. Kola amamane hnene lai itusi cili ka ketrepengöne kö la itre ewekë hne së hna öhne hmekuje hi e cili hnine ej, paatre fe kö hnine la itre xaa itus. Hanawange la ketre ceitun: eje a qaja koi së la aqane xupe la itre wëtresij e koho hnengödrai, memine la ihnadro, memine la pane trahmany me föe. Eje e hnine la Tusi Hmitrötr la itre trepene meköti nyine nyi trepene la mejiune së, matre ixatua koi së troa cile kowe la itre ejolene la mel memine la itre ewekë hne së hna hnehengazon. Ej a qejepengön la aqane tro Akötresie a eatrëne la aja i Nyidrë memine la aqane tro Nyidrëti a axulune la itre aqane mele ka loi e celë fen. Drei la ketre ahnahna ka nyipi lolo catr, ene la Tusi Hmitrötr!

3. Nemene la hna amamane göi Iehova, qa ngöne laka Nyidrëti a hamëne koi së la Tusi Hmitrötr, nge pine nemen matre kola hape ka iakeukawanyi ej?

³ Tusi Hmitrötre fe la ketre ahnahna ka akeukawan la itre hni  së, pine laka, ej a amamane la pengöne la Atre Hamën, ene Iehova Akötresie. Ame la Nyidrëti a hamën la itusi cili, tre celë hi nyine anyipicin, ka hape, ame la aja i Nyidrë, tro së a atre Nyidrëti hnyawa. Eje hi, atreine hi tro Tusi Hmitrötr a xatua nyipunie troa easenyi catr koi Iehova.

4. Nemene la hnei nyipunieti hna hain ngöne la emanane la Tusi Hmitrötr?

⁴ Maine hetre Tusi Hmitrötre i nyipunie, tre, thaa nyipunie hmekuje kö lai trene tus. Ame la Tusi Hmitrötr tre, hna fejan ej ngöne la 2 300 lao qene hlapa nge sin, ka pexeje lai itre xan nge ame ngöne itre xaa qenehlapa tre sine hi; qa ngöne lai, maine ala 100 lao atr e cailo fen, 90 la angetre kapa. Matre kösë caa milio nge sin lao Tusi Hmitrötr hna hamën e nöjei wiik! Traqa koi itre miliar la etrun la itre Tusi Hmitrötr hna fejan, ka pexej maine sine hi. Eje hi, pëkö ketre itusi ka tune la Tusi Hmitrötr.

5. Nemene la aliene la kola hape “qa thene la ua i Akötesie” la Tusi Hmitrötr?

⁵ Ketre, ame la Tusi Hmitrötr tre, “qa thene la Ua i Akötesie.” (2 Timoteo 3:​16) Ngöne nemene götran? Kola sa hnei Tusi Hmitrötr, ka hape: “Hnei ite ate qa thei Akötesie hna ulatine thenge la hna upi angate hnene la Uati Hmitöt.” (2 Peteru 1:​21) Ka ceitune hi lai memine la tusi ne la maseta hna cinyanyin hnene la seketere. Eje e hnine la tusi cili la itre mekunen me ithuemacanyi hna hamën hnene la maseta. Celë hi matre sipu tusi nyidrë la tus, ngo thaa tusi ne kö la seketere. Ceitune hi memine la Tusi Hmitrötr, laka eje e cili hnin  la maca i Akötresie, ngo thaa macane kö la itre atr ka cinyihane ej. Haawe, ame asë hi la Tusi Hmitrötr, tre, “wesi ula i Akötesie.”​—1 Thesalonika 2:13.

6, 7. Pine nemen matre nyine hain la aqane cepunikë la itre mekune ne la Tusi Hmitrötr?

⁶ Traqa koi 1 600 la etrune la itre macatre ne cinyihane la Tusi Hmitrötr, itre hneijin ka isapengön. Isa hneijinene kö la hna mele ngön hnene la itre ka cinyihan, nge ka xulu angatr qa ngöne la itre fami ka isa pengöne aqane mel. Ame itre xan, tre, ka eëny, me ka nyi ie, me ka thupë öni. Ame itre xan, tre, itre perofeta angatr, me angetre amekötin, me itre joxu. Hna cinyihan la ketre evangelia hnei Luka, ketre droketre. Ngacama isapengöne kö la aqane mele ne la itre ka cinyihan la Tusi Hmitrötr, ngo ame pe la aliene la itre hnei angatre hna cinyihan, tre, ka cepunikë hnyawa asë hi qaane ju hi la qaan uti hë ngöne la pun. *

⁷ Kola qaja koi së hnene la pane tusi ne la Tusi Hmitrötr, la qaane matre traqa pi la itre jol kowe la itre atr. Ame la tusi tixenuë, tre, ej a amamane laka troa Paradraiso maine ketre hlapa ka mingöming elanyi la fene hnengödrai asë. Kola qaja hnei Tusi Hmitrötr la itre ewekë ka traqa ngöne la itre thauzane macatre, nge eje fe a fe amamane koi së la aja i Akötresie memine la aqane tro Nyidrëti a eatrëne ej. Nyine hain la aqane cepunikë la itre götrane ne la Tusi Hmitrötr, haawe, celë hi ewekë ka amamai së, ka hape, tusi lai qaathei Akötresie.

