ITRE hna seseun—ewekë lai ka traqa kowe la nöjei pengöne atr, goi traqa fe kowe la itre hlue i Akötresie. Önine la atre cinyihane la salamo: “Nyimu mekun’ e kuhu hning.” (Salamo 94:19) Öni Iesu fe, ame ngöne la hneijine ne la pun, tro la “kuke hnine [maine itre hna hnehengazon] kowe la mele celë” a ketre itupathi ka tru kowe la itre hlue i Iehova. (Luka 21:34) Hapeue fe epun? Epuni kö a hane ngazohnine la pë mani, me itre jol ngöne la hnepe lapa i epun, maine itre mec ka traqa koi epun? Nemene la aqane tro Iehova a xatua epun troa xomihnine la itre jole cili?

Thatreine kö tro sa ketre sipu cile kowe la itre ewekë hne së hna seseun. Öni Paulo aposetolo: “Hna cile xötreithi hun, ngo tha pepetre pe me thatreine enij; cile xou hun, ngo tha hna thingi gojenyin . . . hna akeinyi hun, ngo tha hna apatrene kö.” Nemene la ka xatua së troa cile hut? Ene “la etrune la men,” men qaathei Iehova, Akötresieti Kapucatinasë.—2 Korinito 4:7-9, MN.

Pane mekune jë la aqane kapa së ekö la “etrune la men,” ene la men ka sasaithe la hna hetrenyi hnei atr. Mekune pala kö epun la ketre cainöj ka akökötrene la hni ne ole i epuni koi Iehova pine la ihnimi nyipici Nyidrë? Nge tune kaa fe la lapaune i epun kowe la itre hnei Iehova hna thingehnaean, hna acatrene fe kö ngöne lo epuni a qejepengöne la Paradraiso kowe la itre atr? Ame la easa sine la itre icasikeu, me ce thawa me itre xan la lapaune së, easë hi lai a kapa la trenge catre ka aijijë së troa cile catre qëmekene la itre ewekë hne së hna seseun, nge tingetinge fe la hni së troa nyihlue i Iehova cememine la madrin.

Maine jë, troa pë ihneimeke i epun. Nyipici laka, Iehova a upi së troa amë panëne la Baselaia me eatrëne pala hi la itre huliwa i Nyidrë. (Mataio 6:33; Luka 13:24) Ngo, tune kaa e traqa ju la itre icilekeu, me sine mec, maine itre jol ka traqa kowe la hnepe lapa nge ajolë epuni jë troa kuca la itre huliwa i Nyidrë? Nge tune kaa e xome asë jë maseta la traeme i epun matre pë pëhë kowe la ekalesia? Tru pala ha la traeme hna xome thei epun matre tha ijije hë la traem me trenge catre i epuni troa eatrën la itre huliwa nyine kuca. Eje hi laka, pë hë ihneimeke i epun. Maine jë tro epuni a mekune ka hape, tru pala ha la hnei Iehova hna huliwa epun.

Trotrohnine hnyawa hi Iehova la pengöi epun. Tha tro jë kö Nyidrëti lai a upi epuni troa kuca la hnei epuni hna thatrein. Ketre, atre hnyawa hi Nyidrë ka hape, e tro hmaca epun a hetre egöcatr me hetre mekune ka loi, tha tro kö lai a aca tro traqa ju hi, nyipi ewekë troa hetre hnepe ijin.—Salamo 103:13, 14.

Hanawange la aqane thupë Elia perofeta hnei Iehova. Tru la kucakuca i angeic me xou, ame hnei angeic hna kötre kowe la hnapapa. Hapeu, hnei Iehova kö hna wesitrëne lai perofeta me upi angeic troa bëeke kowe la hnëqa i angeic? Ohea. Alua upe Iehova la angela troa ahlë Elia me ithue ai angeic. Ngo 40 lao drai thupen, Elia pala hi a seseu me xou.  Nemene ju hë la hna kuca koi angeic hnei Iehova? Ame la hnapan, hnei Iehova hna amamane ka hape, atreine Nyidrëti amele angeic. Ame la hnaaluen, hnei Iehova hna akeukawane la hni Elia hnene la “aqane ewekë ka menyike” me aqane ewekë acony. Ase jë hi, Iehova a qaja amamane koi angeic ka hape, tha angeice hmekuje la hlue i Nyidrë, ngo hetre itre thauzane hmaca kö. Tha hmitre ju kö thupene lai, nge Elia hmaca ha a xejë la huliwa ne perofeta. (1 Ite Joxu 19:1-19) Nemene la ini nyine troa xom? Ame la kola lapane la hni Elia hnene la seseu, hnei Iehova hna xomihni angeic ahoeany, me utipi angeic. Tha saze kö Iehova. Tro fe hi Nyidrëti a thupë së tune lai.

Hamëne jë koi Iehova la hnei epuni hna atrein. Thatreine kö troa ceitune la hnei epuni hna atreine kuca enehila memine lo hnei epuni hna majemine kuca ekö. Hanawange la ketre ceitun: Ame la atre iwaja, tre, e nyimu treu ne tha nyenyape hë angeic, thatreine kö tro angeic a canga weje lo aqane nyenyape i angeice ekö. Tro pe angeice lai a pane thele troa eatrëne trongëne la itre nyine kuca ka ijij, matre traqa pi kowe lo aqane catre me atreine nyenyape aqeanyi angeice ekö. Ka ceitune hi la itre Keresiano me itre ka iwaja. Angatre a thele matre tha tro kö a nyenyape menu ngo tro pe a traqa kowe la hna isi kow. (1 Korinito 9:24-27) Thele jë tro hi a eatrëne la nyine kuca enehila! Maine jë, aja i epuni troa sine la ketre icasikeu ne la ekalesia. Sipo ixatua jë koi Iehova matre traqa pi kowe la aja i epun. Ame hë la epuni a egöcatre hmaca ngöne la götrane u, epuni hë lai a “demeju [öhne ju], nge atejë laka ate ihnimi Iehova.” (Salamo 34:8) The thëthëhmine kö laka, ame la ewekë hnei epuni hna kuca göi troa amamane la ihnimi epuni koi Iehova, tre, ngacama ka co ju hë, ngo ame pe, ka sisitria catre koi Nyidrë.—Luka 21:1-4.

Hnei Iehova hna thuecatre i June tune kaa troa bëeke koi Nyidrë? Öni angeic: “Eni pala hi a thithi koi Iehova, me sipo ixatua koi Nyidrë. Ame e cili, hnene la tresing, föe ne la neköng, hna thuemacanyi ni la ketre asabele hna troa hnen ngöne la traoneng. Eni a mekune jë tro hi a hane sine la ca drai. Tru la madrinenge troa cememine hmaca la itre hlue i Iehova! Ixatua ka tru koi ni la asabele cili. Eni hmaca ha enehila a nyihlue i Iehova cememine la madrin. Hetre aliene hmaca ha la meleng. Atre hnyawa ha ni ka hape, nyipi ewekë koi ni la itre trejin, memine la ixatua i angatr. Tru la oleng ke, hna nue ijine koi ni troa bëek.”