8. Hamëne jë la itre ceitun ka amaman, ka hape, hna jelenyipicin hnei Sias la itre hna qaja ha hnei Tusi Hmitrötr.

⁸ Kolo fe a hane qaja hnene la sias la enyipicine la Tusi Hmitrötr. Eje e hnin la itre ithuemacanyi thaa hna anyipicine pala kö hnene la sias ngöne lo hneijine kola cinyihan ej. Hanawang la ketre ceitun, eje e hnine la tusi Levitiko la itre trenge wathebo thatraqai angetre Isaraela ekö; kola qaja la aqane troa pane ananyin qa ngöne la lapa la itre ka wezipo, memine la aqane troa nyihnyawane la mel, itre ewekë lai hna thatrepengöne hnene la itre nöje ka lapa xötreithe la nöje i Akötresie. Tune mina fe lo itre aqane mekune menune ekö  hnei itre xan göne la ihnadro, laka, tria kö la itre hnei angatr hna qaja, ngo ame Tusi Hmitrötr, tre, hna qaja hnyawa ha la exupexupëtene la ihnadro, ene laka, ka raone ej. (Isaia 40:22) Hna qaja hnyawa hnei Tusi Hmitrötr ka hape, hna “athipe la fene hnengödrai ngöne la pëkö.” (Iobu 26:7) Eje hi laka, ame la Tusi Hmitrötr tre, thaa itusi ne kö la itre ka kuci Sias. Ngo ame pe la eje a ithanatan la itre ewekë hna amamane hnene la Sias, thaa ka tria kö ej. Hapeu, thaa celë kö ketre kepine lai nyine amamai së ka hape, itus ka xulu qaathei Akötresie?

9. (a) Tune kaa la aqane mama la enyipicine me ecatrene la Tusi Hmitrötr, jëne la aqane trongene la mele ne la atr? (b) Nemene la hna amamane koi së göi Tusi Hmitrötr, hnene la aqane nyipici ne la itre ka cinyihane ej?

⁹ Ka nyipici fe, matre easë a mejiune kowe la Tusi Hmitrötr la ej a qaja la aqane trongene la mele ne la atr. Ka meköti la itre hnene eje hna qaja. Thaa kolo hmekuje kö a qaja la itre ëje ne la itre atr, ngo itre xötrapane i angatre mina fe. * Ame la itre ka kuci edromë ekö, tre, e ngaanë hë la noje i angatre ngöne la hna isi, haawe thaa tro kö angatre lai a hane cinyihan; ngo ame pena ha la itre ka cinyihane la Tusi Hmitrötr, tre, angatr a qaja pala hi la nyipici, goi amamane fe angatr la itre ngazo i angatr memine la itre ngazo ne la nöje i angatr. Ame ngöne la tusi Numera, hna wangatrehmekun hnei Mose ketre atre cinyany, la ngazo hnei angeic hna sipu kuca, nge catre pi hë la aqane haji angeic. (Numera 20:​2-​12) Thaa öhne kö së la aqane nyipici cili ngöne la itre hna cinyihan hnene la itre ka edromë, ngo kolo kö a mama hnyawa hnine la Tusi Hmitrötr, pine laka celë hi itus qaathei Akötresie.

10. Pine nemen matre thaa sesëkötre kö së ene Tusi Hmitrötr, laka ka hetre thangane ka loi kowe la mele së?

¹⁰ Pine laka qaathene la ua i Akötresie la Tusi Hmitrötr, haawe, “nyipi ewekë troa inin, me nyine amekötin, me nyine eamo, me nyine ihajine ngöne la thina ka meköt.” (2 Timoteo 3:​16) Nyipici, ame la Tusi Hmitrötr tre, ketre itus ka lolo catr kowe la mele së. Eje a hamën la trotrohnine ka jui nyine tro sa atre la pengöne la atr. Thaa sesëkötre kö së la itre ithuemacanyi hna hamën hnei Tusi Hmitrötr, pine laka, ame la Atrekë ewekën, tre, Iehova Akötresieti hi lo Atre Xupi së! Trotrohnine kö Nyidrë la itre mekuna së memine la itre aliene hni së, ame së atr thatreine hnyawa kö së. Ketre, atre kö Iehova  la ka nyipi ewekë kowe la mele së matre tro sa mele madrin. Nge ketre atre kö Nyidrëti la itre aqane mel nyine tro sa thipetrij.

11, 12. (a) Nemene la itre topik hna ithanatan hnei Iesu ngöne la Cainöje i nyidrë hune la Wetr? (b) Nemene la itre xaa mekune ka loi kowe la mele së hna hamën hnine la Tusi Hmitrötr, nge pine nemen matre ka hetre thangane ka loi pala hi itre ej kowe la hnedrai së enehila?

¹¹ Pane mekune jë la cainöje i Iesu, lo hna hape Cainöj hune la Wetr, hna cinyihan ngöne Mataio mekene 5 koi 7. Hnine la cainöje ka sisitria cili, hnei Iesu hna ithanatan la itre topik ka nyimutre, tune la aqane troa hetrenyi la nyipi madrin, memine la aqane troa iloi,  me aqane troa thith, me inamacanëne la aqane troa goeën la itre mo ne ngönetrei. Ka hetre eloine pala hi la itre trenge ewekë i Iesu enehila, tune ekö lo aqane menen me hetre thangane itre ej ngöne lo kola xötrei cile fë itre ej.

¹² Ame la itre xaa trepene meköti ne la Tusi Hmitrötr, tre, thatraqane la mele ne la hnepe lapa, me itre hna majemine göi huliwa, me aqane troa ce mele memine la itre xan. Ame la itre trepene meköti ne la Tusi Hmitrötr tre thatraqane la itre atr asë, nge ka hetre thangane ka loi pala hi la itre eamo ne ej. Hna nango amexej la inamacan ka eje e hnine la Tusi Hmitrötr, jëne la itre trenge ewekë i Akötresie hna cinyihan hnei Isaia perofeta, kola hape: “Ini Iehova Akötesi ’ö, ate ini ’ö troa hete thangan.”​—Isaia 48:17.

13. Nemene la itre xaa ithuemacanyi hna hamën hnei Iehova göi Babulona, matre troa cinyihan hnei Isaia?

¹³ Nyimutre hë lao ewekë hna perofetan hnei Tusi Hmitrötr, ka eatre hë. Drei la ketre ceitun. Jëne Isaia ketre perofeta ka mele ekö ngöne la hnaaeitrene hadredrene macatre M.P.K., * hnei Iehova hna ahnith, ka hape, troa apaatren la traon e Babulona. (Isaia 13:19; 14:​22, 23) Hna hamëne hë la itre ithuemacanyi nyine troa qaja amë la aqane troa eatre hnyawa la hna perofetane cili. Tro ha aweliwelën la hneopegejë ne Babulona hnene la itre trongene isi ithupëjia, me thapa la traon, a thaa tro ju kö a isi. Thaa eje hmekuje kö lai hna ahnith. Kolo mina fe a perofetan hnei Isaia la ëje ne la joxu ka troa thapa e Babulona, ene Koreso.​—Isaia 44:27–​45:2.

14, 15. Tune kaa la aqane eatr la itre xaa hna perofetan hnei Isaia göi Babulona?

¹⁴ Ame hë la thupene la 200 lao macatre, ngöne la jidri ne 5 Okotropa a hlë koi drai 6, macatre 539 M.P.K., kolo hi a lapa xötreithi Babulona hnene la itre sooc. Drei la ka elemekene la itre sooce cili? Koreso, ketre joxu ne Peresi. Mama ha la aqane troa lepe e Babulona, kolo pe hi a treqen matre eatrëne pi lo lai hna perofetan nyine hain. Ngo tune kaa, tro kö a ngaa Babulona hnene la trongene isi Koreso, a thaa tro ju kö a isi tune lo hna ahnithe hë ekö?

¹⁵ Kola pui ne xeni me feet hnei angetre Babulona ngöne la jidri cili, nge thaa xou i angatre kö ke kola mekun, ka hape, ijije hi troa thupë angatr hnene la itre tra etë ka draië catr me ka isaisa, ka  ekögölithe la traon. Ame ngöne la ijine cili, hnei Koreso hna ajean la timi ne la hneopegejë ka neni xötreithe la traon. Ene pe uti trootro pi hi la tim, matre ijije hë kowe la itre sooce troa tro sasaithe la hneopegejë me tro kowe la itre ngöne uma ne la traon. Ngo tune kaa la aqane sasaithe la trongene isi Koreso la itre hna xupi etë? Thatre pala kö la kepin laka, ame ju hi lai jidri cili, tre, thaa hane ju kö thinge la itre qëhnelö ne la traon!

16. (a) Nemene la hnei Isaia hna ahnithe göne la pune koi Babulona? (b) Tune kaa la aqane eatr la hna perofetan hnei Isaia, ene laka troa paatr hnei Babulona?

¹⁶ Hna thingehnaeane fe göi Babulona ka hape: “Tha tro kö a lapan’ eje epine palua, nge troa pa ate ngön’ eje qane la kete xöte uti hë la kete xöt, nge pëkö ate Arabia troa hunuma e cili, nge tha tro kö la itete thupë mamoe a mekölen’ e cili la ite hnaaxö mamoe.” (Isaia 13:20) Thaa kolo hmekuje kö a ahnithe ka hape, troa kei la traon. Hna amamane fe ka hape, ka tro Babulona a paatre palua. Thaa sihngödri kö koi së troa wange la enyipicine la itre trenge ewekë cili. Ame la götrane ailojë ne Irak, e cili la ketre igötrane hna thaa lapaane kö, kola mekun ka hape e cili hi lo Babulona ekö, 80 lao kilomet qaa Bagdad. Celë hi nyine anyipicine laka hna eatre hnyawa lo hnei Iehova hna qaja jëne Isaia, kola hape: “Tro ni a thelethelën’ eje hnene la ifelete hna mecin.”​—Isaia 14:22, 23. *

17. Nemene la aqane acatren la lapaune së hnene la kola eatr la itre hna thingehnaean hnei Tusi Hmitrötr?

¹⁷ Ame la easë a goeën la aqane perofetan me eatrën hnei Tusi Hmitrötr la itre ewekë, hapeu, thaa kolo kö lai a acatrene catrën la lapaune së? Eje hi lai laka, maine ase hë Iehova ekö eatrën lo itre hnei Nyidrëti hna thingehnaean, thatreine kö tro sa lueluën laka tro Nyidrëti elanyi a eatrën la itre hnei Nyidrëti hna thingehnaean, ene la troa acile hmaca la paradraiso e celë fen. (Numera 23:19) Ketre, hetrenyi së la “mejiune kowe la mele ka tha ase palua kö, lo hna thinge hnaeane ekö qa palua, hnei Akötesie ka tha ’teine thoi.”​—Tito 1:2. *

18. Nemene la trenge ewekë ka hetre emenene hna qaja hnei Paulo aposetolo göne la “wesi ula i Akötesie”?

¹⁸ Tune lo hne së hna ce wange hë ngöne la mekene celë, kola mama hnyawa laka ka ketrepengöne kö la Tusi Hmitrötr. Ngo thaa kolo hmekuje kö a sisitria la Tusi Hmitrötr qa ngöne laka ka cepunikë  la itre mekun hnine la itusin, maine ka nyipici ngöne la götrane la Sias me itre edromë, ka hetre thangane ka loi la inamacanen, nge nyine mejiune kow la itre hna perofetan. Hna cinyihan hnei Paulo aposetolo ketre Keresiano, ka hape: “Mele la wesi ula i Akötesie, me men, me ka idei hune la taua ka lue qenön, kola thine me thupa luëne la hni me [“ua,” MN ] memine la hna itö june la ngönetei me xëten, nge ate amekötine la ite mekune me ite aja ne la hni.”​—Heberu 4:​12.

19, 20. (a) Tune kaa la aqane tro la Tusi Hmitrötr a xatua nyipunie troa isa waipengöi nyipunie? (b) Tune kaa la aqane tro nyipunie a amamane la hni ne ole i nyipunie kowe la ahnahna ka ketrepengöne kö qaathei Akötresie, ene la Tusi Hmitrötr?

¹⁹ Maine tro sa e la “wesi ula” i Akötresie maine maca i Nyidrë hnine la Tusi Hmitrötr, ijije hi troa saze la mele së. Eje a xatua së troa isa waipengö së hnyawa. Maine jë easë a qaja la etrun ka hape hetre ihnimi së koi Akötresie, ngo ame pe tre, tro la aqane kapa së la ini qa ngöne la Wesi Ula i Nyidrë, ene la Tusi Hmitrötr, a amamane hnyawa la enyipicine la itre nyipi mekune së, memine fe la itre sipu aliene la itre hni së.

²⁰ Nyipici laka, ame la Tusi Hmitrötr, tre, qaathei Akötresie, nge nyipi ewekë tro sa e ej, me inin, me hnin ej. Amamane jë la ole i nyipunie kowe la ahnahna cili qaathei Akötresie, hnene la troa catre waipengöne hnyawa la itre aliene ej. Maine tro nyipunieti a kuca tune lai, tro hë nyipunie a trotrohnine hnyawa la aja i Akötresie kowe la itre atr. Tro pë hë së a ce ithanatan ngöne la mekene thupen, la pengöne la aja cili, memine la aqane troa eatrëne ej.